"Magakasadya sila kag Magasinggit sa Kalipay"

Liturhiya sang Pulong

(Domingo, Disyembre 15, 2019)

Ikatatlo nga Domingo sang Adbyento

1. Ang Pagbasa gikan sa Libro ni:

Isaias nga Propeta 35:1-6, 10

   Ang desierto magakasadya, kag ang mga bulak magapamukadkad sa kigas nga duta. Ang desierto magaamba kag magasinggit sa kalipay; manginmatahom ini subong sang bukid sang Libano kag manginmapatubason subong sang mga kaumhan sang Carmelo kag Saron. Ang tagsatagsa makakita sang himaya sang Dios, sang iya pagkahalangdon kag sang iya gahom. 

   Pabaskuga ang mga kamot nga nagapalangluya, kag ang mga tuhod nga nagakurog sa kaluyahon. Singgana ang tagsatagsa nga nagapakaluya, “Magpakabakod kamo kag indi magkahadlok! Ang Dios magaabot sa pagluwas sa inyo, magakari sia sa pagtimalos sa inyo mga kaaway."

   Ang bulag makakita, ang bungol makabati ang lupog magatumbo kag magasaot, kag ang apa magasinggit sa kalipay. Ang mga tuboran sang tubig magailig sa desierto.
   Magaabot sila sa Jerusalem nga nagakasadya, nagakanta kag nagasinggit sa kalipay. Nagakasadya sila sa walay katapusan kay nahilway na sila sa kasubo kag kalisod.

Salmo sa Pagsabat: 

Mga Salmo 146:6-7, 8-9, 9-10

(S) Magkari ka, O Ginoo, sa pagluwas sa amon.

Ginatuman gid niya sa gihapon ang iya mga saad; nagahukom sia pabor sa mga ginapigos, kag nagahatag sia sing kalan-on sa mga ginagutom. (S)
Ang Ginoo nagahilway sang mga binilanggo kag nagaayo sang mga bulag. Ginabayaw niya ang mga ginapaubos, ginahigugma niya ang iya matarong nga mga tawo. Ginaapinan niya ang mga dumoluong nga nagapuyo sa duta. (S)

Ginabuligan niya ang mga balo nga babayi kag mga ilo, pero ginaguba niya ang mga plano sang mga malaut. Ang Ginoo magahari sa walay katubtoban! Ang imo Dios, O Sion, magagahom sa tanan nga panahon! (S)

2. Ang Pagbasa gikan sa Sulat ni:

Santiago nga Apostol 5:7-10

   Gani, mga utod ko, magpailob kamo tubtob sa pag-abot sang Ginoo. Tan-awa ninyo kon ano ang pagpailob sang mangungoma samtang ginahulat niya ang iya hamili nga patubas. Nagahulat sia sing mapainulobon sang nahauna kag ulihi nga ulan. Kamo man magpailob. Indi pagdulaa ang inyo paglaom, kay ang adlaw sang pag-abot sang Ginoo malapit na. 

   Mga utod ko, indi kamo magbinasulay, agod nga ang Dios indi maghukom sa inyo. Ang Hukom malapit na, kag manugsulod na! Mga utod ko, dumdoma ninyo ang mga propeta nga naghambal sa ngalan sang Ginoo. Himoa ninyo sila nga mga huwaran sang mapainuboson nga pagbatas tungod sang pag-antos. 

Aleluya:

Isaias 61:1

   Ang Ginoo nagpuno sa akon sang iya gahom. Ginpili niya ako sa pagdala sang maayong balita sa mga imol.

Ang Pagbasa sang Santos nga Ebanghelyo suno kay:

San Mateo 11:2-11

   Sang pagkabati ni Juan Bautista didto sa bilangguan, nahanungod sang mga ginahimo ni Cristo, ginpadala niya ang iya mga gintuton-an sa pagpamangkot kay Jesus nga nagasiling, “Sugiri kami, ikaw bala ang ginsiling ni Juan nga magakari, ukon magapaabot pa kami sing lain?” 

   Si Jesus nagsabat, “Balik kamo kag sugiri ninyo si Juan sang inyo nabatian kag nakita: ang mga bulag makakita, ang mga piang makalakat, ang mga aruon ginaayo, ang mga bungol makabati, ang mga patay ginabanhaw, kag ang Maayong Balita ginawali sa mga imol. Bulahan ang wala nagapangduhadoha sa akon!”

   Sang pagbalik na sang mga gintuton-an ni Juan, si Jesus nagsiling sa mga tawo nahanungod kay Juan, “Ano ang ginapaabot ninyo nga makita sang pagkadto ninyo kay Juan didto sa desierto? Kugon bala nga ginahapayhapay sang hangin? Ano bala ang ginkadto ninyo nga tan-awon? Isa bala ka tawo nga nagabayu sing malahalon? Ina nga sahi sang mga tawo nagapuyo sa mga palasyo! Sugiri ninyo ako, ano gid bala ang inyo ginkadto nga tan-awon? Isa bala ka propeta? Huo, nagasiling ako sa inyo, kag labaw pa sa isa ka propeta ang inyo nakita. Kay si Juan amo ang ginasiling sini nga kasulatan: ‘Yari ang akon manugbalita, siling sang Dios; ipadala ko sia nga magauna sa imo kag magaaman sang imo alagyan.’
   Dumdoma ninyo ini! Sa mga nagkalatawo wala na sing may magdaku pa sa kay Juan Bautista. Pero ang labing diutay sa Ginharian sang langit daku pa sa iya. 

Disyembre 14 | Disyembre 16