JOSUE - Kapitulo 4

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

"Ano bala Ini nga mga Bato?"

1 Sang makatabok na ang mga lsraelinhon sa Jordan, ang Ginoo nagsiling kay Josue,
2 "Pili ka sing dose ka mga tawo, isa sa tagsa ka tribo,
3 kag mandoi sila, ‘Kuha kamo sing dose ka mga bato sa tunga sang Jordan, sa duog nga gintindugan sang mga pari. Dalha ninyo ini, kag ibutang ninyo sa duog nga inyo pagadulogan karon nga gab-i.'"
4 Dayon gintawag ni Josue ang dose ka mga tawo nga iya ginpili,
5 kag ginsingganan sila, "Kadto kamo sa tunga sang Jordan, nga nagauna sa Kaban sang Kasugtanan sang Ginoo nga inyo Dios. Ang kadaisa sa inyo magkuha kag magpas-an sing isa ka bato para sa tagsa ka tribo sang Israel.
6 Ini nga mga bato magapahanumdom sa mga tawo sang ginhimo sang Ginoo. Kon ang inyo mga kaanakan sa palaabuton magpamangkot sa inyo kon ano ang buot silingon sining mga bato,
7 sugiran ninyo sila nga ang tubig sang Suba sang Jordan nag-untat sa pag-ilig sang pagtabok sang Kaban sang Kasugtanan sang Ginoo. Ini nga mga bato magapahanumdom sa gihapon sang mga tawo sang Israel.”
8 Gintuman sang mga tawo ang mando ni Josue. Subong sang ginsiling sang Ginoo kay Josue, nagkuha sila sing dose ka mga bato sa tunga sang Suba sang Jordan, isa ka bato para sa tagsa ka tribo sang Israel, ginpas-an nila ini tubtob sa ila gindulogan kag ginpamutang didto.
9 Nagpahamtang man si Josue sing dose ka mga bato sa tunga sang suba sang Jordan, sa duog nga gintindugan sang mga pari nga nagadala sang Kaban sang Kasugtanan (ini nga mga bato yadto pa didto).
10 Ang mga pari nagtindog sa tunga sang Jordan tubtob natuman ang tanan nga ginsugo sang Ginoo kay Josue nga himuon sang mga tawo. Amo ini ang ginsugo ni Moises. Dayon ang mga tawo nagdalidali kag nagtabok.
11 Sang makatabok na sila tanan, ang Kaban sang Kasugtanan sang Ginoo kag ang mga pari naglakat nga nagauna sa mga tawo.
12 Ang mga lalaki sang mga tribo nanday Ruben kag Gad, kag ang katunga sang tribo ni Manases nag-una tabok sa tanan nga mga tawo, nga handa para sa inaway subong sang ginsiling ni Moises sa ila.
13 Samtang ang Ginoo nagatan-aw sa ila, mga 40,000 ka mga tawo nga handa para sa inaway nagtabok pakadto sa kapatagan nga malapit sa Jerico.
14 Ang mga tawo sang Israel nagpadungog kay Josue subong isa ka gamhanan nga tawo, tungod sang ginhimo sang GINOO sadto nga adlaw. Ila sia ginpadunggan sa bug-os niya nga kabuhi subong sang ila pagpadungog kay Moises.
15 Dayon ang Ginoo nagsiling kay Josue,
16 "Mandoi ang mga pari nga nagadala sang Kaban sang Kasugtanannga magtakas sila halin sa Suba sang Jordan."
17 Kag gintuman ini ni Josue.
18 Sang makatakas na ang mga pari sa mamala nga duta nag-ilig naman ang tubig, kag nag-awas naman sa iya mga pangpang.
19 Ang mga tawo nagtabok sa Jordan sang ika-14 nga adlaw sang Abril, ang nahauna nga bulan, kag naghimo sila sing kampamento sa Gilgal sa sidlangan nayon sang Jerico.
20 Didto ginpahamtang ni Josue ang dose ka mga bato nga ginkuha sa Suba sang Jordan.
21 Kag nagsiling sia sa mga tawo sang Israel, "Kon mamangkot ang mga kabataan sa ila mga ginikanan sa ulihi kon ano bala ini nga mga bato,
22 sugiran ninyo sila nga ang Israel nagtabok sa suba sang Jordan sa mamala nga duta.
23 Ang GINOO nga inyo Dios nagpamala sang Suba sang Jordan para sa inyo tubtob nakatabok kamo, subong nga iya man ginpamala ang Mapula nga Dagat tubtob nakatabok kami.
24 Tungod sini ang tanan nga mga tawo sang duta magakilala sang gahom sang GINOO, kag kamo magapadungog sa GINOO nga inyo Dios tubtob sa katubtoban."

JOSUE - Kapitulo 3 <<<   >>> JOSUE - Kapitulo 5