◇◇◇◇◇
Si Gideon
1 Ang mga tawo sang Israel nagpakasala batok sa Ginoo, gani ginpagamhan sila sang Ginoo sa mga tawo sang Midian sa sulod sang pito ka tuig.2 Ang mga Midianhon makusog pa sang sa mga Israelinhon, kag ang mga tawo sang Israel nagpalagyo sa mga kuweba kag sa iban nga mga duog sa kabukiran agod indi sila maano.
3 Kon magtanom ang mga Israelinhon, ginakadtuan sila sang mga Midianhon upod sa mga Amaleknon kag sa mga tribo sang desierto sa pag-away sa ila.
4 Nagahimo sila sang ila kampamento sa amo nga duta kag nagalaglag sang mga tanom sang mga Israelinhon tubtob sa bagatnan sa mga duog sa palibot sang Gasa. Wala gid sila sing ginabilin para sa mga Israelinhon nga pangabuhian, bisan isa lang ka karnero, baka, ukon asno.
5 Nagakari sila nga dala ang ila mga kahayupan kag mga tolda nga daw subong kadamo sang mga apan. Sila kag ang ila mga kamelyo tama kadamo nga indi maisip. Nagkari sila sa paglaglag sang duta,
6 kag ang mga Israelinhon indi makasarang sa ila. Dayon ang mga tawo sang Israel nagpanawag sa Ginoo sa pagpangayo sing bulig.
7 Sang pagpanawag sang mga Israelinhon sa Ginoo tungod sang mga Midianhon,
8 ang GINOO nagpadala sa ila sing isa ka propeta nga nagdala sa ila sini nga mensahi halin sa Ginoo, ang Dios sang Israel: "Ginpagwa ko kamo halin sa Egipto sa diin gin-ulipon kamo.
9 Ginluwas ko kamo sa mga Egiptohanon kag sa tanan nga mga nagapakig-away batok sa inyo. Gintabog ko sila samtang nagaabanse kamo, kag ginhatag ko sa inyo ang ila mga duta.
10 Nagsiling ako sa inyo nga ako amo ang GINOO nga inyo Dios, kag nga indi kamo magsimba sa mga dios sang mga Amornon, nga ang ila duta amo ang inyo ginapuy-an karon. Pero wala kamo magpamati sa akon."
11 Karon nag-abot ang anghel sang Ginoo kag naglingkod sa idalom sang kahoy nga terebinto malapit sa baryo sang Opra, nga iya ni Joas, sa panimalay ni Abieser. Ang iya anak nga si Gideon nagalinas sang trigo sing tago lang sa pulogaan sang ubas, agod matago ini sa mga Midianhon.
12 Dayon ang anghel sang Ginoo nagpakita sa iya kag nagsiling. "Maisog kag makusog nga tawo, ang Ginoo kaupod mo!"
13 Nagsiling si Gideon sa iya, “Abi mamangkot ako sa imo, sir, ngaa bala nahanabo ini tanan sa amon kon ang Ginoo kaupod namon? Ano ang natabo sa tanan nga makatilingala nga mga butang nga ginsugid sang amon mga ginikanan nga mga ginhimo anay sang Ginoo? Pareho abi sang iya pagpagwa sa ila sa Egipto? Ginpatumbayaan kami sang GINOO? Ginpabay-an niya kami sa mga Midianhon."
14 Dayon ginmanduan sia sang Ginoo, "Lakat sa bug-os mo nga kusog, kag luwasa ang Israel sa mga Midianhon. Ako gid ang nagapadala sa imo.”
15 Kag nagsabat si Gideon, "Pero GINOO, ano ang pagluwas ko sang Israel? Ang akon panimalay amo ang labing mapigaw sa tribo ni Manases, kag ako amo ang labing kubos sa amon panimalay.”
16 Kag ang Ginoo nagsiling sa iya, “Mahimo mo ini kay ako magabulig sa imo. Pagalaglagon mo ang mga Midianhon subong nga sila daw isa lang ka tawo.”
17 Nagsabat si Gideon, “Kon nahamuot ka sa akon, pamatud-i sa akon nga ikaw gid ang nagahambal.
18 Kon mahimo indi ka anay maghalin tubtob magbalik ako kag makadulot sa imo sing halad nga kalan-on.” Nagsiling sia, "Magapabilin ako tubtob sa imo pagbalik.”
19 Gani nagsulod si Gideon kag nagluto sing tinday nga kanding, kag naghimo sia sing tinapay nga arina nga isa ka sukob nga wala sing lebadora. Ginbutang niya ang karne sa basket kag ang sabaw sa kaldero, kag gindala ini sa anghel sang Ginoo sa idalom sang kahoy nga terebinto, kag ginhatag sa iya.
20 Dayon ginsingganan sia sang anghel, "Ibutang ang karne kag tinapay sa sini nga bato, kag ibubo ang sabaw sa ibabaw nila." Kag gintuman niya ini.
21 Gindab-ot ini sang anghel sang Ginoo, gintandog ang karne kag ang tinapay sang punta sang sungkod nga iya ginauyatan. Naggwa ang kalayo sa bato kag ginlamon ang karne kag tinapay. Dayon ang anghel sang Ginoo nadula.
22 Karon nahibal-an gid ni Gideon nga ang iya nakita amo ang anghel sang Ginoo, kag sa may kahadlok nagsiling sia, "O Ginoong Dios, nakita ko ang imo anghel, kag nag-atubangay gid kami!"
23 Pero ang Ginoo nagsiling sa iya, "Indi ka magkahadlok. Wala kaso ina. Indi ka sina mapatay."
24 Nagpatindog si Gideon sing altar didto para sa Ginoo, kag gintawag ini, "Ang Ginoo amo ang Paghidait." Yara pa ini tubtob karon didto sa Opra, nga iya sang mga kabaranggayan ni Abieser.
25 Sadto nga gab-i nagsiling ang GINOO sa iya, "Kuhaa ang toro nga baka sang imo amay, kag ang isa pa gid ka toro nga baka nga pito ka tuig ang kagulangon,o kag gub-a ang altar nga ginpatindog sang imo amay para kay Baal, kag tapsa ang simbulo sang diosa nga si Ashera.
26 Patindog ka sing nagakabagay nga altar para sa Ginoo nga imo Dios sa ibabaw sini nga pamakod. Dayon kuhaa ang ikaduha nga toro nga bakap kag sunoga ini subong nga halad. Gamita nga gatong sa halad ang simbulo ni Ashera nga imo gintapas."
27 Gani nagkuha si Gideon sing napulo sang iya mga ulipon kag gintuman niya ang ginsiling sang Ginoo sa iya. Nahadlok sia sa paghimo sini sa adlaw tungod sang iya panimalay kag sa mga tawo sa banwa, gani ginhimo niya ini sa gab-i.
28 Aga pa sang pagmata sang mga tawo sang madason nga adlaw, nasapwan nila nga ginguba ang altar ni Baal kag ang simbulo ni Ashera gintapas, kag ginpatindog didto ang ikaduha nga baka nga ginsunog sa altar.
29 Nagpinamangkutanay sila kon sin-o ang naghimo sini. Gin-usisa nila kag ila nahibal-an nga si Gideon nga anak ni Joas amo ang naghimo sini.
30 Dayon ginsingganan nila si Joas, “Pagwaa diri ang imo anak, agod patyon namon sia. Ginguba niya ang altar ni Baal, kag gintapas niya ang simbulo ni Ashera sa luyo sini."
31 Pero nagsiling si Joas sa tanan nga nagsukna sa iya, “Nagapakigbais bala kamo tungod kay Baal! Ginapangapinan bala ninyo sia? Ang nagapakigbais tungod sa iya pagapatyon sa wala pa mag-aga. Kon isa ka dios si Baal, paapina sia sa iya kaugalingon, kay ang iya altar amo ang ginguba."
32 Sugod sadto si Gideon ginkilala nga si Jerubaal,q kay si Joas nagsiling, "Paapina si Baal sa iya kaugalingon, kay ang iya altar amo ang ginguba.”
33 Karon nagtipon sing tingob ang mga Midianhon, mga Amaleknon, kag ang mga tribo sa desierto. Nagtabok sila sa Suba sang Jordan, kag nagpatindog sang ila mga tolda sa kapatagan sang Jesreel.
34 Ang espiritu sang Ginoo naggahom kay Gideon kag nagpatunog sia sing budyong sa pagpanawag sang mga kalalakin-an sang kabaranggayan ni Abieser sa pagsunod sa iya.
35 Nagpadala sia sing mga mensahero sa bug-os nga kadutaan sang tribo ni Manases sa pagtawag sa pagsunod sa iya. Nagpadala sia sing mga mensahero sa mga tribo nanday Aser, Sabulon, kag Neftali, kag nag-abot man sila sa pag-upod sa iya.
36 Karon nagsiling si Gideon sa Dios, “Nagsiling ka nga luyag mo gamiton ako sa pagluwas sang Israel.
37 Yari karon, magabutang ako sing delana sa duta nga ginalinasan namon sang trigo. Pagkaaga kon may tun-og sa delana lamang kag ang duta mamala, karon mahibal-an ko nga luyag mo gid nga luwason ko ang Israel."
38 Kag amo gid ini ang natabo. Sang pagmata ni Gideon aga pa gid sa madason nga adlaw, ginpuga niya ang delana, kag may tun-og sia nga nakuha nga nagpuno sang isa ka yahong.
39 Karon nagsiling si Gideon sa Dios, “Indi ka lang magkaakig sa akon, amo na lang ini ang akon pangayuon. Kon mahimo, luyag ko pa gid ang isa ka pagpamatuod paagi sa delana. Ang delana indi pagbas-a kag ang tun-og sa duta lamang.”
40 Sadto nga gab-i, ginhimo ini sang Dios. Ang delana lamang ang mamala, pero ang duta natabunan sing tun-og.
oang toro . . . kagulangon; ukon toro nga baka sang imo amay, nga pito ka tuig ang iya edad.
pikaduha nga toro nga baka; ukon ang toro nga baka.
qJERUBAAL: Ini nga ngalan sa Hebreo nagakahulogan "Paapina si Baal sang iya kaugalingon.”
No comments:
Post a Comment