Showing posts with label Judges. Show all posts
Showing posts with label Judges. Show all posts

Wednesday, May 1, 2019

Ang Libro sang Mga Hukom

Panguna
   Ang Libro sang mga Hukom tinipon nga mga hitabo sang maragtas sang Israel halin sang pag-agaw sang Canaan tubtob sang pagpatindog sang ginharian. Ini nga mga hitabo nahanungod sa hinimoan sang mga pungsodnon nga baganihan nga ginatawag nga mga "hukom" nga ang madamo sa ila mga pangulo nga mga soldado kag manuglowas kag indi pareho sang mga hukom karon. Ang labing bantog sang mga hukom amo si Samson. Ang iya binuhatan makita sa kapitulo 13—16.
   Ang daku nga leksyon sa sini nga libro amo nga ang pagpadayon sang Israel nasandig sa pag-upod sa Dios, samtang ang pagtalikod sa Dios nagapadulong sa kalaglagan. Pero labaw pa sini bisan kon ang pungsod nagtalikod sa Dios, kag ang kalaglagan nag-abot, ang Dios handa sa gihapon sa pagluwas sang iya mga tawo kon naghinulsol sila kag nagbalik sa iya liwat.

Balayan sang Kaundan
   Ang mga hitabo tubtob sa kamatayon ni Josue 1:1—2:10
   Ang mga hukom sang Israel 2:11—16:31
   Nanarisari nga mga hitabo 17:1—21:25

☆☆☆ MGA HUKOM ☆☆☆
1 2 3 4 5 6 7 8 9 10 
11 12 13 14 15 16 17 18 19 20 
21
☆☆☆ MGA HUKOM ☆☆☆


JOSUE 《 | 》 RUT

Saturday, September 29, 2018

MGA HUKOM - Kapitulo 21

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Mga Asawa para sa Tribo ni Benjamin
1 Ang mga tawo sang Israel nagpanumpa sa Ginoo didto sa Mispa nga nagasiling, “Wala gid sing isa sa amon nga magatugot sang isa ka Benjaminhon sa pagpangasawa sang amon anak nga babayi.”
2 Nagkadto sa Betel ang mga tawo, kag naglingkod didto sa atubangan sang Dios tubtob sa gab-i. Naghibi sila sing tudo gid kag nagpanalambiton.
3 Nagsiling sila, "O Ginoong Dios sang Israel, ngaa bala natabo ini? Ngaa nga nakulangan sing isa ka tribo ang Israel?"
4 Nagbangon ang mga tawo sing aga pa gid sang madason nga adlaw, kag nagpatindog sing altar didto. Naghalad sila sing mga halad sang paghiambit kag sang mga halad nga sinunog.
5 Nagpamangkot sila, "Sa tanan nga mga tribo sang Israel, sin-o bala ang wala magkari sa sining pagkatipon sa atubangan sang Ginoo?" Nagpanumpa sila, nga ang bisan sin-o nga wala magkari sa Ginoo sa Mispa pagapatyon.
6 Pero ang mga Israelinhon nagpangasubo tungod sang ila mga kautoran nga mga Benjaminhon. Nagsiling sila, "Karon nga adlaw nadulaan ang Israel sang isa sang iya mga tribo.
7 Ano bala ang aton himuon sa paghatag sing mga asawa para sadtong mga nabilin nga buhi? Nakapanumpa na kita sa GINOO, nga indi kita maghatag sa ila bisan isa sang aton mga anak nga babayi."
8 Dayon nagpamangkot sila, “Sa tanan nga mga tribo sang Israel, sin-o bala ang wala magkari sa Ginoo sa Mispa?" Nasapwan nila nga wala sing isa halin sa Jabes, sa Galaad, nga nagkari sa kampamento sa pagpakigbahin sa pagkatipon.
9 Sang gintipon sing tingob ang tanan nga mga tawo, wala sing isa halin sa Jabes nga yadto didto.
10 Gani ang katilingban nagpadala sing 12,000 sang ila pinakamaisog nga mga tawo nga may mga sugo sa ila nga nagasiling, “Lakat kamo kag pamatyon ang tagsatagsa sa Jabes, lakip ang mga kababayin-an kag mga kabataan.
11 Amo ini ang himuon ninyo: pamatyon ninyo ang tanan nga mga lalaki, kag ang tagsa ka babayi nga indi na ulay.”
12 Nakakita sila sing 400 ka mga pamatan-on nga mga babayi nga ulay sa mga tawo sang Jabes, gani gindala nila sila sa kampamento sa Silo, nga yara sa duta sang Canaan.
13 Dayon ang bug-os nga katilingban nagpadala sing mensahi sa mga Benjaminhon nga yadto didto sa Bato sang Rimon, kag nagpangabay sa ila sa pag-untat sang inaway.
14 Nagbalik ang mga Benjaminhon, kag ang mga Israelinhon naghatag sa ila, sang mga pamatan-on nga mga babayi halin sa Jabes, nga wala nila ginpamatay. Pero kulang ining mga kababayin-an para sa ila.
15 Nagkasubo ang mga tawo tungod sang mga Benjaminhon, kay ang Ginoo nagguba sang paghiliusa sang mga tribo sang Israel.
16 Gani ang mga pangulo sang katilingban nagsiling, "Wala na sing mga kababayin-an sa tribo ni Benjamin. Ano bala ang aton himuon sa paghatag sing mga asawa para sa mga kalalakin-an nga nabilin?
17 Indi dapat madulaan ang Israel sang isa sang iya 12 ka mga tribo. Kinahanglan magpangita kita sing paagi para indi mapapas ang tribo ni Benjamin,
18 pero indi kita makapahanugot nga ipaasawa sa ila ang aton mga anak nga babayi." Ginsiling nila ini, kay ang mga Israelinhon nagpakamalaut sang bisan sin-o nga magpahanugot sa isa ka Benjaminhon sa pagpangasawa sang isa sang iya mga anak nga babayi.
19 Gani nagsiling sila, "Madali na lang ang tuigan nga piesta sang Ginoo sa Silo." (Ang SiIo yara sa aminhan sang Betel, sa bagatnan sang Lebona, kag sa nasidlangan sang dalan halin sa Betel pakadto sa Sikem.)
20 Ginsingganan nila ang mga Benjaminhon, “Lakat kamo kag magpanago sa mga talamnan sang ubas,
21 kag magbantay. Kon maggwa ang mga pamatan-on nga mga babayi sang Silo sa pagsaot sa tion sang ila piesta, maggwa dayon kamo sa mga talamnan sang ubas. Ang kada isa sa inyo magkuha gikan sa mga babayi sang mangin-asawa niya paagi sa palugos, kag dalha ninyo sila pabalik sa kadutaan sang Benjamin upod sa inyo.
22 Kon magkari sa amon ang ila mga amay ukon mga kautoran nga mga lalaki sa pagreklamo, singganan namon sila, ‘Kon mahimo ihatag lang sila sa amon, kay wala man namon sila pagkuhaa halin sa inyo paagi sa inaway agod mangin-amon mga asawa. Kag tungod kay wala man ninyo sila pag-ihatag sa amon, wala man kamo makalapas sa inyo saad.'"
23 Ginhimo ini sang mga Benjaminhon. Ang kada isa sa ila nagpili sang iya asawa gikan sa mga kababayin-an nga nagsaot, kag gindala sa pagpalagyo. Dayon nagbalik sila sa ila kaugalingon nga kadutaan, kag ginpatindog liwat ang ila mga banwa kag nagpuyo didto.
24 Sa amo man nga tion, ang mga Israelinhon naghalin, kag ang tagsatagsa ka tawo nagbalik sa iya kaugalingon nga tribo kag panimalay, kag sa iya kaugalingon nga pagkabutang.
25 Wala sing hari sa Israel sadto nga panahon. Ang tagsatagsa nagpagusto lang sang iya luyag himuon.


MGA HUKOM - Kapitulo 20

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Ang Israel Nag-aman para sa Inaway
1 Ang tanan nga mga Israelinhon, halin sa Dan sa aminhan tubtob sa Beerseba sa bagatnan, kag halin sa duta sang Galaad sa sidlangan nagsabat sang panawag. Nagtipon sila sing tingob kag naghiliugyon sa atubangan sang Ginoo sa Mispa.
2 Yadto man didto ang mga pangulo sang tanan nga mga tribo sang Israel sang pagtipon sang mga tawo sang Dios. May 400,000 tanan ka mga soldado nga nagalakat lang.
3 Nakabati ang mga kaliwat ni Benjamin nga ang iban nga mga Israelinhon nagtaklad pa Mispa. Nagpamangkot ang nga Israelinhon, "Sugiri kami kon paano nahimo ini nga kalautan?"
4 Nagsabat ang Levita, nga ang iya kerida amo ang ginpatay, “Ang akon kerida kag ako nagkadto sa Gabaa, sa kadutaan ni Benjamin sa pagpaligad sang isa ka gab-i didto.
5 Nag-abot ang mga lalaki sang Gabaa sa pagkuha sa akon, kag sadto nga gab-i ginlibutan nila ang balay. Ang tuyo nila amo ang pagpatay sa akon, kag sa baylo sini, ginlugos nila ang akon kerida, kag napatay sia.
6 Gindala ko ang iya bangkay, ginhiwahiwa, kag ginpadala ko sila sa tagsa ka bahin sang kadutaan sang Israel. Ini nga mga tawo nakahimo sing kalautan kag mahigko nga butang sa tunga naton.
7 Kamo tanan nga yari diri mga Israelinhon. Ano bala ang aton pagahimuon nahanungod sini?”
8 Nagtindog sing tingob ang tanan nga mga tawo kag nagsiling, "Wala sing isa sa aton nga magpauli sa iya tolda ukon sa iya balay.
9 Amo ini ang aton himuon: magapili kita sing mga tawo sa pagsala kay sang Gabaa.z
10 Ang isa ka parti sang napulo ka bahin sang mga tawo sa Israel mag-aman sing pagkaon para sa mga hangaway. Ang iban magalakat sa pagsilot sang mga taga-Gabaa tungod sang mahigko nga butang nga ginhimo nila sa Israel.”
11 Gani ang tanan nga mga tawo sa Israel nagtingob sa isa ka tinutoyo nga amo ang pagsalakay sang banwa.
12 Ang mga tribo sang Israel nagpadala sing mensahero sa tanan nga kadutaan sang tribo ni Benjamin nga nagasiling, "Ano ini nga kalautan ang inyo ginhimo?
13 Karon itugyan ninyo inang mga hurong nga mga lalaki sang Gabaa, agod pamatyon namon sila, kag makuha ini nga kalautan sa Israel.” Pero wala magsapak ang mga kaliwat ni Benjamin sa ila mga utod nga mga Israelinhon.
14 Nagtipon sila sa Gabaa halin sa tanan nga mga siyudad sang Benjamin, sa pagpakig-away sa mga tawo sang Israel.
15 Gintipon nila ang 26,000 nga mga hangaway halin sa ila mga siyudad sadto nga adlaw. Wala labot sini, ang mga pumoluyo sang Gabaa nagtipon sing 700 ka mga pinili nga mga tawo.
16 Sa sini nga kadamuon, may 700 ka pinili nga mga tawo nga mga walis. Ang tagsatagsa sa ila makatiro sing terador sa isa ka nahot nga buhok nga wala gid sing paglisa.
17 Ang mga Israelinhon, wala labot ang mga tribo ni Benjamin, nagtipon sing 400,000 ka mga nahanas nga mga hangaway.
Ang Inaway batok sa mga Benjaminhon
18 Nagkadto ang mga Israelinhon sa duog nga ginasimbahan sa Betel. Didto nagpamangkot sila sa Dios, “Ano bala nga tribo ang magauna sa pagsalakay sang mga Benjaminhon?” Nagsabat ang Ginoo, “Ang tribo ni Juda.”
19 Gani nagbangon ang mga Israelinhon sang madason nga aga kag naghimo sila sing kampamento malapit sa siyudad sang Gabaa.
20 Naglakat sila sa pagpakig-away batok sa tribo ni Benjamin kag ginpahamtang nila ang mga  hangaway sing alagisod nga nagaatubang sa siyudad.
21 Ang mga soldado ni Benjamin naggwa sa siyudad, kag sa wala pa matunod ang adlaw ginpamatay nila ang 22,000 ka mga hangaway nga Israelinhon.
22-23 Ang mga Israelinhon nagkadto sa duog nga ginasimbahan kag naghibi sila sa atubangan sang Ginoo tubtob sa gab-i. Nagpamangkot sila sa Ginoo, "Makadto bala kami sa pagpakig-away liwat batok sa amon mga utod nga Benjaminhon?" Nagsabat ang Ginoo, "Huo, lakat kamo.” Gani nag-isog ang mga soldado sang mga Israelinhon, kag ginpahamtang nila liwat ang mga hangaway subong man sang ginhimo nila sang nagligad nga adlaw.
24 Gingubat liwat sang mga Israelinhon ang tribo ni Benjamin.
25 Kag sa liwat, ang mga Benjaminhon naggwa sa Gabaa, kag sa sini nga tion ginpamatay nila ang 18,000 ka mga nahanas nga mga hangaway sang mga Israelinhon.
26 Dayon ang mga Israelinhon nagtaklad pa Betel kag naghibi. Naglingkod sila didto sa atubangan sang Ginoo kag wala magkaon tubtob sa gab-i. Naghalad sila sing mga halad sa paghiambit, kag naghalad sila sing mga halad nga sinunog sa atubangan sang Ginoo.
27 Dayon nagpakighinun-anon sila sa Ginoo. (Sadto nga mga inadlaw, ang Kaban sang Kasugtanan sang Dios yadto didto sa Betel,
28 kag si Pines, nga anak ni Eleasar, nga anak ni Aaron, amo ang gintugyanan sini.) Nagpamangkot sila, "Magalakat bala kami sa pagpakig-away liwat sa amon mga kautoran nga mga Benjaminhon, ukon magauntat kami?" Nagsiling ang Ginoo, "Pakig-away kamo, kay buas padag-on ko kamo batok sa ila.”
29 Gani nagpahamtang ang mga Israelinhon sing mga hangaway sa tago lang sa palibot sang Gabaa.
30 Kag sa ikatlo nga adlaw gingubat nila ang mga hangaway ni Benjamin, kag ginpahamtang nila ang ila mga hangaway sing alagisod nga nagaatubang sa Gabaa, subong sang ila ginhimo sang una.
31 Naggwa ang mga Benjaminhon sa pagpakig-away, kag ginpalagas sila sang mga Israelinhon palayo sa siyudad. Subong sang ginhimo nila sang una, nagsugod sila sa pagpamatay sang pila ka mga tawo sa alagyan pakadto sa Betel, sa alagyan pakadto sa Gabaa, kag sa latagon. Nakapatay sila sing mga 30 ka mga Israelinhon.
32 Nagsiling ang mga Benjaminhon, "Ginalutos naton sila, pareho sang una.” Pero nagsiling ang mga Israelinhon, “Malagyo kita, kag palagson naton sila palayo sa siyudad pakadto sa mga dalanon.”
33 Dayon ang daku nga bahin sang mga hangaway sang Israel nag-isol kag nagtipon sila liwat sing tingob sa Baaltamar, pero ang mga kalalakin-an nga nagapalibot sa siyudad, hinali lang naggwa sa ila mga ginapanaguan sa mga kabatuhan sa palibot sang Gabaa.
34 Napulo ka libo ka mga tawo ang ginpili sing pinasahi gikan sa tanan nga mga Israelinhon, ang nagsalakay sang Gabaa, kag malapuyot gid ang inaway. Wala makahibalo ang mga Benjaminhon nga madali na lang sila malaglag.
35 Ginpadaog sang Ginoo ang mga Israelinhon batok sa mga hangaway sang mga Benjaminhon. Ginpamatay sang mga Israelinhon ang 25,100 sang ila mga kaaway sadto nga adlaw,
36 kag natalupangdan sang mga Benjaminhon nga nalutos sila.
Sa Ano nga Paagi Nagdaog ang mga Israelinhon
Nagpalagyo ang mga Israelinhon sa mga Benjaminhon, kay nagsalig sila sa mga hangaway nga ila ginpapanago sa palibot sang Gabaa.
37 Ini nga mga hangaway hinali lang nga nagsalakay sang Gabaa, naglapta sila, kag ginpamatay nila ang tanan sa banwa.
38 Ang mga hangaway sang Israel kag ang mga soldado nga nagapanago nagkasugot sang isa ka sinyas. Kon makita nila ang daku nga aso nga nagatub-ok halin sa banwa,
39 ang mga Israelinhon nga nagapalagas kag nagapakig-away sa latagon magabalik. Sa sini nga tion, ang mga Benjaminhon nakapatay na sing 30 ka mga Israelinhon. Nagsiling sila sa ila kaugalingon, "Ginalutos naton sila pareho sang una."
40 Karon nagpahayag ang ila sinyas, ang madamol nga aso nagsugod sa pagtub-ok gikan sa banwa. Nagbalikid ang mga Benjaminhon, kag natingala gid sila sang makita nila nga nasunog ang bug-os nga banwa.
41 Dayon nagbalik ang mga Israelinhon, kag nagsalangisag ang mga Benjaminhon, kay natalupangdan nila nga madali na lang sila malaglag.
42 Nagpalagyo sila sa mga Israelinhon kag nagdalagan pakadto sa desierto, pero indi sila makapalagyo. Nakibon sila sang daku nga bahin sang mga hangaway kag sang mga soldado nga nagapagwa sa banwa, kag nalaglag sila.
43 Ginkibon sang mga Israelinhon ang ila mga kaaway, kag ginlagas nila sila nga wala sing untat tubtob sa punta sa sidlangan sang Gabaa, kag ginapamatay sila samtang nagapalagyo sila.
44 Desiotso mil nga pinakaali nga mga hangaway sang mga Benjaminhon ang ginpamatay.
45 Ang iban nagbalik kag nagdalagan pakadto sa desierto sa Bato sang Rimon. Lima ka libo sa ila ang ginpamatay sa mga dalan. Ang nabilin ginpanglagas sang mga Israelinhon kag ginpanglasalasa. Nakapatay sila sing 2,000.
46 Sa kabilugan, 25,000 ka mga Benjaminhon ang ginpamatay sadto nga adlaw, kag tanan sila maisog nga mga soldado.
47 Pero 600 ka mga lalaki ang nagbalik kag nagdalagan pakadto sa desierto, sa Bato sang Rimon, kag nagtener sila didto sing apat ka bulan.
48 Ang mga Israelinhon nagbalik kag nagpakig-away sa nabilin nga mga Benjaminhon, kag ginpamatay nila sila, ang tanan nga mga kalalakin-an, mga kababayin-an, kag mga kabataan, kag subong man ang mga kasapatan, kag ang tagsatagsa nga ila makita. Ginsunog nila ang tagsa ka banwa sa amo nga duog.


zAng isa ka dumaan nga pagbadbad Gabaa; sa Hebreo Geba.


MGA HUKOM - Kapitulo 19

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Ang Levita kag ang Iya Kerida
1 Sadto nga mga inadlaw, sang wala sing hari ang Israel, may isa kaLevita nga nagpuyo sa malayo nga kabakuloran sang Efraim. Nagkuha sia sing isa ka babayi halin sa Betlehem, sa Juda, nga manginkerida niya.
2 Pero naakig sa iya ang iya kerida, kag nagpauli ini sa balay sang iya amay sa Betlehem. Nagtener sia didto sing apat ka bulan.
3 Dayon nagpamat-od ang lalaki sa pag-apas sa iya, kag gin-uloulohan sia sa pagbalik sa iya. Gindala niya ang iya suloguon kag ang duha ka asno. Gin-abiabi sia sang babayi sa balay sang iya amay. Sang makita sia sang amay sang babayi, gin-abiabi sia sing malipayon.
4 Ang amay sang babayi naghawid sa iya sa pagpabilin, gani nagpabilin sia sing tatlo ka adlaw. Nagkaon ang mag-asawa kag nagtener sila sing mga pila ka gab-i didto.
5 Pagkaaga sang ikap-at nga adlaw, nagbugtaw sila sing aga pa, kag nag-aman sa paglakat. Pero nagsiling ang amay sang babayi sa Levita, "Magkaon ka anay, agod magabakod ang imo lawas. Lakat ugaling dugaydogay."
6 Gani ang amay sang babayi kag ang Levita naglingkod sa pagkaon kag pag-inom. Dayon nagsiling sa iya ang amay sang babayi, "Kon mahimo magpabilin ka sa bug-os nga gab-i, kag magpangalipay ka."
7 Malakat na kuntani ang lalaki, pero ginpilit sia sang amay sa pagpabilin, gani nagtener sia liwat didto sa bug-os nga gab-i.
8 Sa ikalima nga adlaw, aga pa sia nagbangon agod maglakat, pero ang amay sang babayi nagsiling sa iya, "Kon mahimo magkaon ka anay. Karon ka lang dugaydogay lakat." Gani nagkaon sila sing dungan.
9 Sang manuglakat na ang lalaki, ang iya kerida, kag ang iya suloguon, nagsiling ang amay, "Daw hapon na gid ini kaayo, maayo pa magtener na lang kamo sa bug-os nga gab-i. Madulom na dugaydogay, magpabilin na lang anay kamo diri kag magpahuway. Buas, aga pa kamo bugtaw, agod makalakat kamo kag magpauli.”
10-11 Pero indi gusto ang lalaki sa pagpabilin sing isa pa ka gab-i, gani naglakat sia kag ang iya kerida. May duha sila ka mga asno nga may mga montora. Kahapunanon na sang makaabot sila malapit sa Jebus (nga amo ang Jerusalem), gani ang suloguon nagsiling sa iya agalon, “Ngaa indi na lang kita maghapit kag magpabilin sa bug-os nga gab-i diri sa siyudad sang mga Jebusnon?”
12 Pero nagsiling ang iya agalon, "Indi kita maghapit sa siyudad nga ang mga tawo indi mga lsraelinhon. Maligad lang kita kag magpadayon sa Gabaa.
13 Mapadayon kita sa uloonhan, kag magpaligad sing isa ka gab-i sa Gabaa ukon Rama."
14 Gani ginligaran nila ang Jebus kag nagpadayon sila sa ila dalanon. Nagahinunod na ang adlaw sang makaabot sila sa Gabaa, sa kadutaan sang tribo ni Benjamin.
15 Naghapit sila didto sa pagpaligad sang gab-i. Nagsulod ang Levita kag naglingkod sa plasa sang siyudad, pero wala gid sing tawo nga nag-agda sa ila sa pagdayon sa ila balay sadto nga gab-i.
16 Sadto nga tion, may tigulang nga lalaki nga nagapauli, halin sa iya obra sa uma. Ini nga tawo didto anay nagapuyo sa kabakuloran sang Efraim, pero karon nagatener sia sa Gabaa. Ang mga tawo didto naggikan sa tribo ni Benjamin.
17 Natalupangdan sang tigulang nga lalaki ang tawo nga umalagi didto sa plasa sang siyudad, kag ginpamangkot sia sang tigulang, "Taga-diin ka bala, kag diin ka makadto?"
18 Nagsabat ang Levita, "Nagapanglakaton kami halin sa Betlehem sa Juda, kag nagapakadto kami sa malayo nga duog sa kabakuloran sang Efraim, diin  ako nagapuyo. Nagkadto ako sa Betlehem, pero, karon nagapauliy na ako. Wala sing isa nga nag-agda sa akon sa pagdayon sa iya balay.
19 May inugpakaon kami kag inugpahalab para sa amon mga asno, may tinapay kag bino para sa akon kag sa akon kerida, kag para sa akon suloguon. May tuman kami nga balon para sa amon kinahanglanon."
20 Nagsiling ang tigulang nga lalaki, “Didto lang kamo dayon sa akon balay! Ako ang mahibalo sa imo, kon mahimo indi ka magpabilin sini nga gab-i sa plasa."
21 Gani gindala niya sila pauli sa iya balay, kag ginpakaon niya ang ila mga asno. Ang iya mga bisita nanghinaw sang ila mga tiil, kag nagkaon kag nag-inom.
22 Nagakinasadya gid sila, sang hinali may mga hurong gikan sa banwa nga naglibot sa balay kag nagpamukpok sa puwertahan. Nagsiling sila sa tigulang nga lalaki, "Pagwaa ang lalaki nga nag-upod dira sa imo! Luyag namon sia himuslan!"
23 Pero naggwa ang tigulang nga lalaki kag nagsiling, "Kon mahimo mga abyan, indi lang ninyo paghimoa ina! Indi ninyo paghimoa ina nga kalautan kag mahigko nga butang! Ini nga tawo akon bisita.
24 Yari ang iya kerida, kag ang akon ulay nga anak nga dalaga. Dalhon ko sila diri sa gwa kag ihatag ko sila sa inyo. Pagusto kamo kon ano ang himuon ninyo sa ila. Pero indi lang ninyo paghimoa ining malaut nga butang sa sini nga tawo!"
25 Pero ang mga tawo indi magpati sa iya. Gani ginkuha sang Levita ang iya kerida kag ginpagwa sa ila. Ginlugos nila sia kag ginhimuslan sa bug-os nga gab-i, kag wala mag-untat tubtob maaga.
26 Sang kaagahon na, nag-abot ang babayi kag natumba sa puwertahan sang balay sang tawo sa diin yara ang iya bana. Nagpabilin sia didto tubtob magsanag ang adlaw.
27 Sang pagbugtaw sang iya bana sadto nga aga, kag sang ginbuksan niya ang puwertahan sa pagpadayon sang iya paglakat, nakita niya ang iya kerida nga nagahamyang sa atubangan sang balay, nga ang iya kamot nagadab-ot sang puwertahan.
28 Nagsiling ang Levita, "Bangon ka, kay malakat na kita." Pero wala gid sing sabat. Gani ginsablay niya ang bangkay sang iya kerida sa likod sang asno, kag naglakat sia sa pagpauli.
29 Sang makaabot sia sa iya balay, nagsulod sia kag nagkuha sing sundang. Ginkuha niya ang bangkay sang iya kerida, kag ginhiwahiwa niya ini sa napulog duha ka parti kag ginpadala niya sila sa tagsa ka bahin sang duta sang Israel.
30 Ang tagsatagsa nga nakakita sini nagsiling, "Wala pa gid kami makakita sing subong sini! Wala pa gid sing natabo nga pareho sini halin sang paggwa sang mga Israelinhon sa Egipto. Hunahonaa ninyo! Ano bala ang aton himuon nahanungod sini?"


ynagapauli; sa Hebreo nagapakadto sa balay sang GINOO.


MGA HUKOM - Kapitulo 18

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Miqueas kag ang Tribo ni Dan
1 Wala sing hari sa Israel sadto nga panahon. Sadto nga mga inadlaw, ang tribo ni Dan nagapangita sing kadutaan nga pagaangkunon kag pagapuy-an. Sa mga tribo sang Israel, ang tribo ni Dan wala pa makabaton sing duta nga ila pagapanag-iyahan tubtob sadto nga tion.
2 Gani ang mga kaliwat ni Dan nagpili sing lima ka mga lalaki nga maisog gikan sa tanan nga mga panimalay sa tribo, kag ginpadala sila halin sa mga banwa sang Sora kag Estaol, kag ginsugo sa pag-usisa sang duta kag sa pagpanilag sa mga pumoluyo. Gani nagkadto sila sa kabakuloran sang Efraim kag nagtener sa balay ni Miqueas.
3 Samtang didto sila, nakilala nila ang panghambal sang pamatan-on nga Levita, gani nagdulog sila kag nagpamangkot sa iya, "Ano ang ginahimo mo diri? Sin-o ang nagdala sa imo diri?"
4 Nagsabat sia sa ila, "May kasugtanan kami ni Miqueas. Nagaalagad ako subong nga iya pari, kag iya ako ginasuweldohan.”
5 Nagsiling sila sa iya, "Kon mahimo, pamangkuta ang Dios kon bala magamadinalag-on kami sa sining amon panglakaton.”
6 Nagsabat ang pari, "Wala kamo sing dapat paligban. Ang Ginoo nagatatap sa inyo sa sining inyo panglakaton."
7 Gani ang lima ka mga lalaki naghalin, kag naglakat pakadto sa banwa sang Lais. Nakita nila kon daw ano kalig-on ang pagpuyo didto sang mga pumoluyo pareho sang mga Sidonhon. Malinong sila kag mahipos nga mga tawo, kag wala sing kasuayon. Wala sila ginakulang sang ila mga kinahanglanon. Nagapuyo sila nga malayo sa mga Sidonhon, kag wala sing paghisayo sa iban nga mga katawuhan.
8 Sang magbalik ang lima ka mga lalaki sa Sora kag Estaol ginpamangkot sila sang ila mga kasimanwa kon ano ang ila nakita.
9 Nagsabat sila, “Dali kamo, salakayon naton sila. Nakita namon ang duta, kag maayo gid ini. Indi kamo magpabilin diri nga wala sing ginahimo. Dalidali kamo! Sudla ninyo kag agawon ini!
10 Sa inyo pag-abot didto, masapwan ninyo nga ang mga tawo wala gid nagahunahona nga may malain nga matabo. Isa ini ka malapad nga duta, kag yara ang tanan nga luyag sang isa ka tawo.”
11 Gani naglakat halin sa Sora kag Estaol ang 600 ka mga tawo gikan sa tribo ni Dan nga handa sa pagpakig-away.
12 Nagtaklad sila kag naghimo sing kampamento sa nakatundan sang siyudad sang Hearim sa Juda. Amo ini ang kabangdanan nga ang duog gintawag nga kampamento ni Dan.
13 Halin didto nagkadto sila sa balay ni Miqueas sa kabakuloran sang Efraim.
14 Dayon ang lima ka mga lalaki nga naglakat sa pagpanilag sa kadutaan sa palibot sang Lais, nagsiling sa ila mga kaupdanan, “Nakahibalo bala kamo nga sa sini nga mga balay may isa ka diosdios nga kahoy nga nahaklapan sing pilak? May iban man nga mga diosdios, kag may mga bayu para sa ila. Ano bala sa hunahona ninyo ang aton himuon?”
15 Gani naghapit sila sa balay ni Miqueas sa diin nagapuyo ang pamatan-on nga Levita. Ginpamangkot nila sia kon kamusta man sia.
16 Samtang ang 600 ka mga tawo sang tribo ni Dan nga handa sa pagpakig-away nagatindog sa may puwertahan.
17 Ang lima ka mga espiya nagderetso sa sulod sang balay, kag ginkuha nila ang diosdios nga kahoy nga nahaklapan sing pilak, ang iban pa nga mga diosdios, kag ang ila mga bayu. Ang pari nagpabilin sa puwertahan upod sa 600 ka mga soldado nga lupit sa hinganiban.
18 Sa tapos makakadto ang mga tawo sa balay ni Miqueas, kag makuha ang mga diosdios nga kahoy, ang mga bayu para sini, kag ang larawan nga tinunaw, nagsiling ang pari, “Ano bala ang ginahimo ninyo?"
19 Ginsingganan nila sia, "Maghipos ka. Indi ka maghambal. Mag-upod ka sa amon, kag ikaw ang amon manginpari kag manuglaygay. Indi ka bala luyag nga manginpari para sa isa ka bug-os nga tribo sang Israel, sa baylo sang isa lamang ka panimalay sang isa ka tawo?"
20 Nalipay gid sini ang pari, gani ginkuha niya ang mga diosdios nga kahoy kag ang mga bayu para sini, kag nag-upod sia sa ila.
21 Nagbalik sila kag ginpauna nila ang mga kabataan, mga kahayupan, kag ang ila mga pagkabutang.
22 Malayo na ang ila nalaktan halin sa balay ni Miqueas, sang ginpanawag ang mga lalaki nga kaingod ni Miqueas sa pagpakig-away. Nalambot nila ang mga kaliwat ni Dan,
23 kag ginsinggitan nila sila. Nagbalikid ang mga kaliwat ni Dan, kag nagpamangkot kay Miqueas, "Ano bala ang natabo? Ngaa nga kadamo gid sa inyo nga nagalagas sa amon?"
24 Nagsiling si Miqueas, "Ano bala ang buot ninyo silingon nga nagapamangkot pa kamo kon ano ang natabo? Ginkuha ninyo ang akon pari, kag ang mga diosdios nga akon ginhimo, kag naglakat kamo! Ano na lang ang nabilin sa akon?"
25 Ginsingganan sia sang mga kaliwatan ni Dan, "Maayo pa nga maghipos ka na, ukon maakig ining mga tawo kag salakayon nila kamo, kag ikaw kag ang imo bug-os nga panimalay magakalamatay."
26 Gani nagpadayon sa paglakat ang mga kaliwat ni Dan. Sang makita ni Miqueas nga mas makusog sila sang sa iya, nagbalik sia pauli.
27 Ginkuha sang mga kaliwat ni Dan ang tanan nga ginhimo ni Miqueas kag ang iya pari. Dayon naglakat sila kag ginsalakay ang Lais, isa ka banwa nga ang mga tawo malinong kag wala sing gamo. Ginpamatay nila ang tanan nga mga pumoluyo kag ginsunog ang siyudad.
28 Wala gid sing isa nga yadto didto nga makatabang sa ila, kay ang banwa malayo sa Sidon, kag wala gid sila sing paghisayo sa iban nga mga katawuhan. Ini nga banwa yara sa amo man nga kapatagan sang Betrehob. Ginpatindog liwat sang mga kaliwat ni Dan ang siyudad, kag didto sila nagpuyo.
29 Ginhingalanan nila ang siyudad nga Dan, suno sa ngalan sang ila tigulang nga si Dan, nga anak ni Jacob. Sang una, ini nga banwa gintawag Lais.
30 Ang mga kaliwat ni Dan nagpatindog sing diosdios nga pagasimbahon. Si Jonatan, nga anak ni Gersom, nga anak ni Moises, nag-alagad subong nga pari sang mga kaliwat ni Dan, kag ang iya mga kaliwat nag-alagad subong mga pari nila tubtob sang pagbihag sini nga mga tawo.
31 Ang diosdios ni Miqueas nagpabilin didto tubtob nga ang tolda sang Dios yadto sa Silo.


MGA HUKOM - Kapitulo 17

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Ang mga Diosdios ni Miqueas
1 May isa ka tawo nga ang iya ngalan si Miqueas nga nagpuyo sa kabakuloran sang Efraim.
2 Ginsingganan niya ang iya iloy, "Sang kawaton ang imo 1,100 ka mga pilak, ginpakamalaut mo ang nagkawat kag nabatian ko gid ang imo pagpakamalaut. Tan-awa, yari sa akon ang mga pilak. Ako amo ang nagkawat sadto." Nagsiling ang iya iloy, "Kabay nga bendisyunan ka sang Ginoo, anak ko!"
3 Gin-uli niya sa iya iloy ang 1,100 ka mga pilak. Ang iya iloy nagsiling, “Agod indi mahulog sa imo ang pagpakamalaut, anak ko, ako gid magahalad sini nga mga pilak sa Ginoo. Pagagamiton ini sa paghimo sing diosdios nga kahoy kag pagahaklapan ini sing pilak. Gani karon, iuli ko ini sa imo.”
4 Pero gin-uli man niya ang mga pilak sa iya iloy. Nagkuha ang iya iloy sing duha ka gatos ka mga pilak, kag ginhatag niya sa platero, nga naghimo sing diosdios nga kahoy nga tinigban, kag ginhaklapan ini sing pilak. Ginbutang ini sa balay ni Miqueas.
5 Ining tawo nga si Miqueas may kaugalingon nga duog sa diin sia nagasimba. Naghimo sia sing mga diosdios kag mga bayu para sa ila, kag ginhimo niya ang isa sang iya mga anak nga Ialaki nga iya pari.
6 Wala sing hari sa Israel sadto nga tion. Ang tagsatagsa nagpagusto lang sang iya luyag nga himuon.
7 May isa ka pamatan-on nga Ialaki nga nagapuyo sa banwa sang Betlehem sa Juda. Isa sia ka Levita gikan sa panimalay ni Juda.
8 Naghalin sia sa Betlehem sa pagpangita sang iban nga duog nga pagapuy-an. Sang nagapanglakaton sia nakaabot sia sa balay ni Miqueas sa kabakuloran sang Efraim.
9 Ginpamangkot sia ni Miqueas, "Diin ka bala maghalin?" Nagsabat sia, "Ako isa ka Levita nga taga-Betlehem sa Juda. Nagapangita ako sing duog nga sarang mapuy-an.
10 Nagsiling si Miqueas, "Diri ka lang puyo upod sa akon. Himuon ko ikaw nga akon manuglaygay kag pari, kag hatagan ko ikaw sing napulo ka bilog nga pilak kada tuig, kag mga bayu, kag mga pagkaon."
11 Nagpasugot ang pamatan-on nga Levita sa pagpuyo upod kay Miqueas, kag nanginsubong sia sang isa ka anak ni Miqueas.
12 Ginhimo sia ni Miqueas nga iya pari, kag nagpuyo sia sa balay ni Miqueas.
13 Nagsiling si Miqueas, "Karon nahibal-an ko nga himuon sang Ginoo ang tanan nga maayo para sa akon, kay may pari ako nga isa ka Levita.”


MGA HUKOM - Kapitulo 16

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Samson sa Gasa
1 Nagkadto si Samson sa Gasa, sa diin nakita niya ang isa ka babayi nga nagabaligya sang iya dungog, kag naghulid sia sa babayi.
2 Nahibal-an sang mga taga-Gasa nga si Samson yadto didto, gani ginlibutan nila ang duog kag ginbantayan nila sia sa bug-os nga gab-i sa puwertahan sang siyudad. Naghipos lamang sila sa bug-os nga gab-i, nga nagahunahona sa ila kaugalingon, "Mahulat kita tubtob mag-aga, kag aton dayon sia patyon.”
3 Pero naghigda si Samson tubtob sa tungang gab-i. Dayon nagbangon sia kag ginkaptan ang puwerta sang siyudad kag gingabot dala ang mga sera, mga haligi kag mga trangka kag tanan nga bahin sini. Ginpas-an niya ini kag gindala sa putokputokan sang bukid nga nagaatubang sa Hebron.
Si Samson kag si Delila
4 Sa tapos sini, naghigugma si Samson sang isa ka babayi nga taga-Kapatagan sang Sorek, nga ang iya ngalan si Delila.
5 Ginkadtuan si Delila sang lima ka mga pangulo sang mga Filistinhon kag ginsingganan, "Uloulohi sia, kag usisaa kon diin nagahalin ang iya pagkakusog kag kon sa ano nga paagi namon sia madaog kag magapos agod indi na sia makabato sa amon. Ang kadaisa sa amon magahatag sa imo sing 1,100 ka bilog nga mga pilak.”
6 Gani nagsiling si Delila kay Samson, "Kon mahimo sugiri ako kon ngaa man tama gid kakusog sa imo. Ano ang himuon sang isa ka tawo nga Iuyag maggapos sa imo agod indi na ikaw makabato?"
7 Nagsabat si Samson, "Kon gapuson nila ako sing pito ka bag-o kag lab-as nga mga banting sang pana, manginmaluya ako subong sang iban.”
8 Gani gindalhan sang mga pangulo sang mga Filistinhon si Delila sing pito ka bag-o kag lab-as nga mga banting sang pana, kag gingapos sini ni Delila si Samson.
9 May mga tawo nga ginpahulat niya sa isa ka kuwarto, gani nagsinggit sia, "Samson! Yara na ang mga Filistinhon!" Pero ginpangbugras ni Samson ang mga banting sang pana subong sang pagkabugto sang hilo kon sindutan sang kalayo. Gani wala pa gid mahibal-i ang sekrito sang iya pagkakusog.
10 Ginsingganan ni Delila si Samson, "Nahibal-an ko nga ginainto mo lang ako kag ginabutigan. Kon mahimo, sugiri man ako kon sa ano nga paagi magapos ikaw."
11 Ginsingganan sia ni Samson, “Kon gapuson nila ako sang bag-o gid nga mga kalat nga wala pa gid magamit, manginmaluya ako pareho sang iban.”
12 Gani nagkuha si Delila sing bag-o nga mga kalat, kag gingapos niya si Samson. Dayon nagsinggit sia, "Samson! Yara na ang mga Filistinhon!" May mga tawo nga nagahulat sa pihak nga kuwarto. Pero ginpangbugras ni Samson ang mga kalat sa iya butkon subong sang hilo.
13 Nagsiling si Delila kay Samson, "Ginainto mo gihapon ako kag ginabutigan. Sugiri ako kon ano ang paagi sang paggapos sa imo. Ginsingganan sia ni Samson, "Kon ihabol mo ang pito ka salapid sang akon buhok sa teral kag hugton mo ini sa palpal, manginmaluya ako subong sang iban."
14 Dayon ginpatulog sia ni Delila, kag ginhabol niya sa teral ang pito ka salapid nga buhok ni Samson. Ginhugot niya ini sa palpal, kag nagsinggit, "Samson! Yara na ang mga Filistinhon!" Pero nagbugtaw si Samson kag ginpalos niya ang iya buhok sa teral.
15 Gani nagsiling si Delila sa iya, “Ngaa man nga nagasiling ka nga ginahigugma mo ako, nga may ginalikom pa ikaw sa akon? Katatlo mo na ako intuon, kag wala mo pa ako masugiri kon ngaa kakusog gid sa imo."
16 Nagpadayon sia sa pagpamangkot kay Samson adlaw-adlaw. Tinak-an gid si Samson sang pagpamilit sa iya ni Delila sa bagay nga naghandom na lang sia nga nagasiling, "Mas maayo nga mapatay na lang ako."
17 Sang ulihi, ginsugiran na lang niya si Delila sang kamatuoran. Nagsiling si Samson, “Wala gid maguntingi ang akon buhok, kay ginhalad ako sa Dios subong isa ka Nazareox halin sa akon pagkatawo. Kon guntingan ako sang akon buhok, madula ang akon kusog, kag manginmaluya ako pareho sang iban.”
18 Sang mahibal-an ni Delila nga ginsugiran sia ni Samson sang kamatuoran, nagpadala sia sing mensahi sa pangulo sang mga Filistinhon kag nagsiling, “Balik kamo sing makaisa na lang, kay ginsugiran niya ako sang matuod." Dayon nag-abot sila nga may dala nga kuwarta.
19 Ginpatulog ni Delila si Samson sa iya mga paa, kag nagtawag sang isa ka tawo nga naggunting sang pito ka salapid nga buhok ni Samson. Dayon ginpukaw ni Delila ang balatyagon ni Samson, pero maluya na sia.
20 Nagsinggit si Delila, "Samson! Yara na ang mga Filistinhon!" Nagbugtaw sia kag naghunahona sa iya kaugalingon, "Manginpalos ako kag manginhilway subong sang una." Wala sia makahibalo nga ginbayaan na sia sang Ginoo.
21 Gindakop sia sang mga Filistinhon kag ginlukat nila ang iya mga mata. Gindala nila sia sa Gasa, kag ginkadenahan sang saway. Ginpaobra nila sia sa galingan didto sa prisuhan.
22 Pero nagsugod sa pagtubo liwat ang iya mga buhok.
Napatay si Samson
23 Nagtipon sing tingob ang mga pangulo sang mga Filistinhon sa pagsaulog kag sa pagdulot sang daku nga halad sa ila dios nga si Dagon. Nagkanta sila, "Ginpadaog kami sang amon dios batok sa amon kaaway nga si Samson!"
24 Nagakinasadya sila, gani nagsiling sila sing pagdayaw sa ila dios, "Ginpadaog kami sang amon dios batok sa amon kaaway, nga naglaglag sang amon duta kag nagpamatay sang madamo sa amon!"
25 Nagakinasadya sila, gani nagsiling sila, "Dalha ninyo diri si Samson agod yagutaon naton sia!" Sang mapagwa nila sia sa prisuhan, ginyaguta nila sia, kag ginpatindog nila sia sa gin-utlan sang mga haligi.
26 Nagsiling si Samson sa bata nga lalaki nga nagatuytoy sa iya, “Patanduga ako sa mga haligi nga nagatukod sini nga balay. Luyag ako magsandig."
27 Nagaginutok ang mga babayi kag mga lalaki sa amo nga templo. Ang lima ka mga pangulo nga Filistinhon yadto man didto, kag may mga 3,000 ka mga lalaki kag mga babayi sa ibabaw sang atop, nga nagatan-aw kay Samson kag nagayaguta sa iya.
28 Dayon nagpangamuyo si Samson, "O Ginoong Dios, kon mahimo dumdoma ako. Kon mahimo, O Dios, hatagi ako sing kusog bisan makaisa na lang, agod nga makatimalos ako sa mga Filistinhon tungod sang akon duha ka mata."
29 Gin-uyatan ni Samson ang duha ka haligi nga yara sa tunga nga nagatukod sang templo. Ginduso niya ini,
30 kag nagsinggit, "Bisan mapatay ako, basta upod lang sa mga Filistinhon!" Sa bug-os niya nga kusog iya ginduso ang mga haligi, kag nalusod ang templo sa mga pangulo kag sa tagsatagsa nga yadto didto. Madamo pa nga mga tawo ang iya napatay sang mapatay sia sang sa mga tawo nga napatay niya sang buhi pa sia.
Sa bug-os niya nga kusog iya ginduso ang mga haligi. (16:30)
31 Karon nagdulhog ang iya mga kautoran nga lalaki kag ang iya bug-os nga panimalay sa pagkuha sang iya bangkay. Gindala nila ang iya bangkay pauli kag ginlubong nila sia sa gin-utlan sang Sora kag Estaol, sa lulobngan sang iya amay nga si Manoa. Nanginpangulo sia sang Israel sa sulod sang 20 ka tuig.


xNAZAREO: Tan-awa ang 13:5.


MGA HUKOM - Kapitulo 15

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
1 Sang ulihi, sang tig-alani sang trigo, nagkadto si Samson sa pagduaw sa iya asawa, kag gindalhan niya sia sang isa ka tinday nga kanding. Ginsingganan niya ang amay sang iya asawa, "Luyag ko magsulod sa kuwarto sang akon asawa." Pero indi niya si Samson pagpasudlon.
2 Ginsingganan niya si Samson, "Ang dumdom ko gid nga ginadumtan mo sia, gani ginpaasawa ko sia sa imo abyan. Pero ang iya nga manghod nga babayi matahom pa sa iya, kag mangin-imo sia sa baylo sang imo asawa."
3 Nagsiling si Samson, "Sa sini nga tion indi ako mabasol kon ano ang akon himuon sa mga Filistinhon!"
4 Gani naglakat sia kag nagdakop sang 300 ka mga singgalong. Gintabid niya ang mga ikog nila tagduhadoha kag ginbutangan sing mitsa sa ulot sang tagsa ka paris.
5 Dayon ginsindihan niya ang mga mitsa, kag ginbuy-an ang mga singgalong sa kaumhan sang trigo sang mga Filistinhon. Ginsunog niya indi lamang ang natumpi nga mga trigo, kundi pati man ang mga alanyon sa kaumhan. Nasunog man ang katamnan sang mga olibo.
6 Dayon nagpamangkot ang mga Filistinhon, “Sin-o ang naghimo sini?” Nahibal-an nila nga si Samson ang naghimo sini, tungod kay ang ugangan niya nga Timnahanon nagkuha sang asawa ni Samson kag ginpaasawa sa abyan ni Samson. Gani naglakat ang mga Filistinhon kag ginsunog ang babayi tubtob mapatay, kag ginsunog ang balay sang iya amay.
7 Ginsingganan sila ni Samson, "Amo gali ini ang ginahimo ninyo! Ginasumpa ko nga indi ako mag-untat tubtob indi kamo tanan mabalusan!"
8 Ginsalakay niya sila sing tudo gid kag ginpamatay ang madamo sa ila. Nian naglakat sia kag nagtener sa kuweba sa pil-as sang Etam.
Ginlutos ni Samson ang mga Filistinhon
9 Nag-abot ang mga Filistinhon kag naghimo sing kampamento sa Juda, kag gingubat ang banwa sang Lehi.
10 Ang mga tawo sang Juda nagpamangkot sa ila, "Ngaa gingubat ninyo kami?" Nagsabat sila, "Nagkari kami sa pagdakop kay Samson, kag sa pagbalos sa iya sang ginhimo niya sa amon."
11 Dayon nagkadto sa kuweba sa pil-as sang Etam ang 3,000 ka mga tawo sang Juda kag nagsiling sila kay Samson, “Wala ka bala makahibalo nga ang mga Filistinhon amo ang nagagahom sa aton? Ano bala ini ang ginhimo mo sa amon?" Nagsabat si Samson, "Ginbalusan man lang sila sang ginhimo nila sa akon."
12 Nagsiling sila sa iya, "Nagkari kami diri sa paggapos sa imo, agod itugyan ka namon sa mga Filistinhon." Nagsiling si Samson, "Magsaad kamo nga indi kamo ang magapatay sa akon."
13 Nagsiling sila, “Indi kami ang magapatay sa imo, kundi amon lang ikaw gapuson kag itugyan sa ila." Gani gingapos nila sia sang duha ka bag-o nga kalat kag gindala halin sa pil-as.
14 Sang makaabot sia sa Lehi, nagdalagan ang mga Filistinhon nga nagasinggit sa pagsugata sa iya. Ginhatagan sia sing kusog sang espiritu sang Ginoo, kag ginpamugto niya ang mga kalat nga nagagapos sang iya mga butkon nga daw pareho lang sang nasunog nga hilo.
15 Nakakita sia sing bago nga sulang nga tul-an sang asno, ginpulot niya ini, kag paagi sini, ginpatay niya ang isa ka libo ka mga tawo.
16 Gani si Samson nagkanta: "Paagi sa sulang nga tul-an sang asno ginpatay ko ang isa ka libo ka mga tawo. Paagi sa sulang nga tul-an sang asno gintumpok ko sila sa mga tinumpokan."v
17 Pagkatapos sadto, iya ginpilak ang sulang nga tul-an sang asno. Yadto nga duog ginhingalanan Bakulod sang Sulang nga Tul-an.
18 Gin-uhaw gid kaayo si Samson, gani nagpanawag sia sa Ginoo kag nagsiling, “Ginhatag mo sa akon ining daku nga pagdaog, kag karon mapatay man lang bala ako atungod sang kauhaw kag pagabihagon sang di-tinuli nga mga Filistinhon?"
19 Nian ginpalitik sang Dios ang yuhob sa duta didto sa Lehi, kag naggwa ang tubig gikan sini. Nag-inom si Samson kag nag-ayo ang iya pamatyag. Gani ang tuboran ginhingalanan Enhakore.w Ini yara pa sa Lehi.
20 Nanginpangulo si Samson sa Israel sa sulod sang 20 ka tuig samtang ang mga Filistinhon nagagahom sa duta.


vMGA TINUMPOKAN: Ini nga pulong kon ihambal daw pareho sang Hebreo nga pulong nga kon sayuron "asno."
wENHAKORE: Ini nga ngalan sa Hebreo nagakahulogan "ang nagapanawag."


MGA HUKOM - Kapitulo 14

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Samson kag ang Babayi sa Timna
1 Nagkadto si Samson sa Timna, sa diin nakita niya ang isa ka babayi nga Filistinhon.
2 Nagpauli sia kag ginsugiran niya ang iya amay kag iloy, "May nakita ako nga isa ka babayi nga Filistinhon sa Timna. Kuhaa ninyo sia, kay luyag ko sia pangasaw-on."
3 Pero nagsiling sa iya ang iya amay kag iloy, "Ngaa magpangasawa ka sang isa ka babayi nga gikan sa mga Filistinhon nga di-tinuli? Wala ka bala sing nakita nga dalaga gikan sa imo mga himata, ukon sa aton mga tawo?" Pero nagsiling si Samson sa iya amay, "Kuhaa ninyo sia para sa akon, kay naluyag gid ako sa iya."
4 Wala makahibalo ang iya amay kag iloy nga ang Ginoo amo ang nagtuytoy kay Samson sa paghimo sini, kay ang Ginoo nagapangita sing kahigayunan sa pagsumpong sa mga Filistinhon. Sa sini nga tion ang mga Filistinhon nagagahom sa Israel.
5 Nagdulhog si Samson upod sa iya amay kag iloy pakadto sa Timna. Sang nagapakadto sila sa talamnan sang ubas didto, nabatian niya ang bataon nga leon nga nagangurob sa iya.
6 Pero si Samson ginhatagan sing kusog sang espiritu sang Ginoo. Gindakop niya ang leon kag ginpihak sang iya lamang kaugalingon nga mga kamot, nga daw pareho lamang sang tinday nga kanding. Pero wala niya pagsugiri ang iya amay kag iloy sang iya ginhimo.
7 Dayon nagkadto si Samson kag naghambal sa dalaga, kag naluyag sia sa dalaga.
8 Sang makaligad ang pila ka adlaw nagbalik si Samson sa pagpangasawa sa iya. Naglipas sia sa dalan sa pagtan-aw sang leon nga iya ginpatay, kag natingala sia sang makita niya nga ginapungyotan ini sang mga putyokan, nga may dugos sa sulod sang patay nga lawas sang leon.
9 Ginsandok niya sang iya kamot ang dugos kag ginkaon niya ini samtang nagalakat sia. Nagkadto sia sa iya amay kag iloy kag ginhatagan niya sila. Nagkaon sila, pero wala sila pagsugiri ni Samson nga ginkuha niya ang dugos sa lawas sang leon nga patay.
10 Nagkadto ang iya amay sa balay sang dalaga, kag si Samson nagpapunsyon didto. Amo ini ang kinabatasan sang pamatan-on nga mga lalaki.
11 Sang makita sia sang mga Filistinhon nagdala sila sing 30 ka pamatan-on nga mga lalaki sa pag-upod sa iya.
12-13 Nagsiling si Samson sa ila, "Pakta ninyo ini nga paktakon. Pustahan ko kamo sing 30 ka panid nga mapino nga lino, kag 30 ka ilislan nga malahalon nga mga bayu, nga indi kamo makapakot sang kahulogan sini nga paktakon sa wala pa matapos ang pito ka adlaw nga punsyon." Nagsiling sila sa iya, "Sugiri kami sang paktakon, kay pamatian namon."
14 Nagsiling si Samson: "Halin sa manugkaon nakuha ang kalan-on, halin sa makusog nakuha ang katam-is." Sa tapos ang tatlo ka adlaw, indi pa gid nila mapakton kon ano ang kahulogan sang paktakon.
15 Sang ikap-atu ka adlaw ginsingganan nila ang asawa ni Samson, "Uloulohi ang imo bana nga sugiran kami sang kahulogan sang paktakon. Kon indi ka, sunogon namon ang balay sang imo amay asta ikaw. Kamo nag-agda sa amon agod paimulon kami. Indi bala matuod ini?"
16 Gani ang asawa ni Samson nagkadto sa iya nga nagahibi kag nagsiling, "Wala mo ako ginahigugma, kundi ginadumtan mo ako! Ginhatagan mo sing paktakon ang akon mga abyan, pero wala mo ako pagsugiri sang kahulogan sini!" Si Samson nagsiling sa iya, “Pamati bala anay, wala ko gani pagsugiri ang akon amay kag iloy. Ngaa nga sugiran ko ikaw?"
17 Nagpadayon sa paghibi ang asawa ni Samson sa sulod sang pito ka adlaw sang punsyon tungod sini. Pero sa ikapito nga adlaw ginsugiran sia ni Samson sang sabat, kay nagapamilit gid sia nahanungod sini. Iya dayon ginsugiran ang mga Filistinhon.
18 Gani sa ikapito nga adlaw sa wala pa  makasulod si Samson sa kuwarto, nagsiling sa iya ang mga tawo sang siyudad: "Ano bala ang matam-is pa sa dugos? Ano bala ang makusog pa sa leon?" Nagsabat si Samson: "Kon wala ninyo pag-iarado ang akon baka, wala kuntani kamo makapakot sang akon paktakon.”
19 Nian ginhatagan si Samson sang espiritu sang Ginoo sing kusog, kag nagkadto sia sa Askalon. Ginpatay niya ang 30 ka mga lalaki didto, ginkawatan sila, kag ginhatag niya ang ila malahalon nga mga bayu sa mga tawo nga nagpakot sang iya paktakon. Nagpauli sia nga nagabalingaso sa kaakig tungod sa natabo.
20 Ang asawa ni Samson ginpaasawa sa lalaki nga kaubay sa iya kasal.


uAng iban nga dumaan nga pagbadbad ikap-at; sa Hebreo ikapito.


MGA HUKOM - Kapitulo 13

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Ang Pagkatawo ni Samson
1 Ang mga Israelinhon nagpakasala liwat batok sa Ginoo, kag iya sila ginpagamhan sa mga Filistinhon sa sulod sang 40 ka tuig.
2 May isa ka tawo nga ginhingalanan kay Manoa, nga taga-Sora, kag isa sia ka katapo sang tribo ni Dan. Ang iya asawa wala gid makapamata.
3 Nagpakita ang anghel sang Ginoo sa iya kag nagsiling, "Wala gid ikaw makapamata, pero sa indi madugay magabusong ikaw kag magaanak sing isa ka bata nga lalaki.
4 Tandaan mo nga indi ka gid mag-inom sing bino ukon makahulobog nga ilimnon, ukon magkaon sang ginadilian nga mga pagkaon,
5 kay karon magabusong ka kag magaangkon sang isa ka anak nga Ialaki. Indi mo sia pagguntingan sang iya buhok, kay sa adlaw sang iya pagkatawo, pagaihalad sia sa Dios subong isa ka Nazareo.s Sia ang magasugod sa pagluwas sa Israel gikan sa mga Filistinhon."
6 Nian nagkadto ang babayi sa iya bana kag ginsugiran sia, "Nagkadto sa akon ang isa ka tawo sang Dios, nga ang iya dagway makakulogmat pareho sang anghel sang Dios. Wala ako magpamangkot sa iya kon diin sia maghalin, kag wala man sia magsugid sa akon sang iya ngalan.
7 Pero nagsiling sia nga magabusong ako kag makaangkon sing anak nga lalaki. Ginsingganan niya ako nga indi mag-inom sing bino ukon makahulobog nga ilimnon, ukon magkaon sang ginadilian nga mga pagkaon, kay ang bata pagaihalad sa Dios subong isa ka Nazareo halin sa iya pagkatawo tubtob mapatay sia."
8 Nian nagpangamuyo si Manoa sa Ginoo, "Ginoo, kon mahimo, pabalika sa amon ang tawo sang Dios nga imo ginpadala, kag sugiri kami kon ano ang dapat namon himuon sa bata sa iya pagkatawo."
9 Ginhimo sang Dios ang ginpangayo ni Manoa, kag ang anghel sang Dios nagbalik sa babayi sang nagalingkod sia sa latagon, pero si Manoa nga iya bana wala didto kaupod niya.
10 Gani nagdalagan sia gilayon sa pagsugid sa iya bana, "Abi mo, ang tawo nga nagkadto sa akon sang isa ka adlaw, nagpakita liwat sa akon."
11 Nagtindog si Manoa kag nag-upod sa iya asawa. Ginkadtuan niya ang tawo kag ginpamangkot, "Ikaw bala ang tawo nga naghambal sa akon asawa?" Nagsabat  sia, “Huo."
12 Nian nagsiling si Manoa, "Gani karon, kon ang imo ginsiling matuod, ano bala ang pagginawi sang bata? Ano bala ang iya pagahimuon?"
13 Nagsabat ang anghel sang GINOO kay Manoa, "Kinahanglan tumanon sang imo asawa ang tanan nga akon ginsiling sa iya.
14 Indi sia magkaon sang bisan ano nga nagagikan sa balagon sang ubas. Indi sia mag-inom sing bino ukon makahulobog nga ilimnon, ukon magkaon sang ginadilian nga mga pagkaon. Kinahanglan tumanon niya ang tanan nga akon ginsiling sa iya.”
15-16 Si Manoa nga wala makahibalo nga isa sia ka anghel sang Ginoo, nagsiling sa iya, "Kon mahimo indi ka anay maglakat. Maluto pa kami sing tinday nga kanding para sa imo." Pero nagsiling ang anghel sa iya, "Kon magpabilin ako, indi ako magkaon sang imo pagkaon. Pero kon luyag ka mag-aman sina, sunoga ina subong nga halad sa Ginoo."
17 Nagsiling si Manoa sa anghel, "Sugiri kami sang imo ngalan, agod mapadunggan namon ikaw kon magmanginmatuod ang imo ginsiling."
18 Nagpamangkot ang anghel sa iya, "Ngaa bala luyag mo gid mahibaluan ang akon ngalan? Isa ini ka misteryo."
19 Gani nagkuha si Manoa sing tinday nga kanding kag mga uyas, kag ginhalad sa ibabaw sang altar nga bato para sa Ginoo sang mga misteryo.t
20 Samtang nagapaibabaw ang dabdab sang kalayo halin sa altar, nakita ni Manoa kag sang iya asawa ang anghel sang Ginoo nga nagapaibabaw pakadto sa langit sa mga dabdab. Dayon naghapa sila sa duta.
Nakita ni Manoa kag sang iya asawa ang anghel sang GINOO. (13:20)
21 Kag wala na gid liwat makita ni Manoa kag sang iya asawa ang anghel. Nahibaluan ni Manoa nga yadto nga tawo amo ang anghel sang Ginoo.
22 Nagsiling si Manoa sa iya asawa, "Mapatay gid kita, kay nakita naton ang Dios!"
23 Pero ang iya asawa nagsabat, "Kon luyag sang Ginoo nga patyon kita, wala niya kuntani pagbatuna ang aton mga halad. Wala niya kuntani ginpakita ini tanan nga mga butang sa aton, ukon ginsugiran sini tanan nga mga butang sa sini nga tion."
24 Ang babayi nag-anak sang isa ka bata nga lalaki, kag ginhingalanan niya sia kay Samson. Nagdaku ang bata kag ginbendisyunan sia sang Ginoo.
25 Kag ang espiritu sang Ginoo nagsugod sa pagpanghikot sa iya, samtang didto sia sa kampamento sang Dan, sa gin-utlan sang Sora kag Estaol.


sNAZAREO: Isa ka tawo nga nagpakita sang iya pagkadebotado sa Dios paagi sa iya pagsaad nga indi mag-inom sang bino ukon magpagunting ukon magtandog sang lawas sang patay (Num. 6:1-8).
tAng iban nga dumaan nga pagbadbad sang mga misteryo; sa Hebreo kag nagahimo sing mga misteryo samtang nagatan-aw si Manoa kag ang iya asawa.


MGA HUKOM - Kapitulo 12

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Jepte kag ang Efraimnon
1 Gintipon ang mga tawo sang Efraim sa pagpakig-away kag nagtabok sila sa Suba sang Jordan pakadto sa Sapon, kag nagsiling sila kay Jepte, “Ngaa man nagtabok ikaw sa pagpakig-away sa mga Amonhon nga wala magsiling sa amon sa pag-upod sa inyo? Tutdan namon ang imo balay nga yara ka sa sulod."
2 Pero nagsiling si Jepte sa ila, "Ang akon mga tawo kag ako may daku nga kaawayon sa mga Amonhon. Nagpangayo ako sing bulig sa inyo, pero indi ninyo ako pagtabangan sa ila.
3 Sang pagkahibalo ko nga indi ninyo ako pagtabangan, nagpasimpalad ako sang akon kabuhi kag nagtabok ako sa pagpakig-away sa mga Amonhon. Ang Ginoo nagpadaog sa akon batok sa ila. Karon, ngaa bala nagakari kamo sa pagpakig-away sa akon?"
4 Dayon gintipon ni Jepte ang tanan nga mga tawo sang Galaad, kag gin-away ang mga tawo sang Efraim kag ginlutos sila. Nagsiling ang mga Efraimnon, "Kamo nga mga Galaadnon sa Efraim kag Manases, mga lauglaog kamo halin sa Efraim!”
5 Gin-agaw sang mga Galaadnon ang mga talabukan sang suba sang Jordan, agod indi makatabok ang mga Efraimnon. Kon may isa ka Efraimnon nga luyag sa pagpalagyo kag magpangayo sing pahanugot sa pagtabok, ang mga tawo sang Galaad magapamangkot sa iya, "Isa bala ikaw ka Efraimnon?" Kon magsiling sila, "Indi,"
6 sugoon nila sia nga magsiling "Sihibolet." Pero magasiling sia “Sibolet,” kay indi sia sini makasampot sa paghambal. Ila dayon sia dakpon kag patyon didto sa talabukan sang Suba sang Jordan. Sadto nga panahon, 42,000 ka mga Efraimnon ang ginpamatay.
7 Si Jepte nga Galaadnon, nagpangulo sa Israel sa sulod sang anom ka tuig. Sang ulihi napatay sia kag ginlubong sa iya kaugalingon nga banwa sa Galaad.
Sanday Ibsan, Elon, kag Abdon
8 Madason kay Jepte, si Ibsan nga taga-Betlehem amo ang nagpangulo sa Israel.
9 May 30 sia ka mga anak nga lalaki. Ginpaban-an niya ang iya 30 ka mga anak nga babayi sang indi niya mga kabaranggayan, kag nagdala sia sing 30 ka mga babayi nga indi gikan sa iya mga kabaranggayan para ipaasawa sa iya mga anak nga mga lalaki. Nanginpangulo si Ibsan sa Israel sa sulod sang pito ka tuig,
10 kag sang ulihi napatay sia, kag ginlubong sa Bethlehem.
11 Madason kay Ibsan, si Elon nga taga-Sabulon amo ang nagpangulo sa Israel sa sulod sang napulo ka tuig.
12 Kag sang ulihi napatay sia, kag ginlubong sa Ayalon sa duta sang Sabulon.
13 Madason kay Elon, si Abdon nga anak nga lalaki ni Hilel nga taga-Piraton, nagpangulo sa Israel.
14 May 40 sia ka mga anak nga lalaki kag 30 ka mga apo nga lalaki nga nagasakay sa 70 ka mga asno. Nanginpangulo si Abdon sa Israel sa sulod sang walo ka tuig.
15 Kag sang ulihi napatay sia, kag ginlubong sa Piraton sa duta sang Efraim, sa kabakuloran sang mga Amaleknon.


MGA HUKOM - Kapitulo 11

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Jepte
1 Si Jepte nga taga-Galaad, isa ka maisog nga soldado. Ang iya amay si Galaad, kag ang iya iloy isa ka babayi nga nagabaligya sang iya dungog.
2 Si Galaad may mga anak man nga lalaki sa iya asawa, kag sang nagdalagku na sila, gintabog nila si Jepte kag ginsingganan, "Wala gid ikaw sing panublion bisan ano sa amon amay, kay ikaw anak sang iban nga babayi."
3 Nagpalagyo si Jepte gikan sa iya mga kautoran, kag nagpuyo sia sa duta sang Tob. Nagpakig-upod sa iya ang Iandulando nga mga tawo, kag nag-updanay sila sa paglibutlibot.
4 Sang ulihi, nagpakig-away ang mga Amonhon batok sa Israel.
5 Sang matabo ini, ginkadtuan sang mga pangulo sang Galaad si Jepte agod dalhon sia pabalik gikan sa duta sang Tob.
6 Ginsingganan nila sia, “Dali, pangulohi kami, agod makapakig-away kita batok sa mga Amonhon."
7 Pero nagsabat si Jepte, “Indi bala nga ginadumtan ninyo ako? Gintabog ninyo ako halin sa balay sang akon amay. Karon kay yara na kamo sa ital-ital, makari kamo sa akon?"
8 Nagsiling sila sa kay Jepte, "Nagadangop kami karon sa imo, kay luyag namon nga updan mo kami sa pagpakig-away sa mga Amonhon, kag magpangulo sa tanan nga mga tawo sang Galaad.”
9 Nagsiling si Jepte sa ila, “Kon dalhon ninyo ako pauli sa pagpakig-away sa mga Amonhon, kag kon padag-on ako sang Ginoo, manginpangulo ninyo ako."
10 Nagsabat sila, "Himuon gid namon ang imo ginasiling. Ang Ginoo amo ang amon saksi."
11 Gani nag-upod si Jepte sa mga pangulo sang Galaad, kag ginhimo sia sang mga tawo nga pangulo kag manugdumala nila. Ginhambal ni Jepte ang iya ginapangayo sa ila sa atubangan sang Ginoo sa Mispa.
12 Dayon nagpadala si Jepte sing mga mensahero sa hari sang mga Amonhon sa pagsiling, "Ano bala ang kabangdanan sang inyo pagpakig-away sa amon? Ngaa bala gingubat ninyo ang akon pungsod?"
13 Nagsabat ang hari sang mga Amonhon sa mga mensahero ni Jepte, "Tungod kay sang paggwa sang mga Israelinhon halin sa Egipto, gin-agaw nila ang akon duta, halin sa Suba sang Arnon tubtob sa Suba sang Jabok, kag tubtob sa Suba sang Jordan. Karon iuli ninyo ini sa matawhay nga paagi."
14 Nagpadala si Jepte sing mga mensahero pabalik sa hari sang mga Amonhon
15 upod sang iya sabat nga nagasiling, "Wala mag-agaw ang Israel sang duta sang Moab ukon sang duta sang Amon.
16 Sang paghalin sang mga Israelinhon sa Egipto, nag-agi sila sa desierto pakadto sa Mapula nga Dagat kag nakaabot sila sa Cades.
17 Dayon nagpadala sila sing mga mensahero sa hari sang Edom sa pagpangayo sing pahanugot sa pag-agi sa iya duta. Pero ang hari sang Edom indi magtugot sa pagpaagi sa ila. Nagpangayo man sila sing pahanugot sa hari sang Moab, kag indi man sia magtugot sa pagpaagi sa ila. Gani nagpabilin ang mga Israelinhon sa Cades.
18 "Gani nagpadayon sila nga nagalatas sa desierto. Naglibot sila sa duta sang Edom kag sa duta sang Moab, kag nakaabot sila sa sidlangan nayon sang Moab, sa tabok sang Suba sang Arnon.Naghimo sila sing kampamento didto, pero wala sila magtabok sa Suba sang Arnon, kay dulonan yadto sang Moab.
19 Dayon nagpadala ang mga Israelinhon sing mga mensahero kay Sihon, ang hari nga Amornon sang Hesbon, kag nagpangayo sang iya pahanugot sa pag-agi sa iya pungsod pakadto sa ila kaugalingon nga duta.
20 Pero indi magtugot si Sihon sa Israel sa pag-agi. Gintipon niya ang tanan niya nga mga hangaway, kag naghimo sing kampamento sa Jahas, kag ginsalakay ang Israel.
21 Pero ang Ginoo, ang Dios sang Israel, nagpadaog sang mga Israelinhon batok kay Sihon kag sa tanan niya nga mga tinawo. Gani gin-agaw sang mga Israelinhon ang tanan nga kadutaan sang mga Amornon nga nagpuyo sa sadto nga duta.
22 Ginpanag-iyahan nila ang tanan nga kadutaan sang Amornon halin sa Arnon sa bagatnan tubtob sa Habok sa aminhan, kag halin sa disierto sa Sidlangan tubtob sa Jordan sa nakatundan.
23 Gani ang GINOO, ang Dios sang Israel, amo ang nagtabog sang mga Amornon tungod sa mga Israelinhon nga iya mga tawo.
24 Nagatinguha bala kamo sa pagbawi sini? Sarang kamo makapanag-iya sang bisan ano nga ginhatag sa inyo sang inyo dios nga si Kemos, pero panag-iyahan namon ang tanan nga ginkuha sang Ginoo, nga amon Dios, para sa amon.
25 Nagadumdom bala kamo nga maayo pa kamo sa kay Balak, nga anak ni Sepor nga hari sang Moab? Wala gid sia maghangkat sa Israel, indi bala? Nagpakig-away bala sia batok sa amon?
26 Ginpanag-iyahan sang Israel ang Hesbon kag Aroer, kag ang mga banwa sa palibot nila, kag ang tanan nga mga siyudad sa pangpang sang Suba sang Arnon sa sulod sang 300 ka tuig. Ngaa bala wala ninyo pagbawia sa sini nga kalawigon?
27 Wala ako sing sayop nga nahimo sa imo. Nagsayop ka sa pagpakig-away sa akon. Ang Ginoo amo ang magahukom. Magahukom sia karon nga adlaw sa tunga sang mga Israelinhon kag mga Amonhon."
28 Pero ang hari sang mga Amonhon wala magsapak sa mensahi nga ginpadala sa iya ni Jepte.
29 Dayon gingamhan si Jepte sang espiritu sang Ginoo. Nag-agi sia sa Galaad kag sa Manases, kag nagbalik sia sa Mispa sa Galaad. Halin didto nagkadto sia sa Amon.
30 Nagsaad si Jepte sa Ginoo nga nagasiling, "Kon padag-on mo ako batok sa mga Amonhon,
31 igahalad ko subong nga halad nga sinunog ang nahauna nga tawo nga maggwa sa akon balay sa pagsugata sa akon, sa pag-abot ko halin sa akon pagdaog. Igahalad ko ina nga tawo sa imo subong halad nga sinunog.”
32 Gani nagtabok si Jepte sa suba sa pagpakig-away sa mga Amonhon, kag ginpadaog sia sang GINOO.
33 Ginsalakay niya sila halin sa Aroer tubtob sa mga kadutaan sa palibot sang Minit, duha ka pulo ka mga siyudad tanan, tubtob sa sapa sang Keramin. Madamo ang mga nagkalamatay, kag nalutos sang mga Israelinhon ang mga Amonhon.
Ang Anak nga Babayi ni Jepte
34 Sang pagbalik ni Jepte pauli sa Mispa, ang iya anak nga babayi naggwa sa pagsugata sa iya nga nagasaot kag nagatukar sang diutay nga tambor. Bugtong sia nga anak ni Jepte. Wala na si Jepte sing iban pa nga anak nga lalaki ukon babayi.
35 Sang pagkakita niya sang iya anak nga babayi, gingisi ni Jepte ang iya kaugalingon nga bayu tungod sa kasubo, kag nagsiling, "Abaw, anak ko! Ginabuong mo ang akon tagipusoon! Ngaa bala nga ikaw pa ang magpakalisod sa akon? Nakapanumpa na ako sa GINOO, kag indi ko na ini mabawi!"
36 Nagsiling ang anak nga babayi ni Jepte sa iya, "Kon nakapanumpa na ikaw sa Ginoo, tumana ang imo ginsumpa nga pagahimuon sa akon. Ang Ginoo naghatag sa imo sing pagtimalos sa imo mga kaaway nga mga Amonhon."
37 Pero nagsiling sia sa iya amay, "Amo lang ini ang akon ginapangayo: pabay-i lang ako sa sulod sang duha ka bulan, agod makaupod ako sa akon mga abyan pakadto sa mga kabukiran sa pagpangasubo, tungod kay dapat ako mapatay nga isa ka ulay.”
38 Gintugotan sia ni Jepte sa paglakat, kag nagpalayo sia sa kay Jepte sa sulod sang duha ka bulan. Sia kag ang iya mga abyan nagkadto sa mga kabukiran, kag nagpangasubo tungod kay mapatay sia nga isa ka ulay.
39 Sa tapos sang duha ka bulan nagbalik sia sa iya amay. Ginhimo ni Jepte ang iya ginsumpa sa Ginoo. Napatay ang iya anak nga babayi nga isa ka ulay. Amo ini ang ginsugoran sang kinabatasan sa Israel,
40 nga ang mga babayi nga Israelinhon nagalakat sa pagpangasubo sing apat ka adlaw sa tagsa ka tuig para sa anak nga babayi ni Jepte nga Galaadnon.


MGA HUKOM - Kapitulo 10

1 2 3 4 5 6 7 8 9 10 11 12 13 14 15 16 17 18 19 20 21 
◇◇◇◇◇
Si Tola kag si Jair
1 Madason kay Abimelec, nag-abot si Tola nga anak ni Pua kag apo ni Dodo, sa pagluwas sang Israel. Naggikan sia sa tribo ni Isacar, kag nagpuyo sa Samir sa kabakuloran sang Efraim.
2 Nanginpangulo sia sang Israel sa sulod sang 23 ka tuig, kag sa tapos sini napatay sia kag ginlubong sa Samir.
3 Madason sa iya, nag-abot si Jair gikan sa Galaad. Ginpangulohan niya ang Israel sa sulod sang 22 ka tuig.
4 May 30 sia ka mga anak nga lalaki nga nagasakay sa 30 ka mga asno. May 30 sila ka mga siyudad sa duta sang Galaad, nga ginatawag sa gihapon nga mga siyudad sang mga tolda sang Jair.
5 Napatay si Jair kag ginlubong sa Kamon.
Ginpigos sang mga Amonhon ang mga Israelinhon
6 Sa liwat ang mga Israelinhon nagpakasala batok sa Ginoo. Nagsimba sila sa mga Baal kag sa mga Astarot, sa mga dios sang Siria, sang Sidon, sang Moab, sang Amon, kag sang Filistia. Ginsikway nila ang Ginoo, kag nag-untat sila sa pagsimba sa iya.
7 Gani naakig ang GINOO sa mga Israelinhon, kag ginpalutos niya sila sa mga Filistinhon kag mga Amonhon.
8 Sadto nga tuig ginlutos kag ginpigos nila ang mga Israelinhon. Sa sulod sang 18 ka tuig ginpapiutan nila ang tanan nga mga Israelinhon nga nagpuyo sa sidlangan sang Suba sang Jordan sa Galaad, sa diin nagpuyo ang mga Amonhon.
9 Ang mga Amonhon nagtabok man sa Jordan sa pagpakig-away sa mga tribo nanday Juda, Benjamin, kag Efraim. Tungod sini ginbudlayan gid sing tama ang Israel.
10 Dayon nagpanawag ang mga Israelinhon sa Ginoo, kag nagsiling, "Nagpakasala kami batok sa imo, kay nagbiya kami sa imo nga amon Dios, kag nagsimba kami sa mga Baal."
11 Nagsabat ang  Ginoo sa mga Israelinhon, "Ang mga Egiptohanon, Amornon, Amonhon, Filistinhon,
12 Sidonhon, Ameleknon, kag Maonhon nagpigos sa inyo sang una, kag nagpangayo kamo sing bulig sa akon. Wala ko bala kamo pagluwasa sa ila?
13 Pero sa gihapon ginsikway ninyo ako, kag nagsimba kamo sa iban nga mga dios, gani indi ko na kamo pagtabangan liwat.
14 Kadto kamo kag magpanawag sa mga dios nga inyo ginpili. Kon yara kamo sa mga kapiutan, magpatabang kamo sa ila."
15 Pero ang mga Israelinhon nagsiling sa Ginoo, "Nagpakasala kami. Himoa ang luyag mo, pero kon mahimo luwasa kami karon nga adlaw."
16 Gani ginsikway nila ang ila mga dumoluong nga mga dios, kag nagsimba sila sa Ginoo, kag ang Ginoo natublag tungod sang kalisdanan sang Israel.
17 Dayon ang mga hangaway sang Amonhon nagtipon sing tingob kag naghimo sing kampamento sa Galaad. Nagtipon man sing tingob ang mga Israelinhon kag naghimo sing kampamento sa Mispa.
18 Nagpamangkutanay ang mga tawo kag ang mga pangulo sang Galaad nga nagasiling, "Sin-o bala ang magapangulo sa pagpakig-away sa mga Amonhon? Manginpangulo sia sang tanan sa Galaad."