□□□□□
Ang mga Trumpeta nga Pilak
1 Ang Ginoo nagsiling kay Moises,
2 “Maghimo ka sing duha ka trumpeta nga pinapa nga pilak agod gamiton sa pagtipon sang mga tawo sing tingob kag para sa paghalin sang kampamento.
3 Kon magpatunog sing malawig ang duha ka trumpeta, ang bug-os nga katilingban magtipon sa palibot mo sa puwertahan sang Tolda nga Tilipunan.
4 Pero kon isa lamang ka trumpeta ang magtunog, ang mga pangulo lamang sang mga kabaranggayan ang magtipon sa imo palibot.
5 Kon malip-ot lamang nga mga pagpatunog ang mabatian, ang mga tribo nga naghimo sing kampamento sa sidlangan amo ang magalakat.
6 Kon ang malip-ot nga mga pagpatunog ang mabatian sa ikaduha nga tion, ang mga tribo sa bagatnan amo ang magalakat. Gani kon maghalin ang kampamento, mabatian ang malip-ot nga mga pagpatunog sang trumpeta,
7 pero sa pagtawag sing tingob sang katilingban patunogon sing malawig ang mga trumpeta.
8 Ang mga anak nga lalaki ni Aaron, nga mga pari, amo ang magapatunog sang mga trumpeta. "Ang masunod nga mga pagsulondan amo ang pagatumanon sa tanan nga panahon nga palaabuton.
9 Kon may inaway sa inyo duta, nga nagaapin kamo sang inyo kaugalingon batok sa kaaway nga naggubat sa inyo, patunoga ninyo ang mga trumpeta, sa pagpahibalo sang inaway. Ako, ang GINOO nga inyo Dios, magabulig sa inyo kag magaluwas sa inyo, sa inyo mga kaaway.
10 Sa inyo man mga kasadyahan, sa inyo mga Piesta sang Lati kag sa iban ninyo nga mga piesta kinahanglan patunogon ninyo ang mga trumpeta kon magdulot kamo sang inyo mga halad nga sinunog kag mga halad sa paghiambit. Dayon ako magabulig sa inyo. Ako amo ang Ginoo nga inyo Dios.”
Ang mga Israelinhon Naghalin sing Kampamento
11 Sa ika-20 nga adlaw sang ikaduha nga bulan sa ikaduha nga tuig sa tapos makahalin ang mga tawo sa Egipto, ang panganod sa ibabaw sang Tolda nga Tilipunan nag-alsa,
12 kag ang mga Israelinhon nagsugod sang ila pagpanglakaton halin sa desierto sang Sinai. Ang panganod nagdulog sa desierto sang Paran.
13 Nagsugod sila sa paglakat sa mando sang Ginoo paagi kay Moises,
14 kag sa tagsa ka tion sang ila paglakat, amo man gihapon ang ila pagpasunod. Ang mga yara sa idalom sang bandera sang grupo nga ginapangunahan sang tribo ni Juda amo ang nagauna sa paglakat, suno sa ila grupo, kag ang ila pangulo amo si Naason nga anak ni Aminadab.
15 Si Natanael nga anak ni Zuar amo ang pangulo sang tribo ni Isacar,
16 kag si Eliab nga anak ni Helon amo ang panguIo sang tribo ni Zabulon.
17 Dason ginabungkag ang Tolda kag ang mga kabaranggayan ni Gerson kag si Merari, nga amo ang nagadala sini, magasunod sa paglakat.
18 Dason, ang mga yara sa idalom sang bandera sang grupo nga ginapangunahan sang tribo ni Ruben magasunod sa paglakat, suno sa ila mga grupo, kag ang ila pangulo amo si Elisur nga anak ni Sedeur.
19 Si Selumiel nga anak ni Zuresadai amo ang panguIo sang tribo ni Simeon,
20 kag si Eliasaf nga anak ni Devel amo ang panguIo sang tribo ni Gad.
21 Dason ang kabaranggayan ni Coat nga Levita magalakat, nga nagadala sang balaan nga mga butang. Sa tion nga mag-abot sila sa madason nga kampamento, ang Tolda napatindog na liwat.
22 Dason, ang mga yara sa idalom sang bandera sang grupo nga ginapangunahan sang tribo ni Efraim magasunod sa paglakat, suno sa ila mga grupo, kag ang ila panguIo amo si Elisama nga anak ni Amiud.
23 Si Gamaliel nga anak ni Pedazur amo ang pangulo sang tribo ni Manases,
24 kag si Abidan nga anak ni Gideoni amo ang pangulo sang tribo ni Benjamin.
25 Sa katapusan, ang mga yara sa idalom sang bandera sang grupo nga ginapangunahan sang tribo ni Dan, nga amo ang nagabantay sang tanan nga mga grupo, sa ulihi, nagasugod sa paglakat, suno sa ila mga grupo, kag ang ila pangulo amo si Ahiezer nga anak ni Amisadai.
26 Si Pagiel nga anak ni Ocran amo ang pangulo sang tribo ni Aser,
27 kag si Ahira nga anak ni Enan amo ang pangulo sang tribo ni Neftali.
28 Gani, amo ini ang pasunod sang paglakat, suno sa ila mga grupo, kon ang mga Israelinhon maghalin sing kampamento kag maglakat.
29 Si Moises nagsiling sa iya bayaw nga si Hobab, anak nga lalaki ni Jetro nga Madianhon, "Manuglakat na kami pakadto sa duog nga ginsiling sang GINOO nga iya ihatag sa amon. Nagsaad sia sa pagpauswag sang Israel, gani mag-upod ka sa amon kag partihan ka namon sang amon pag-uswag.”
30 Nagsabat si Hobab, "Indi ako. Mabalik ako sa akon duta nga natawohan.”
31 Si Moises nagsiling, "Kon mahimo indi kami pagbayai. Nakahibalo ikaw kon sa diin kami makahimo sing kampamento sa desierto kag sarang ikaw makatudlo sa amon.
32 Kon mag-upod ka sa amon, partihan ka namon sang tanan nga mga kaayohan nga ihatag sang Ginoo sa amon.”
Ang mga Tawo Naglakat
33 Sang paghalin sang mga tawo sa Sinai, ang balaan nga bukid, nagpanglakaton sila sing tatlo ka adlaw. Ang Kaban sang Kasugtanan sang Ginoo nagauna permi sa ila sa pagpangita sing duog nga ila pagapatindogan sing kampamento.
34 Sa paghalin sing kampamento, ang panganod sang Ginoo yara sa ibabaw nila kon adlaw.
35 Kon maggwa ang Kaban sang Kasugtanan, si Moises nagasiling, "Magbangon ka, O Ginoo; paaplaaga ang imo mga kaaway kag papalagyoha ang mga nagadumot sa imo!”
36 Kag kon magdulog ini, nagasiling sia, "Balik ka, O GINOO, sa mga linibo nga panimalay sang Israel.”
cBalik . . . Israel; ukon Balik ka, O GINOO, ikaw nga kaangay sang linibo nga mga hangaway para sa Israel.
No comments:
Post a Comment