□□□□□
Ang Kaban sang Kasugtanan Gindala sa Templo
(2 Cron. 5:2—6 :2)
1 Ginpatawag ni Haring Salomon ang mga pangulo sang Israel, ang mga pangulo sang mga tribo kag mga baranggay, sa pagkadto sa Jerusalem sa pagkuha sang Kaban sang Kasugtanan sang GINOO halin sa Sion, ang Siyudad ni David, kag dalhon ini sa Templo.2 Nagtipon sila tanan sing tingob sa Piesta sang mga Tolda sa bulan sang Etanim, ang ikapito nga bulan.
3 Sang makatipon ang tanan nga mga pangulo, ang mga pari nagkuha sang Kaban sang Kasugtanan,
4 kag sa bulig sang mga Levita gindala ini, upod ang balaan nga tolda kag ang tanan nga mga gamit sini, pakadto sa Templo.
5 Si Haring Salomon kag ang tanan nga mga tawo sang Israel nagtipon sa atubangan sang Kaban sang Kasugtanan kag naghalad sang indi maisip nga kadamuon sang mga karnero kag mga baka nga toro.
6 Dayon ang mga pari nagkuha sang Kaban sang Kasugtanan kag ginbutang ini sa nasulod nga santuaryo sang Templo, ang Labing Balaan nga Duog, sa idalom sang mga pakpak sang mga sapat nga may pakpak.
7 Ang ila mga pakpak nga nagahumlad sa ibabaw sang Kaban sang Kasugtanan, nagtabon sini kag sang mga yayongan.
8 Ang mga yayongan nga yadto pa didto, tama kalaba nga ang ila mga punta makita kon ang tawo magtindog sa isa ka duog sa daku nga santuaryo malapit sa atubangan sang nasulod nga santuaryo; pero indi ini makita kon ang tawo magtindog sa gwa.
9 Wala sing iban nga sulod ang Kaban sang Kasugtanan luas sang duha ka tapitapi nga bato nga ginbutang ni Moises didto sa bukid sang Sinai, sa diin ang GINOO naghimo sing kasugtanan sa mga mga tawo sang Israel sang nagapagwa sila halin sa Egipto.
10 Sa napagwa ang mga pari sa Templo, ang panganod nagapuno sini.
11 Indi na sila makabalik sa sulod sa paghimo sang ila bulohaton kay ang himaya sang GINOO nagpuno sang Templo.
12 Dayon si Salomon nagpangamuyo, “Ikaw, O GINOO nagbutang sang adlaw sa langit, pero ginpili mo ang pagpuyo sa mga gal-om kag kadudolman.
13 Karon nagpatindog ako sing templo para sa imo, isa ka duog nga imo pagapuy-an sa walay katubtoban.”
Si Salomon Naghambal sa mga Tawo
(2 Cron. 6:3-11)
14 Samtang ang tanan nga mga tawo nagatindog didto, si Haring Salomon nagliso kag nag-atubang sa ila kag nagpangamuyo sia sa Dios sa pagbendisyon sa ila.15 Dayon nagsiling sia, "Dayawon ang Ginoo nga Dios sang Israel! Gintuman niya ang iya ginsaad sa akon amay nga si David. Amo ini ang ginsiling niya,
16 'Halin sang pagpagwa ko sang akon mga tawo nga Israel sa Egipto, wala ako magpili sing siyudad sa bug-os nga duta sang Israel nga pagapatindugan sang templo sa diin ako pagasimbahon. Pero ginpili ko ikaw, David, subong nga pangulo sang akon mga tawo.'"
17 Kag si Salomon nagsiling pa gid, "Ang akon amay nga si David luyag magpatindog sang templo para sa pagsimba sang Ginoo nga Dios sang Israel,
18 pero ang Ginoo nagsiling kay David nga nalipay sia sa iya handom,
19 pero indi si David, kundi ang iya anak ang magapatindog sang templo.
20 Kag karon ang Ginoo nagtuman sang iya saad: ako ang nagbulos sa akon amay nga si David subong hari sang Israel, kag napatindog ko ang Templo para sa pagsimba sa GINOO nga Dios sang Israel.
21 Naghanda man ako sing duog sa Templo para sa Kaban sang Kasugtanan nga ginasudlan sang malapadlapad nga mga bato sang kasugtanan nga ginhimo sang Ginoo sa aton mga katigulangan sani gindala niya sila pa gwa halin sa Egipto.”
Ang Pangamuyo ni Salomon
(2 Cron. 6:12-42)
22 Dayon sa atubangan sang mga tawo, si Salomon nagkadto kag nagtindog sa atubangan sang altar. Ginbayaw niya ang iya mga kamot23 kag nagpangamuyo, “GINOO nga Dios sang Israel, wala sing Dios nga kaangay mo sa langit ukon sa duta. Matutom ka sa imo kasugtanan, kag nagapakita sang imo mapinadayunon nga paghigugma sa imo mga tawo nga nagakabuhi sing matinumanon sa imo sa bug-os nila nga tagipusoon.
24 Gintuman mo ang imo ginsaad sa akon amay nga si David nga imo alagad, kag karon nga adlaw gintuman mo ang imo ginsaad.
25 Kag karon, GINOO nga Dios sang Israel, nagapangamuyo ako nga imo man tumanon ang isa mo ka saad sa akon amay nga si David sang ginsingganan mo sia, ‘Hatagan ko ikaw sa gihapon sing kaliwat nga magabulos sa imo subong nga hari sa Israel, kon ang imo mga kaliwat magamatutom sa pagtuman sa akon pareho sa imo.’
26 Gani nagapangamuyo ako, O Dios sang Israel, nga imo tumanon ining imo ginsaad sa akon amay nga si David, nga imo alagad.
27 “Pero makapuyo gid bala ang Dios sa duta? Bisan gani ang bug-os nga langit indi tuman kadaku nga makaigo ikaw, gani ano ang pagkaigo mo sa sini nga templo nga akon ginpatindog?
28 Wala sapayan sini, pamatii ang akon pangamuyo kag pag-ampo, O GINOO nga akon Dios; pamatii ang akon panawag kag ang akon pangamuyo sa imo karon nga adlaw.
29 Bantayi ini nga templo sa adlaw kag gab-i, ining duog nga imo ginpili sa diin pagasimbahon ikaw. Pamatii ako sa nagapangamuyo ako diri sa Templo.
30 Pamatii ang akon mga pangamuyo kag ang mga pangamuyo sang imo mga tawo kon magpangamuyo sila sa sini nga duog. Sa imo puloy-an sa langit, pamatii kag patawara kami.
31 Kon ang isa ka tawo ginsumbong nga nakahalit sa isa ka tawo kag gindala sia sa imo altar sa sini nga Templo sa pagsumpa nga wala sia sing sala,
32 O GINOO, magpamati ka sa langit kag hukmi ang imo alagad. Siluti ang nakasala suno sa nagakabagay sa iya, kag hilwaya ang wala sing sala.
33 "Kon ang imo mga tawo nga Israel malutos sang ila mga kaaway tungod kay nagpakasala sia batok sa imo, kag dayon magahinulsol sila, kag magbalik sa imo, kag magpangamuyo, kag magdayaw sa imo, kag magpangamuyo sa sini nga templo nga patawaron sila,
34 pamatii sila sa langit. Patawara ang mga sala sang imo mga tawo, kag dalha sila pabalik sa duta nga imo ginhatag sa ila mga katigulangan
35 "Kon ang imo mga tawo magpakasala batok sa imo kag ikaw magasilot sa ila paagi sa malawig nga tingadlaw, kag dayon kon maghinulsol sila, kag mag-atubang sa sini nga Templo, kag magpangamuyo, kag magdayaw sa imo,
36 pamatii sila sa langit. Patawara ang mga sala sang hari kag sang mga tawo sang Israel. Tudloi sila sang matarong nga pagkabuhi, kag padalhi sing ulan ang imo duta nga imo ginhatag sa imo mga tawo subong ila panublion nga walay katubtoban.
37 "Kon may gutom sa duta, ukon pamalatian, ukon ang mga tanom nalaya sang mainit nga hangin, ukon kusim, ukon apan; ukon ang imo mga tawo ginsalakay sang ila mga kaaway, ukon may pamalatian sa ila,
38 pamatii ang ila mga pangamuyo. Kon ang imo mga tawo nga Israel, tungod sang ila kasubo, magbayaw sang ila mga kamot sa pagpangamuyo nga nagaatubang sa sini nga Templo,
39 pamatii ang ila pangamuyo. Pamatii sila sa imo puloy-an sa langit, patawara sila, kag himoa ang nagakabagay. Ikaw lamang ang nakahibalo sang mga panghunahona sang tanan nga mga tawo. Himoa sa tagsa ka tawo ang nagakabagay sa iya,
40 agod ang imo mga tawo magkahadlok sa imo sa bug-os nga tion nga sila nagapuyo sa duta nga imo ginhatag sa amon mga katigulangan.
41-42 “Kon ang isa ka dumoluong nga nagapuyo sa malayo nga duta makabati sang imo pagkabantog, kag sang dalagku nga mga butang nga imo ginhimo sa imo mga tawo, kag magkari sa pagsimba sa imo kag sa pagpangamuyo sa sini nga Templo,
43 pamatii ang iya pangamuyo. Pamatii sia sa langit sa diin ikaw nagapuyo, kag himoa ang ginapangayo niya sa imo, agod ang tanan nga mga katawuhan sa kalibutan makakilala kag magakahadlok sa imo, pareho sang imo mga tawo. Kag sila makahibalo nga ining Templo nga akon ginpatindog amo ang pagasimbahan sa imo.
44 "Kon magsugo ikaw sa imo mga tawo sa pagpakig-away batok sa ila mga kaaway, kag magapangamuyo sila sa imo nga nagaatubang sa sini nga siyudad nga imo ginpili, kag sa sini nga Templo, nga akon ginpatindog sa imo,
45 pamatii ang ila mga pangamuyo. Pamatii sila sa langit kag padauga sila.
46 "Kon ang imo mga tawo magpakasala batok sa imo—kag wala gid sing bisan isa nga wala nagapakasala—kag sa imo kaakig ginpalutos nimo sila sa ila mga kaaway kag ginpadala sila subong nga mga bilanggo sa iban nga duta, bisan daw ano kalayo,
47 pamatii ang mga pangamuyo sang imo mga tawo. Kon didto sa sadto nga duta maghinulsol sila kag magpangamuyo sa imo nga nagatuad sang ila pagkamakasasala kag pagkamalaut, pamatii ang ila mga pangamuyo, O GINOO.
48 Kon sa sina nga duta magahinulsol sila sing maminatud-on, kag magapangamuyo sila sa imo sa nagaatubang sila sa sini nga duta nga imo ginhatag sa ila mga katigulangan, sa sini nga siyudad nga imo ginpili, kag sa sini nga Templo nga akon ginpatindog sa imo,
49 dayon pamatii ang ila mga pangamuyo. Pamatii sila sa imo puloy-an sa langit, kag magmaluloy-on ka sa ila.
50 Patawara ang tanan nila nga mga sala kag ang ila pagbato sa imo, kag himoa nga ang ila mga kaaway magkaluoy sa ila.
51 Kaugalingon mo sila nga mga tawo nga gindala mo pa gwa sa Egipto, inang nagadabadaba nga horno.
52 “O GINOONG Dios, kabay nga magmaayo ka sa gihapon sa imo mga tawo nga Israel kag sa ila hari, kag pamatii ang ila pangamuyo, kon magpangayo sila sa imo sing bulig.
53 Ginpili mo sila gikan sa mga katawuhan agod mangin-imo mga tawo, suno sa imo ginsiling sa ila paagi sa imo alagad nga si Moises, sang gindala mo ang amon mga katigulangan pa gwa sa Egipto."
Ang Katapusan nga Pangamuyo
54 Sa tapos si Salomon makapangamuyo sa Ginoo, nagtindog sia sa atubangan sang altar, sa diin nagaluhod sia nga nagabayaw sang iya mga kamot.55 Sa mabaskog nga tingog nagpangabay sia sa Ginoo nga bendisyunan ang tanan nga mga tawo nga nagatipon didto. Siling niya,
56 "Dayawon ang Ginoo nga naghatag sa iya mga tawo sing kalinong suno sa iya ginsaad. Gintuman niya ang tanan niya nga mga saad nga maalwan nga iya ginsiling paagi sa iya alagad nga si Moises.
57 Kabay ang Ginoo nga aton Dios mag-upod sa aton subong sang iya pag-upod sa aton mga katigulangan; kabay nga indi gid niya kita pagbayaan ukon pagpatumbayaan.
58 Kabay nga himuon niya kita nga magmatinumanon sa iya, agod nga magkabuhi kita sa gihapon suno sa luyag niya, kag tumanon ta ang tanan nga mga kasugoan kag mga sugo nga iya ginhatag sa aton mga katigulangan.
59 Kabay nga ang Ginoo nga aton Dios magdumdom sa tanan nga tion sini nga pangamuyo kag mga pag-ampo nga ako ginpangayo sa iya. Kabay nga magmaluloy-on sia sa gihapon sa mga tawo sang Israel kag sa ila hari, suno sa ila kinahanglanon adlaw-adlaw.
60 Tungod sini ang tanan nga mga pungsod sa kalibutan makahibalo nga ang Ginoo lamang amo ang Dios kag wala na sing iban.
61 Kabay nga kamo nga iya mga tawo, magmatutom sa gihapon sa Ginoo nga aton Dios, nga nagatuman sang tanan niya nga mga kasugoan kag mga sugo, subong sang inyo ginahimo karon nga adlaw.”
Ang Paghalad sang Templo
(2 Cron. 7:4-10)
62 Dayon si Haring Salomon kag ang tanan nga mga tawo didto nagdulot sing mga halad sa Ginoo.63 Naghalad sia sing 22,000 ka mga baka nga toro kag 120,000 ka mga karnero subong halad sa paghiambit. Gani ang hari kag ang tanan nga mga tawo naghalad sang Templo sa pagsimba sa Gimoo.
64 Sa amo nga adlaw ginhalad man niya ang natunga nga pasiyuhan sa atubangan sang Templo, sa diin naghalad sia sing mga sapat nga ginsunog sing bug-os sa altar, ang halad nga kalan-on, kag ang sibo sang mga sapat para sa halad sa paghiambit. Ang altar nga saway sa pasiyuhan sang Templo tama ka diutay para sa sini tanan nga mga halad.
65 Dayon si Salomon kag ang tanan nga mga tawo sang Israel, halin sa alagyan sa Hamat sa aminhan tubtob sa dulonan sa Egipto, sa bagatnan nagsaulog sang Piesta sang mga Tolda sa atubangan sang Ginoo nga aton Dios sa sulod sang pitor ka adlaw.
66 Sa ikawalo nga adlaw ginpapauli ni Salomon ang mga tawo. Tanan sila nagdayaw sa iya, kag nagpauli sila nga malipayon tungod sang tanan nga maayo nga mga butang nga ginhatag sang Ginoo sa iya alagad nga si David kag sa iya mga tawo nga Israel.
rAng isa ka dumaan nga pagbadbad pito; sa Hebreo katorse.
No comments:
Post a Comment