Gin-ayo si Naaman
1 Si Naaman nga pangulo sang mga hangaway sang Siria,
gamhanan kag ginatahod sang hari sang Siria, tungod kay paagi kay Naaman, ang Ginoo nagpadaog sang mga hangaway sang Siria. Bantog sia nga hangaway,
pero aruon sia.
2 Sa isa sang ila pagsalakay batok sa Israel,ang
mga Sirianhon nakabihag sing isa ka dalagita halin sa Israel nga nanginsuloguon
sang asawa ni Naaman.
3 Isa ka tion nagsiling ang dalagita sa iya ama,
“Maayo kuntani nga makapakigkita ang akon amo sa propeta nga nagapuyo sa Samaria! Ayuhon
gid sia sang iya aro.”
4 Sang pagkabati sini ni Naaman, nagkadto sia sa
hari kag nagsugid sang ginsiling sang dalagita.
5 Ang hari nagsiling, “Kadto ka sa hari sang
Israel kag dalha ini nga sulat sa iya.” Gani si Naaman naglakat, nagdala sia
sing 30,000 ka bilog nga pilak, 6,000 ka bilog nga bulawan kag napulo ka ilislan
nga matahom nga bayu.
6 Ang sulat nga iya gindala nagasiling, “Ini nga
sulat nagapakilala sa imo sang akon opisyal nga si Naaman. Luyag ko nga ayuhon
mo sia sang iya aro.”
7 Sang mabasa sang hari sang Israel ang sulat,
gingisi niya ang iya bayu sa kainit kag
nagsiling, “Ano bala ang pagpaabot sang hari sang Siria nga ayuhon ko ini ngatawo?
Nagahunahona bala sia nga ako Dios,f nga may gahom sa paghatag sang kabuhi kag sa
pagpatay? Maathag gid nga nagapangita lang sia sing kabangdanan nga mag-away
kami!”
8 Sang makabati si Eliseo sang natabo, nagpadala
sia sining mga pulong sa hari: “Ngaa magkaakig ka gid? Ipadala diri ang tawo sa
akon, kag ipakita ko sa iya nga may propeta sa Israel.”
9 Gani si Naaman naglakat upod sa iya mga kabayo
kag karuwahi, kag nagdulog sa puwertahan sang balay ni Eliseo.
10 Si Eliseo nagpadala sang iya suloguon sa
pagsiling kay Naaman nga magkadto sia kag magpanghugas sang iya kaugalingon sing
makapito sa suba sang Jordan,
kag magaayo sia sing bug-os sang iya aro.
11 Pero si Naaman naglakat nga naakig kag nagsiling
sa iya kaugalingon. “Nagahunahona ako nga maggwa sia kag magpangamuyo sa Ginoo nga iya Dios, magbayaw sang iya kamot sa ibabaw sang akon aro kag
ayuhon ako!
12 Wala labot sina, indi bala ang mga suba sang
Abana kag Farfar didto sa Damasco maayo pa sa bisan diin nga suba sang Israel? Kuntani nagpanghugas
na lang ako didto kag nag-ayo!”
13 Ang iya mga suluguon nagkadto sa iya kag
nagsiling, “Sir kon ang propeta nagsugo sa imo sa paghimo sing mabudlay nga
butang, kuntani gintuman mo ini. Karon ngaa nga indi ka na lang magpanghugas sang
imo kaugalingon suno sa iya ginsiling agod mag-ayo ka?”
14 Gani si Naaman naglusong sa Jordan, nagtum-oy
sang iya kaugalingon sing makapito suno sa ginsiling ni Eliseo, kag nag-ayo sia
sing bug-os. Ang iya panit nagtinlo kaangay sang isa ka bata.
15 Nagbalik sia kay Eliseo upod ang iya mga
tinawo kag nagsiling, “Karon nakahibalo ako nga wala sing dios, kundi ang Dios
sang Israel; gani, sir, batuna ining akon regalo.”
16 Nagsabat si Eliseo, “Ginasumpa ko sa Dios nga
buhi, nga akon ginaalagad, indi ako magbaton sing regalo." Si Naaman
nagpamilit nga batunon niya ini, pero indi gid sia.
17 Gani si Naaman nagsiling, "Kon indi ikaw
magbaton sang akon regalo, hatagi lang ako sing duta nga madala sang duha ka
mula nga dalhon ko pauli,g kay halin karon indi na ako magdulot sang mga halad
ukon mga halad nga sinunog sa iban nga dios luwas sa Ginoo.
18 Gani nagalaom ako nga ang Ginoo magapatawad
sa akon kon mag-upod ako sa akon hari sa templo ni Rimon, ang dios sang Siria,
sa pagsimba sa iya. Siguro gid nga ang GINOO magapatawad sa akon!"
19 Si Eliseo nagsiling, “Maayo nga paglakat." Kag
si Naaman naglakat. Malapit pa lang ang nalaktan niya,
20 sang si Giezi nga alagad ni Eliseo nagsiling
sa iya kaugalingon, "Ginpalakat sang akon amo si Naaman nga wala
pagpabayara! Kuntani ginbaton niya ang ginahatag sadtong Siriahanon. Ginasumpa
ko sa buhi nga Ginoo nga lagson ko sia kag magkuha sang bisan ano nga yara sa
iya."
21 Gani ginlagas niya si Naaman. Sang makita ni Naaman
nga may tawo nga nagalagas sa iya, nagpanaog sia sa karuwahi sa pagsugata kag
sa pagpamangkot sa iya, “May malain bala nga natabo?"
22 Si Geizi nagsabat, "Wala man, pero ang
akon agalon nagsugo sa akon sa pagsugid sa imo nga bag-o gid lang nag-abot ang
duha ka katapo sang mga propeta halin sa kabakuloran sang Efraim, kag luyag
niya hatagan sila sing 3,000 ka bilog nga pilak kag duha ka ilisan nga matahum
nga bayu.”
23 Si Naaman nagsabat, “Yari dalha ang 6,000 ka
bilog nga pilak." Ginpilit niya sia sa pagdala sini, ginsulod ang mga pilak
sa duha ka puyo, kag duha niya ka ilisan nga matahum nga bayu, ginhatag ini sa
duha ka suloguon, kag ginsugo sila nga dalhon nila kag mag-una kay Giezi.
24 Sang pag-abot nila sa bakulod sa diin nagapuyo
si Eliseo, ginkuha ni Giezi ang duha ka puyo nga pilak kag gindala sa balay.
Dayon ginpabalik niya ang suloguon ni Naaman.
25 Nagbalik sia sa balay, kag si Eliseo
nagpamangkot, “Diin ka maghalin?" Nagsabat, “Sir, wala ako sing may
ginkadtuan."
26 Pero si Eliseo nagsiling, "Indi bala ako
kaupod nimo sa espiritu sang magpanaog ang tawo sa iya karuwahi sa pagsugata sa
imo? Indi ini tion sa pagbaton sing kuwarta kag mga bayu, talamnan sing olivo
kag talamnan sang ubas, mga karnero kag mga baka, ukon mga suloguon!
27 Kag karon ang aro ni Naaman magatapik sa imo,
kag sa imo mga kaliwatan sa walay katapusan!" Sang paghalin ni Giezi, nag-aruon
sia—kag ang iya panit nagpalamuti.
fDios; ukon isa ka dios.
gSING DUTA . . . NGA DALHON KO PAULI: Ginatuohan
sadto anay nga angisa ka dios ginsimba lamang sa
iya kaugalingon nga duta.
No comments:
Post a Comment