"Wala sing Propeta nga Ginakilala sa Iya Kaugalingon nga Banwa"

Liturhiya sang Pulong

(Lunes, Setyembre 2, 2019)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 4:13-18

   Mga kautoran, luyag namon nga mahibaluan ninyo ang kamatuoran nahanungod sa mga nagkalamatay, agod nga indi kamo magkasubo subong sang iban nga wala sing paglaom. Nagatuo kita nga si Jesus napatay kag nabanhaw. Gani nagatuo man kita nga pagadalhon sang Dios upod kay Jesus ang tanan nga nagkalamatay nga nagatuo sa iya.

   Amo ini ang pagtulon-an sang Ginoo nga amon ginasugid sa inyo: kita nga mga buhi pa sa adlaw sang pag-abot sang Ginoo, indi mag-una sa ila nga mga nagkalamatay na. Kay sa singgit sang pagmando, sa tingog sang arkanghel kag sa tunog sang trumpeta sang Dios, ang Ginoo gid magapanaog gikan sa langit. Ang tanan nga nagkalamatay nga nagatuo kay Cristo pagabanhawon sing una. Dayon kita nga mga buhi pa sa sadto nga tion pagatipunon upod sa ila sa mga panganod sa pagsugata sa Ginoo sa kahawaan. Ti, manginkaupod kita sa Ginoo sing dayon. Gani, maglinipayay kamo sa sini nga mga pulong.

Salmo sa Pagsabat:

Mga Salmo 96:1 kag 3, 4-5, 11-12, 13

(S) Ang Ginoo nagkari sa paghukom sang duta.

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Ibantala ang iya himaya sa mga kapungsoran, ang iya gamhanan nga mga binuhatan sa tanan nga katawuhan. (S)

Gamhanan ang Ginoo, kag takos sia sang daku nga pagdayaw, dapat sia kahadlukan labaw sa tanan nga mga dios. Ang mga dios sang iban nga mga pungsod mga diosdios lamang, pero ang Ginoo amo ang naghimo sang kalangitan. (S)

Magkasadya kamo, O langit kag duta! Magadaguhob ka, O dagat, kag ang tanan nga mga tinuga nga yara sa imo; magkasadya kamo, O mga latagon, kag ang tagsa ka butang nga yara sa inyo! Dayon ang mga kahoy sa kagulangan magahinugyaw sa kasadya sa atubangan sang Ginoo. (S)

Kay nagakari sia sa paggahom sang duta. Pagagamhan niya ang tanan nga katawuhan sang kalibutan sa katarungan kag kamatuoran. (S)

Aleluya:

Lucas 4:18

   Ang Espiritu sang Ginoo yari sa akon kag ginpili niya ako sa pagwali sang Maayong Balita sa mga imol.

Ang Pagbasa sang Santos nga Ebanghelyo suno kay:

San Lucas 4:16-30

   Dayon si Jesus nagkadto sa Nazaret, sa diin sia nagdaku, kag sang Adlaw nga Inugpahuway nagkadto sia sa sinagoga suno sa iya kinabatasan. Nagtindog sia sa pagbasa sang mga Kasulatan, kag ginhatag sa iya ang libro ni Isaias nga propeta. Ginbukad niya ini kag nakita niya ang bahin diin nasulat ang masunod:

   “Ang Espiritu sang Ginoo yari sa akon. 

   Kag ginpili niya ako sa pagwali 

   Sang Maayong Balita sa mga imol, 

   Ginpadala niya ako sa pagbantala 

   Sang kahilwayan sa mga bihag,

   Sa pag-ayo sang mga bulag, 

   Sa paghilway sang mga ginapigos,

   Sa pagbantala sang tuig nga ang Ginoo 

   Magaluwas sang iya mga tawo.”

   Gintakop ni Jesus ang libro, gin-uli sa manugbulig, kag naglingkod. Ang tanan sa sinagoga nagtulok sa iya. Nagsugod sia sa paghambal sa ila, “Ini nga dinalan sang kasulatan natuman karon nga adlaw samtang ginapamatian ninyo ang pagbasa sini.”

   Gindayaw sia sang tanan, kag natingala sila sang matahom nga mga pulong nga iya ginhambal. Nagsiling sila, “Indi bala ini anak ni Jose?”

   Nagsiling si Jesus sa ila, “Sa walay duhadoha magasiling kamo sa akon sining hulobaton, ‘Manugbolong, ayuha anay ang imo kaugalingon.’ Kag magasiling man kamo sa akon, ‘Abi, himoa man diri sa imo kaugalingon nga banwa ang tanan nga nabatian namon nga ginhimo nimo sa Capernaum.’” Kag nagsiling pa gid si Jesus, “Nagasiling ako sa inyo: wala sing propeta nga ginakilala sa iya kaugalingon nga banwa! Pamatii ninyo ako: matuod gid nga madamo ang mga babayi nga balo sa Israel sang panahon ni Elias, sang wala gid mag-ulan sa sulod sang tatlo ka tuig kag anom ka bulan kag may daku nga tiggulotom sa bug-os nga duta, pero si Elias wala ginpadala sa bisan sin-o sa ila, kundi sa babayi nga balo sa Sarepta didto sa Sidon. Kag may madamo nga mga aruon sa Israel sang panahon ni Eliseo nga propeta, pero wala gid sing isa sa ila nga gin-ayo, kundi si Naaman lang nga taga-Siria.”

   Ang tanan nga mga tawo sa sinagoga naakig gid sang pagkabati nila sini. Tumindog sila kag ila ginganoy si Jesus pa gwa sa banwa, kag gindala nila sia sa ibabaw sang bakulod sa diin ang ila banwa napasad, agod ila sia itiklod sa pil-as. Pero si Jesus nag-agi sa tunga nila, kag naglakat.

Setyembre 1 | Setyembre 3