"May Isa nga Magaabot nga Gamhanan pa sa Akon"

Liturhiya sang Pulong

(Domingo, Disyembre 16, 2018)

Ika-tatlo nga Domingo sang Adbyento
Misa de Aguinaldo

1. Ang Pagbasa gikan sa Libro ni:

Sofonias nga Propeta 3:14-18

Mag-amba kag magsinggit sa kalipay, mga tawo sang Israel! Maghugyaw, Jerusalem, sa bug-os mo nga tagipusoon! Ang GINOO nag-untat sang imo pena, ginkuha niya ang tanan nga nagakontra sa inyo. Ang GINOO, ang Hari sang Israel, nagaupod sa inyo; wala sing kabangdanan karon nga kamo magakahadlok. Ang tion magaabot nga sila magasiling sa Jerusalem, “Indi magkahadlok, siyudad sang Sion! Indi pagtugoti nga maghuyhoy ang inyo mga kamot! Ang GINOO nga inyo Dios nagaupod sa inyo; ang iya gahom nagahatag sa inyo sing pagdaog. Pareho siya sa isa ka gamhanan nga soldado nga magaluwas sa inyo. Ang GINOO magakalipay sa inyo kag ang iya gugma magahatag sa inyo, sing bag-o nga kabuhi. Magakanta sia kag magakalipay sa inyo, subong ka malipayon sang mga tawo sa piesta.” Ang GINOO nagasiling, “Gintapos ko ang pagpahog sa paghukom kag ginkuha ang inyo kahuloy-an.

Kalantahon sa Pagsabat:

Isaias nga Propeta 12:2-3, 4, 5-6

(S) Mag-amba kag magsinggit kamo sa kalipay, kay daku sa tunga ninyo ang balaan sang Israel!

Ang Dios ang akon manluluwas, magasalig ako sa iya kag indi magkahadlok. Ang Ginoo nagahatag sa akon sing gahom kag kusog, sia akon manluluwas. Subong nga ang mabugnaw nga tubig nagahatag kalipay sa ginauhaw, gani ang mga tawo sang Dios nagakalipay kon luwason niya sila. (S)
Magpasalamat kamo sa Ginoo! Panawag kamo sa iya sa pagpangayo sing bulig! Isugid sa tanan nga mga kapungsoran ang iya ginhimo! Sugiri sila kon daw ano sia ka gamhanan! (S)

Sugiri sila kon daw ano ka gamhanan sa Ginoo. (12:4)

Mag-amba sa Ginoo, tungod sang dalagku nga mga butang nga iya ginhimo. Iwaragwag ang balita sa bug-os nga kalibutan. Ang tagsatagsa nga nagaestar sa Sion magsinggit kag magkanta! Ang balaan nga Dios sang Israel gamhanan, kag nagaestar sia sa tunga sang iya mga tawo. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 4:4-7

Magkalipay kamo sa gihapon sa inyo pagkabuhi sa Ginoo. Liwat ginasiling ko sa inyo, magkalipay kamo! Ipakita ang inyo kalulo sa tanan nga mga tawo. Ang Ginoo madali na lang mag-abot. Indi kamo magpalibog sang bisan ano, kundi sa inyo mga pagpangamuyo, magpangayo kamo sa Dios sang inyo kinahanglanon nga nagapasalamat sa gihapon. Kag ang paghidait sang Dios nga indi matungkad sang paghangop sang tawo, magatipig sang inyo mga tagipusoon kag mga panghunahona paagi kay Cristo Jesus.

Aleluya:

Isaias 61:1

Ang Ginoo nagpuno sa akon sang iya gahom. Ginpili kag ginpadala niya ako sa pagwali sang Maayong Balita sa mga imol.

Ang Pagbasa sang Santos nga Ebanghelyo suno kay:

San Lucas 3:10-18

Ang mga tawo namangkot sa iya, “Ti, ano karon ang amon himuon?” Nagsabat sia, “Kon sin-o sa inyo ang may duha ka panid nga bayu ihatag niya ang isa sa wala sing bayu, kag kon sin-o sa inyo ang may kalan-on maghatag sa iya nga wala sing kalan-on.” May mga manugsokot sang buhis nga nag-abot sa pagpabautiso, kag nagpamangkot sila sa iya, “Manunodlo, ano ang himuon namon?” Nagsabat sia, “Indi kamo magsukot sing sobra sa ginasiling sang Kasugoan.” May mga soldado nga nagpamangkot man sa iya, “Ti, kami iya, ano ang amon himuon?” Nagsabat sia sa ila, “Indi kamo magkuha sang kuwarta sang iban sa palugos nga paagi ukon sa pagbutangbotang. Magkuntento kamo sang inyo suweldo.” Nagdugang na gid ang pagpaabot sang mga tawo, kag nagsugod sila sa pagpalibog nahanungod sa kay Juan tungod kay basi amo na sia ang Cristo. Gani si Juan nagsiling sa ila: “Ginabautisohan ko kamo sa tubig, pero may isa nga magaabot nga gamhanan pa sa akon. Indi gani ako takos sa paghubad sang higot sang iya sandalyas. Pagabautisohan niya kamo sa Espiritu Santo kag sa kalayo. Ginauyatan na niya ang iya inugpahangin sa pagpain sang tinggas sa upa. Dayon pagatipunon niya ang tinggas sa iya tambubo, pero pagasunogon niya ang upa sa kalayo nga indi gid mapalong.” Ginlaygayan ni Juan ang mga tawo sa madamo kag nagkalainlain nga paagi sang nagawali sia sang Maayong Balita sa ila.

Disyembre 15 | Disyembre 17