Naghatag si Jesus sa Iya nga Gintuton-an sing Gahom sa Pag-ayo kag Paghilway

Liturhiya sang Pulong

(Miyerkules, Hulyo 10, 2019)

Ang Pagbasa gikan sa Libro sang:

Genesis 41:55-57; 42:5-7, 17-24

   Sang magbatyag ang bug-os nga pungsod sang gutom, ang mga tawo nagpangayo sing kalan-on sa hari. Ang hari nagsiling sa tanan nga mga Egiptohanon, “Magkadto kamo kay Jose kag himoa ninyo ang ginasiling niya.” Sang naglapnag na gid ang gutom sa bug-os nga duta, si Jose nagbukas sang tanan nga mga tambubo, kag nagpadalawat sia sing trigo sa mga Egiptohanon, kay ang gutom tama na gid sa bug-os nga duta sang Egipto. Ang mga tawo sa bug-os nga kalibutan nagkadto sa Egipto sa pagdalawat sing trigo kay Jose, kay ang gutom tama gid sa bug-os nga kalibutan.

   Upod sa iban nga mga tawo, ang mga anak nga lalaki ni Israel nag-abot sa Egipto sa pagdalawat sing trigo, kay may gutom sa duta sang Canaan. Si Jose, subong nga gobernador sang Egipto, nagpadalawat sing trigo sa tanan nga mga tawo sang kalibutan. Gani, ang mga utod ni Jose nag-abot, kag nagsaludo sa iya nga ang ila guya nagaduot sa duta. Sang pagkakita ni Jose sa iya mga utod, nakilala niya sila, pero wala sia magpakita nga kilala niya sila. Ginpamangkot niya sila sing matigdas, “Diin kamo maghalin?” 

   Nagsabat sila, “Sa Canaan. Nagkari kami sa pagbakal sing kalan-on.”

   Sa sina nga mga pulong ginbilanggo niya sila sing tatlo ka adlaw.

   Sa ikatlo nga adlaw si Jose nagsiling sa ila, “Mahinadlukon ako sa Dios, gani luwason ko ang inyo mga kabuhi kon himuon ninyo ini: Kon wala kamo nagabutig nga mga tawo, ang isa sa inyo magapabilin sa bilangguan sa diin kamo ginbilanggo, kag ang iban sa inyo sarang makalakat sa pagdala sang inyo gindalawat nga trigo didto sa inyo ginagutom nga mga panimalay. Dayon dapat ninyo dalhon sa akon ang inyo kamanghuran nga utod, sa pagpamatuod nga wala kamo nagabutig, kag indi ko kamo pagpatyon.” 

   Nagsugot sila sa paghimo sini. Nagsiling sila sa isa kag isa, “Sa pagkamatuod, nakasala kita sa ginhimo naton sa aton utod. Nakita naton ang iya daku nga kalisdanan sang nagpakiluoy sia sa aton, pero indi kita magpamati. Amo ina nga kita na man karon ang ginalisdan.”

   Si Ruben nagsiling, “Ginsingganan ko kamo nga indi ninyo pag-anhon ang bata, pero indi kamo magpamati. Kag karon nagabayad kita sang iya kamatayon.” Si Jose nakahangop sang ila ginpanghambal, pero wala sila makahibalo sini, kay ang ila pagpakighambal sa iya paagi sa manugbadbad. Si Jose naghalin sa ila kag naghibi. Sang sarang na man sia makahambal sa ila, nagbalik sia, kag ginpili si Simeon kag ginpagapos sia sa atubangan nila.

Salmo sa Pagsabat:

Mga Salmo 33:2-3, 10-11, 18-19

(S) Kabay nga ang imo mapinadayunon nga gugma magpabilin sa amon, O Ginoo, kay ang amon paglaum yara sa inyo.

Magpasalamat kamo sa Ginoo paagi sa pagtukar sing arpa, magkanta kamo sa iya nga ginaupdan sang mga instrumento nga may kuwerdas. Kantahi ninyo sia sing bag-o nga ambahanon, tukara sing maayo ang arpa, kag magkanta sing tudo! (S)

Ginaguba sang Ginoo ang mga plano sang mga kapungsoran, ginatapna niya ang mga tinutoyo sang mga katawuhan. Pero ang iya mga plano nagapadayon sa walay katapusan, ang iya mga tinutoyo nagapabilin nga wala sing katapusan. (S)

Ang Ginoo nagabantay sa mga nagakahadlok sa iya, sa mga nagasalig sa iya mapinadayunon nga gugma. Ginaluwas niya sila sa kamatayon; ginabuhi niya sila sa tion sang tiggulotom. (S)

Aleluya:

Marcos 1:15

Ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Mateo 10:1-7

   Gintawag ni Jesus sing tingob ang dose ka mga gintuton-an kag ginhatagan sila sing gahom sa pagtabog sang malaut nga mga espiritu, kag sa pag-ayo sang tanan nga masakit kag balatian. Amo ini ang mga ngalan sang dose ka mga apostoles: ang nahauna, si Simon nga ginatawag Pedro kag si Andres nga iya utod; si Santiago kag si Juan nga iya utod, mga anak ni Zebedeo; si Felipe kag si Bartolome; si Tomas kag si Mateo nga manugsokot sang buhis; si Santiago nga anak ni Alfeo kag si Tadeo; si Simon nga patriota kag si Judas Iscariote, nga nagluib kay Jesus.

   Ginpadala ni Jesus ang dose ka mga apostoles kag ginsingganan sila: “Indi kamo magkadto sa duta sang mga Gentil ukon sa mga banwa sang Samaria, kundi kadtoi ninyo ang mga tawo sang Israel nga subong sang mga karnero nga nagtalalang. Lakat kamo kag ibantala nga ang Ginharian sang langit malapit na!

Hulyo 9 | Hulyo 11