Friday, May 20, 2011

2 MGA HARI - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25

Si Elias kag si Haring Ocozias
1 Sang mapatay si Haring Acab sang Israel, ang pungsod sang Moab nagribok batok sa Israel.
2 Si Haring Ocozias sang Israel nahulog halin sa balkon nga yara sa atop sang iya palasyo sa Samaria kag nabalda gid sia. Gani nagpadala sia sing mga tawo sa pagpamangkot kay Beelzebul, ang dios sang Ecron, nga siyudad sa Filistia, kon bala magaayo pa sia sa iya balda.
3 Pero ang anghel sang GINOO nagsugo kay Elias nga propeta nga taga-Tisbe, sa pagsugata sang mga tawo nga ginpadala ni Haring Ocozias kag sa pagpamangkot sa ila, “Ngaa man nga magpamangkot kamo kay Beelzebul, ang dios sang Ecron? Tungod bala nga nagahunahona kamo nga wala sing Dios sa Israel?
4 Sugiri ninyo ang hari nga ang GINOO nagasiling, ‘Indi ikaw mag-ayo sa imo balda, kundi mapatay ka!’” Gintuman ni Elias ang ginsugo sang GINOO,
5 kag ang mga tawo nagbalik sa hari. Nagsiling ang hari, “Ngaa bala nagbalik kamo?”
6 Nagsabat sila, “Ginsugata kami sang isa ka tawo kag ginsingganan niya kami nga magbalik sa imo kag sugiran ikaw nga ang GINOO nagasiling, ‘Ngaa man nga nagpadala ka sing mga tawo sa pagpamangkot kay Beelzebul, ang dios sang Ecron? Tungod bala nga nagahunahona ka nga wala sing Dios sa Israel? Indi ikaw mag-ayo sa imo balda, kundi mapatay ka!’”
7 Nagpamangkot ang hari, “Ano bala ang hitsura sang tawo?”
8 Nagsabat sila, “Nagabayu sia sang panit sang sapat,a kag may paha nga panit.” Ang hari nagsiling, “Si Elias ato!”
9 Dayon nagpadala sia sing isa ka opisyal upod ang 50 ka mga tawo sa pagkuha kay Elias. Nakita sang opisyal si Elias nga nagalingkod sa ibabaw sang bakulod, kag nagsiling sa iya, “Alagad sang Dios, nagsugo ang hari nga magdulhog ka.”
10 Si Elias nagsabat, “Kon ako alagad sang Dios, kabay ang kalayo halin sa langit magpatay sa imo kag sa imo nga tinawo!” Sa gilayon may kalayo halin sa langit nagpatay sa opisyal kag sa iya mga tinawo.
11 Ang hari nagpadala pa gid sing isa ka opisyal upod ang 50 ka mga tawo, nga nagkadtob kay Elias kag nagsiling, “Alagad sang Dios, nagsugo ang hari nga magdulhog ka gilayon!”
12 Si Elias nagsabat. “Kon ako alagad sang Dios, kabay ang kalayo halin sa langit magpatay sa imo kag sa imo nga tinawo!” Sa gilayon may kalayo halin sa langit kag nagpatay sa opisyal kag sa iya mga tinawo.
13 Sa liwat ang hari nagpadala sang isa ka opisyal upod sa 50 ka mga tawo. Nagtaklad sia sa bakulod, nagluhod sia sa atubangan ni Elias kag nagpakiluoy, “Alagad sang Dios, kaluoyi ako ka gang akon mga tinawo. Luwasa ang amon kabuhi!
14 Ang duha ka opisyales kag ang ila mga tinawo napatay paagi sa kalayo halin sa langit; pero kaluoyi ako!”
15 Ang anghel sang GINOO nagsiling kay Elias, “Dulhog ka upod sa iya, kag indi magkahadlok.” Gani si Elias nag-upod sa opisyal pakadto sa hari,
16 kag nagsiling sa iya, “Amo ini ang ginasiling sang GINOO: ‘Tungod kay nagpadala ikaw sing mga tawo sa pagpamangkot kay Beelzebul, ang dios sang Ecron—subong nga daw wala sing Dios sa Israel nga pamangkutan—indi ikaw mag-ayo, kundi mapatay ka!’”
17 Si Ocozias napatay, suno sa ginsiling sang GINOO paagi kay Elias. Wala sia sing mga anak nga lalaki, gani ang iya utod nga lalaki nga si Joram nagbulos sa iya subong hari, sa ikaduha nga tuig ni Jehoram nga anak nga lalaki ni Josafat, hari sang Juda.
18 Ang tanan nga ginhimo ni Haring Ocozias ginsulat sa Maragtas sang mga Hari sang Israel.


aNagabayu sia . . . sapat; ukon Bulbolon sia nga tawo. 

bAng isa ka dumaan nga pagbadbad nagkadto; sa Hebreo nagsabat.


No comments:

Post a Comment