ESTER - Kapitulo 1

1 2 3 4 5 6 7 8 9 10

Si Rayna Basti Wala Magtuman kay Haring Asuero

1 Sang una nga tiyempo may isa ka hari nga si Asuero nga naggahom sa 127 ka mga probinsya halin sa India tubtob sa Etiopia.

2 Ang iya palasyo yadto sa Susa nga amo ang kapital sang iya ginharian nga amo ang Persia.

3 Sa ikatlong tuig sang iya paghari naghatag sia sing punsyon sa iya mga opisyales kag mga tulogyanan. Nagtambong ang mga hangaway sang Persia kag Media, kag subong man ang mga gobernador kag mga prinsipe sang mga probinsya.

4 sa sulod sang anom ka bulan ginpakita niya ang manggad sang iya ginharian kag kon daw ano ka halangdon kag ka dalayawon yadto!

5 Sa tapos ang anom ka bulan, ang hari naghiwat pa gid sing punsyon sa tanan nga mga tawo, imol kag manggaranon, nga yara sa Susa, ang kapital sang siyudad. Ini nga punsyon ginhiwat sa pasiyuhan sang hardin sang palasyo kag naglawig ini sing pito ka adlaw.

6 Ang pasiyuhan ginkurtinahan sang puti kag asol nga mga kurtina nga ginhigot sang lubid nga granate nga mapino sa pilak nga mga sulosingsing sa mga marmol nga haligi. May mga siya nga salaliayan nga nahimo sa bulawan kag pilak nga ginbutang sa pasiyuhan nga ang salog puti nga marmol, perlas, kag malahalon nga mga bato nga nagkalainlain ang kolor.

7 Ang mga bisita ginpagustohan lang sing inom sang harianon nga bino nga gintagay sa bulawan nga mga ilimnan nga nagkalainlain ang korte.

8 Ang pag-imnanay wala sing pugongpugong kay ang hari nagmando sa mga suloguon sa palasyo nga pagustohan lang nila ang luyag sang tagsa ka tawo.

9 Sa pihak nga bahin, si Rayna Basti naghatag man sing punsyon para sa mga babayi sa harianon nga palasyo.

10 Sang ikapito nga adlaw sang punsyon, masadya ang hari tungod sa pag-inom sang bino, gani, ginpatawag niya ang pito ka mga alagad niya nga kapon nga amo sanday Mehuman, Bista, Harbona, Bigta, Abagta, Setar kag Karkas.

11 Ginsugo niya sila nga dalhon si Rayna Basti sa atubangan niya nga nagasuksok sang korona sang rayna agod ipakita niya ang iya katahom sa mga tawo kag mga opisyales, kay isa sia ka matahom nga babayi.

12 Pero sang sugiran sang mga alagad si Rayna Basti nahanungod sang sugo sang hari indi sia magkadto. Tungod sini ang hari nagbalingaso sa kaakig.

13 Dayon ang hari nagpakigsapol sa iya mga palamangkutan nga mga tawo nga nakahibalo sang mga kasugoan kag mga pagsulondan. Kay amo ini ang ginahimo sang hari agod mahibaluan niya kon ano ang dapat himuon.

14 Ang salaligan niya nga mga palamangkutan amo sanday Karsena, Setar, Admata, Tarsis, Meres, Marsena, kag Memukan. Ini sila amo ang pito ka mga opisyales sang Persia kag Media nga may pinakamataas nga palangakuan sa ginharian nga ginapamatian sang hari.

15 Ginpamangkot niya sila, "Suno sa kasugoan ano bala ang dapat himuon sa kay Rayna Basti kay wala sia nagtuman sang akon mando nga ginpadala paagi sa akon mga alagad?"

16 Si Memukan nagsabat sa atubangan sang hari kag sang iya mga opisyales, "Si Rayna Basti nagpakahuya, indi lamang sang hari kundi sang tanan nga mga opisyales kag sang tanan nga mga tawo sa bug-os nga ginharian.

17 Sa bug-os nga ginharian ang tagsa ka babayi nga makahibalo sang ginhimo sang rayna magatamay sang iya bana. Magasiling sila, 'Si Haring Asuero nagmando nga si Rayna Basti pagadalhon sa iya atubangan pero ang rayna wala magkadto.'

18 Ang mga asawa sang mga opisyales sang Persia kag Media nga nakabati sining ginhimo sang rayna magahambal nahanungod sini nga adlaw sa mga opisyales sang hari sa wala pa matunod ang adlaw kag ang pagtamay kag pagyaguta nila indi mag-untat.

19 Kon luyag mo, Mahal nga Hari, maghimo ka sing isa ka sugo nga si Basti indi na magkari sa atubangan sang hari. Ilakip ini sa mga kasugoan sang Persia kag Media agod indi gid ini maislan. Dayon ihatag sang hari ang pagkarayna sa isa ka babayi nga mas dungganon pa sa iya.

20 Kon mahibal-an sa bug-os nga ginharian ining sugo sang hari, ang tanan nga mga babayi magatahod sa ila bana imol ukon manggaranon."

21 Ginpakamaayo sang hari kag mga prinsipe ang ginhambal ni Memukan, kag ang hari naghimo sang iya ginpanugyan.

22 Ang hari nagpadala sing mga sulat sa tanan nga mga probinsya nga sakop sang iya ginharian, suno sa ila pangsulat kag hambal, agod ang tagsa ka lalaki manginpangulo sang ila kaugalingon nga balay kag maggahom sa mga babayi sa iya panimalay.

NEHEMIAS - Kapitulo 13 <<<   >>> ESTER - Kapitulo 2