Si Haring Amasias sang Juda
(2 Cron. 25:1-24)
1 Sa ikaduha nga tuig sang paggahom ni Jehoas nga anak nga lalaki ni Joacas subong hari sa Israel, si Amasias nga anak nga lalaki ni Joas nanginhari sa Juda.
2 Nagaedad sia sing 25 ka tuig, kag naggahom sia sa Jerusalem sa sulod sing 29 ka tuig. Ang iya iloy amo si Jehoadan nga taga-Jerusalem.
3 Naghimo sia sing matarong sa atubangan sang GINOO, pero indi sia pareho sang iya amay nga si David; sa baylo ginhimo niya ang ginhimo sang iya amay nga si Joas.
4 Wala niya pagpanggub-a ang mga altar nga ginasimbahan sa mga diosdios, kag ang mga tawo nagpadayon sa pagdulot sing mga halad kag sa pagsunog sing insyenso sa sini nga mga altar.
5 Sang malig-on na ang paggahom ni Amasias, ginpapatay niya ang mga opisyales nga nagpatay sang iya amay nga hari.
6 Walay sapayan sini, wala niya pagpamatya ang ila mga kabataan kundi ginsunod niya ang ginmando sang GINOO sa kasugoan ni Moises nga nagasiling, "Ang mga ginikanan indi pagpamatyon tungod sang mga sala sang ila mga kabataan, kag ang mga kabataan indi pagpamatyon tungod sang mga sala sang ila mga ginikanan. Ang tawo pagapatyon lamang tungod sang iya nahimo nga sala.”
7 Si Amasias nagpamatay sing 10,000 ka Edomnon nga mga hangaway sa kapatagan sang Asin, nga yara sa nabagatnan sang Patay nga Dagat. Gin-agaw niya ang siyudad sang Sela sa inaway, kag ginhingalanan ini nga Jocteel tubtob karon nga adlaw.
8 Dayon si Amasias nagpadala sing mga mensahero kay Haring Jehoas sang Israel, nga nagahangkat sa iya sa pag-away.o
9 Pero si Haring Jehoas nagpadala pabalik sini nga sabat: "Sang una, sa Bukid sang Libano, ang talungon nagpadala sing pulong sa cedro: 'Ipaasawa ang imo anak nga babayi sa akon anak nga lalaki.' Ang isa ka sapat nga talonon nakaagi kag gintasak ang talungon.
10 Karon ikaw, Amasias, naglutos sang mga Edomnon, kag nagpabugal ka. Magkontento ka sang imo pagkabantog, kag magpabilin sa imo balay. Ngaa magtuga ka sing kagamo nga magadala lamang sing kalalat-an sa imo kag sa imo mga tawo?"
11 Pero si Amasias indi magpamati, gani si Haring Jehoas naglakat upod sa iya mga tinawo kag nagpakig-away kay Haring Amasias sa Betsemes sang Juda.
12 Ang mga hangaway ni Amasias nalutos, kag ang tanan niya nga mga soldado nagpalagyo pauli sa ila mga puloy-an.
13 Gindakop ni Jehoas si Amasias, nagpadayon sa Jerusalem kag ginguba ang pader halin sa Puwerta sang Efraim pakadto sa Pamusod nga Puwerta nga may kalabaon nga 200 ka yarda.
14 Ginkuha niya ang tanan nga mga pilak kag mga bulawan nga iya makita; ang tanan nga mga galamiton sa templo kag ang tanan nga mga manggad sang palasyo, kag gindala pabalik sa Samaria. May gindala man sia nga mga bihag upod sa iya.
15 Ang tanan nga mga ginhimo ni Jehoas, lakip ang iya kaisog sa inaway batok kay Haring Amasias sang Juda, nasulat sa Maragtas sang mga Hari sang Israel.
16 Si Jehoas napatay kag ginlubong sa lulobngan sang mga hari sa Samaria, kag ang iya anak nga lalaki nga si Jeroboam II pagbulos sa iya subong hari.
Ang Pagkamatay ni Haring Amasias sang Juda
(2 Cron. 25:25-28)
17 Si Haring Amasias sang Juda nagkabuhi sing 15 ka tuig sa tapos nga mapatay si Jehoas sang Israel.
18 Ang tanan nga mga ginhimo ni Amasias nasulat sa Maragtas sang mga Hari sang Juda.
19 May isa ka paghimbon sa Jerusalem sa pagpatay kay Amasias, gani nagpalagyo sia sa siyudad sang Laquis, pero ang iya mga kaaway nagsunod sa iya didto kag ginpatay sia.
20 Ang iya bangkay ginbalik sa Jerusalem nga nakarga sa kabayo, kag ginlubong didto sa lulobngan sang mga hari, sa Siyudad ni David, ang daan nga bahin sang Jerusalem.
21 Dayon ang mga tawo sang Juda nagkorona subong hari kay Uzias ang iya anak nga lalaki nga nagaedad sang 16 ka tuig.
22 Gin-agaw kag ginpatindog liwat ni Uzias ang Elat sa tapos mapatay ang iya amay.
Si Haring Jeroboam II sang Israel
23 Sa ika-15 nga tuig sang paggahom ni Amasias nga anak ni Joas hari sang Juda, si Jeroboam nga anak nga lalaki ni Jehoas nanginhari sang Israel, kag naggahom sia sa Samaria sa sulod sang 41 ka tuig.
24 Nagpakasala sia batok sa Ginoo, nagsunod sa mga malaut nga ginhimo ni Haring Jeroboam nga anak ni Nebat, nga nagdala sang Israel sa pagpakasala.
25 Ginbawi niya ang tanan nga mga kadutaan sang Israel, halin sa Alagyan sang Hamat sa naaminhan pakadto sa Patay nga Dagat sa nakatundan. Amo ini ang ginsaad sang Ginoo, ang Dios sang Israel paagi sa iya alagad nga propeta nga si Jonas anak nga lalaki ni Amitai nga tagat-Gat Heper.
26 Nakita sang Ginoo ang tama kapaitp nga pag-antos sang mga lsraelinhon. Wala gid sing isa nga makatabang sa ila.
27 Pero ang katuyoan sang Ginoo sa Israel indi ang paglaglag sa ila sing bug-os kag wala sing katapusan, gani, ginluwas niya sila paagi kay Jeroboam II.
28 Ang tanan nga mga ginhimo ni Jeroboam II, ang iya kaisog sa mga inaway, ang pagpabalik niya sang Damasco kag Hamat sang Israel,q nasulat sa Maragtas sang mga Hari sang Israel.
29 Napatay si Jeroboam kag ginlubong sa lulobngan sang mga hari, kag ang iya anak nga si Zacarias nagbulos sa iya subong hari.
onagahangkat sa iya sa pag-away; ukon nagaagda sa iya sa isa ka sinapol.
pAng iban nga dumaan nga pagbadbad tama kapait; sa Hebreo mabinatuon.
qAng isa ka dumaan nga pagbadbad sa lsrael; sa Hebreo para sa Juda sa Israel.
No comments:
Post a Comment