Disyembre 11, 2020, Biyernes sang Ika-2 nga Semana sang Adbiento

Liturhiya sang Pulong

San Damaso I, Santo Papa

Nahauna nga Balasahon - Isaias  48:17-19

Salmo sa Pagsabat - Mga Salmo 1:1-2, 3, 4, 6

Ebanghelyo - Mateo 11:16-19

Ang Ginoo Magatuytoy sa inyo sa Dalan nga dapat ninyo Agihan

Ang Pagbasa gikan sa Libro ni:

Isaias nga Propeta 48:17-19

    Ang balaan nga Dios sang Israel, 

        ang Ginoo nga nagaluwas sa inyo nagasiling: 

    "Ako amo ang Ginoo nga inyo Dios, 

        ang luyag magtudlo sa inyo para sa inyo kaayuhan, 

    kag nagatuytoy sa inyo sa dalan 

        nga dapat ninyo agihan. 

    "Kon nagpamati lamang kamo 

        sa akon mga sugo! 

    Kuntani nag-ilig na ang mga 

        kaayuhan sa inyo 

    kaangay sang tuboran nga wala ginahubsi! 

    Ang pagdaog nag-abot sa inyo 

    kaangay sang mga balod nga 

        nagadapya sa baybayon. 

    Ang inyo mga kaliwat manginsubong 

        kadamo sang mga balas sa baybayon, 

    kag napat-od ko nga indi gid sila malaglag.”

Salmo sa Pagsabat:

Mga Salmo 1:1-2, 3, 4, 6

(S) Ang bisan sin-o nga magsunod sa imo, O Ginoo may kapawa sang kabuhi.

Bulahan ang tawo nga nagasikway sang laygay sang mga malaut, nga wala nagasunod sa ginahimo sang mga makasasala, nga wala nagabuylog sa mga nagayaguta sa Dios. Sa baylo, naluyag sia magbasa sang Kasugoan sang Ginoo, kag nagatuon sini sa adlaw kag gab-i. (S)

Kaangay sia sang kahoy nga nagatubo sa higad sang sapa, nagapamunga ini sa nagakaigo nga panahon, kag ang iya mga dahon wala nagakalaya. Matigayon niya ang tanan nga iya ginahimo! (S)

Pero indi kaangay sini ang mga malaut! Kaangay sila sang labhang nga ginapalid sang hangin. (S)

Ang Ginoo nagatuytoy kag nagaapin sang matarong nga mga tawo, pero ang malaut nagapadulong sa ila kalaglagan. (S)

Aleluya:

    Ang Ginoo magakari; sugataa ninyo Sia; Sia amo ang prinsipe sang paghidait. 

Ang Pagbasa sang Santos nga Ebanghelyo suno kay:

San Mateo 11:16-19

    Sadto nga panahon: Si Jesus naghambal sa mga tawo, “Karon, sa ano ko bala ipaanggid ang mga tawo sini nga panahon? Kaangay sila sang mga kabataan nga nagapinungko didto sa tiyendahan kag nagasinggitanay, ‘Nagtukar kami sa inyo sing plawta, pero wala kamo magsaot! Nagpanalambiton kami, pero wala man kamo maghibi!’ Nagkari si Juan nga nagapuasa kag wala nagainom sing bino, kag nagsiling sila, ‘Ginagamhan sia sang yawa!’ Ang Anak sang Tawo nagkari nga nagakaon kag nagainom, kag nagsiling sila, ‘Tan-awa ninyo ini nga tawo! Palakaon sia kag palainom sing bino, kag amigo sang mga manugsokot sang buhis kag sang mga makasasala!’ Pero ang kaalam sang Dios mapamatud-an paagi sa iya mga binuhatan.”

Disyembre 10 | Disyembre 12

Disyembre 4, 2020, Biyernes sang Nahauna nga Semana sang Adbiento

Liturhiya sang Pulong

San Juan Damasceno, Pari kag Doktor sang Simbahan

Nahauna nga Balasahon - Isaias 29:17-24

Salmo sa Pagsabat - Mga Salmo 27:1, 4, 13-14

Ebanghelyo - Mateo 9:27-31

"Nagatuo bala kamo?"

Ang Pagbasa gikan sa Libro ni:

Isaias nga Propeta 29:17-24

   Subong sang ginasiling, sa indi madugay ang kagulangan mangintalamnan kag ang talamnan manginkagulangan.

   Kon mag-abot ina nga adlaw, ang bungol makabati kon ang isa ka libro basahon sing mabaskog, kag ang bulag nga nagkabuhi anay sa kadudolman makakita. Ang imol kag mapainuboson nga mga tawo makaagom liwat sang kalipay nga ginahatag sang balaan nga Dios sang Israel. Amo ini ang katapusan sadtong nagapigos sa iban kag nagatamay sa Dios. Ang tagsa ka makasasala laglagon. Ang Dios magalaglag sang mga nagapasipala sa iban, sadtong mga nagapugong agod indi masilutan ang mga kriminal, kag ang mga nagabutig agod indi mahatagan sing husto nga paghukom ang matarong nga mga tawo.

   Gani karon ang Ginoo, ang Dios sang Israel nga nagluwas kay Abraham sa mga kabudlayan nagasiling, "O mga tawo ko, indi na kamo mahuy-an, kag indi na kamo magpanghilawhilaw sa kahuya. Makita ninyo ang mga anak nga akon ihatag sa inyo, kag dayon makilala ninyo nga ako amo ang balaan nga Dios sang Israel. Padunggan ninyo ako kag magtuman sa akon. Ang mga buangboang magatuon sa paghangop, kag ang pirme lang nagakumod magakalipay kon tudloan.”

Salmo sa Pagsabat:

Mga Salmo 27:1, 4, 13-14

(S) Ang Ginoo amo ang akon kapawa kag kaluwasan. 

Ang Ginoo amo ang akon kapawa kag kaluwasan: wala ako sing sin-o nga kahadlukan; ang Ginoo nagaapin sa akon sa tanan nga katalagman; wala ako sing kahadlukan. (S)

Isa lamang ka butang ang akon ginapangayo sa Ginoo, isa lamang ka butang ang akon naluyagan: sa pagpuyo sa balay sang Ginoo sa bug-os ko nga kabuhi, sa pagpamalandong sang iya kaayo didto, kag sa pagpangayo sang iya pagtuytoy. (S)

Huo, sa-sini nga kinabuhi makakita pa ako sang kaayo sang Ginoo sa iya mga tawo. Magsalig sa Ginoo! Magtuo kag indi magdula sing paglaom. Magsalig sa Ginoo! (S)

Aleluya:

   Ang Ginoo magaabot kag magapasadya sang kabuhi sang iya mga alagad.

Ang Pagbasa sang Santos nga Ebanghelyo suno kay:

San Mateo 9:27-31

   Naghalin si Jesus sa sadto nga duog, kag sang nagalakat sia, may duha ka bulag nga nagsunod sa iya nga nagasinggit, “Kaluoyi kami, kaliwat ni David!”

   Sang makasulod na si Jesus sa isa ka balay nagpalapit sa iya ang duha ka bulag kag iya sila ginpamangkot, “Nagatuo bala kamo nga sarang ko mahimo ini?”

   Nagsabat sila, “Huo, Sir!”

   Dayon gintandog ni Jesus ang ila mata kag nagsiling, “Matuman ini suno sa inyo pagtuo!” Kag makakita na sila. Si Jesus nagpaandam gid sa ila, “Indi kamo magpanugid bisan kay sin-o!” Pero naglakat sila kag nagpanugid sang balita nahanungod kay Jesus sa sadto nga lugar.

Disyembre 3 | Disyembre 5

Disyembre 2, 2020, Miyerkules sang Nahauna nga Semana sang Adbiento

Liturhiya sang Pulong

Nahauna nga Balasahon - Isaias 25:6-10

Salmo sa Pagsabat - Mga Salmo 23: 1-3, 3-4, 5, 6

Ebanghelyo - Mateo 15:29-37

"Sia amo ang Ginoo - Nagsalig kami sa Iya"

Ang Pagbasa gikan sa Libro ni:

Isaias nga Propeta 25:6-10

   Diri sa bukid sang Sion ang Ginoo nga Makagagahom magaaman sang isa ka bangkite para sa tanan nga mga kapungsoran sang kalibutan—isa ka bangkite sang labing manamit nga pagkaon kag sang labing maayo nga bino. Diri panason niya ang tanan nga mga gal-om sang kasubo nga nagalikop sang tanan nga mga kapungsoran. Ang Ginoo magadula sang kamatayon sa walay katapusan! Pagapahiran niya ang mga luha sang tagsatagsa sa mga mata kag kuhaon niya ang kahuloy-an nga gin-antos sang iya mga tawo sa bug-os nga kalibutan. Ang Ginoo gid amo ang naghambal!

   Kon mahanabo ini, ang tagsatagsa magasiling, "Sia amo ang amon Dios! Nagsalig kami sa iya kag ginluwas niya kami. Sia amo ang Ginoo. Nagsalig kami sa iya, kag karon nagakasadya kami kag nagakalipay, kay ginluwas niya kami!” Ang Ginoo magaapin sang bukid sang Sion.

Salmo sa Pagsabat:

Mga Salmo 23: 1-3, 3-4, 5, 6

(S) Magapuyo ako sa balay sang Ginoo sa tanan nga adlaw sang akon kabuhi.

Ang Ginoo amo ang akon manugbantay, yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytuyan sa mga linaw sang matin-aw nga tubig. Ginahatagan niya ako sing bag-o nga kusog. (S)

Ginatuytoyan niya ako sa husto nga dalan, suno sa iya ginsaad. Bisan pa nagaagi ako sa dalan nga tama kadulom, indi gid ako mahadlok, O Ginoo, kay ikaw nagaupod sa akon. Ang imo baston kag ang imo sungkod nagaapin sa akon. (S)

Ginabutangan mo ako sa lamisa sing madamo nga pagkaon, sa diin makit-an ako sang tanan ko nga mga kaaway. Ginhisuan mo sing lana ang akon ulo sa pag-abiabi sa akon, kag ginpaawas mo ang akon kupa. Ginaabiabi mo ako subong sang pinasidunggan nga bisita, kag ginapuno mo ang akon kupa. (S)

Sa pagkamatuod, ang imo kaayo kag gugma mangin-akon samtang nga nagakabuhi pa ako i, kag ang imo balay mangin-akon puloy-an sa walay katubtoban. (S)

Aleluya:

   Tan-awa, nagapakari ang Ginoo sa pagluwas sang iya nga tawo; bulahan ang nakaaman sa pagsugata sa iya.

Ang Pagbasa sang Santos nga Ebanghelyo suno kay:

San Mateo 15:29-37

   Naghalin si Jesus sa sadto nga duog kag nagkadto sa higad sang Linaw sang Galilea. Nagtaklad sia sa isa ka bakulod kag naglingkod didto. Nagkadto sa iya ang madamo nga mga tawo nga nagadala sang mga piang, mga bulag, mga pingkaw, mga apa, kag sang madamo pa nga mga masakiton, kag ila ginbutang sa atubangan ni Jesus, kag gin-ayo niya sila.

   Ang mga tawo natingala sang ila makita nga ang mga apa makahambal, ang mga pingkaw makauntay sang ila mga kamot, ang mga piang makalakat, ang mga bulag makakita; kag gindayaw sang mga tawo ang Dios sang Israel.

   Gintawag ni Jesus ang iya mga gintuton-an kag nagsiling sa ila, “Naluoy ako sa sini nga mga tawo, kay tatlo na ini ka adlaw ang ila pag-upod sa akon, kag karon nawad-an na sila sing kalan-on. Indi ako luyag nga magpauli sila nga wala makakaon, kay basi magkalalipong sila sa dalanon.”

   Ang mga gintuton-an nagpamangkot sa iya, “Diin bala kita mangita sing pagkaon diri sa desierto nga makaigo para sa sini nga kadamuon sang mga tawo?”

   Ginpamangkot sila ni Jesus, “Pila bala ka bilog ang inyo tinapay?” Nagsabat sila, “Pito ka bilog nga tinapay kag pila lang ka bilog nga magamay nga mga isda.” Ginsugo niya ang mga tawo nga magpungko sa duta. Dayon ginkuha niya ang pito ka bilog nga tinapay kag ang mga isda, kag sang nakapasalamat sia sa Dios, ginpamihakpihak niya ini kag ginhatag sa mga gintuton-an, kag ang mga gintuton-an naghatag sini sa mga tawo. Ang tanan nagkaon kag nabusog. Gintipon sang mga gintuton-an ang nabilin kag pito pa ka alat ang napuno. 

Disyembre 1 | Disyembre 3

Ang Nagapaubos sang Ila Kaugalingon Pagapakataason

Liturhiya sang Pulong

(Sabado, Agosto 22, 2020)

Ang Mahal nga Birhen Maria nga Reyna

Ang Pagbasa gikan sa Libro ni:

Ezequiel nga Propeta 43:1-7

   Gindala ako sang tawo sa puwerta nga nagaatubang sa sidlangan, kag didto nakita ko ang masilaw nga kapawa nga nagapahayag sang presensya sang Dios sang Israel nga nagapakari halin sa sidlangan. Ang tingog sang Dios daw dagat nga nagadaguhob, kag ang duta nagabanaag sang iya masilaw nga kapawa. Ini nga palanan-awon pareho sang akon nakita sang pagkari sang Dios sa paglaglag sang Jerusalem, kag pareho sang palanan-awon nga akon nakita sa ubay sang suba sang Kebar. Dayon naghapa ako sa duta. Ang masilaw nga kapawa nag-agi sa sidlangan nga puwerta kag nagsulod sa Templo.

   Gin-alsa ako sang espiritu sang Ginoo kag gindala sa nasulod nga pasiyuhan, sa diin nakita ko ang Templo nga napuno sang himaya sang Ginoo. Ang tawo nagtindog sa luyo ko didto, kag nabatian ko ang Ginoo nga naghambal sa akon halin sa Templo, "Tawo nga mamalatyon, yari ang akon trono. Magapuyo ako diri upod sa mga tawo sang Israel kag magagahom sa ila sa walay katapusan. Ang mga tawo sang Israel ukon ang ila mga hari indi na gid magpakahuya liwat sang akon balaan nga ngalan paagi sa pagsimba sa iban nga mga dios kag sa pagpatindog sang mga monyomento sang ila patay nga mga hari.

Salmo sa Pagsabat:

Mga Salmo 85:9 kag 10, 11-12, 13-14

(S) Ang himaya sang Dios magapabilin sa aton duta.

Nagapamati ako sa ginasiling sang Ginoong Dios; nagasaad sia sing paghidait sa aton nga iya mga tawo. Matuod gid nga handa sia sa pagluwas sang mga nagapadungog sa iya, kag ang iya himaya magapabilin sa aton duta. (S)

Ang gugma kag katutom magaupdanay, ang pagkamatarong kag paghidait magakitaay. Ang katutom sang tawo magalambot sa ibabaw halin sa duta, kag ang pagkamatarong sang Dios magatamod halin sa langit. (S)

Ang Ginoo magapauswag sa aton, kag ang aton duta magapatubas sing bugana. Ang pagkamatarong magauna sa Ginoo, kag magaaman sing alagyan para sa iya. (S)

Aleluya:

San Mateo 23:9, 10

   Isa lamang ang inyo amay sa langit kag isa lamang ang inyo pangulo nga amo ang Cristo. 

Ang Pagbasa sang Santos nga Ebanghelyo suno kay:

San Mateo 23:1-12

   Dayon si Jesus naghambal sa madamo nga mga tawo kag sa iya mga gintuton-an, “Ang mga manunodlo sang Kasugoan kag ang mga Fariseo, amo ang mga awtoridad sa pagsaysay sang Kasugoan ni Moises. Gani tumana kag sunda ninyo ang ila ginasiling sa inyo, pero indi kamo mag-ilog sang ila ginahimo, kay lain ang ila ginahambal kag lain man ang ila ginahimo. Nagaaman sila sang mabug-at nga dalal-on kag ginapapas-an nila ini sa mga tawo, pero wala man gani sila nagabulig. Ang tanan nila nga ginahimo pakitakita lang sa mga tawo. Dalagku ang mga sulodlan sang mga dinalan sang kasulatan nga ginabugkos nila sa ila mga agtang kag sa ila mga butkon kag malaba ang mga sidsid sang ila bayu! Luyag sila magpungko sa pinasulabi nga mga pulongkoan sa mga punsyon kag sa nahauna nga mga pulongkoan sa mga sinagoga. Luyag sila nga abiabihon sing matinahuron sa mga merkado, kag tawgon nga ‘Manunodlo.’ Pero kamo inyo indi dapat magpatawag nga ‘Manunodlo,’ kay kamo tanan mag-ulotod, kag isa lamang ang inyo Manunodlo. Indi kamo magtawag bisan kay sin-o nga tawo diri sa duta nga ‘Amay,’ kay isa lamang ang inyo amay sa langit. Kag indi man kamo magpatawag nga ‘Pangulo,’ kay isa lamang ang inyo pangulo nga amo ang Cristo. Ang labing daku sa inyo dapat manginsuloguon ninyo. Ang nagapakataas sang iya kaugalingon pagapaubson, kag ang nagapaubos sang iya kaugalingon pagapakataason.” 

Agosto 21 | Agosto 23

Ang mga Butang nga Nagadagta sa Tawo

Liturhiya sang Pulong

(Martes, Agosto 4, 2020)

San Juan Maria Vianney, Pari

Ang Pagbasa gikan sa Libro ni:

Jeremias nga Propeta 30:1-2, 12-15, 18-22

   Ang Ginoo, ang Dios sang Israel, nagsiling sa akon: "Isulat sa isa ka libro ang tanan nga akon ginsiling sa imo.

   Ang Ginoo nagasiling sa iya mga tawo, "Ang inyo mga pilas indi magpali, ang inyo mga samad indi mag-ayo. Wala sing may mag-atipan sa inyo, wala sing bulong sa inyo mga pilas, wala na sing paglaom nga mag-ayo kamo. Ang tanan ninyo nga mga kahagugma nagkalimot sa inyo, wala na sila nagakabalaka sa inyo. Ginsalakay ko kamo kaangay sang kaaway, ang inyo silot tama kabug-at, kay madamo kaayo ang inyo mga sala, kag ang inyo kalautan tama kadaku. Indi na kamo magreklamo nahanungod sang inyo mga kasamaran, wala na sing makaayo sa inyo. Ginsilutan ko kamo kaangay sini, kay ang inyo mga sala madamo, kag ang inyo kalautan tama kadaku.

   Ang Ginoo, nagasiling, "Pabalikon ko ang akon mga tawo sa ila duta, kag kaluoyan ko ang tagsa ka panimalay. Ang Jerusalem pagapatindugon liwat, kag ang iya palasyo pagakaayuhon. Ang mga tawo nga nagapuyo didto magaamba sing pagdayaw, magasinggit sila sa kalipay. Sa akon pagbendisyon magamuad slla, ang akon pagbendisyon magahatag sa ila sang kadungganan. Pabalikon ko ang daan nga gahom sang pungsod, kag pasaron ko ini liwat sing malig-on. Silutan ko ang tanan nga nagapigos sa ila. Ang ila pangulo magagikan sa ila kaugalingon nga pungsod, ang ila prinsipe gikan sa ila kaugalingon nga mga tawo. Kag agdahon ko sia, magapalapit sia, sin-o ang mangahas sa pagkari nga wala maagda. Sila mangin-akon mga tawo, kag ako mangin-ila Dios. Ako, ang GINOO, naghambal sini."

Salmo sa Pagsabat:

Mga Salmo 102:16-18, 19-21, 29, 22-23

(S) Ang Ginoo nagpatindog liwat sang Sion, ipakita niya ang iya pagkagamhanan.

Ang mga pungsod magakahadlok sa Ginoo; ang tanan nga mga hari sang duta magakahadlok sa iya gahom. Kon ang Ginoo magpatindog liwat sang Sion, ipakita niya ang iya pagkagamhanan. (S)

Isulat para sa palaabuton nga kaliwatan ang ginhimo sang Ginoo, agod ang mga tawo nga wala pa mabun-ag magadayaw sa iya. Ang Ginoo nagtamod halin sa iya balaan nga duog sa kahitaasan, nagtamod sia sa duta gikan sa langit, sa pagpamati sang mga ugayong sang mga binilanggo, kag sa paghilway sang mga ginpamatbatan sing kamatayon. (S)

Ang amon mga kabataan magakabuhi nga indi maano, kagang ila mga kaliwat magakabuhi sa idalom sang imo pagbantay. Gani ang mga tawo magabantala sang ngalan sang Ginoo  sa Sion; magapasalamat sila sa iya sa Jerusalem, kon ang mga pungsod kag mga ginharian magtipon kag magsimba sa Ginoo. (S)

Aleluya:

San Juan 1:49

   Manunodlo, ikaw amo ang Anak sang Dios! Ikaw amo ang Hari sang Israel.

Ang Pagbasa sang Santos nga Ebanghelyo suno kay:

San Mateo 15:1-2, 10-14

   May mga Fariseo kag mga manunodlo sang Kasugoan halin sa Jerusalem nga nagkadto kay Jesus kag namangkot, “Ngaa bala nga ang imo mga gintuton-an wala nagatuman sang mga pagtulon-an nga ginpaalinton sang aton mga katigulangan? Wala sila nagapanghinaw sang ila kamot suno sa kinabatasan kon magkaon sila!” 

   Gintawag ni Jesus ang mga tawo kag nagsiling sa ila, “Pamatii kag hangpa ninyo! Indi ang nagasulod sa baba sang tawo ang nagadagta sa iya, kundi ang nagagwa sa iya baba amo ang nagadagta sa iya.” 

   Dayon ang iya mga gintuton-an nagpalapit sa iya kag nagsiling, “Nahibal-an mo bala nga ang mga Fariseo nasaklaw sang imo ginsiling?” 

   Si Jesus nagsabat, “Ang tagsa ka tanom nga wala gintanom sang akon langitnon nga Amay pagagabuton. Pabayai sila! Mga bulag sila nga manugtoytoy, kag kon ang bulag magtuytoy sa isa ka bulag, sila nga duha mahulog sa kanal.” 

Agosto 3 | Agosto 5

Nagapalibog Ka - Isa gid lang ang Kinahanglan

Liturhiya sang Pulong

(Miyerkules, Hulyo 29, 2020)

Santa Marta

1. Ang Pagbasa gikan sa Libro ni:

Jeremias nga Propeta 7:1-11

   Ginpadala ako sang Ginoo sa puwerta sang Templo, sa diin ang mga tawo sang Juda nagsulod sa pagsimba. Ang Ginoo nagsiling sa akon sa pagtindog didto kag sa pagbantala sang inugsiling sang Ginoo nga Makagagahom, ang Dios sang Israel, “Bayluhi ang inyo pagginawi kag ang mga butang nga inyo ginahimo, agod padayunon ko kamo sa pagkabuhi diri. Untati ninyo ang pagpati sa butig nga mga pulong, ‘Indi kami maano! Amo ini ang Templo sang Ginoo, ang Templo sang Ginoo, ang Templo sang Ginoo!’

   “Bayluhi ang inyo pagginawi kag ang mga butang nga inyo ginahimo. Magtratahay kamo sing husto. Indi na kamo magpamintaha sa mga dumoluong, mga ilo, kag mga balo. Indi kamo magpamatay sang mga tawo nga wala sing sala sa sining duta. Indi na kamo magsimba sa iban nga mga dios, kay ini magalaglag sa inyo. Kon magbaylo kamo padayunon ko kamo sa pagkabuhi sa duta nga akon ginhatag sa inyo mga katigulangan subong ila palanublion nga wala sing katapusan.

   “Tan-awa, nagasalig kamo sa mga pulong nga malimbungon. Nagapangawat kamo, nagapamatay, nagapanginbabayi kag nagapanginlalaki, nagasumpa sing butig, nagadulot sing mga halad kay Baal, kag nagasimba sa iban nga mga dios nga wala gani ninyo makilal-i. Ginahimo ninyo ang akon ginadumtan, kag dayon nagakari kamo kag nagatindog sa akon atubangan, sa akon Templo, kag nagasiling, ‘Indi kami maano!’ Nagahunahona bala kamo nga ang akon Templo palanaguan sang mga makawat? Nakit-an ko ang inyo ginahimo.

Salmo sa Pagsabat:

Mga Salmo 34:2-3, 4-5, 6-7, 8-9, 10-11

(S) Sa gihapon magapasalamat ako sa Ginoo.

Sa gihapon magapasalamat ako sa Ginoo; indi gid ako mag-untat sa pagdayaw sa iya. Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! (S)

Ibantala ta ang pagkadaku sang Ginoo; dayawon ta sing tingob ang iya ngalan! Nagpangamuyo ako sa Ginoo kag ginsabat niya ako; ginkuha niya ang tanan ko nga mga kahadlok. (S)

Ang mga ginapigos nagasalig sa iya kag nagakalipay sila; indi gid sila mapaslawan. Ang mga makalulooy nagapanawag sa iya, kag nagasabat sia sa ila; ginaluwas niya sila sa tanan nila nga mga kalalat-an. (S)

Ang anghel sang Ginoo nagabantay sa tanan nga nagatahod sa iya, kag iya sila ginaluwas sa katalagman. Tilawi kag tan-awon ninyo kon daw ano kaayo ang Ginoo! Bulahan ang tawo nga nagadangop sa iya. (S)

Tahura ninyo ang Ginoo, tanan kamo nga iya mga tawo, kay ang mga nagatahod sa iya indi mawad-an sang tanan nila nga mga kinahanglanon. Bisan pa ang mga leon ginakulangan sing pagkaon kag ginagutman, pero ang nagatuman sa Ginoo indi gid makulangan sang maayo nga mga butang. (S)

2. Ang Pagbasa gikan sa Nahauna nga Sulat ni:

San Juan 4:7-16

   Mga hinigugma, maghigugmaanay kita, kay ang gugma nagagikan sa Dios. Ang nagahigugma anak sang Dios kag nakakilala sa Dios. Ang wala nagahigugma wala makakilala sa Dios, kay ang Dios gugma. Sa sini nga paagi ginpahayag sang Dios ang iya gugma sa aton: ginpadala niya ang iya bugtong nga Anak sa kalibutan agod nga may kabuhi kita paagi sa iya. Amo ini ang gugma: indi tungod kay naghigugma kita sa Dios, kundi nga ang Dios naghigugma sa aton kag nagpadala sang iya Anak agod nga paagi sa iya mapatawad ang aton mga sala. 

   Sa sini nga paagi aton mapat-od nga kita nagakabuhi sa Dios, kag sia nagakabuhi sa aton, kay ginhatag niya sa aton ang iya Espiritu.  Kag nakita naton kag nagasugid kita sa iban nga ang Amay nagpadala sang iya Anak nga mangin-Manlulowas sang kalibutan. Ang nagakilala nga si Jesus amo ang Anak sang Dios, ang Dios nagakabuhi sa iya, kag sia nagakabuhi sa Dios. Kag kita nakakilala kag nagatuo nga ang Dios nagahigugma sa aton.

   Ang Dios gugma, kag ang nagakabuhi sa gugma, nagakabuhi sa Dios kag ang Dios nagakabuhi sa iya. 

Aleluya:

San Juan 8:12

   Ako amo ang kapawa sang kalibutan, siling sang Ginoo; ang nagasunod sa akon may kapawa sang kabuhi.

Ang Pagbasa sang Santos nga Ebanghelyo suno kay:

San Lucas 10:38-42

   Sang nagpadayon si Jesus kag ang iya mga gintuton-an sang ila pagpanglakaton, nakaabot sia sa isa ka baryo. Didto ginbaton sia sang isa ka babayi nga ginahingalanan kay Marta sa iya balay. Si Marta may utod nga babayi nga ginahingalanan kay Maria nga naglingkod sa tiilan sang Ginoo sa pagpamati sang iya pagpanudlo. Si Marta indi na makaarapal sang madamo nga mga hilikuton, gani nagpalapit sia kay Jesus kag nagsiling, “Ginoo, wala ka bala nagakabalaka nga ginapabayaan lang ako sang akon utod sa mga hilimuson? Singgana sia nga magbulig sia sa akon.” 

   Ang Ginoo nagsabat sa iya, “Marta, Marta, nagapalibog ka, kag indi ka mapahamtang tungod sang madamo nga mga butang, pero isa gid lang ang kinahanglan. Husto ang ginpili ni Maria, kag ina indi makuha sa iya.”

Hulyo 28 | Hulyo 30

"Ang mga Matarong Magasilak subong sang Adlaw sa Ginharian sang ila Amay"

Liturhiya sang Pulong

(Martes, Hulyo 28, 2020)

Martes sang Ika-17 nga Semana sang Ordinaryo nga Panahon

Ang Pagbasa gikan sa Libro ni:

Jeremias nga Propeta 14:17-22

   Ang Ginoo nagmando sa akon nga sugiran ko ang mga tawo sang akon kalisod kag magsiling:

     “Kabay nga mag-ilig ang mga luha sa akon

     Mga mata sa adlaw kag sa gab-i,

     Kabay nga indi ako mag-untat sa paghibi,

     Kay ang akon mga tawo napilasan gid sing madalom,

     Kag nasakit gid sila.

     Kon magkadto ako sa mga kaumhan,

     Makita ko ang mga bangkay sang mga tawo nga

     Nagkalamatay sa inaway.

     Kon magkadto ako sa mga kabanwahanan,

     Makita ko ang mga tawo nga nagkalamatay sa gutom.

     Ang mga propeta kag ang mga pari nagapadayon sa

     Ila bulohaton,

     Pero wala sila makahibalo sang ila ginahimo!”

     O Ginoo, ginsikway mo na gid bala ang Juda?

     Ginadumtan mo bala ang mga tawo sang Sion?

     Ngaa bala nga ginhalitan mo gid kami sing tama

     Sa bagay nga indi na kami mag-ayo?

     Nagpangita kami sang paghidait,

     Pero wala kami sing nakuha nga maayo.

     Naglaom kami nga ayuhon,

     Sa baylo nag-abot ang kakugmat.

     Nagpakasala kami batok sa imo, O Ginoo,

     Ginkilala namon ang amon mga sala,

     Kag ang sala sang amon mga katigulangan.

     Dumdoma ang imo mga saad, kag indi kami pagtamaya,

     Indi pagpakahuy-i ang Jerusalem

     Ang duog sang imo mahimayaon nga trono.

     Tumana ang kasugtanan nga imo ginhimo sa amon,

     Kag indi ini paglapasa.

     Wala sing bisan isa sang mga diosdios sang mga

     Kapungsoran ang sarang makapaulan,

     Wala sing bisan isa sa ila

     Ang makapatalithi halin sa langit.

     Naglaom kami sa imo, O Ginoo nga amon Dios,

     Kay ikaw ang nagahimo sini nga mga butang.”

Salmo sa Pagsabat:

Mga Salmo 79:8, 9, 11 kag 13

(S) Para sa imo kaugalingon nga kadungganan, O Ginoo, luwasa kami.

Indi kami pagsiluti tungod sang mga sala sang amon mga katigulangan, sa baylo kaluoyi kami karon, kay nawad-an kami sang tanan nga paglaom. (S)

Buligi kami, O Dios nga amon manlulowas, tungod sa imo kaugalingon nga kadungganan. Luwasa kami kag patawara ang amon mga sala, agod ang mga tawo magadayaw sa imo. (S)

Pamatii ang mga pag-ugayong sang mga binilanggo, kag sa imo daku nga gahom hilwaya yadtong ginpamatbatan nga pagapatyon. Kag kami nga imo mga tawo, ang mga karnero sang imo panong, magapasalamat sa imo sing dayon kag magadayaw sa imo sa tanan nga tion nga palaabuton. (S)

Aleluya:

   Ang Pulong sang Dios amo ang binhi, si Kristo ang manugsab-og; ang bisan sin-o nga nakakita sa iya, nagakabuhi sing walay katapusan.

Ang Pagbasa sang Santos nga Ebanghelyo suno kay:

San Mateo 13:36-43

   Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang.”

   Si Jesus nagsiling sa ila, “Ang tawo nga nagsab-og sang maayo nga binhi amo ang Anak sang Tawo. Ang uma amo ang kalibutan. Ang maayo nga binhi amo ang mga anak sang Ginharian, kag ang mga bugang amo ang mga anak sang Yawa. Ang kaaway nga nagsab-og sang bugang amo si Satanas. Ang tig-alani amo ang katapusan sang panahon, kag ang mga mangangani amo ang mga anghel. Subong nga ang mga bugang gintipon kag ginsunog sa kalayo, amo man ang mahanabo sa katapusan sang panahon. Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala, kag ang tanan nga nagahimo sing malaut. Kag ini sila ihaboy sa nagadabadaba nga kalayo, sa diin magahibi sila kag magabagrot sang ila mga ngipon. Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may dulonggan kamo!”

Hulyo 27 | Hulyo 29

Sin-o bala ang Akon mga Utod?

Liturhiya sang Pulong

(Martes, Hulyo 21, 2020)

Martes sang Ika-16 nga Semana sang Ordinaryo nga Panahon

Ang Pagbasa gikan sa Libro ni:

Miqueas nga Propeta 7:14-15, 18-20

   Magmanugbantay ka sa imo mga tawo, O Ginoo, ang mga tawo nga imo ginpili. Nagakabuhi sila nga silahanon lamang sa desierto nga ginalibutan sang maayo nga duta. Tugoti sila sa pagkadto kag maghalab sa matambok nga halalban sang Basan kag Galaad, subong sang ila ginhimo sang una nga mga panahon.

   Maghimo ka sing mga milagro para sa amon, O Ginoo, subong sang imo ginhimo sadtong mga adlaw sang imo pagpagwa sa amon gikan sa Egipto.

   O Ginoo, wala sing iban nga dios nga kaangay sa imo. Ginapatawad mo ang mga sala sang imo nabilin nga mga tawo. Wala ka nagakaakig sing dayon, kundi nagapakita ka sang imo malig-on nga paghigugma. Magamaluloy-on ka sa amon liwat. Pagatasakon mo ang amon mga sala, kag itagbong ini sa kadadalman sang dagat. Magapakita ka sang imo katutom kag malig-on nga paghigugma sa imo mga tawo nga Israelinhon nga mga kaliwat ni Abraham suno sa imo ginsumpa sa amon mga katigulangan sadtong una nga panahon.

Salmo sa Pagsabat:

Mga Salmo 85:2-4, 5-6, 7-8

(S) O Ginoo, ipakita sa amon ang imo mapinadayunon nga kaluoy kag gugma.

O Ginoo, nanginmaayo ka sa imo duta; ginpauswag mo liwat ang Israel. Ginpatawad mo ang mga sala sang imo mga tawo kag ginpasaylo mo ang ila mga sayop. Wala na ikaw nagakaakig sa ila kag ginpaiway mo ang imo kasingkal. (S)

Pabalika kami, O Dios nga amon manlulowas, kag indi ka na magkaakig sa amon! Magakaakig bala ikaw sing dayon sa amon? Indi na gid bala mag-untat ang imo kaakig? (S)

Nagapakiluoy kami, kon mahimo, bag-uha ang amon kusog, kag kami, nga imo mga tawo, magadayaw sa imo. Ipakita sa amon ang imo mapinadayunon nga gugma, O Ginoo, kag luwasa kami. (S)

Aleluya:

Juan 14:23

    Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya. 

Ang Pagbasa sang Santos nga Ebanghelyo suno kay:

San Mateo 12:46-50

   Nagahambal pa si Jesus sa mga tawo, sang mag-abot ang iya iloy kag mga utod nga lalaki. Naghulat sila sa gwa kag nagpangabay nga makapakighambal sa iya. Gani ang isa sa mga tawo didto nagsiling kay Jesus, “Yara sa gwa nagahulat ang imo iloy kag mga utod nga lalaki. Luyag sila magpakighambal sa imo.” 

   Si Jesus nagsabat, “Sin-o bala ang akon iloy? Sin-o bala ang akon mga utod?” Dayon gintudlo niya ang iya mga gintuton-an kag nagsiling, “Tan-awa ninyo, yari ang akon iloy kag mga utod. Kay ang bisan sin-o nga nagatuman sang kabubot-on sang akon Amay sa langit amo ang akon utod nga lalaki, utod nga babayi, kag akon iloy.”

Hulyo 20 | Hulyo 22

Indi mga Halad nga Sapat ang Luyag Ko kundi ang Pagkaluoy

Liturhiya sang Pulong

(Biyernes, Hulyo 17, 2020)

Biyernes sang Ika-kinse nga Semana sang Ordinaryo nga Panahon

Ang Pagbasa gikan sa Libro ni:

Isaias nga Propeta 38:1-6, 21-22, 7-8

   Sa sadto man nga tion, si Haring Ezequias nagmasakit kag diutayan lang mapatay. Ang propeta nga si Isaias nga anak ni Amoz nagduaw sa iya kag ginsingganan sia, “Ang Ginoo nagasiling nga ipahamtang mo sing nagakaigo ang tanan nga mga butang kay indi na ikaw mag-ayo. Maghanda ka kay ikaw mapatay.”

   Si Ezequias nag-atubang sa dingding kag nagpangamuyo: “Dumdoma, O Ginoo, nga nag-alagad ako sa imo sing matutom kag mainunongon, kag nagtinguha gid ako sa paghimo sang imo luyag nga himuon ko.” Kag nagsugod sia sa paghibi sing tudo gid.

   Dayon ang Ginoo nagsugo kay Isaias sa pagbalik kay Ezequias kag singganon sia, “Ako, ang Ginoong Dios sang inyo amay nga si David, nakabati sang imo pangamuyo kag nakakita sang imo mga luha; palawigon ko sing 15 pa ka tuig ang imo kabuhi. Luwason ko ikaw kag ini nga siyudad sang Jerusalem gikan sa hari sang Asiria, kag padayunon ko ang pag-apin sa siyudad.

   Si Isaias nagsiling sa hari nga hampulan niya ang iya hubag sang panit sang higos, agod nga mag-ayo sia. Dayon si Haring Ezequias nagpamangkot, “Ano bala ang tanda sa pagpamatuod nga sarang na ako makakadto sa Templo?”

Kalantahon sa Pagsabat:

Isaias nga Propeta 38:10, 11, 12, 16

(S) Ginluwas mo ang akon kabuhi, O Ginoo, indi ako mapatay.

Naghunahona ako nga samtang nagahingurosgan pa ako magakadto ako sa kalibutan sang mga patay nga indi na maglawig ang akon kabuhi. (S)

Naghunahona ako nga sa sining kalibutan sang mga buhi indi ko makita liwat ang Ginoo, ukon ang bisan sin-o nga buhi. (S)

Ang akon kabuhi gin-utod kag natapos, kaangay sang tolda nga ginguba, kaangay sang panapton nga gin-utod sa iya tiral. (S)

O Ginoo, magakabuhi ako tungod sa imo tungod sa imo lamang; ayuha ako, kag tugoti nga magkabuhi.(s)

Aleluya:

Juan 10:27

   Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 12:1-8

   Isa sadto ka tion sa Adlaw nga Inugpahuway, si Jesus nag-agi sa tunga sang kaumhan sang trigo. Ginutom ang iya mga gintuton-an, gani nagpangutol sila sang mga uhay kag ginkaon. Sang makita ini sang mga Fariseo nagsiling sila kay Jesus, “Tan-awa bala, ang ginhimo sang imo mga gintuton-an batok sa Kasugoan sa Adlaw nga Inugpahuway!” 

   Si Jesus nagsabat, “Wala gid bala ninyo mabasahi ang ginhimo ni David sang sia kag ang iya mga kaupdanan ginutom? Nagsulod sia sa balay sang Dios, kag ginkaon niya upod sang iya mga tinawo ang tinapay nga nahalad sa Dios, bisan pa batok sa Kasugoan para sa ila ang pagkaon sadto nga tinapay. Kay yadto nga tinapay para lamang sa mga pari. Kag wala man bala ninyo mabasahi sa Kasugoan ni Moises nga sa Adlaw nga Inugpahuway, ang mga pari sa templo nagalapas sang Kasugoan sa tagsa ka Adlaw nga Inugpahuway, pero wala man sila makasala? Nagasiling ako sa inyo, may yari diri nga daku pa sa templo. Kon inyo lamang nahibaluan kon ano ang kahulogan sini nga kasulatan, ‘Indi mga halad nga sapat ang luyag ko, kundi ang pagkaluoy,’ wala ninyo kuntani paghukmi ang mga wala sing sala. Kay ang Anak sang Tawo amo ang Ginoo sang Adlaw nga Inugpahuway.” 

Hulyo 16 | Hulyo 18

Luyag Ka bala nga Bayawon pa Langit?

Liturhiya sang Pulong

(Martes, Hulyo 14, 2020)

Martes sang Ika-kinse nga Semana sang Ordinaryo nga Panahon

1. Ang Pagbasa gikan sa Libro ni:

Isaias nga Propeta 7:1-9

   Sang si Acaz nga anak ni Jotam kag apo ni Uzias amo ang hari sang Juda, si Rezin nga hari sang Siria upod kay Peca nga anak ni Remalias nga hari sang Israel, naggubat sang Jerusalem, pero wala nila ini maagaw.

   Sang pagkabati sang hari sang Juda nga ang mga hangaway sang Siria yara na sa duta sang Israel, sia kag ang iya mga tinawo hinadlukan gid sa bagay nga nagkulorog sila kaangay sang mga kahoy nga ginauyog sang hangin.

   Ang Ginoo nagsiling kay Isaias, “Dalha ang imo anak nga si Sear Jasub kag maglakat ka sa pagsugata kay Haring Acaz. Makita mo sia sa dalan sa diin nagaobra ang mga manughabol, sa punta sang kanal nga ginailigan sang tubig halin sa punong sa naibabaw. Singgana sia nga mag-andam, magkalma, kag indi magkahadlok ukon magsalasala. Ang kaakig ni Haring Rezin kag sang iya mga tinawo nga taga-Siria, kag ni Haring Peca wala sing katalagman pareho sang aso halin sa duha ka dungkolan. Ang Siria, upod sa Israel kag sang iya hari naghimbon. Ang tuyo nila amo ang paggubat sang Juda, sa pagpahadlok sa mga tawo agod mag-upod sa ila, kag dayon himuon ang anak ni Tabeel nga hari.

   “Pero ako, ang Ginoo, nagasiling nga indi ini matabo. Tungod kay ang Siria indi magbakod sang sa Damasco, kag ang Damasco indi magbakod sang sa kay Haring Rezin. Nahanungod sa Israel, sa sulod sang 65 ka tuig malaglag ini kag indi na makatindog subong isa ka pungsod. Ang Israel indi magbakod sang sa siyudad sang Samaria, kag ang Samaria indi magbakod sang sa kay Haring Peca.

   “Kon ang inyo pagtuo indi mabakod, indi kamo makapadayon.’”

Salmo sa Pagsabat:

Mga Salmo 48:2-3, 3-4, 5-6, 7-8

(S) Ang Dios magabantay sang siyudad nga indi maano sa wala sing katapusan.

Gamhanan ang Ginoo, kag dapat gid dayawon sa siyudad sang aton Dios, sa iya balaan nga bukid mataas kag matahom; nagadala sing kalipay sa bug-os nga kalibutan! (S)

Ang Sion, ang bukid sang Dios, ang siyudad sang gamhanan nga hari. Ang Dios nagapakita nga upod sa iya wala sing katalagman sa sulod sang mga pamakod sang siyudad. (S)

Nagtipon ang mga hari kag nagkari sa pagsalakay sang bukid sang Sion. Sang pagkakita nila sini, natingala sila; hinadlukan sila kag nagpalagyo. (S)

Didto gindakop sila sang kahadlok kag kasakit, subong sang isa ka babayi nga manugbata. Ginapangguba sang Dios ang dalagku nga mga sakayan sa hangin nga timog. (S)

Aleluya:

Mga Salmo 95:8

   Karon nga adlaw indi ninyo pagpatig-aha ang inyo mga kasingkasing; kundi pamatii ninyo ang ginasiling sang Ginoo.

Ang Pagbasa sang Santos nga Ebanghelyo suno kay:

San Mateo 11:20-24

   Dayon ginpangbasol ni Jesus ang mga banwa sa diin naghimo sia sang kalabanan sang iya mga milagro kay ang mga tawo didto wala maghinulsol sang ila mga sala. “Kailo ka man Corazin! Kailo ka man Betsaida! Kay kon ang mga milagro nga ginhimo sa inyo ginhimo sa Tiro kag Sidon, dugay na kuntani ang mga tawo didto nagbayu sang sako kag nagbutang sing abo sa ila ulo sa pagpakita nga nagbiya sila sa ila mga sala! Gani dumdoma ninyo nga sa Adlaw sang Paghukom, sobra pa ang silot nga inyo pagabatunon sang sa Tiro kag Sidon. Kag ikaw man Capernaum luyag ka bala nga bayawon pa langit? Itagbong ka sa impiyerno! Kay kon ang mga milagro nga nahimo sa imo ginhimo sa Sodoma, kuntani ang Sodoma ara pa tubtob karon! Gani, dumdoma ninyo nga sa Adlaw sang Paghukom sobra pa ang silot nga batunon mo sang sa Sodoma!”

Hulyo 13 | Hulyo 15

Ginhatagan ni Jesus ang Iya mga Gintuton-an sing Gahom sa Pag-ayo kag Paghilway

Liturhiya sang Pulong

(Miyerkules, Hulyo 8, 2020)

Miyerkules sang Ika-Katorse nga Semana sang Ordinaryo nga Panahon

Ang Pagbasa gikan sa Libro ni:

Oseas nga Propeta 10:1-3, 7-8, 12

   Ang mga tawo sang Israel kaangay sang balagon sang ubas nga may madamo sing bunga. Samtang nagabugana sila, nagadamo man ang ila mga altar nga ginapatindog. Samtang nagaayo ang patubas sang ila duta, ginapatahom pa gid nila ang balaan nga mga haligi nga ila ginasimba. Ang ila mga tagipusoon madaya, kag karon dapat sila mag-antos tungod sang ila mga sala. Ang Dios magaguba sang ila mga altar kag magatumba sang ila balaan nga mga haligi.
   Sa indi madugay ini nga mga tawo magasiling, “Wala kami sing hari, kay wala kami magkahadlok sa Ginoo. Pero ano gid bala ang mahimo sang hari para sa amon?
   Ang ila hari madula, kaangay sang bukal sang tubig. Ang malain nga mga duog sa diin ang mga tawo sang Israel nagasimba sa mga diosdios pagagub-on. Ang mga hilamon kag mga kahuykahoy nga tunokon magatubo sa ila mga altar. Ang mga tawo magasiling sa mga bukid, “Tagoa kami!” kag sa mga bakulod, “Tumbahi kami!”
   Nagsiling ako, ‘Magpanggas kamo sing katarungan para sa inyo kaugalingon kag mag-ani kamo sang mga kaayuhan nga ginpatubas sang inyo katutom sa akon. Magbungkag kamo sing bag-o nga duta para sa inyo kaugalingon, kay tion na ini nga magabalik kamo sa akon nga inyo Ginoo, kag magaabot ako kag hatagan ko kamo sang mga kaayuhan.’

Salmo sa Pagsabat:

Mga Salmo 105:2-3, 4-5, 6-7

(S) Magpabilin kamo sa iya atubangan sa gihapon.

Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya! Magakalipay kamo kay iya kita; ang tanan nga nagaalagad sa Ginoo magkalipay! (S)
Magdangop kamo sa Ginoo agod buligan; magpabilin kamo sa iya atubangan sa gihapon. Dumdoma ninyo ang iya gamhanan kag makatilingala nga mga milagro, kag ang mga paghukom nga iya ginhatag. (S)
Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili: Ang Ginoo amo ang aton Dios; ang iya mga sugo para sa bug-os nga kalibutan. (S)

Aleluya:

Marcos 1:15

   Ang Ginharian sang Dios malapit na; bayai ninyo ang inyo mga sala kag magpati sa Maayong Balita.

Ang Pagbasa sang Santos nga Ebanghelyo suno kay:

San Mateo 10:1-7

   Gintawag ni Jesus sing tingob ang dose ka mga gintuton-an kag ginhatagan sila sing gahom sa pagtabog sang malaut nga mga espiritu, kag sa pag-ayo sang tanan nga masakit kag balatian. Amo ini ang mga ngalan sang dose ka mga apostoles: ang nahauna, si Simon nga ginatawag Pedro kag si Andres nga iya utod; si Santiago kag si Juan nga iya utod, mga anak ni Zebedeo; si Felipe kag si Bartolome; si Tomas kag si Mateo nga manugsokot sang buhis; si Santiago nga anak ni Alfeo kag si Tadeo; si Simon nga patriota kag si Judas Iscariote, nga nagluib kay Jesus.
   Ginpadala ni Jesus ang dose ka mga apostoles kag ginsingganan sila: “Indi kamo magkadto sa duta sang mga Gentil ukon sa mga banwa sang Samaria, kundi kadtoi ninyo ang mga tawo sang Israel nga subong sang mga karnero nga nagtalalang. Lakat kamo kag ibantala nga ang Ginharian sang langit malapit na!

Hulyo 7 | Hulyo 9

Wala pa gid sing Nakita nga Subong Sini

Liturhiya sang Pulong

(Martes, Hulyo 7, 2020)

Martes sang Ika-Katorse nga Semana sang Ordinaryo nga Panahon

Ang Pagbasa gikan sa Libro ni:

Oseas nga Propeta 8:4-7, 11-13

   “Ang akon mga tawo nagpili sing mga hari nga wala sing pahanugot sa akon. Naghimo sila sing mga pangulo nga wala ako makahibalo. Sa ila pilak kag bulawan naghimo sila sing mga diosdios para sa ila kalaglagan. Ginsikway ko ang bulawan nga baka nga ginsimba sang mga pumoluyo sang siyudad sang Samaria. Nagasilabo ang akon kaakig sa ila. San-o pa bala nila biyaan ang ila pagsimba sa mga diosdios? Ang isa ka platero sa Israel naghimo sing diosdios, kag indi ini Dios! Ang diosdios nga ginasimba sang mga taga-Samaria pagadugmokon.
     Kon magpanggas sila sing hangin,
     Magaani sila sing bagyo!
     Ang nagatindog nga trigo nga wala sing uhay
     Indi makapatubas sing kalan-on.
Pero kon makapatubas gid man ini, ang mga dumoluong magaubos sini kaon!
   “Samtang nagadamo ang mga altar sang mga tawo sang Israel sa pagkuha sang sala, nagadamo man ang mga duog nga ila ginahimuan sang sala. Nagsulat ako sing madamo nga mga pagtulon-an para sa mga tawo, pero ginkabig nila ini nga iya sang mga dumoluong. Naluyag sila magdulot sing mga halad, kag naluyag sila magkaon sang karne. Pero ako, ang Ginoo, wala malipay sa ila, kag karon dumdomon ko ang ila sala kag silutan ko sila tungod sini. Pabalikon ko sila sa Egipto!
 
Salmo sa Pagsabat:

Mga Salmo 115:3-4, 5-6, 7-8, 9-10

(S) Mga tawo sang Israel, magsalig kamo sa Ginoo.

Ang amon Dios yara sa langit, nga nagahimo sang luyag niya. Ang ila mga dios nahimo sa pilak kag bulawan, nga ginhimo sang mga kamot sang tawo. (S)
May mga baba sila, apang indi makahambal, kag mga mata, pero indi makakita. May mga dulonggan sila, pero indi makabati, kag mga ilong, pero indi makasimhot. (S)
May mga kamot sila, pero indi makatandog, kag mga tiil pero indi makalakat. Kabay nga ang mga naghimo sa ila kag ang tanan nga nagasalig sa ila, manginkaangay sang diosdios nga ila ginhimo! (S)

Aleluya:

Juan 10:14

   Ako amo ang maayo nga manugbantay, siling sang Ginoo; sa amo man nga bagay nakilala ko ang akon mga karnero, kag sila nakakilala sa akon.

Ang Pagbasa sang Santos nga Ebanghelyo suno kay:

San Mateo 9:32-38

   Sang nagapalauli ang mga tawo, may iban nga mga tawo nga nagdala kay Jesus sang isa ka tawo nga indi makahambal tungod kay ginagamhan sia sing yawa. Sang matabog na ang yawa naghambal ang apa kag natingala ang tanan nga nagasiling, “Wala pa gid kami sing nakita nga subong sini sa Israel!” Pero ang mga Fariseo nagsiling, “Ang prinsipe sang mga yawa amo ang naghatag sa iya sang gahom sa pagpagwa sang mga yawa.”
   Dayon si Jesus naglibot sa tanan nga kabanwahanan kag mga kabaryuhanan. Nagpanudlo sia sa mga sinagoga, nagbantala sang Maayong Balita sang Ginharian, kag nagpang-ayo sang mga tawo sa ila nagkalainlain nga mga masakit kag balatian. Sang makita niya ang madamo nga mga tawo, naluoy gid sia sa ila kay madamo gid ang ila palaligban kag kaangay sila sang mga karnero nga nagaalaplaag nga wala sing manugbantay. Gani nagsiling sia sa iya mga gintuton-an, “Malapad ang alanyon, ugaling diutay lang ang mangangani. Magpangamuyo kamo sa tag-iya sang alanyon, agod magpadala sia sang dugang nga mga mangangani sa pagtipon sang iya patubas.”

Hulyo 6 | Hulyo 8

Magaabot ang Adlaw kon San-o Sila Magapuasa

Liturhiya sang Pulong

(Sabado, Hulyo 4, 2020)

Sabado sang Ika-Trese nga Semana sang Ordinaryo nga Panahon

Ang Pagbasa gikan sa Libro ni:

Amos nga Propeta 9:11-15

   Ang Ginoo nagasiling, “Sa sadto nga adlaw pagapatindugon ko liwat ang panimalay ni David, nga kasubong sang isa ka balay nga napukan. Pagakaayuhon ko ang iya mga pader, kag patindugon ini. Pagapatindugon ko ini kaangay sang iya kahimtangan sang una. Gani ang mga pumoluyo sang Israel magaagaw sang nabilin nga duta sang Edom kag sang tanan nga mga pungsod nga akon sadto anay,” ang siling sang Ginoo, nga magahimo sini.
   Ang Ginoo nagasiling, “Ang mga adlaw magaabot, nga ang mga manug-arado magaarado samtang ang mga manug-ani nagaani pa, kag ang manughimo sing bino magahimo pa sing bino samtang ang manugpanggas nagasugod na sa pagpanggas sang binhi. Ang mga bukid magatubod sing matam-is nga bino, kag ang bino magailig gikan sa mga bakulod. Dalhon ko pabalik sa ila duta ang akon mga tawo. Pagakaayuhon nila ang ila nagkaguba nga mga siyudad kag ila pagapuy-an ini, magatanom sila sing mga ubas kag magainom sing bino, magahimo sila sing mga hardin kag magakaon sang ila tinamnan. Itanom ko sila sa duta nga akon ginhatag sa ila, kag indi na sila paggabuton liwat.” Ang Ginoo nga imo Dios naghambal sini.

Salmo sa Pagsabat:

Mga Salmo 85:9 kag 10, 11-12, 13-14

(S) Ang Ginoo nagsaad sang paghidait sa iya mga tawo.

Nagapamati ako sa ginasiling sang Ginoong Dios; nagasaad sia sing paghidait sa aton nga iya mga tawo. Matuod gid nga handa sia sa pagluwas sang mga nagapadungog sa iya, kag ang iya himaya magapabilin sa aton duta. (S)
Ang gugma kag katutom magaupdanay, ang pagkamatarong kag paghidait magakitaay. Ang katutom sang tawo magalambot sa ibabaw halin sa duta, kag ang pagkamatarong sang Dios magatamod halin sa langit. (S)
Ang Ginoo magapauswag sa aton, kag ang aton duta magapatubas sing bugana. Ang pagkamatarong magauna sa Ginoo, kag magaaman sing alagyan para sa iya. (S)

Aleluya:

Juan 10:27

   Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 9:14-17

   Karon ang mga sumolunod ni Juan Bautista nagkadto kay Jesus nga nagapamangkot, “Ngaa nga kami kag ang mga Fariseo nagapuasa sing masunson, pero ang imo mga gintuton-an wala gid nagapuasa?”
   Si Jesus nagsabat, “Magakasubo bala ang mga inagda sa kasal samtang ang nobyo kaupod pa nila? Pero magaabot ang adlaw nga ang nobyo pagakuhaon sa ila kag amo na ina ang ila pagpuasa.
   “Wala sing bisan sin-o nga nagatukap sing bag-o nga panapton sa daan nga bayu kay ina nga tukap magabingkas sang bayu, kag ang iya gisi magadaku pa gid. Wala man sing bisan sin-o nga nagasulod sang bag-o nga bino sa daan nga sulodlan nga panit, kay kon himuon niya ini ang panit nga sulodlan sang bino mabusdik, kag ang bino mauyang kag ang sulodlan nga panit indi na mapuslan. Sa baylo sini, ginasulod ang bag-o nga bino sa bag-o nga sulodlan nga panit, kag ini sila magadugay.” 

Hulyo 3 | Hulyo 5

Magpakabakod Ka - Ang Imo mga Sala Ginapatawad

Liturhiya sang Pulong

(Huwebes, Hulyo 2, 2020)

Huwebes sang Ika-Trese nga Semana sang Ordinaryo nga Panahon

Ang Pagbasa gikan sa Libro ni:

Amos nga Propeta 7:10-17

   Si Amasias nga pari sang Betel nagpanugid kay Haring Jeroboam sang Israel sini, “Si Amos naghimbon batok sa imo sa tunga sang mga Israelinhon. Ang iya mga pamulongpulong magaguba sang pungsod. Amo ini ang iya ginasiling, ‘Si Jeroboam mapatay sa inaway, kag ang mga Israelinhon pagakuhaon sa ila duta kag pagabihagon.’”

   Kag si Amasias nagsiling kay Amos, “Ikaw nga indi matuod nga propeta! Magbalik ka sa duta sang Juda kag didto ka magpangita sang imo pangabuhian kag didto ka magpanagna. Indi ka na magpanagna diri sa Betel. Ini nga duog simbahan sang hari. Amo ini ang templo sang bug-os nga pungsod.”

   Si Amos nagsabat, “Indi ako propeta. Indi amo ini ang akon palangitan-an. Manugbantay ako sang mga hayop, kag manug-atipan man sang higera. Pero ang Ginoo nagkuha sa akon sa pagkamanugbantay sang hayop kag nagmando sa akon sa paglakat kag sa paghambal sa iya mga tawo nga Israelinhon para sa iya. Gani karon, magpamati ka sa ginasiling sang Ginoo. Ginasingganan mo ako sa pag-untat sa pagpanagna batok sa mga pumoluyo sang Israel, kag indi na magwalay batok sa mga kaliwat ni Isaac. Amasias, tungod kay nagasiling ikaw sina, ang Ginoo nagasiling sa imo, ‘Ang imo asawa mangin-isa ka makihilawason nga babayi sa siyudad, kag ang imo mga kabataan magakalamatay sa gira. Ang imo duta pagapahatpahaton kag pagaihatag sa iban, kag ikaw mismo mapatay sa duta sang indi tumoluo. Ang mga pumoluyo sang Israel pagakuhaon sa ila duta kag pagabihagon.’”

Salmo sa Pagsabat:

Mga Salmo 19:8, 9, 10, 11

(S) Matarong ang mga paghukom sang Ginoo; wala ini sing may ginapasulabi.

Ang kasugoan sang Ginoo himpit; nagahatag ini sing bag-o nga kabuhi, ang mga sugo sang Ginoo masaligan, kag nagahatag ini sing kaalam sa mga nakulangan. (S)

Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop sa hunahona. (S)

Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)

Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)

Aleluya:

2 Corinto 5:19

   Amo ini ang amon mensahi nga ang Dios nagahimo sang tanan nga mga tawo nga iya mga abyan paagi kay Cristo kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Mateo 9:1-8

   Nagsakay si Jesus sa sakayan pabalik sa tabok sang linaw, kag nag-abot sia sa iya kaugalingon nga banwa. May mga tawo nga nagdala sa iya sing isa ka paralitiko nga nagahamyang sa higdaan. Nakita ni Jesus kon daw ano ang ila pagtuo kag nagsiling sia sa paralitiko, “Anak, magpakabakod ka! Ang imo mga sala ginapatawad.” 

   Dayon may mga manunodlo sang Kasugoan didto nga nagsiling sa ila kaugalingon, “Ini nga tawo nagahambal batok sa Dios!”

   Si Jesus nga nakahibalo sang ila ginapanghunahona nagsiling, “Ngaa bala nagapanghunahona kamo sing malain? Diin bala sini ang mahapos, ang pagsiling sa paralitiko, ‘Ang imo mga sala ginapatawad,’ ukon ang pagsiling, ‘Bangon ka kag maglakat’? Karon pamatud-an ko sa inyo nga ang Anak sang Tawo may gahom sa duta sa pagpatawad sang mga sala.” Gani nagsiling sia sa paralitiko, “Bangon ka, dalha ang imo higdaan kag magpauli ka!” 

   Ang paralitiko nagbangon kag nagpauli. Sang pagkakita sini sang mga tawo, hinadlukan sila kag gindayaw nila ang Dios tungod sang gahom nga iya ginhatag sa mga tawo. 

Hulyo 1 | Hulyo 3

Si Jesus Nagahilway sa mga Ginagapos

Liturhiya sang Pulong

(Miyerkules, Hulyo 1, 2020)

Miyerkules sang Ika-Trese nga Semana sang Ordinaryo nga Panahon

Ang Pagbasa gikan sa Libro ni:

Amos nga Propeta 5:14-15, 21-24

   Tinguhaa ninyo ang paghimo sang matarong kag indi ang malaut, agod magkabuhi kamo. Dayon ang Ginoong Dios nga Makagagahom manginkaupod ninyo, subong sang ginasiling ninyo. Dumti ang malaut, higugmaa ang maayo, kag maghukom sing matarong sa mga korte. Ayhan ang Ginoong Dios nga Makagagahom manginmaayo sa mga tawo nga nabilin nga buhi pa sa sining pungsod.

   “Naakig gid ako sa inyo mga piesta, indi na ako makaagwanta sini! Kon maghalad kamo sa akon sing mga halad nga sinunog kag halad nga uyas, indi ako sini magbaton. Kag indi ako magbaton sang inyo pinatambok nga mga sapat nga inyo dalhon sa akon subong halad sa pagpasalamat. Untata ang inyo magahod nga mga kanta. Indi ako maluyag magpamati sa inyo mga instrumento sa musika. Padayuna ang pagluntad sang pagkamatarong kag katarungan, kasubong sang suba nga wala nagamala.

Salmo sa Pagsabat:

Mga Salmo 50:7, 8-9, 10-11, 12-13, 16-17

(S) Luwason ko gid ang tanan nga nagatuman sa akon.

“Pamati kamo, mga tawo ko, kag magahambal ako, magasaksi ako batok sa imo, O Israel. Ako ang Dios, ang imo Dios. (S)

Wala ako nagasaway sa imo tungod sang imo mga halad kag sang mga halad nga sinunog nga imo pirme ginahalad sa akon. Wala ako kinahanglan sang toro nga mga baka gikan sa inyo mga pastuhan, ukon mga kanding gikan sa inyo mga kahayupan. (S)

Tungod kay akon ang mga kasapatan sang katalunan, kag ang mga baka sa linibo ka mga kabakuloran. Akon ang tanan nga mga kapispisan sa talon kag ang tanan nga nagakabuhi sa latagon. (S)

“Kon ginagutom ako indi ko ikaw pagsugiran, tungod kay akon ang kalibutan kag ang tanan nga ara sa iya. Nagakaon bala ako sang karne sang baka, ukon nagainom sang dugo sang kanding? (S)

“Ngaa bala ginapabutyag mo ang akon mga sugo? Ngaa bala nagahambal ka nahanungod sang akon kasugtanan? Indi ka magpatudlo sa akon, ginasikway mo ang akon mga sugo. (S)

Aleluya:

Santiago 1:18

   Sa iya kaugalingon nga kabubot-on, ginhimo niya kita nga iya mga anak paagi sa pulong sang kamatuoran, agod nga manginnahauna kita sa tanan niya nga mga tinuga. 

Ang Pagbasa sang Santos nga Ebanghelyo suno kay:

San Mateo 8:28-34

   Sang makaabot si Jesus sa duta sang mga taga-Gadara, sa tabok sang linaw, ginsugata sia sang duha ka tawo nga naggwa gikan sa mga lulobngan. Ini sila ginagamhan sang yawa kag mabangis kaayo, sa bagay nga wala sing tawo nga nagaagi sadto nga dalan. Gilayon nagsinggit sila, “Ano bala ang himuon mo sa amon, ikaw nga Anak sang Dios? Nagkari ka bala sa pagsilot sa amon sa wala pa mag-abot ang tion?” 

   Didto sa unhan may panong sang mga baboy nga nagapang-ungad. Ang mga yawa nagpakiluoy kay Jesus nga nagasiling, “Kon tabugon mo gid man kami, pasudla na lang kami sa sadtong mga baboy.” 

   Si Jesus nagsiling sa ila, “Sigi, lakat kamo!” Gani naggwa sila kag nagsulod sa mga baboy. Ang bug-os nga panong nagdinaguso sa pil-as pakadto sa linaw kag nagkalalumos.

   Ang mga manugsagod sang baboy nagpalagyo kag nagkadto sa banwa, sa diin ginpanugid nila ang tanan nga nahanabo sa mga baboy kag sa duha ka tawo nga ginagamhan sang yawa. Gani ang tanan nga mga tawo sa sadto nga banwa naggulowa sa pagsugata kay Jesus, kag sang pagkakita nila sa iya, nagpakiluoy sila sa iya nga maghalin sia sa ila banwa.

Hunyo 30 | Hulyo 2

“Ngaa bala Nagakahadlok gid Kamo, Kadiutay sang Inyo Pagtuo?”

Liturhiya sang Pulong

(Martes, Hunyo 30, 2020)

Martes sang Ika-Trese nga Semana sang Ordinaryo nga Panahon

Ang Pagbasa gikan sa Libro ni:

Amos nga Propeta 3:1-8; 4:11-12

   Mga pumoluyo sang Israel, magpamati kamo sa sini nga mga pulong nga ginhambal sang Ginoo nahanungod sa inyo: "Ginpangulohan ko pa gwa sa Egipto ang imo bug-os nga panimalay. Sa tanan nga mga panimalay sa duta ikaw lamang ang akon ginkilala kag ginkabalak-an. Gani pagasilutan ko ikaw sang tanan mo nga mga sala.
   Makaupdanay bala ang duha ka tawo sa paglakat, kon wala anay sila magkasugot?
   Magangurob bala ang leon sa talon, kon wala sia sing may nakita nga tulokbon?
   Magangurob bala ang tutoy nga leon sa iya Iungib kon wala sia sing may nadakpan?
   Masiod bala ang pispis sa duta kon wala sing paganyat sa iya?
   Mapisik bala ang siod kon wala sing may nagtandog sini?
   May magpatunog bala sang trumpeta para sa inaway nga indi makapahadlok sang mga tawo sa isa ka siyudad?
   May makakulogmat bala nga matabo sa siyudad kon indi ini paghimuon sang Ginoo?
   Sa pagkamatuod ang Ginoo indi maghimo sing bisan ano nga butang kon indi niya anay mapahayag ang iya plano sa iya mga alagad nga propeta.
   Kon magngurob ang leon, sin-o bala ang indi mahadlok?
   Kon ang Ginoo maghambal, sin-o bala ang indi magbantala sang iya mga pulong?
  Ang Ginoo nagasiling, "Ginlaglag ko ang iban sa inyo subong sang paglaglag ko sang Sodoma kag Gomora. Kaangay kamo sang nagadabdab nga kahoy nga ginsabnit sa kalayo. Pero wala kamo magbalik sa akon. Gani, mga pumoluyo sang Israel, amo ini ang pagahimuon ko sa inyo. Kag tungod kay himuon ko ini, maghanda kamo sa pag-atubang sang paghukom sang Dios!"

Salmo sa Pagsabat:

Mga Salmo 5:4-6, 6-7, 8

(S) O GINOO, tuytoyi ako sa pagtuman sang imo kabubot-on.

Sa pagbutlak sang adlaw nagapangamuyo ako sa imo, kag karon nagahulat ako sang sabat mo. Ikaw ang Dios nga indi luyag sang kalautan; wala sing duog ang malaut sa imo atubangan. Wala ka nagatalupangod sa mga bugalon. (S)
Ginadumtan mo ang malaut nga mga tawo. Ginalaglag mo ang tanan nga mga butigon, kag ginatamay mo ang malugoson kag malimbongon. (S)
Pero ako akon makaduaw sa imo balay, tungod sang imo daku nga gugma. Makasimba ako sa imo balaan nga Templo, kag nagaduko sa pagtahod sa imo. (S)

Aleluya:

Mga Salmo 130:5

   Nalangkag gid ako sa pagpaabot sang bulig sang Ginoo, kag sa iya mga pulong nagasalig ako.

Ang Pagbasa sang Santos nga Ebanghelyo suno kay:

San Mateo 8:23-27

   Nagsakay si Jesus sa sakayan kag ang iya mga gintuton-an nag-upod sa iya. Sa hinali nag-abot ang mabaskog nga bagyo sa linaw, sa bagay nga nagdalagku ang mga balod kag ang sakayan ginasudlan sang tubig. Pero si Jesus nagakatulog. Ginpalapitan sia sang iya mga gintuton-an kag ginpukaw nga nagasiling, “Ginoo, luwasa kami! Daw malumos kita!”
   Si Jesus nagsabat, “Ngaa bala nagakahadlok gid kamo? Kadiutay sang inyo pagtuo!” Dayon nagbangon sia, ginmanduan niya ang hangin kag ang balod nga mag-untat, kag naglinaw.
   Ang tanan natingala gid kag nagsiling, “Ano bala nga tawo ini? Bisan pa ang hangin kag ang balod nagatuman sa iya!” 

Hunyo 29 | Hulyo 1

"Ginoo, Sarang Mo Ako Maayo"

Liturhiya sang Pulong

(Biyernes, Hunyo 26, 2020)

Biyernes sang Ikadose nga Semana sang Ordinaryo nga Panahon

Ang Pagbasa gikan sa Ikaduha nga Libro sang:

Mga Hari 25:1-12

   Nagribuk si Sedequias kay Haring Nabucodonosor sang Babilonia. Gani si Nabucodonosor nag-abot upod sang iya tanan nga mga hangaway kag ginsalakay ang Jerusalem sa ikanapulo ka adlaw sang ika-10 ka bulan sang ikasiyam ka tuig sang paggahom ni Sedequias. Nagpatindog sila sing kampamento sa gwa sang siyudad, naghimo sang trinsera sa palibot sini, kag nagpadayon sa pagkibon sini tubtob sa ika-11 nga tuig sang paggahom ni Sedequias. Sa ikasiyam nga adlaw sang ikaapat ka bulan sa amo nga tuig, sang tama gid ang tiggulotom kag ang mga tawo wala na sing kalan-on, ang pader sang siyudad ginguhaban, kag bisan ang mga taga-Babilonia nagalibot sang siyudad, ang tanan nga mga soldado nakapalagyo sang gab-i. Nagpalagyo sila paagi sa hardin sang hari, nag-agi sa puwertahan nga nagaangot sang duha ka pader, kag nakapalagyo pakadto sa Kapatagan sang Jordan. Pero ang hangaway sang Babilonia naglagas kay Haring Sedequias kag nadakpan sia sa kapatagan malapit sa Jerico; ang tanan niya nga mga hangaway nagbiya sa iya. Gindala si Sedequias kay Haring Nabucodonosor, nga didto sa siyudad sang Ribla, kag didto ginhukman sia ni Nabucodonosor. Sa atubangan ni Sedequias ginapamatay ang iya mga anak nga lalaki, dayon ginpalukat ni Nabucodonosor ang iya mga mata, ginkadenahan kag gindala sia sa Babilonia.
   Sa ikapito nga adlaw sang ikalima nga bulan sang ika-19 nga tuig sang paggahom ni Haring Nabucodonosor sang Babilonia, si Nabuzaradan, ang palamangkutan sang hari kag pangulo sang iya hangaway, nagsulod sa Jerusalem. Ginsunog niya ang Templo, ang palasyo, kag ang mga balay sang tanan nga gamhanan nga mga tawo sang Jerusalem, kag ang iya mga hangaway nagguba sang mga pader sang siyudad. Dayon gindala ni Nabuzaradan sa Babilonia ang mga tawo nga nabilin sa siyudad, ang nabilin nga sampaton nga mga manug-obra kag yadtong mga nagtipyuk sa mga taga-Babilonia. Pero ginbilin niya sa Juda ang iban sang imol nga mga tawo, nga wala sing mga pagkabutang, kag ginpaobra sila sa mga talamnan sang ubas kag mga uma.

Salmo sa Pagsabat:

Mga Salmo 137:1-2, 3, 4-5, 6

(S) O Jerusalem! Kabay nga indi na ako makakanta liwat kon indi ako magdumdom sa imo.

Sa ubay sang mga suba sang Babilonia nagpungko kami kag naghibi sang madumdoman namon ang Sion. Sa mga kahoy nga sawse didto ginsang-at namon ang amon mga arpa. (S)
Ang mga nagbihag sa amon nagsugo sa amon sa pagkanta, ginsugo nila kami sa paglingaw sa ila: “Kantahi kami sing ambahanon nahanungod sa Sion!” (S)
Paano abi ang pagkanta namon sang ambahanon sang Ginoo sa duta sang mga dumoluong? Kabay nga indi na gid ako makatukar liwat sang arpa, kon malimtan ko ikaw, O Jerusalem! (S)
Kabay nga indi na gid ako makakanta liwat,  kon indi ako magdumdom sa imo, kon indi ako magpanumdom sa imo subong nga akon labing daku nga kalipay! (S)

Aleluya:

Mateo 8:17

   Sia gid mismo ang nagkuha sang aton mga masakit kag nagdala sa iya kaugalingon sang aton mga balatian.

Ang Pagbasa sang Santos nga Ebanghelyo suno kay:

San Mateo 8:1-4

   Si Jesus nagdulhog halin sa bakulod kag ginsunod sia sang madamo nga mga tawo. Dayon may isa ka aruon nga nagpalapit sa iya, kag nagluhod sa iya atubangan nga nagasiling, “Ginoo kon buot mo, sarang mo ako maayo.”
   Gindab-ot sia ni Jesus kag gintandog nga nagasiling, “Buot ko nga mag-ayo ka!” Sa gilayon nag-ayo sia sa iya aro. Dayon si Jesus nagsiling, “Pamati ka! Indi mo ini pag-isugid bisan kay sin-o, kundi magkadto ka gilayon sa pari kag magpatan-aw ka sang imo kaugalingon. Dayon maghalad ka suno sa ginsugo ni Moises sa pagpamatuod sa mga tawo nga maayo ka na.” 

Hunyo 25 | Hunyo 27

"Ang Maalam nga Nagpatindog sang Ila Balay sa Bato"

Liturhiya sang Pulong

(Huwebes, Hunyo 25, 2020)

Huwebes sang Ikadose nga Semana sang Ordinaryo nga Panahon

Ang Pagbasa gikan sa Ikaduha nga Libro sang:

Mga Hari 24:8-17

   Si Joaquin nanginghari sang Juda sang nagaedad sia sing 18 ka tuig, kag naggahom sia sa Jerusalem sing tatlo ka bulan. Ang iya iloy amo si Nehusta, nga anak ni Elnatan, nga nagikan sa Jerusalem. Si Joaquin nagpakasala batok sa Ginoo, nga nagasunod sang ginhimo sang iya amay.
   Sa panahon sang iya paggahom ang mga hangaway sang Babilonia, nga ginapangulohan sang mga opisyales ni Haring Nabucodonosor nagsalakay kag nagkibon sang Jerusalem. Sa panahon sang pagkibon, si Nabucodonosor gid nagkadto sa Jerusalem, kag si Haring Joaquin, upod sang iya iloy, sang iya mga anak nga lalaki, sang iya mga opisyales, kag sang mga opisyales sa palasyo, nag-ampo sa mga taga-Babilonia. Si Nabucodonosor, sa iya ika-8 ka tuig nga paggahom nagdala kay Joaquin subong bihag. Kag gindala niya sa Babilonia ang tanan nga malahalon nga mga pagkabutang sa Templo kag sa palasyo. Suno sa ginsiling sang Ginoo, si Nabucodonosor nagpamuka sang tanan nga mga galamiton nga bulawan nga ginhimo ni Haring Salomon agod gamiton sa Templo. Si Nabucodonosor nagdala sang mga pumoluyo sang Jerusalem subong bihag, ang tanan nga mga prinsipe, kag sang tanan nga kinilala nga mga tawo, 10,000 sila tanan. Iya man gindala ang tanan nga sampaton nga mga manug-obra, lakip ang mga panday sa salsalon, kag ginbilin niya sa Juda ang imol lamang nga mga pumoluyo.
   Gindala ni Nabucodonosor si Joaquin sa Babilonia subong bihag, upod sa iya iloy, sa iya mga asawa, sa iya mga opisyales, kag sa kinilala nga mga pumoluyo sang Juda. Gindala ni Nabucodonosor sa Babilonia ang tanan nga mapuslanon nga mga tawo, 7,000 sila tanan, kag 1,000 ka sampaton nga mga manug-obra, lakip ang mga panday sa salsalon, tanan sila maayo sing lawas nga sarang makaentra sa pagkasoldado. Si Matanias nga tiyo ni Joaquin ginhimo ni Nabucodonosor nga manginhari sang Juda kag ginbaylohan ang iya ngalan kay Sedequias.

Salmo sa Pagsabat:

Mga Salmo 79:1-2, 3-5, 8, 9

(S) O Ginoo luwasa kami agod ang mga tawo magdayaw sa imo.

O Dios, ginsalakay sang mga di-diosnon ang duta sang imo mga tawo! Gindagtaan nila ang imo balaan nga Templo kag ginbayaan nila ang Jerusalem nga nalaglag. Ginbilin nila ang mga bangkay sang imo mga tawo agod manginkalan-on sang mga kapispisan, ang mga bangkay sang imo mga alagad agod manginkalan-on sang mga sapat nga talunon. (S)
Ginpaagay nila ang dugo sang imo mga tawo kaangay sang tubig; nagbaha ang dugo sa bug-os nga Jerusalem, kag wala sing may nabilin sa paglubong sang mga bangkay. Ang mga pungsod sa palibot namon nagayaguta sa amon, nagakadlaw sila kag nagalangu-lango sa amon. Tubtob san-o pa bala ang imo pagkaakig sa amon, O Ginoo? Wala bala sing katapusan? Magapadayon bala sa pagdabdab ang imo kaakig subong sang kalayo? (S)
Indi kami pagsiluti tungod sang mga sala sang amon mga katigulangan, sa baylo kaluoyi kami karon, kay nawad-an kami sang tanan nga paglaom. (S)
Buligi kami, O Dios nga amon manlulowas, tungod sa imo kaugalingon nga kadungganan. Luwasa kami kag patawara ang amon mga sala, agod ang mga tawo magadayaw sa imo. (S)

Aleluya:

Juan 14:23

   Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya.

Ang Pagbasa sang Santos nga Ebanghelyo suno kay:

San Mateo 7:21-29

   “Indi ang tanan nga nagatawag sa akon ‘Ginoo, Ginoo,’ makasulod sa Ginharian sang langit, kundi ang nagatuman lamang sang kabubot-on sang akon Amay nga yara sa langit. Kon mag-abot yadto nga Adlaw, madamo ang magatawag sa akon ‘Ginoo, Ginoo! Sa imo ngalan nagwali kami, sa imo ngalan nagtabog kami sang mga yawa kag naghimo sang madamo nga mga milagro!’ Dayon magasiling ako sa ila, ‘Wala ako makakilala sa inyo. Palayo kamo sa akon, kamo nga manugbuhat sang malaut!’ ”
   “Gani, ang nagapamati sang akon mga pulong kag nagatuman sini kaangay sia sang isa ka maalam nga tawo nga nagpatindog sang iya balay sa bato. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Pero wala ini matumba kay napasad ini sa bato.
   “Ang nagapamati sang akon mga pulong kag wala nagatuman sini, kaangay sia sa tawo nga buangboang nga nagpatindog sang iya balay sa balas. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Natumba ini kag daw ano ang pagragamak sini!”
   Sa tapos mahambal ni Jesus ini nga mga butang, ang mga tawo natingala gid sa iya pagpanudlo. Indi sia kaangay sang ila mga manunodlo sang Kasugoan, kay ang iya pagpanudlo may awtoridad.

Hunyo 24 | Hunyo 26

"Indi Pag-ihaboy ang mga Perlas sa Atubangan sang mga Baboy"

Liturhiya sang Pulong

(Martes, Hunyo 23, 2020)

Martes sang Ikadose nga Semana sang Ordinaryo nga Adlaw

Ang Pagbasa gikan sa Ikaduha nga Libro sang:

Mga Hari 19:9-11, 14-21, 31-35, 36

   Sang mabatian ini sang emperador, nagpadala sia sang sulat kay Haring Ezequias sang Juda sa pagsiling sa iya, “Ang Dios nga imo ginasaligan nagsiling sa imo nga indi ikaw mahulog sa akon mga kamot, pero indi ina magpatalang sa imo. Nahibal-an mo kon ano ang ginahimo sang emperador sang Asiria sa pungsod nga iya luyag laglagon. Nagahunahona ka bala nga makapalagyo ikaw?

   Ginkuha ni Haring Ezequias ang sulat gikan sa mga nagdala kag ginbasa ini. Dayon nagkadto sia sa Templo, ginbutang niya ang sulat didto sa atubangan sang Ginoo, kag nagpangamuyo, “O Ginoo, ang Dios sang Israel, nga nagalingkod sa imo harianon nga trono, ikaw lamang amo ang Dios, nagagahom sa tanan nga mga ginharian sang kalibutan. Gintuga mo ang langit kag ang duta. Karon, O Ginoo, tan-awa ang nagakatabo sa amon. Pamatii ang tanan nga ginsiling ni Senaquerib sa pagpakahuya sa imo, ang buhi nga Dios. O Ginoo, nahibal-an namon tanan nga ang mga emperador sang Asiria naglaglag sang madamo nga mga pungsod, ginhimo ang ila mga duta nga mamingaw, kag ginsunog ang ila mga dios—nga indi matuod nga dios, mga larawan lamang nga kahoy kag bato nga ginhimo sang mga kamot sang tawo. Karon, O Ginoo nga amon Dios, luwasa kami gikan sa mga Asirianhon, agod nga ang tanan nga mga kapungsoran sang kalibutan makakilala nga ikaw lamang, O Ginoo, amo ang Dios.”

   Dayon si Isaias nagpahibalo kay Haring Ezequias nga nagasiling nga ang Ginoo nakabati sang pangamuyo sang hari, kag nagsabat sini. Ang Ginoo nagsiling, “Ang siyudad sang Jerusalem nagakadlaw sa imo, Senaquerib, kag nagayaguta sa imo.

   May mga tawo sa Jerusalem kag sa Bukid sang Sion nga mabilin nga buhi, kay ang Ginoo nagpat-od sini nga matabo.”

   Amo ini ang ginsiling sang Ginoo nahanungod sa emperador sang Asiria: “Indi sia makasulod sa sini nga siyudad ukon makapana sing bisan isa ka baslay batok sini. Wala sing mga soldado nga may mga taming nga makapalapit sa siyudad, kag wala sing mga trinsera nga mapatindog sa palibot sini. Magabalik sia sa amo man nga dalan nga iya gin-agyan sang iya pagkari, kag indi sia makasulod sa sini nga siyudad. Ako, ang Ginoo, naghambal sini. Apinan ko kag bantayan ini nga siyudad, tungod sa akon kadungganan kag tungod sang ginsaad ko kay David nga akon alagad.”

   Sadto nga gab-i ang anghel sang Ginoo nagsulod sa kampamento sang mga Asirianhon kag nagpatay sang 185,000 ka mga soldado. Dayon si Senaquerib nga emperador sang Asiria nalagyo kag nagbalik sa Nineve.

Salmo sa Pagsabat:

Mga Salmo 48:2-3, 3-4, 10-11

(S) Ang Dios magabantay sang Iya siyudad sa wala sing katapusan.

Gamhanan ang Ginoo, kag dapat gid dayawon sa siyudad sang aton Dios, sa iya balaan nga bukid mataas kag matahom; nagadala sing kalipay sa bug-os nga kalibutan! (S)

Ang Sion, ang bukid sang Dios, ang siyudad sang gamhanan nga hari. Ang Dios nagapakita nga upod sa iya wala sing katalagman sa sulod sang mga pamakod sang siyudad. (S)

Sa sulod sang imo Templo, O Dios, ginpanumdom namon ang imo mapinadayunon nga gugma. Ginadayaw ikaw sang mga tawo bisan diin, kag ang imo pagkabantog nagalapnag sa bug-os nga duta. Matarong ang imo paggahom. (S)

Aleluya:

Juan 8:12

   Ako amo ang kapawa sang kalibutan, siling sang Ginoo; ang nagasunod sa akon may kapawa sang kabuhi.

Ang Pagbasa sang Santos nga Ebanghelyo suno kay:

San Mateo 7:6, 12-14

   “Indi pag-ihatag ang balaan nga mga butang sa mga ido, kay balikdon ka nila kag kadton. Indi pag-ihaboy ang mga perlas sa atubangan sang mga baboy kay pagatasakon lamang nila ini.” 

   “Himoa sa iban ang luyag ninyo nga pagahimuon sa inyo. Amo ini ang kahulogan sang Kasugoan ni Moises kag ang pagtudlo sang mga propeta.” 

   “Sulod kamo sa puwerta nga makitid, kay masangkad ang puwerta kag mahapos ang dalan pakadto sa kalaglagan, kag madamo ang nagaalagi sa sini. Pero makitid ang puwerta kag mabudlay ang dalan pakadto sa kabuhi, kag diutay gid lang ang nakatultol sini.” 

Hunyo 22 | Hunyo 24