Magtuon Kamo sa Akon kag Makapahuway Kamo

Liturhiya sang Pulong

(Domingo, Hulyo 5, 2020)

Ika-Katorse nga Domingo sang Ordinaryo nga Panahon

1. Ang Pagbasa gikan sa Libro ni:

Zacarias nga Propeta 9:9-10

   Maghugyaw, maghugyaw mga pumoluyo sang Sion! Magsinggit sa kalipay, kamo nga mga pumoluyo sang Jerusalem! Tan-awa, ang inyo hari nagaabot sa inyo nga mahimayaon kag madinalag-on, pero mapainuboson kag nagasakay sa asno, sa polyino nga tinday sang asno. Ang Ginoo nagasiling, "Kuhaon ko sa Israel ang mga karuwahi sa inaway, kag kuhaon ko ang mga kabayo sa Jerusalem. Pagabalion ang mga pana nga gingamit sa inaway. Ang inyo hari magapakighidait sa mga kapungsoran; magagahom sia halin sa isa ka dagat pakadto sa isa, halin sa suba sang Eufrates pakadto sa mga ukbong sang duta.”

Salmo sa Pagsabat:

Mga Salmo 145:1-2, 8-9, 10-11, 13-14

(S) Bendisyunan ko ang imo ngalan sa wala katubtoban, O Dios ko kag Hari ko.

Ibantala ko ang imo pagkagamhanan, O Dios ko kag hari ko; magapasalamat ako sa imo sa wala sing katubtoban. Sa tagsa ka adlaw magapasalamat ako sa imo; dayawon ko ikaw sa wala sing katubtoban. (S)

Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo. (S)

Ang tanan mo nga mga tinuga, O Ginoo, magadayaw sa imo, kag ang imo mga tawo magapasalamat sa imo! Magahambal sila sang himaya sang imo ginharian, kag magasugid sila sang imo gahom. (S)

Ang imo ginharian wala sing katapusan, kag ikaw hari sa walay katubtoban. Ang Dios matutom sa iya mga saad, kag maayo sa tanan nga iya ginahimo. Ginabuligan niya ang tanan nga yara sa kalisdanan, ginabayaw niya ang tanan nga ginapaubos. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 8:9, 11-13

   Pero wala na kamo nagakabuhi suno sa ginatudlo sa inyo sang inyo tawuhanon nga kinaugali, kundi nagakabuhi kamo suno sa ginatudlo sang Espiritu, kon matuod nga ang Espiritu sang Dios nagakabuhi sa inyo. Ang tawo nga wala sa iya ang Espiritu ni Cristo indi iya ni Cristo. Kon ang Espiritu sang Dios nga nagbanhaw kay Jesus nagakabuhi sa inyo, ti sia nga nagbanhaw kay Cristo magahatag man sing kabuhi sa inyo mamalatyon nga lawas, paagi sa iya Espiritu nga yara sa inyo. 

   Gani, mga utod, may katungdanan kita sa pagkabuhi, pero indi suno sa luyag sang aton tawuhanon nga kinaugali. Kay kon nagakabuhi kamo suno sa inyo tawuhanon nga kinaugali, mapatay kamo. Pero kon nagakabuhi kamo suno sa Espiritu, ginapatay ninyo ang inyo malaut nga mga buhat, kag magakabuhi kamo. 

Aleluya:

Mateo 11:25

   O Amay, Ginoo sang langit kag duta! Nagapasalamat ako sa imo tungod kay ginpahayag mo sa mga di-maalam, ang ginlipdan mo sa mga maalam kag may mataas nga tinun-an. 

Ang Pagbasa sang Santos nga Ebanghelyo suno kay:

San Mateo 11:25-30

   Sa sadto nga tion si Jesus nagsiling, “O Amay, Ginoo sang langit kag duta! Nagapasalamat ako sa imo tungod kay ginpahayag mo sa mga di-maalam, ang ginlipdan mo sa mga maalam kag may mataas nga tinun-an. Huo, O Amay, kay amo ini ang imo nahamut-an. 

   “Ang akon Amay nagtugyan sa akon sang tanan nga butang. Wala sing nakakilala sa Anak luas ang Amay, kag wala man sing nakakilala sa Amay luas ang Anak kag ang bisan sin-o nga luyag ipahayag sang Anak ang Amay. 

   “Kari kamo sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo kag magtuon kamo sa akon, kay ako malulo kag mapainuboson sing tagipusoon, kag makapahuway kamo. Ang akon gota mahapos, kag ang akon karga mamag-an.”

Hulyo 4 | Hulyo 6