2 MGA CRONICA - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

Si Salomon Nagpangayo sing Kaalam
(1 Hari 3:1-15)

1 Si Salomon, nga anak ni David, ginpalig-on sa iya ginharian, kag ang GINOO nga iya Dios nagbendisyon sa iya kag naghimo sa iya nga gamhanan.

2 Si Salomon nagsugo sa tanan nga mga opisyales nga gintugyanan sang mga linibo kag sang mga ginatus ka mga tawo, sang tanan nga mga opisyales sa gobyerno, sang tanan nga mga pangulo sang panimalay, kag sang iban nga mga tawo,

3 nga nagamando sa ila sa pagkadto upod sa iya sa duog nga ginasimbahan sa Gabaon. Nagkadto sila didto kay yadto didto ang Tolda nga Tilipunan nga ginhimo ni Moises, nga alagad sang Dios, sang didto sila sa desierto.

4 (Pero ang Kaban sang Kasuguan didto sa Jerusalem, gintago sa tolda nga ginpatindog ni Haring David sang pagdala niya sang Kaban halin sa Kiryatjearim.)

5 Ang altar nga saway nga ginhimo anay ni Bezalel nga anak ni Uri, sa kabaranggayan ni Hur, didto man sa Gabaon sa atubangan sang Tolda nga Tilipunan. Si Salomon kag ang tanan nga mga tawo nagsimba sa Dios didto.

6 Sa atubangan sang Tolda ang hari nagsimba sa GINOO paagi sa pagdulot sang mga halad sa altar nga saway. Naghalad sia sing 1,000 ka mga sapat kag ginsunog ini tanan sing bug-os sa ibabaw sang altar.

7 Sadto nga gab-i ang Dios nagpakita kay Salomon kag nagpamangkot, “Ano ang luyag mo nga ihatag ko sa imo?”

8 Si Salomon nagsabat, “Nagpakita ka sing daku nga gugma sa akon amay nga si David, kag karon ginhimo mo ako nga hari sa pagbulos sa iya.

9 O GINOONG Dios, ang imo saad sa akon amay natuman; ginhimo mo ako nga hari sa sining madamo nga mga tawo nga indi maisip.

10 Gani hatagi ako sing kaalam kag ihibalo nga kinahanglan ko sa paggahom sa ila, kay kon indi ano ang pagkasarang ko sa paggahom sining imo mga tawo nga tama kadamo?”

11 Ang Dios nagsabat kay Salomon, “Husto ang imo ginpili. Sa baylo nga magpangayo ka sing manggad, ukon pagkabutang, ukon kadungganan, ukon kamatayon sang imo mga kaaway, ukon malawig nga kabuhi para sa imo kaugalingon, nagpangayo ka sing kaalam kag ihibalo agod nga makasarang ka sa paggahom sa sining mga tawo sa diin ginhimo ko ikaw nga hari.

12 Hatagan ko ikaw sing kaalam kag ihibalo. Wala labot sini, hatagan ko ikaw sing dugang nga manggad, pagkabutang, kag kadungganan nga wala pa gid maangkon sang bisan sin-o nga hari nga una sa imo ukon sa ulihi nimo.”

13 Gani naghalin^a si Salomon sa duog nga ginasimbahan sa gabaon sa diin didto ang balaan nga Tolda kag nagbalik sa Jerusalem. Didto naggahom sia sa Israel.

14 Nagtipon sia sing 1,400 ka mga karuwahi kag 12,000 ka mga manugkabayo para sa inaway. Ang iban sa ila sini ginbutang niya sa Jerusalem kag ang iban ginbutang niya sa lainlain nga mga siyudad.

15 Sa tion sang iya paggahom, ang pilak kag bulawan sa Jerusalem daw pareho lang ka ordinaryo sang mga bato, kag ang sedro kadamo man pareho lang ka ordinaryo sang sikomoro.

16 Ang mga tulogyanan sang hari nagpadala sang tanan nga mga kabayo halin sa Musri^b kag sa Cilicia,^c

17 kag sang mga karuwahi halin sa Egipto. Sila ang nagahatag sang mga kabayo kag mga karuwahi sa mga hari nga Hethanon kag Siriahanon nga nagabaligya sang mga karuwahi sa tag 600 ka bilog nga pilak kag sang mga kabayo sa tag 150 ang bilog.


^aAng iban nga dumaan nga pagbadbad naghalin; sa Hebreo nagkadto. 
^bMusri; sa Hebreo Egipto. 
^cMUSRI KAG CILICIA: Duha ka dumaan nga mga pungsod nga amo na karon ang nabagatnan-sidlangan nga Turkiya nga amo ang sentro sang nagapatubas sang mga kabayo sa tion ni Salomon.

1 MGA CRONICA - Kapitulo 29 <<<   >>> 2 MGA CRONICA - Kapitulo 2