NUMEROS - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang Nahauna nga Pagsenso sang Israel

1 Sang nahauna nga adlaw sang ikaduha nga bulan sa ikaduha nga tuig sa tapos ang mga tawo sang Israel makahalin sa duta sang Egipto, ang GINOO naghambal kay Moises sa Tolda nga Tilipunan sa desierto sang Sinai. Nagsiling sia,

2 “Ikaw kag si Aaron kinahanglan magsenso sang mga tawo sang Israel, suno sa mga kabaranggayan kag mga panimalay. Listahon ninyo ang mga ngalan sang tanan nga mga lalaki

3 nga nagaedad sing 20 ka tuig paibabaw nga sarang makapakig-away.

4 Magpabulig ka sa isa ka pangulo sang baranggay gikan sa tagsa ka tribo.”

5-16 Amo ini ang mga lalaki nga mga pangulo sang ila mga tribo, nga ginpili gikan sa katilingban para sa sini nga obra:

Tribo               Pangulo sang baranggay
Ruben            Elisur nga anak ni Sedeur
Simeon          Selumiel nga anak ni Zurisadai
Juda               Naason nga anak ni Aminadab
Isacar            Natanael nga anak ni Zuar
Zabulon        Eliab nga anak ni Helon
Efraim          Elisama nga anak ni Amiud
Manases       Gamaliel nga anak ni Pedazur
Benjamin     Abidan nga anak ni Gideoni
Dan               Ahiezer nga anak ni Amisadai
Aser              Pagiel nga anak ni Ocran
Gad               Eliasaf nga anak ni Devel
Neftali          Ahira nga anak ni Enan

17 Sa bulig sining 12 ka mga lalaki si Moises kag si Aaron

18 nagtawag sing tingob sang bug-os nga katilingban sa nahauna nga adlaw sang ikaduha nga bulan kag naglista sang tanan nga mga tawo suno sa mga kabaranggayan kag mga panimalay. Ang mga ngalan sang tanan nga mga lalaki nga nagaedad sing 20 ka tuig ukon labaw pa, ginlista kag gin-isip

19 suno sa ginsugo sang GINOO. Sa Desierto sang Sinai ginlista ni Moises ang mga tawo.

20-46 Ang mga lalaki nga nagaedad sing 20 ka tuig paibabaw nga makasarang sa pagpakig-away ginlista ang ila mga ngalan suno sa kabaranggayan kag panimalay halin sa tribo ni Ruben, ang panganay na anak ni Jacob. Ang kadamuon nila amo ang masunod:

Tribo                            Kadamuon
Ruben                          46,500
Simeon                        59,300
Gad                              45,650
Juda                             74,600
Isacar                          54,400
Zabulon                      57,400
Efraim                        40,500
Manases                     32,200
Benjamin                   35,400
Dan                             62,700
Aser                            41,500
Neftali                        53,400

          Kabug-osan: 603,550

47 Ang mga Levita wala ginlista upod sa iban nga mga tribo,

48 kay ang GINOO nagsiling kay Moises,

49 “Kon magsenso kamo sang mga lalaki nga sarang makapakig-away, indi ninyo pag-ilakip ang tribo ni Levi.

50 Sa baylo himoa ninyo ang mga Levita nga tulogyanan sang Tolda nga Tilipunan kag sang tanan nga mga gamit sini. Sila amo ang magadala sini kag sang tanan nga mga gamit sini, magaalagad sa sini kag magapatindog sang ila kampamento sa palibot sini.

51 Kon maghalin na kamo sa inyo kampamento, ang mga Levita magaguba sang Tolda kag magapatindog sini liwat sa bag-o nga kampamento. Ang bisan sin-o nga iban nga magpalapit sa Tolda pagapatyon.

52 Ang iban nga mga Israelinhon magapatindog sang kampamento suno sa ila grupo, ang tagsa ka tawo upod sa iya grupo kag sa idalom sang iya kaugalingon nga bandera.

53 Pero ang mga Levita magapatindog sing kampamento sa palibot sang Tolda nga Tilipunan sa pagbantay sini, agod nga wala sing isa nga makapalapit kag manginkabangdanan sang akon paghalit sa katilingban sang Israel.”

54 Gani ang mga tawo sa Israel nagtuman sang tanan nga ginsugo sang GINOO kay Moises.

LEVITICO - Kapitulo 27 <<<   >>> NUMEROS - Kapitulo 2