♡♡♡♡♡
Si Josue kag ang mga Taga-Gabaon
1 Nabatian ini sang tanan nga mga hari sa nakatundan sang Jordan, nga yara sa kabakuloran, sa kapatagan, kag ang tanan nga yara sa baybayon sang Dagat sang Mediteraneo tubtob sa naaminhan sa Libano. Amo ini ang mga hari sang mga Hethanon, mga Amornon, mga Canaanhon, mga Peresnon, mga Hebhanon, kag mga Hebusnon.2 Sila tanan nagtingob sa pagpakig-away batok kay Josue kag sa Israel.
3 Sang mabatian sang mga tawo sang Gabaon ang ginhimo ni Josue sa Jerico kag sa Ay,
4 nagpamat-od sila sa paglimbong sa iya. Naglakat sila kag nagkuha sing mga kalan-on, ginkargahan nila ang ila mga asno sing daan nga mga sako kag mga panit nga sulodlan sing bino nga gision na, kag may mga tukap.
5 Nagsuksok sila sing daan na kaayo nga mga sandalyas nga natukapan kag mga lapat na nga mga bayu. Ang tinapay nga ila ginbalon matig-a na kag agup-opon.
6 Dayon nagkadto sila kay Josue didto sa kampamento sa Gilgal, kag nagsiling sa iya kag sa mga tawo sang Israel, "Halin pa kami sa malayo nga duta. Maghimo kamo sing kasugtanan upod sa amon."
7 Pero ang mga tawo sang Israel nagsiling sa mga Hebhanon, "Ngaa man maghimo kami sing kasugtanan sa inyo? Basi malapit lang ang inyo ginapuy-an.”
8 Nagsiling sila sa kay Josue, "Yari kami sa pag-alagad sa imo." Si Josue nagpamangkot sa ila, "Sin-o bala kamo? Sa diin kamo maghalin?"
9 Dayon nagpanu- giron sila nga nagasiling: "Nagkari kami halin sa malayo pa nga duta, sir. Kay nakabati kami nahanungod sang Ginoo nga imo Dios. Nabalitaan namon ang tanan nga iya ginhimo sa Ehipto,
10 kag ang iya ginhimo sa duha ka hari nga Amornon sa sidlangan sang Jordan: sa kay Sihon nga hari sang Hesbon, kag sa kay Og nga hari sang Basan, nga nagapuyo sa Astarot.
11 Ang amon mga pangulo, kag ang tanan nga mga tawo nga nagapuyo sa amon duta nagsiling sa amon, 'Maghanda kamo sing kalan-on nga balalunon para sa panglakaton. Lakat kamo sa pagsugata sini nga mga tawo kag singgana sila, "Yari kami sa pag-alagad sa imo. Kon mahimo, maghimo ka sing kasugtanan upod sa amon."'
12 Tan-awa ang amon tinapay. Sang paglakat namon sa pagsugata sa imo, kag sa amon paghalin sa amon puloy-an, mainit-init pa ini. Pero tan-awa bala! Matig-a na sila kag agup-opon.
13 Sang sudlan namon sing bino ini nga mga panit, bag-o pa ini, pero tan-awa bala! Gision na ini. Ang amon mga bayu kag mga sandalyas nagkalagisi na tungod sang malawig kaayo nga pagpanglakaton.”
14 Ang mga tawo sang Israel nagtilaw sang pagkaon, pero wala sila magpangayo sang laygay sa Ginoo.
15 Gani si Josue nagpakighidait sa ila, kag naghimo sing kasugtanan sa ila nga pahanugotan sila nga mabuhi. Ang mga pangulo sang katilingban sang Israel nagsumpa sa ila.
16 Sang makaligad ang tatlo ka adlaw sa tapos mahimo ang kasugtanan, nahibal-an sang mga Israelinhon nga malapit lang ang ginapuy-an sini nga mga tawo.
17 Gani naglakat ang mga tawo sang Israel, kag sa tapos ang tatlo ka adlaw nakaabot sila sa mga siyudad nga ginpuy-an sini nga mga tawo. Ang mga siyudad sang Gabaon, Kapira, Beerot, kag ang Kiryatearim.
18 Pero ang mga Israelinhon indi makapamatay sa ila, kay ang ila mga pangulo nagsumpa sa sini nga mga tawo sa ngalan sang Ginoo, ang Dios sang Israel. Ang tanan nga mga tawo nagreklamo sa mga pangulo tungod sini.
19 Pero ang mga panguIo nagsabat, "Nagsumpa kami sa ila sa ngalan sang Ginoo, ang Dios sang Israel. Karon indi na kami makahalit sa ila.
20 Kinahanglan pabay-an naton nga mabuhi sila, tungod sang aton sumpa. Kon indi, ang Dios magasilot sa aton.
21 Pabay-i sila nga mabuhi, apang magapangahoy sila kag magasag-ob sing tubig para sa aton." Amo ini ang panugyan sang mga pangulo.
22 Ginpatawag ni Josue ang mga taga-Gabaon, kag ginpamangkot sila, "Ngaa man ginlimbungan ninyo kami kag ginsugiran nga naghalin pa kamo sa malayo nga duog, nga taga-diri man lang gali kamo?
23 Tungod sining inyo ginhimo ginpakamalaut kamo sang Dios. Mangin-ulipon kamo sa gihapon nga magapangahoy kag magasag-ob sing tubig para sa Templo sang akon Dios.”
24 Nagsabat sila kay Josue, "Amo ini ang amon ginhimo, sir, kay nakahibalo kami nga matuod gid nga ang Ginoo nga inyo Dios nagsugo sa iya alagad nga si Moises sa paghatag sa inyo sang bug-os nga duta, kag sa pagpamatay sa mga tawo nga nagapuyo sa duta samtang nagaabanse kamo. Ginhimo namon ini kay nahadlok gid kami sa inyo, kag nahadlok kami mapatay.
25 Karon yari kami sa imo gahom. Pagusto ikaw kon ano ang luyag mo nga himuon sa amon."
26 Gani gin-apinan sila ni Josue sa mga tawo sang Israel, kag wala niya sila ginpapatay.
27 Pero ginhimo nila sila nga mga manugpangahoy kag manugsag-ob sang tubig para sa mga tawo kag sa altar sang Ginoo. Tubtob karon nga adlaw nagapadayon sila sa paghimo sini, nga nagaalagad sa mga duog nga ginapili sang GINOO nga sia pagasimbahon.
No comments:
Post a Comment