♡♡♡♡♡
Nalutos ang mga Amornon
1 Ang hari sang Jerusalemc nga si Adoni-sedek, nakabati nga gin-agaw kag ginlaglag sing bug-os ni Josue ang Ay kag ginpatay ang hari sini, subong sang iya ginhimo sa Jerico kag sa iya hari. Nakabati man sia nga ang mga taga-Gabaon nagpakighidait sa mga Israelinhon kag nagapuyo kaupod nila.2 Ang mga pumoluyo sang Jerusalem nagkahadlok gid sing tama, kay ang Gabaon daku nga siyudad sa tanan nga mga siyudad nga may mga hari, kag daku pa gani ini sa Ay, kag ang iya mga kalalakin-an maisog nga mga hangaway.
3 Gani nagpasugo si Adoni-sedek sa kay Hoham, nga hari sang Hebron, sa kay Piram, nga hari sang Harmot, sa kay Hapia, nga hari sang Lakis, kag sa kay Debir, nga hari sang Eglon:
4 "Karikamo kag buligi ninyo ako sa pagsalakay sa Gabaon, kay ang iya mga pumoluyo nagpakighidait kay Josue kag sa mga tawo sang Israel.”
5 Ining lima ka mga hari nga Amornon, ang mga hari sang Jerusalem, Hebron, Harmut, Lakis kag Eglon, nagtingob upod sang ila mga hangaway, kag ginlibutan nila ang Gabaon, kag ginsalakay ini.
6 Ang mga pumoluyo sang Gabaon nagpangayo sing bulig kay Josue sa kampamento sang Gilgal nga nagasiling, "Sir, indi kami pagpabay-i! Kari ka gilayon kag tabangi kami! Luwasa kami! Ang tanan nga mga hari nga Amornon sa mga kabakuloran nagtingob sa pagsalakay sa amon!"
7 Gani si Josue kag ang bug-os niya nga hangaway nagtaklad gikan sa Gilgal.
8 Ang GINOO nagsiling kay Josue, "Indi ka magkahadlok sa ila. Ginhatag ko na sa imo ang pagdaog. Wala sing isa sa ila nga makasarang sa imo."
9 Sa bug-os nga gab-i si Josue naglakat halin sa Gilgal, kag ginsalakay niya sila sing hinali.
10 Ginpasalangisag sila sang Ginoo sa atubangan sang mga hangaway sang Israel. Ginpamatay sila sang mga Israelinhon sa Gabaon, kag ginpanglagas sila padulhog sa bukid sang Bethoron nga nagapakig-away tubtob sa nabagatnan sa Aseka kag sa Makeda.
11 Samtang nagapalagyo sila sa mga hangaway nga Israelinhon padulhog sa makitid nga alagyan sa Bethoron pakadto sa Aseka, ginpangdagdagan sila sang Ginoo sang dalagku nga mga yelo gikan sa langit kag nagkalamatay sila. Madamo pa ang nagkalamatay paagi sa mga yelo nga daw bato sang sa ginpamatay sang mga Israelinhon.
12 Sa adlaw nga ang Ginoo nagpadaog sang mga tawo sang Israel batok sa mga Amornon, si Josue naghambal sa GINOO. Nagsiling sia sa atubangan sang mga Israelinhon: "Adlaw, magdulog ka sa ibabaw sang Gabaon, bulan, magpabilin ka sa ibabaw sang Kapatagan sang Ayalon.”
13 Ang adlaw nagdulog kag ang bulan wala maghulag tubtob nadaog sang pungsod sang Israel ang iya mga kaaway. Nasulat ini sa libro ni Haser. Ang adlaw nagdulog sa tunga sang langit, kag wala ini maglakat sa pagtunod sa bug-os nga adlaw.
14 Wala pa gid sing adlaw nga kasubong sini halin sang una nga ang GINOO nagtuman sa isa ka tawo, kag nagpakig-away sa pagdampig sa Israel.
15 Dayon si Josue kag ang iya nga hangaway nagbalik sa kampamento sa Gilgal.
16 Nakapalagyo ang lima ka mga hari, kag nagpanago sila sa kuweba sa Makeda.
17 Nakit-an sila, kag ginsugiran si Josue nga nagapanago sila didto.
18 Nagsiling si Josue, "Paligiri ninyo sing dalagku nga mga bato ang puwerta sang kuweba. Magbutang kamo sing mga gwardya didto,
19 pero kamo inyo indi magpabilin didto. Lagsa ninyo ang mga kaaway kag salakaya sila gikan sa likod. Indi sila pagpasudla sa ila mga siyudad! Ang Ginoo nga inyo Dios magapadaog sa inyo batok sa ila."
20 Si Josue kag ang mga tawo sang Israel nagpamatay sa ila. Ang mga nakapalagyo nagpanago sa sulod sang siyudad nga nalibutan sing pader.
21 Dayon ang tanan nga mga tinawo ni Josue nakabalik sa iya nga wala maano sa kampamento sa Makeda. Wala sing may nangahas sa paghambal sing malain batok sa bisan sin-o nga tawo sa Israel.
22 Karon si Josue nagsiling, "Abrihi ninyo ang puwerta sang kuweba, kag dalha ninyo pa gwa diri sa akon ang lima ka mga hari.”
 |
| "Dalha ninyo pa gwa diri sa akon ang lima ka mga hari." (10:22) |
24 Sang madala na ang mga hari sa kay Josue, gintawag niya ang tanan nga mga tawo sang Israel sa pagpalapit sa iya, kag ginmanduan ang mga opisyales nga nag-upod sa iya, “Kari kamo, kag linasa ninyo ang mga liog sining mga hari.” Ginhimo nila ini.
25 Dayon si Josue nagsiling sa ila, "Indi kamo magkahadlok ukon magpakaluya. Magpakalig-on kamo kag magpakaisog, kay ang Ginoo magahimo sini sa tanan ninyo nga mga kaaway."
26 Karon ginpamatay ni Josue ang mga hari kag ginbitay sila sa lima ka mga kahoy diin nagpabilin sila tubtob sa gab-i.
27 Sang pagtunod sang adlaw, nagmando si Josue, kag ginkuha sila kag ginhaboy sila sa kuweba diin sila nagpanago. Gintabunan sing dalagku nga mga bato ang puwerta sang kuweba, kag didto pa sila tubtob karon.
28 Ginsalakay ni Josue kag gin-agaw ang Makeda kag ang iya hari sa sadto nga adlaw. Ginpamatay niya ang tanan nga yara sa siyudad, kag wala gid sing isa nga nabilin nga buhi. Ginhimo niya sa hari sang Makeda ang iya man ginhimo sa hari sang Jerico.
29 Sa tapos sini, si Josue kag ang iya mga hangaway nagpadayon sa paglakat halin sa Makeda pakadto sa Libna, kag ginsalakay nila ini.
30 Ang Ginoo nagpadaog sa mga Israelinhon batok sa sini nga siyudad kag sa iya hari. Ginpamatay ang tagsa ka tawo sa siyudad kag wala sia sing ginbilin bisan isa. Ginhimo niya sa hari ang iya man ginhimo sa hari sang Jerico.
31 Sa tapos sini, si Josue kag ang iya mga hangaway nagpadayon sa paglakat halin sa Libna pakadto sa Lakis. Ginlibutan nila ini kag ginsalakay.
32 Ginpadaog sang Ginoo ang mga Israelinhon batok sa Lakis sa ikaduha nga adlaw sang pag-inaway. Subong sang iya ginhimo sa Libna, wala sia sing ginbilin nga buhi, kundi ginpamatay niya ang tanan nga mga tawo.
33 Dayon si Horam nga hari sang Geser, nag-abot sa pagbulig sa Lakis, pero ginlutos sia ni Josue kag sang iya mga tinawo, kag wala gid sing isa sa ila nga nabilin nga buhi.
34 Sa tapos sini, si Josue kag ang iya mga hangaway nagpadayon sa paglakat halin sa Lakis pakadto sa Eglon. Ginlibutan nila ini kag ginsalakay.
35 Sa amo man nga adlaw gin-agaw nila ini kag ginpamatay ang tanan nga yadto didto, subong sang ginhimo niya sa Lakis.
36 Sa tapos sini, si Josue kag ang iya hangaway nagpadayon sa paglakat halin sa Eglon kag nagtaklad pakadto sa kabakuloran sang Hebron. Ginsalakay nila ini
37 kag gin-agaw. Ginpatay nila ang hari, kag ang tanan nga mga tawo sa siyudad, kag subong man ang sa mga kaingod nga mga banwa. Ginlaglag gid sing bug-os ni Josue ang siyudad, subong sang iya ginhimo sa Eglon. Wala sing isa nga nabilin nga buhi.
38 Nian si Josue kag ang iya mga hangaway nagbalik sa Debir kag ginsalakay ini.
39 Gin-agaw niya ini lakip ang hari kag ang tanan nga kaingod nga mga banwa. Ginpamatay nila ang tanan nga mga tawo didto. Ginhimo ni Josue sa Debir kag sa iya hari ang iya ginhimo sa Hebron, Libna, kag sa ila mga hari.
40 Nadaog ni Josue ang bug-os nga duta. Ginpanglutos niya ang mga hari sa kabakuloran, sa mga duog sang Negeb, sa mga kapatagan, kag sa mga kunsaran sang mga bakulod. Wala sing isa nga iya ginluwas, kundi ginpamatay niya ang tanan. Amo ini ang ginsugo sang Ginoo nga Dios sang Israel.
41 Ginpanglutos sila ni Josue halin sa Cades Barnea sa nabagatnan pakadto sa Gasa malapit sa baybayon, lakip ang tanan nga mga duog sa Gosen, tubtob sa naaminhan sa Gabaon.
42 Nadaog ni Josue ini tanan nga mga hari kag ang ila mga kadutaan sa isa lang ka pagsalakay, kay ang Ginoo nga Dios sang Israel, nagpakig-away tungod sa Israel.
43 Sa tapos sini, si Josue kag ang iya mga hangaway nagbalik sa kampamento sa Gilgal.
cJERUSALEM: Sa sadto nga tion siyudad ini sang Jebusnon.
No comments:
Post a Comment