Wala pa gid sing Nakita nga Subong Sini

Liturhiya sang Pulong

(Martes, Hulyo 7, 2020)

Martes sang Ika-Katorse nga Semana sang Ordinaryo nga Panahon

Ang Pagbasa gikan sa Libro ni:

Oseas nga Propeta 8:4-7, 11-13

   “Ang akon mga tawo nagpili sing mga hari nga wala sing pahanugot sa akon. Naghimo sila sing mga pangulo nga wala ako makahibalo. Sa ila pilak kag bulawan naghimo sila sing mga diosdios para sa ila kalaglagan. Ginsikway ko ang bulawan nga baka nga ginsimba sang mga pumoluyo sang siyudad sang Samaria. Nagasilabo ang akon kaakig sa ila. San-o pa bala nila biyaan ang ila pagsimba sa mga diosdios? Ang isa ka platero sa Israel naghimo sing diosdios, kag indi ini Dios! Ang diosdios nga ginasimba sang mga taga-Samaria pagadugmokon.
     Kon magpanggas sila sing hangin,
     Magaani sila sing bagyo!
     Ang nagatindog nga trigo nga wala sing uhay
     Indi makapatubas sing kalan-on.
Pero kon makapatubas gid man ini, ang mga dumoluong magaubos sini kaon!
   “Samtang nagadamo ang mga altar sang mga tawo sang Israel sa pagkuha sang sala, nagadamo man ang mga duog nga ila ginahimuan sang sala. Nagsulat ako sing madamo nga mga pagtulon-an para sa mga tawo, pero ginkabig nila ini nga iya sang mga dumoluong. Naluyag sila magdulot sing mga halad, kag naluyag sila magkaon sang karne. Pero ako, ang Ginoo, wala malipay sa ila, kag karon dumdomon ko ang ila sala kag silutan ko sila tungod sini. Pabalikon ko sila sa Egipto!
 
Salmo sa Pagsabat:

Mga Salmo 115:3-4, 5-6, 7-8, 9-10

(S) Mga tawo sang Israel, magsalig kamo sa Ginoo.

Ang amon Dios yara sa langit, nga nagahimo sang luyag niya. Ang ila mga dios nahimo sa pilak kag bulawan, nga ginhimo sang mga kamot sang tawo. (S)
May mga baba sila, apang indi makahambal, kag mga mata, pero indi makakita. May mga dulonggan sila, pero indi makabati, kag mga ilong, pero indi makasimhot. (S)
May mga kamot sila, pero indi makatandog, kag mga tiil pero indi makalakat. Kabay nga ang mga naghimo sa ila kag ang tanan nga nagasalig sa ila, manginkaangay sang diosdios nga ila ginhimo! (S)

Aleluya:

Juan 10:14

   Ako amo ang maayo nga manugbantay, siling sang Ginoo; sa amo man nga bagay nakilala ko ang akon mga karnero, kag sila nakakilala sa akon.

Ang Pagbasa sang Santos nga Ebanghelyo suno kay:

San Mateo 9:32-38

   Sang nagapalauli ang mga tawo, may iban nga mga tawo nga nagdala kay Jesus sang isa ka tawo nga indi makahambal tungod kay ginagamhan sia sing yawa. Sang matabog na ang yawa naghambal ang apa kag natingala ang tanan nga nagasiling, “Wala pa gid kami sing nakita nga subong sini sa Israel!” Pero ang mga Fariseo nagsiling, “Ang prinsipe sang mga yawa amo ang naghatag sa iya sang gahom sa pagpagwa sang mga yawa.”
   Dayon si Jesus naglibot sa tanan nga kabanwahanan kag mga kabaryuhanan. Nagpanudlo sia sa mga sinagoga, nagbantala sang Maayong Balita sang Ginharian, kag nagpang-ayo sang mga tawo sa ila nagkalainlain nga mga masakit kag balatian. Sang makita niya ang madamo nga mga tawo, naluoy gid sia sa ila kay madamo gid ang ila palaligban kag kaangay sila sang mga karnero nga nagaalaplaag nga wala sing manugbantay. Gani nagsiling sia sa iya mga gintuton-an, “Malapad ang alanyon, ugaling diutay lang ang mangangani. Magpangamuyo kamo sa tag-iya sang alanyon, agod magpadala sia sang dugang nga mga mangangani sa pagtipon sang iya patubas.”

Hulyo 6 | Hulyo 8