"Wala pa gid kita Makakita sing subong sini"

Liturhiya sang Pulong

(Biyernes, Enero 17, 2020)

San Antonio, Abad

Ang Pagbasa gikan sa Nahauna nga Libro ni:

Samuel nga Propeta 8:4-7, 10-22

   Karon ang tanan nga mga pangulo sang Israel nagtipon sing tingob, kag nagkadto kay Samuel sa Rama kag nagsiling sa iya,"Tan-awa, nagatigulang na ikaw kag ang imo mga anak wala makasunod sang imo kaayo. Gani, pili ka sang isa ka hari sa paggahom sa amon subong sang iban nga mga pungsod." Naglain ang buot ni Samuel sa ila pagpangayo sang isa ka hari, gani nagpangamuyo sia sa Ginoo, kag ang Ginoo nagsiling, "Pamatii ang tanan nga ginasiling sang mga tawo sa imo. Indiikaw ang ila ginsikway, kundi ako ang ila ginsikway subong hari.

   Ginsugid ni Samuel sa mga tawo nga nagpangayo sa iya sing hari ang tanan nga ginsiling sa iya sang GINOO. Si Samuel nagsiling,"Amo ini ang himuon sang inyo hari sa inyo. Himuon niya ang inyo mga anak nga lalaki nga mga hangaway, ang iban sa ila magaalagad subong manugkaruwahi, ang iban sa ila mga manugkabayo, kag ang iban sa ila magauna sa mga karuwahi sa pagsalakay. Himuon niya ang iban sa ila nga mga opisyales nga magadumala sang 1,000 ka mga hangaway, kag ang iban 50 ka mga hangaway. Ang inyo mga anak nga lalaki magaarado sang iya mga uma, magaani sang iya mga patubas, kag magahimo sang iya mga armas kag mga gamit para sa iya mga karuwahi. Ang inyo mga anak nga babayi magahimo sing mga agwa, kag mga manginmanugloto sang pagkaon kag tinapay. Kuhaon niya ang pinakamaayo ninyo nga mga uma, mga katamnan sang ubas, kag mga katamnan sang olibo kag ihatag niya ini sa iya mga opisyales. Kuhaon niya ang ikapulo sang inyo mga patubas kag sang inyo mga ubas para sa iya mga opisyales sa korte kag sa iban pa nga mga opisyales. Kuhaon niya ang inyo mga alagad, ang inyo mga pinakamaayo nga baka kag mga asno sa pag-obra sa iya. Kuhaon niya ang ikapulo sang inyo mga panong kag kamo mangin-ulipon niya. Kon ina nga tion mag-abot, magareklamo gid kamo tungod sang inyo hari nga inyo ginpili, pero ang GINOO indi magpamati sa inyo mga reklamo."

   Ang mga tawo wala magpamati kay Samuel, sa baylo nagsabat sila,"A, indi mahimo! Luyag namon nga may hari kami, agod manginkaangay kami sa iban nga mga pungsod, nga may kaugalingon nga hari sa paggahom sa amon, kag sa pagpangulo sa amon sa gira kag sa mga inaway." Ginpamatian ni Samuel ang tanan nga ila ginsiling. Dayon nagkadto sia sa Ginoo kag ginsugid ini. Ang Ginoo nagsabat,"Himoa ang ila luyag kag hatagi sila sing hari."Sa tapos sini ginsingganan ni Samuel ang mga tawo sang Israel sa pagpauli.

Salmo sa Pagsabat:

Mga Salmo 89:16-17, 18-19

(S) Maga-amba ako, O Ginoo, sang imo walay katapusan nga kaluoy.

Tungod sa imo nagakalipay sila sa bug-os nga adlaw, kag nagadayaw sa imo tungod sang imo kaayo. Ginahatagan mo kami sing dalagku nga mga pagdaog; sa imo kaayo ginapadaog mo kami. (S)

Kay ikaw, O Ginoo, ang nagpili sang amon mangangapin; ikaw, ang Balaan nga Dios sang Israel, amo ang naghatag sa amon sang amon hari. Sa isa ka palanan-awon sang una nagsiling ikaw sa imo matutom nga mga alagad, “Ginkoronahan ko ang isa ka bantog nga soldado; ginhatag ko ang trono sa isa nga pinili sa mga tawo. (S)

Aleluya:

Lucas 7:16

   Ang isa ka daku nga propeta nagpakita sa tunga naton, kag ang Dios nagkari sa pagluwas sang Iya mga tawo.

Ang Pagbasa sang Santos nga Ebanghelyo suno kay:

San Marcos 2:1-12

   Sang makaligad ang pila ka adlaw, nagbalik si Jesus sa Capernaum, kag naglapnag ang balita nga yara sia sa iya balay. Nagdulogok ang madamo nga mga tawo sa bagay nga wala na sing lugar bisan pa sa atubangan sang puwertahan. Si Jesus nagawali gid sa ila sang Maayong Balita sang mag-abot ang pila ka mga tawo nga nagadala sang isa ka paralitiko—ang apat sini sa ila nagayayong sang paralitiko. Pero indi sila makapalapit kay Jesus tungod kay nagaginutok ang mga tawo. Gani nagguhab sila sing lulotsan sa atop sang balay, didto gid nayon sa ginatindugan ni Jesus. Sang malutsan na ang ila ginuhaban gintunton nila ang paralitiko nga nagahamyang sa iya higdaan. Nakita ni Jesus kon daw ano gid ang ila pagtuo, kag nagsiling sia sa paralitiko, “Anak ko, napatawad na ang imo mga sala.”
   May pila ka mga manunodlo sang Kasugoan nga nagalingkod didto kag nagmuno sa ila kaugalingon, “Ngaa makahambal sia sing subong sina batok sa Dios? Wala sing tawo nga makapatawad sang mga sala, kundi ang Dios lamang.”
   Sa gilayon nahibaluan ni Jesus ang ila mga hunahona, gani nagsiling sia sa ila, “Ngaa nga nagapainuino kamo sing subong sina sa inyo kaugalingon? Diin bala ang mas mahapos, ang magsiling sa paralitiko, ‘Napatawad na ang imo mga sala,’ ukon ang magsiling, ‘Bangon ka, dalha ang imo higdaan kag maglakat’?
   Karon pamatud-an ko sa inyo, nga ang Anak sang Tawo may gahom sa duta sa pagpatawad sang mga sala.” Gani nagsiling sia sa paralitiko, “Nagasiling ako sa imo, bangon ka, dalha ang imo higdaan kag magpauli!”
   Samtang nagatan-aw sila, ang paralitiko nagbangon gilayon, nagdala sang iya higdaan kag dalidali nga naglakat. Naurongan gid sila tanan kag nagdayaw sila sa Dios, nga nagasiling, “Wala pa gid kita makakita sing subong sini!”

Enero 16 | Enero 18