"Magaluwas Sia sang Iya mga Tawo sa ila mga Sala"

Liturhiya sang Pulong

(Martes, Disyembre 18, 2018)

Misa de Aguinaldo

Ang Pagbasa gikan sa Libro ni:

Jeremias nga Propeta 23:5-8

Ang GINOO nagasiling, “Magaabot gid ang tion nga magapili ako subong hari sang isa ka kaliwat ni David nga manginkaangay sa iya. Ini nga hari magadumala nga may kaalam kag magahimo sing matarong kag nagakaigo sa bug-os nga duta. Kon sia amo na ang hari, ang mga tawo sang Juda may kalig-onan, kag ang mga tawo sang  Israel magakabuhi sa paghidait. Pagatawgon nila ina nga hari nga ‘Ang GINOO matarong.’” Nagasiling mg Ginoo, "Magaabot ang tion nga ang mga tawo indi na magsumpa sa akon subong Dios nga buhi nga nagpagwa sang mga tawo sang Israel gikan sa duta sang Egipto. Sa baylo, magasumpa sila sa akon subong Dios nga buhi nga nagpagwa sang mga tawo sang Israel gikan sa aminhan nga duta, kag gikan sa tanan nga mga kapungsoran sa diin ko sila ginpaalaplaag. Dayon magapuyo sila sa ila kaugalingon nga duta."

Salmo sa Pagsabat:

Mga Salmo 72:1-2, 12-13, 18-19

(S) Sa iya mga inadlaw, magauswag ang katarungan, kag magalapnag ang paghidait sing walay katapusan.

Tudloi ang hari sa paghukom suno sa imo pagkamatarong, O Dios, ipaambit sa iya ang imo kaugalingon nga katarungan, agod magahari sia sa imo mga tawo suno sa katarungan, kag magagahom sing matarong sa mga imol. (S)
Ginaluwas niya ang mga imol nga nagapanawag sa iya, kag ang mga nawad-an kag mga pinatumbayaan. May kaluoy sia sa mga maluya kag imol, ginaluwas niya ang kabuhi sang mga nawad-an. (S)
Dayawon ang Ginoo, ang Dios sang Israel, nga sia gid lang ang nagahimo sining makatilingala nga mga butang! Dayawon ang iya mahimayaon nga ngalan sa walay katapusan, kag kabay nga ang iya himaya magpuno sang bug-os nga duta! Kabay pa! Kabay pa! (S)

Aleluya:
O Pangulo sang mga taga-Israel, nga naghatag sang mga sugo kay Moises sa Sinai, kari kag luwason mo kami sang imo gamhanan nga kamot.

Ang Pagbasa sang Santos nga Ebanghelyo suno kay:

San Mateo 1:18-25

Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.” Karon ini tanan nahanabo agod mapamatud-an ang ginhambal sang Ginoo paagi sa propeta, “Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”). Gani sang pagmata ni Jose gintuman niya ang ginsiling sang anghel sang Ginoo, kag iya ginpangasawa si Maria. Pero wala si Jose magtandog kay Maria tubtob nga nag-anak sia sing lalaki, kag ginhingalanan ni Jose ang bata nga Jesus.

Disyembre 17 | Disyembre 19