□□□□□
Ang Sungkod ni Aaron
1 Ang Ginoo nagsiling kay Moises,
2 "Singgana ang mga tawo sang Israel sa paghatag sa imo sang 12 ka mga sungkod, isa halin sa tagsa ka pangulo sang tagsa ka tribo. Isulat ang ngalan sang tagsa ka tawo sa iya sungkod
3 kag dayon isulat ang ngalan ni Aaron sa sungkod nga iya sang tribo ni Levi. May isa ka sungkod para sa tagsa ka pangulo sang tribo.
4 Ibutang ini tanan sa Tolda nga Tilipunan, sa atubangan sa Kaban sang Kasugtanan, sa diin ako magapakigkita sa inyo.
5 Dayon ang sungkod sang tawo nga akon ginpili magapanalingsing. Sa sini nga paagi pauntaton ko ang padayon nga pagreklamo sini nga mga Israelinhon batok sa imo.”
6 Gani si Moises naghambal sa mga Israelinhon, kag ang kadaisa sang ila mga pangulo naghatag sa iya sing sungkod, isa para sa tagsa ka tribo, 12 tanan, kag ang sungkod ni Aaron ginbutang upod sini.
7 Dayon ginbutang ni Moises ang tanan nga mga sungkod sa Tolda nga Tilipunan sa atubangan sang Kaban sang Kasugtanan sang Ginoo.
8 Sang madason nga adlaw, sang pagsulod ni Moises sa Tolda, nakita niya nga ang sungkod ni Aaron nga iya sang tribo ni Levi, nagpanalingsing. Nanglumbay ini, namulak, kag nagpamunga sing mga almendra nga luto!
9 Ginkuha ni Moises ang tanan nga mga sungkod kag ginpakita niya ini sa mga Israelinhon. Nakita nila ang nahanabo kag ang tagsa ka pangulo nagkuha sang iya kaugalingon nga sungkod.
10 Ang Ginoo nagsiling kay Moises, "Iuli ang sungkod ni Aaron sa atubangan sang Kaban sang Kasugtanan. Pagataguon ini subong isa ka paandam sa mga rebelde nga mga Israelinhon, nga magakalamatay sila, kon indi sila mag-untat sang ila mga pagreklamo."
11 Ginhimo ini ni Moises suno sa sugo sang Ginoo.
12 Ang mga tawo sang Israel nagsiling kay Moises, "Kon amo katapusan na namon ini!
13 Kon ang bisan sin-o lang nga magpalapit sa Tolda nga Tilipunan mapatay, kon amo pareho lang nga patay na kami tanan!"
No comments:
Post a Comment