□□□□□
Si Salomon Nagtalikod sa Dios
1 Si Salomon naghigugma sa madamo nga mga babayi sa iban nga mga pungsod. Wala labot sang bata sang hari sang Egipto, nagpangasawa sia sing mga Hethanon, mga Moabnon, mga Amonhon, mga Edomnon, kag mga Sidonhon.2 Ginpangasawa niya sila bisan ang Ginoo nagsugo sa mga Israelinhon nga indi magpangasawa ukon magpamana sa sini nga mga tawo kay ini sila magadala sa mga Israelinhon sa pagsimba sa iban nga mga dios.
3 Si Salomon nagpangasawa sing 700 ka mga prinsesa kag may 300 man sia ka mga babayi. Sila ang kabangdanan sang pagtalikod niya sa Dios,
4 kag sang tigulang na sia gindala nila sia sa pagsimba sa iban nga mga dios. Wala sia magmatutom sa GINOO nga iya Dios, subong sang pagkatutom sang iya amay nga si David.
5 Nagsimba sia kay Astarot nga diosa sang Sidon, kag kay Moloc, ang makangilil-ad nga dios sang Amon.
6 Nagpakasala sia batok sa GINOO, kag wala sia magmaminatud-on sa iya subong sang pagkamaminatud-on sang iya amay nga si David.
7 Sa bukid, sa sidlangan sang Jerusalem nagpatindog sia sing duog nga pagasimbahan kay Cemos, ang makangilil-ad nga dios sang Moab, kag duog nga pagasimbahon kay Moloc, ang makangilil-ad nga dios sang Amon.
8 Nagpatindog man sia sing mga duog nga ginasimbahan sa diin ang tanan niya nga mga asawa nga dumoluong makasunog sing insyenso kag makadulot sing mga halad sa ila kaugalingon nga mga dios.
9-10 Bisan nga ang GINOO, ang Dios sang Israel, nagpakita kay Salomon sing makaduha, kag nagsiling sa iya nga indi magsimba sa iban nga dios, pero si Salomon wala magtuman sa GINOO, kundi nagtalikod sa iya. Gani ang GINOO naakig kay Salomon,
11 kag nagsiling sa iya, “Tungod kay ginhungod mo nga lapason ang imo kasugtanan sa akon kag wala mo gintuman ang akon mga sugo, nagasumpa ako nga kuhaon ko ang ginharian sa imo kag ihatag ko ini sa isa sang imo mga opisyales.
12 Pero tungod sa imo amay nga si David indi ko paghimuon ini samtang buhi pa ikaw, kundi sa tion sang paggahom sang imo anak.
13 Kag indi ko pagkuhaon ang bug-os nga ginharian sa iya, sa baylo bilinan ko sia sing isa ka tribo tungod sa akon alagad nga si David kag tungod sa Jerusalem, ang siyudad nga ginhimo ko nga mangin-akon kaugalingon.”
Ang mga Kaaway ni Salomon
14 Gani ginhimo sang Ginoo nga si Hadad, sang harianon nga panimalay sang Edom magsumpong kay Salomon.15-16 Sang una, sang pag-agaw ni David sang Edom, si Joab nga pangulo sang iya mga hangaway nagkadto didto sa paglubong sang mga patay. Sia kag ang iya mga tinawo nagpabilin sa Edom sing anom ka bulan, kag sa sini nga tion ginpamatay nila ang tagsa ka lalaki sa Edom
17 luas kay Hadad kag sang pila ka mga ulipon nga Edomnon sang iya amay, nga nagpalagyo sa Egipto. Sadto nga tion si Hadad bata pa.
18 Gikan sa Madian nagkadto sila sa Paran sa diin ang iban nga mga tawo nagbuylog sa ila. Dayon nagkadto sila sa Egipto. Nagkadto sila sa hari, nga naghatag kay Hadad sing duta kag balay kag pagkaon.
19 Si Hadad kag ang hari nag-amigohay, kag ginpaasawa sang hari kay Hadad ang bayaw sang hari nga utod ni Tafanes nga Rayna.
20 Nagbata sia kay Hadad sing lalaki, si Genubat, nga ginpadaku sang rayna sa palasyo sa diin nagpuyo sia upod sa mga anak nga lalaki sang hari.
21 Sang pag-abot sang balita kay Hadad sa Egipto nga si David napatay na, kag si Joab nga pangulo sang hangaway patay na man, si Hadad nagsiling sa hari, “Pabalika ako sa akon kaugalingon nga pungsod.”
22 Ang hari nagpamangkot, "Ngaa mapauli ka? Tungod bala nga wala ko ikaw mahatagi bisan ano?" Si Hadad nagsabat sa hari, “Papaulia lang ako.” Kag nagpauli sia sa iya kaugalingon nga pungsod. Si Hadad nga hari sang Edom malaut kag mapait nga kaaway sang Israel.w
23 Ginhimo sang Dios nga si Rezon nga anak nga lalaki ni Eliada magsumpong kay Salomon. Si Rezon ulipon anay ni Haring Hadadezer sang Zoba, pero nagpalagyo sia sa iya agalon,
24 kag nanginpangulo sia sang grupo sang mga rebelde. (Natabo ini sa tapos malutos ni David si Hadadezer kag mapamatay niya ang mga kadampig ni Hadadezer nga Sirianhon.) Si Rezon kag ang iya mga tinawo naglakat kag nagpuyo sa Damasco sa diin ginhimo sia sang iya mga tinawo nga hari sang Siria.
25 Nanginkaaway sia sang Israel sa panahon ni Salomon.
Ang Saad sang Dios kay Jeroboam
26 Ang isa pa ka tawo nga nagsumpong kay Haring Salomon amo ang isa niya ka opisyales nga si Jeroboam nga anak ni Nebat nga taga-Sereda sa Efraim. Ang iya iloy si Serua nga isa ka balo.27 Ang masunod amo ang kabangdanan sang iya pagrebelde. Si Salomon nagapatampok sang duta sa nasidlangan nga kilid sang Jerusalem kag nagapasangkad sang pader sang siyudad.
28 Si Jeroboam mabakod nga pamatan-on, kag sang makita ni Salomon nga mapisan sia ginpadumala niya sia sang tanan nga pilitaryo nga obra sa kadutaan sang mga tribo ni Manases kag ni Efraim.
29 Isa ka adlaw, samtang si Jeroboam nagapakadto sa Jerusalem, si Ahias nga propeta gikan sa Silo nagsugata sa iya nga isahanon lang sa dalan sa wayang. Si Ahias nagabayu sing bag-o nga panapton,
30 pero gin-uba niya ini, gingisi sa dose ka bahin,
31 kag nagsiling kay Jeroboam, “Kuha ka sing napulo ka bahin para sa imo kaugalingon, kay ang GINOO, ang Dios sang Israel, nagasiling sa imo, ‘Kuhaon ko ang ginharian kay Salomon, kag pagahatagan ko ikaw sing napulo ka tribo.
32 Si Salomon magahawid sing isa ka tribo tungod sa akon alagad nga si David kag tungod sa Jerusalem, ang siyudad nga ginpili ko nga mangin-akon gikan sa bug-os nga duta sang Israel.
33 Himuon ko ini tungod kay ginsikway ako ni Salomon kag ginsimba niya si Astarot, ang diosa sang Sidon; si Cemos, ang dios sang Moab, si Moloc, ang dios sang Amon. Si Salomonx wala magtuman sa akon; nagpakasala sia, kag wala niya gintuman ang akon mga kasugoan kag mga sugo subong sang pagtuman sang iya amay nga si David.
34 Pero indi ko pagkuhaon ang bug-os nga ginharian kay Salomon, kag magahari sia sing bug-os sang iya kabuhi tungod sa akon alagad nga si David nga akon ginpili kag nagtuman sang akon mga kasugoan kag mga sugo.
35 Kuhaon ko ang ginharian sa anak ni Salomon kag hatagan ko ikaw sing napulo ka tribo.
36 Hatagan ko ang anak ni Salomon sing isa ka tribo, agod may yara sa gihapon nga kaliwat ang akon alagad nga si David nga magagahom sa Jerusalem, ang siyudad nga akon ginpili sa diin ako pagasimbahon.
37 Jeroboam, himuon ko ikaw nga hari sang Israel, kag magagahom ikaw sa tanan nga mga duta nga luyag mo.
38 Kon tumanon mo ako sing bug-os magkabuhi suno sa akon mga kasugoan, kag maghimo sang akon ginsugo, subong sang ginhimo sang akon alagad nga si David, ako manginkaupod mo sa gihapon. Himuon ko ikaw nga hari sang Israel kag pat-uron ko nga ang imo mga kaliwat magagahom sa tapos sa imo, subong sang ginhimo ko kay David.
39 Tungod sang mga sala ni Salomon, silutan ko ang mga kaliwat ni David, pero indi sa tanan nga panahon.'"
40 Gani si Haring Salomon nagtinguha sa pagpatay kay Jeroboam, pero nagpalagyo sia pakadto kay Haring Sisac sa Egipto kag nagpabilin didto tubtob napatay si Salomon.
Ang Kamatayon ni Salomon
(2 Cron. 9:29-31)
41 Ang tanan nga ginhimo ni Salomon, ang iya binuhatan kag kaalam nasulat tanan sa Maragtas ni Salomon.42 Nagpuyo sia sa Jerusalem nga naggahom sa bug-os nga Israel sing 40 ka tuig.
43 Napatay sia kag ginlubong sa Jerusalem, kag ang iya anak nga si Rehoboam nagbulos sa iya subong nga hari.
wAng isa ka dumaan nga pagbadbad Si Hadad . . . Israel; sa Hebreo ini nga bahin nabutang sa punta sang bersikulo 25.
xAng iban nga dumaan nga pagbadbad Si Salomon; sa Hebreo Sila.
No comments:
Post a Comment