Si Haring Acaz sang Juda
(2 Cron. 28:1-27)
1 Sa ika-17 nga tuig sang paggahom ni Peca nga anak nga lalaki ni Remalias subong hari sang Israel, si Acaz nga anak nga lalaki ni Joatam nanginhari sang Juda.
2 Nagaedad sia sing 20 ka tuig sang paghari niya kag naggahom sia sa Jerusalem sa sulod sang 16 ka tuig. Wala sia magsunod sang matarong nga ginhimo sang iya amay nga si Haring David; sa baylo, naghimo sia sang malaut sa atubangan sang Ginoo nga iya Dios,
3 kag nagsunod sa mga ginhimo sang mga hari sang Israel. Ginhalad niya bisan pa ang iya kaugalingon nga anak nga lalaki sa mga diosdios subong halad nga sinunog, sa pagsunod sa mga makangilil-ad nga ginhimo sang mga tawo nga gintabog sang Ginoo pa gwa sa duta samtang nagapasulod ang mga Israelinhon.
4 Sa mga duog sa diin ginasimba ang mga diosdios, sa mga kabakuloran, kag sa idalom sang magapa nga kahoy, si Acaz nagdulot sing mga halad kag nagsunog sing insyenso.
5 Si Haring Resin sang Siria kag si Haring Peca sang Israel nagsalakay sang Jerusalem kag nagkibon sini, pero indi sila makalutos kay Acaz.
6 (Sa amo man nga tion, ang hari sang Edomu nag-agaw sang siyudad sang Elat, kag gintabog pagwa ang mga taga-Juda nga nagapuyo didto. Ang mga Edomnon nagpuyo sa Elat tubtob karon nga adlaw.)
7 Si Acaz nagpadala sing mga tawo nga may mensahi sa kay Tiglat Piliser, ang emperador sang Asiria: "Ako imo matutom nga alagad. Kari kag luwasa ako sa mga hari sang Siria kag Israel, nga nagasalakay sa akon."
8 Ginkuha ni Acaz ang pilak kag bulawan sa Templo kag sa talaguan sa palasyo kag gindala subong nga dulot sa emperador.
9 Si Tiglat Piliser, sa sabat sang pangabay ni Acaz, naggwa upod sa iya mga hangaway sa pagsalakay sang Damasco, gin-agaw ini, ginpatay si Haring Resin, kag gindala ang mga tawo pakadto sa Kir subong mga bihag.
10 Sang pagkadto ni Haring Acaz sa Damasco sa pagsugata kay Emperador Tiglat Piliser, nakita niya ang altar didto kag nagpadala sia kay Urias nga pari sang isa ka modelo nga sulondan sini nga nagalakip sang bisan diutay nga bahin sini.
11 Gani si Urias naghimo sang altar kaangay gid sini, kag gintapos ini sa wala pa magbalik si Acaz.
12 Sang pagbalik ni Acaz halin sa Damasco nakita niya ang altar nga nahuman na,
13 gani nagsunog sia sang mga halad nga sapat, kag mga halad nga kalan-on sa altar, kag nag-ula sia sa sini sang isa ka halad nga ilimnon kag sang dugo sang halad sang paghiambit.
14 Ang altar nga saway nga ginhalad sa Ginoo yara sa ulot sang bag-o nga altar kag sang Templo kag ginhalin ini ni Acaz sa naaminhan nga kilid sang bag-o nga altar.
15 Dayon ginsugo niya si Urias: "Gamita ining akon malapad nga altar para sa halad nga sinunog sa aga kag sa halad nga kalan-on sa hapon, sa halad nga sinunog kag halad nga kalan-on sang hari kag sang mga tawo, kag para sa halad nga ilimnon sang mga tawo. Iula sa sini ang dugo sang tanan nga mga sapat nga ginhalad. Pero ibilin mo ang altar nga saway nga akon gamiton para palamangkutan."
16 Gintuman ini ni Urias suno sa sugo sang hari.
17 Ginguba ni Haring Acaz ang saway nga karo nga ginagamit sa Templo kag ginkuha ang mga labador nga yara sa ibabaw sini. Ginkuha man niya ang saway nga tangke nga natungtong sa likod sang dose ka saway nga mga baka, kag ginbutang ini sa sadsaran nga bato.
18 Sa paglipay sang emperador sang Asiria, ginkuha man ni Acaz halin sa Templo ang tulongtungan sang trono sang hari, kag ginsirahan ang alagyan sang hari pakadto sa Templo.
19 Ang tanan nga mga ginhimo ni Haring Acaz nasulat sa Maragtas sang mga Hari sang Juda.
20 Si Acaz napatay kag ginlubong sa lulobngan sang mga hari sa Siyudad ni David, ang daan nga bahin sang Jerusalem, kag ang iya anak nga lalaki nga si Ezequias nagbulos sa iya subong hari.
uAng hari sang Edom; sa Hebreo si Haring Resin sang Siria.
No comments:
Post a Comment