Sin-o bala ang Akon mga Utod?

Liturhiya sang Pulong

(Martes, Hulyo 21, 2020)

Martes sang Ika-16 nga Semana sang Ordinaryo nga Panahon

Ang Pagbasa gikan sa Libro ni:

Miqueas nga Propeta 7:14-15, 18-20

   Magmanugbantay ka sa imo mga tawo, O Ginoo, ang mga tawo nga imo ginpili. Nagakabuhi sila nga silahanon lamang sa desierto nga ginalibutan sang maayo nga duta. Tugoti sila sa pagkadto kag maghalab sa matambok nga halalban sang Basan kag Galaad, subong sang ila ginhimo sang una nga mga panahon.

   Maghimo ka sing mga milagro para sa amon, O Ginoo, subong sang imo ginhimo sadtong mga adlaw sang imo pagpagwa sa amon gikan sa Egipto.

   O Ginoo, wala sing iban nga dios nga kaangay sa imo. Ginapatawad mo ang mga sala sang imo nabilin nga mga tawo. Wala ka nagakaakig sing dayon, kundi nagapakita ka sang imo malig-on nga paghigugma. Magamaluloy-on ka sa amon liwat. Pagatasakon mo ang amon mga sala, kag itagbong ini sa kadadalman sang dagat. Magapakita ka sang imo katutom kag malig-on nga paghigugma sa imo mga tawo nga Israelinhon nga mga kaliwat ni Abraham suno sa imo ginsumpa sa amon mga katigulangan sadtong una nga panahon.

Salmo sa Pagsabat:

Mga Salmo 85:2-4, 5-6, 7-8

(S) O Ginoo, ipakita sa amon ang imo mapinadayunon nga kaluoy kag gugma.

O Ginoo, nanginmaayo ka sa imo duta; ginpauswag mo liwat ang Israel. Ginpatawad mo ang mga sala sang imo mga tawo kag ginpasaylo mo ang ila mga sayop. Wala na ikaw nagakaakig sa ila kag ginpaiway mo ang imo kasingkal. (S)

Pabalika kami, O Dios nga amon manlulowas, kag indi ka na magkaakig sa amon! Magakaakig bala ikaw sing dayon sa amon? Indi na gid bala mag-untat ang imo kaakig? (S)

Nagapakiluoy kami, kon mahimo, bag-uha ang amon kusog, kag kami, nga imo mga tawo, magadayaw sa imo. Ipakita sa amon ang imo mapinadayunon nga gugma, O Ginoo, kag luwasa kami. (S)

Aleluya:

Juan 14:23

    Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya. 

Ang Pagbasa sang Santos nga Ebanghelyo suno kay:

San Mateo 12:46-50

   Nagahambal pa si Jesus sa mga tawo, sang mag-abot ang iya iloy kag mga utod nga lalaki. Naghulat sila sa gwa kag nagpangabay nga makapakighambal sa iya. Gani ang isa sa mga tawo didto nagsiling kay Jesus, “Yara sa gwa nagahulat ang imo iloy kag mga utod nga lalaki. Luyag sila magpakighambal sa imo.” 

   Si Jesus nagsabat, “Sin-o bala ang akon iloy? Sin-o bala ang akon mga utod?” Dayon gintudlo niya ang iya mga gintuton-an kag nagsiling, “Tan-awa ninyo, yari ang akon iloy kag mga utod. Kay ang bisan sin-o nga nagatuman sang kabubot-on sang akon Amay sa langit amo ang akon utod nga lalaki, utod nga babayi, kag akon iloy.”

Hulyo 20 | Hulyo 22