Si Haring Oseas sang Israel
1 Sa ika-12 nga tuig sang paggahom ni Haring Acaz sang Juda, si Oseas nga anak nga lalaki ni Ela nanginhari sa Israel, kag naghari sia sa Samaria sa sulod sang siyam ka tuig.
2 Nagpakasala sia batok sa Ginoo, pero indi pareho sang iban nga mga hari nga naggahom una sa iya.
3 Si Salmanasar nga Emperador sang Asiria nagpakig-away batok sa iya. Si Oseas nag-ampo sa iya kag nagbayad sa iya sing buhis tuigtuig.
4 Pero isa sadto ka tuig si Oseas nagpadala sing mensahero sa kay Haring So sang Egipto, nga nagapangayo sing bulig, kag nag-untat sia sa pagbayad sing buhis sa Asiria. Sang pagkahibalo ni Salmanasar sini, gindakop niya si Oseas kag ginpabilanggo.
Ang Pagkapukan sang Samaria
5 Dayon ginsalakay ni Salmanasar ang Israel, kag ginkibon ang Samaria. Sa ikatlo nga tuig sang pagkibon,
6 nga amo ang ika-9 nga tuig sang paggahom ni Oseas, ang Emperador sang Asiriav nag-agaw sang Samaria, gindala ang mga Israelinhon sa Asiria subong bihag, kag ginpapuyo ang iban sa ila sa siyudad sang Hala, ang iban sa suba sang Habor, sakop sang Gosan kag ang iban sa mga siyudad sang Media.
7 Ang Samaria napukan tungod kay ang mga Israelinhon nagpakasala batok sa Ginoo nga ila Dios, nga nagluwas sa ila sa hari sang Egipto kag ginpagwa niya sila sa Egipto. Nagsimba sila sa iban nga mga dios,
8 nagsunod sila sa mga pagbinatasan sang mga tawo nga ginpagwa sang Ginoo samtang ang iya mga tawo nagapasulod sa duta, kag ginsunod nila ang mga pagbinatasan nga gintudlo sang mga hari sang Israel.
9 Ang mga Israelinhon naghimo sing mga butang nga wala maluyagi sang GINOO nga ila Dios. Naghimo sila sang mga duog sa diin ginasimba ang mga diosdios sa ila tanan nga mga banwa, halin sa pinakadiutay nga baryo tubtob sa pinakadaku nga siyudad.
10 Sa tanan nga mga kabakuloran kag sa idalom sang tagsa ka magapa nga kahoy nagpatindog sila sang mga haligi nga bato, kag mga larawan sang diosa nga si Ashera,
11 kag nagsunog sila sing insyenso sa tanan nga mga altar sang mga diosdios, nga nagsunod sang ginahimo sang mga tawo nga gintabog pa gwa sang Ginoo sa duta. Ginpaakig nila ang Ginoo sa tanan nga ila ginhimo nga malaut,
12 kag naglapas sang sugo sang Ginoo nga indi magsimba sa mga diosdios.
13 Ang Ginoo nagpadala sang iya mga mensahero kag mga propeta sa pagpaandam sa Israel kag sa Juda nga nagasiling, “Bayai ang inyo malaut nga mga pagginawi kag tumana ang akon mga sugo nga yara sa kasugoan nga ginhatag ko sa inyo mga katigulangan nga akon ginhatag sa inyo paagi sa akon mga alagad nga mga propeta.”
14 Pero indi sila magtuman. Nagpatig-a sila kaangay sang ila mga katigulangan, nga wala magsalig sa Ginoo nga ila Dios.
15 Wala sila magtuman sa iya mga pagtudlo, wala sila magtuman sang kasugtanan nga iya ginhimo upod sa ila mga katigulangan, kag wala sila magpamati sang iya mga paandam. Nagsimba sila sa walay pulos nga mga diosdios kag sila man manginwalay pulos, kag ginsunod nila ang mga pagbinatasan sang mga pungsod sa palibot, nga wala nagatuman sang sugo sang Ginoo nga indi magsunod sini.
16 Ginlapas nila ang tanan nga mga sugo sang Ginoo nga ila Dios kag naghimo sang duha ka toro nga baka nga metal agod simbahon. Naghimo man sila sing larawan sang diosa nga si Ashera, nagsimba sa mga bituon, kag nag-alagad sa dios nga si Baal.
17 Ginhalad nila ang ila mga anak nga lalaki kag mga babayi subong halad nga sinunog sa mga diosdios. Nagpamangkot sila sa mga espiritista kag sa mga manughimalad, kag gintugyan nila ang ila kaugalingon sa paghimo sing malaut sa atubangan sang Ginoo kag ini nagpaakig sa GINOO.
18 Ang Ginoo naakig sa mga Israelinhon kag gintabog niya sila sa iya atubangan, kag ang nabilin amo lamang ang ginharian sang Juda.
19 Pero bisan ang mga tawo sang Juda wala magtuman sa mga sugo sang Ginoo nga ila Dios. Ginsunod nila ang mga pagginawi nga ginahimo sang mga tawo sang Israel.
20 Ang Ginoo nagsikway sang tanan nga mga Israelinhon, nagsilot sa ila kag gintugyan sila sa ila mga kaaway nga mapintas, tubtob sa ulihi nga gintabog niya sila sa iya atubangan.
21 Sa tapos mapihak sang GINOO ang Israel sa Juda, ang mga Israelinhon naghimo kay Jeroboam nga anak nga lalaki ni Nebat nga ila hari. Si Jeroboam amo ang nagtulod sa ila sa pagsikway sang ila Ginoo, kag gindala sila sa tama nga pagpakasala.
22 Ginsunod nila si Jeroboam, kag nagpadayon sa paghimo sang tanan nga mga sala nga iya ginhimo,
23 tubtob sang ulihi ang Ginoo nagtabog sa ila sa iya atubangan, suno sa iya ginpaandam paagi sa iya mga alagad nga mga propeta nga iya himuon. Gani ang mga tawo sang Israel gindala subong bihag sa Asiria, sa diin nagapuyo sila tubtob karon.
Ang mga Taga-Asiria Nagpuyo sa Israel
24 Ang emperador sang Asiria nagdala sing mga tawo halin sa mga siyudad sang Babilonia, Cuta, Iva, Hamat kag Sefarvaim kag ginpapuyo sila sa mga siyudad sang Samaria,w sa baylo sang mga Israelinhon nga ginbihag. Ginpanag-iyahan nila ini nga mga siyudad kag nagpuyo didto.
25 Sang pagsugod nila puyo didto, wala sila magsimba sa Ginoo, gani nagpadala sia sang mga leon, nga nagpamatay sang iban sa ila.
26 Ang emperador sang Asiria ginsugiran nga ang mga tawo nga ginpapuyo niya sa mga siyudad sang Samaria wala makahibalo sang kasugoan sang Dios sa sina nga duta, kag gani ang dios nagpadala sang mga leon, nga nagpamatay sa ila.
27 Gani ang emperador nagmando: "Pabalika ang isa sang mga pari nga gindala naton subong bihag; pabalika siax kag papuy-a didto, kag tudloan ang mga tawo sang kasugoan sang dios sina nga duta."
28 Gani ang isa ka Israelinhon nga pari nga ginpagwa halin sa Samaria naglakat kag nagpuyo sa Betel, sa diin nagtudlo sia sa mga tawo sa pagsimba sa GINOO.
29 Pero ang mga tawo nga nagpuyo sa Samaria nagpadayon sa paghimo sang ila mga diosdios kag ginbutang nila ini sa mga altar nga ginpatindog sang mga Israelinhon. Ang tagsa ka lainlain nga grupo naghimo sang mga diosdios sa mga siyudad sa diin nagapuyo sila.
30 Ang mga tawo sang Babilonia naghimo sing mga larawan sang dios nga si Succot-Benot; ang mga tawo sang Cuta naghimo sing mga larawan ni Nergal; ang mga tawo sang Hamat naghimo sing mga larawan ni Asima;
31 ang mga tawo sang Ava naghimo sing mga larawan ni Nibcaz kag ni Tartac; kag ang mga tawo sang Sefarvaim nagdulot sang ila mga kabataan subong halad nga sinunog sa ila mga dios nga si Adramilec kag si Anamelec.
32 Ini nga mga tawo nagsimba man sa Ginoo, kag nagpili gikan sa ila sang tanan nga sahi sang mga tawo sa pag-alagad subong mga pari sa duog sa diin ginasimba ang mga diosdios kag sa pagdulot sing mga halad para sa ila didto.
33 Gani nagsimba sila sa Ginoo pero nagsimba man sila sa ila kaugalingon nga mga dios suno sa pagbinatasan sang mga pungsod sa diin naghalin sila.
34 Ginahimo nila sa gihapon ang ila daan nga pagbinatasan tubtob karon nga adlaw. Wala sila nagasimba sa GINOO, ukon nagatuman sang mga kasugoan kag mga sugo nga iya ginhatag sa mga kaliwat ni Jacob, nga iya ginhingalanan Israel.
35 Ang Ginoo naghimo sing kasugtanan sa ila kag nagmando sa ila nga nagasiling, "Indi kamo magsimba sa iban nga mga dios. Indi kamo magyaub sa ila, ukon mag-alagad sa ila, ukon magdulot sang mga halad sa ila.
36 Dapat kamo magkahadlok sa akon, ang Ginoo, nga nagdala sa inyo pa gwa sa Egipto paagi sa daku nga gahom kag kusog. Kinahanglan magyaub kamo kag magdulot sing mga halad sa akon.
37 Tumana ninyo sa gihapon ang mga kasugoan kag mga sugo nga akon ginsulat para sa inyo. Indi kamo magkahadlok sa iban nga mga dios,
38 kag indi ninyo pagkalimtan ang kasugtanan nga ginhimo ko sa inyo.
39 Magtahod kamo sa akon, ang Ginoo nga inyo Dios, kag luwason ko kamo sa inyo mga kaaway."
40 Pero yadto nga mga tawo indi magpamati, kag nagpadayon sila sa pagsunod sang ila daan nga mga pagbinatasan.
41 Gani yadto nga mga tawo nagsimba sa GINOO, pero nagsimba man sila sa ila mga diosdios kag ang ila mga kaliwat naghimo man sang amo nga mga butang tubtob karon.
vEMPERADOR SANG ASIRIA: Ini amo si Sargon II; ginbuslan niya si Salmanaser nga napatay sa wala pa mapukan ang Samaria.
wSAMARIA: Ang ngalan sining kapital nga siyudad amo anay ang ginhingalan sa ginharian sang Israel.
xAng iban nga dumaan nga pagbadbad sia; sa Hebreo sila.
No comments:
Post a Comment