□□□□□
Si Salomon Naghanda sa Pagpatindog sang Templo
(2 Cron. 2:1-18)
1 Si Hiram nga hari sang Tiro amigo ni David halin sang una. Pagkabati niya nga si Salomon nagtal-os sa iya amay nga si David, nagpadala sia sing mga embahador sa iya.2 Si Salomon nagpadala sing mensahi kay Hiram:
3 “Nakahibalo ka nga ang akon amay nga si David indi makapatindog sang templo para sa pagsimba sa Ginoo nga iya Dios tungod sang pirme nga inaway nga iya gin-atubang batok sa mga kaaway nga mga pungsod sa palibot niya. Indi sia makapatindog sang templo tubtob ang Dios naghatag sa iya sing pagdaog batok sa tanan niya nga mga kaaway.
4 Pero karon ang Ginoo nga akon Dios naghatag sa akon sing kalinong sa tanan ko nga mga dulonan. Wala na ako sing mga kaaway, kag wala ako nagakahadlok nga may malain nga magaabot sa akon.
5 Ang Ginoo nagsaad sa akon amay nga si David nga nagasiling, 'Ang imo anak nga akon pabuslon sa imo subong hari magapatindog sing templo para sa akon.' Karon pat-od na ang akon plano sa pagpatindog sina nga templo para sa pagsimba sa Ginoo nga akon Dios.
6 Gani ipadala ang imo mga tinawo sa Libano sa pagpamulod sing mga kahoy nga sedro. Ang akon mga tinawo magaobra upod sa ila, kag suholan ko ang imo mga tinawo suno sa luyag mo. Ikaw gid nakahibalo nga ang akon mga tinawo indi makapamukan sing mga kahoy pareho sang imo mga tinawo.”
7 Si Hiram nalipay gid sang pagkabaton niya sang mensahi ni Salomon, kag nagsiling sia, "Dayawon ang GINOO karon nga adlaw sa iya paghatag kay David sing maalam nga anak nga magahari sa sinang daku nga pungsod!"
8 Dayon si Hiram nagpadala kay Salomon sining masunod nga mensahi: "Nabaton ko ang imo mensahi, kag handa ako sa paghimo sang imo ginapangabay, kag sa paghatag sang mga kahoy nga sedro kag pino.
9 Ang akon mga tinawo magapadulhog sang mga kahoy halin sa Libano tubtob sa dagat kag ila ini talabiron nga daw balsa agod ila ini mapalutaw pakadto sa duog nga imo luyag. Didto pagabuloblagon ini sang akon mga tinawo kag ang imo mga tinawo amo na ang mahibalo. Kon parti sa imo, ikaw lang kuntani ang mahibalo sang pagkaon sang akon mga tinawo.”
10 Gani si Hiram naghatag kay Salomon sang tanan nga kahoy nga sedro kag pino nga iya kinahanglanon.
11 Kag si Salomon naghatag kay Hiram sing 20,000 ka sako nga trigo kag 1,833 ka barilg nga lana sang olivo kada tuig para sa iya mga tinawo.
12 Ang Ginoo nagtuman sang iya saad kag ginhatagan si Salomon sing kaalam. May kalinong sa tunga ni Hiram kag ni Salomon, kag naghimo sila sing kasugtanan sa pag-apinay.
13 Si Haring Salomon nagtipon sa bug-os nga Israel sing 30,000 ka mga tawo nga ginpilit sa pag-obra,
14 kag ginbutang niya si Adoniram sa pagdumala sa ila. Ginbahinbahin niya sila sa tatlo ka grubo nga tag-10,000 ka mga tawo, kag ang tagsa ka grupo nagtener sing isa ka bulan sa Libano kag duha ka bulan sa ila balay.
15 Si Salomon may 80,000 ka mga tawo sa kabakuloran nga nagabasbas sing mga bato, kag may 70,000 ka mga tawo sa pagdala sini,
16 kag nagbutang sia sing 3,300 ka mga porman sa pagdumala sang ila mga hilikuton.
17 Sa mando ni Haring Salomon nagbasbas sila sing dalagku kag maayo nga klase nga mga bato para sa sadsaran sang Templo.
18 Ang mga tinawo ni Salomon kag ni Hiram, kag ang mga tawo gikan sa siyudad sang Biblos, naghanda sang mga bato kag mga tablon sa pagpatindog sang Templo.
gAng iban nga dumaan nga pagbadbad (tan-awa ang 2 Cron. 2:10) 1,833 ka baril; sa Hebreo 18 ka baril.
No comments:
Post a Comment