Ambahanon ni David sa
Iya Pagdaog
(2 Sam. 22:1-51)
1 O Ginoo, daw ano
ang akon paghigugma sa imo!
Ikaw ang akon mangangapin.
2 Ang Ginoo amo ang akon
manlulowas;
sia amo ang akon malig-on nga pamakod.
Ang Dios ko amo ang akon mangangapin,
kag upod sa iya indi ako maano.
Sia amo ang akon taming,
ginaapinan niya ako
agod indi ako maano.
3 Nagpanawag ako sa Ginoo,
kag
iya ako ginluwas sa akon mga kaaway.
Dayawon ang Ginoo!
4 Ang lubid sang
kamatayon nagsambod sing hugot sa akon,
ang mga balod nga nagalaglag naglapaw sa
akon.
5 Ang lubid sang
kamatayon nagsambod sing hugot sa akon,
kag ang lulobngan naghanda sang iya
tugalbong para sa akon.
6 Nagpanawag ako sa Ginoo
sa akon kalisdanan,
nagpanawag ako sa akon Dios agod apinan.
Sa iya templo nabatian
niya ang akon tingog,
ang akon pagpanawag sa pagpangayo sing bulig nakalambot
sa iya igdulongog.
7 Dayon ang duta naglinog
kag nagkurog,
ang mga sadsaran sang mga bukid nag-uyog kag nagtay-og,
tungod kay ang
Dios nangakig!
8 Nagtub-ok ang aso sa iya
ilong,
naggwa sa iya baba ang nagaharahara nga kalayo kag nagadabdab nga mga
baga.
9 Ginbuksan niya ang
langit, kag nagpanaog sia,
nga may gal-om sa idalom sang iya mga tiil.
10 Nagsakay sia sa
kerubin kag naglupad paidalom,
nagalabad sia nga nagatungtong sa mga pakpak sang
hangin.
11 Gintabunan niya ang
iya kaugalingon sang kadudolman,
ang madamol nga gal-om nga puno sang tubig
nagalibot sa iya.
12 Yelo nga daw mga bato
kag nagadabdab nga mga baga
nagikan sa kilat nga yara sa atubangan niya,
kag
naglapos ini sa madamol nga gal-om.
13 Dayon ang
Ginoo nagdaguob gikan sa langit,
kag nabatian ang tingog sang Labing Mataas.
14 Ginpana niya ang iya
mga baslay, kag nag-alaplaag ang iya mga kaaway,
ginpakirab niya ang kilat, kag
nagtal-as sila.
15 Nakit-an ang kadadalman
sang kadagatan,
kag ang mga sadsaran sang duta nabuksan,
sang pagsabdong mo sang
imo mga kaaway, O Ginoo,
kag sang pagdaguob sang imo tingog sa kaakig.
16 Gikan sa langit
gindawhat ako sang Ginoo,
iya ako ginbatak gikan sa madalom nga tubig.
17 Ginluwas niya ako sa
akon gamhanan nga mga kaaway,
kag sa tanan nga nagadumot sa akon,
kay indi ako
makasarang sa ila.
18 Sang yara ako sa
kalalat-an ila ako ginsalakay,
pero gin-apinan ako sang Ginoo.
19 Ginlikaw niya ako sa
katalagman,
ginluwas niya ako kay iya ako nahamut-an.
20 Ang Ginoo naghatag sa
akon sing balos kay matarong ako,
ginbendisyunan niya ako kay wala ako sing
sala.
21 Ginatuman ko ang kasugoan
sang Ginoo,
wala ako nagabato sa akon Dios.
22 Ginatuman ko ang
tanan niya nga mga kasugoan,
wala ko ginalapas ang iya mga sugo.
23 Nakahibalo sia nga
wala ako sing kasaypanan,
nga ang malaut akon ginalikawan.
24 Gani, ginhatagan niya
ako sing balos kay matarong ako,
kag nakahibalo sia nga wala ako sing sala.
25 Ikaw, Ginoo, matutom
sa mga matutom,
kag maayo gid sa mga himpit.
26 Putli ka sa mga putli,
pero ginadumtan mo ang mga malaut.
27 Ginaluwas mo ang mga
mapainuboson,
pero ginasumpo mo ang mga bugalon.
28 Ang Ginoo nagahatag
sa akon sing kapawa,
ang akon Dios nagasubol sang kadudolman nga yara sa akon.
29 Ginahatagan niya ako
sing kusog sa pagsalakay sang akon mga kaaway,
sang gahom sa pagguba sang ila
mga depensa.
30 Daw ano kahimpit sang
mga binuhatan sini nga Dios,
daw ano ka masaligan ang iya mga pulong!
Kaangay
sia sang taming
sa tanan nga nagadangop sa iya.
31 Ang Ginoo lamang
amo ang Dios,
ang Dios lamang amo ang aton mangangapin.
32 Sia ang Dios nga nagahatag
sa akon sing kusog,
ginaapinan niya ako nga indi maano sa akon dalanon.
33 Ginapalig-on niya ang
akon mga tikang subong sang usa,
Ginabantayan niya ako sa mga kabukiran.
34 Ginahanashanas niya
ako para sa inaway,
agod mabingat ko ang labing mabaskog nga pana.
35 Ikaw, O Ginoo, nagaapin
kag nagaluwas sa akon,
nangingamhanan ako sa imo pag-atipan,
kag ang imo gahom
nagaapin sa akon.
36 Tungod sa imo wala ako
madakpi,
kag wala ako mahulog sa kamot sang kaaway.
37 Ginalagas ko ang akon
mga kaaway kag nadakpan ko sila,
wala ako mag-untat tubtob malutos sila.
38 Ginalampusan ko sila,
kag indi na sila makabangon,
nalutos sila kag nagahamyangon sa akon tiilan.
39 Ginahatagan mo ako sing
kusog sa pag-away,
kag pagdaog sa akon mga kaaway.
40 Ginapatal-as mo ang
akon mga kasumpong,
ginalaglag ko ang mga nagadumot sa akon.
41 Nagapangayo sila sing
bulig, pero wala sing may makabulig sa ila,
nagapanawag sila sa Ginoo, pero
wala niya sila pagsabta.
42 Ginadugmok ko sila kaangay
sang yab-ok nga ginapalid sang hangin,
ginatasak ko sila, kaangay sang lunang sa
mga dalan.
43 Ginaluwas mo ako sa mabinatuon
nga mga tawo,
kag ginapadumala mo ako sang mga kapungsoran,
ang mga tawo nga
wala ko anay makilala akon na karon mga ginsakpan.
44 Kon mabatian nila ako, nagatuman
sila gilayon,
ang mga dumoluong nagaduko sa atubangan ko.
45 Nadulaan sila sing
kaisog,
kag gikan sa ila mga pamakod naggwa sila nga nagakurog.
46 Buhi ang Ginoo! Dayawon
ang akon Mangangapin!
Ang Dios amo ang akon manlulowas! Ibantala ang iya
pagkagamhanan!
47 Ginpadaog niya ako
batok sa akon mga kaaway,
iya ginapasakop ang mga tawo sa idalom nakon,
48 kag iya ako ginaluwas
sa akon mga kasumpong.
Tungod sa imo, O Ginoo, nagadaog ako batok sa akon mga
kaaway,
kag ginaapinan mo ako sa mabangis nga mga tawo.
49 Gani, O Ginoo, sa
tunga sang mga kapungsoran magadayaw ako sa imo,
magaamba ako sing mga pagdayaw
sa imo.
50 Dalagku nga mga pagdaog ang
ginahatag sang Dios sa iya hari,
ginapakita niya ang iya mapinadayunon nga gugma
sa iya pinili,
sa kay David kag sa iya mga kaliwat sa walay katubtoban.
vTITULO SA HEBREO: Amo ini ang mga pulong nga gin-amba ni David nga alagad sang GINOO, para sa GINOO sa adlaw nga ginluwas sia sang GINOO sa kay Saul kag sa tanan niya nga mga kaaway.
