Luyag Ka bala nga Bayawon pa Langit?

Liturhiya sang Pulong

(Martes, Hulyo 14, 2020)

Martes sang Ika-kinse nga Semana sang Ordinaryo nga Panahon

1. Ang Pagbasa gikan sa Libro ni:

Isaias nga Propeta 7:1-9

   Sang si Acaz nga anak ni Jotam kag apo ni Uzias amo ang hari sang Juda, si Rezin nga hari sang Siria upod kay Peca nga anak ni Remalias nga hari sang Israel, naggubat sang Jerusalem, pero wala nila ini maagaw.

   Sang pagkabati sang hari sang Juda nga ang mga hangaway sang Siria yara na sa duta sang Israel, sia kag ang iya mga tinawo hinadlukan gid sa bagay nga nagkulorog sila kaangay sang mga kahoy nga ginauyog sang hangin.

   Ang Ginoo nagsiling kay Isaias, “Dalha ang imo anak nga si Sear Jasub kag maglakat ka sa pagsugata kay Haring Acaz. Makita mo sia sa dalan sa diin nagaobra ang mga manughabol, sa punta sang kanal nga ginailigan sang tubig halin sa punong sa naibabaw. Singgana sia nga mag-andam, magkalma, kag indi magkahadlok ukon magsalasala. Ang kaakig ni Haring Rezin kag sang iya mga tinawo nga taga-Siria, kag ni Haring Peca wala sing katalagman pareho sang aso halin sa duha ka dungkolan. Ang Siria, upod sa Israel kag sang iya hari naghimbon. Ang tuyo nila amo ang paggubat sang Juda, sa pagpahadlok sa mga tawo agod mag-upod sa ila, kag dayon himuon ang anak ni Tabeel nga hari.

   “Pero ako, ang Ginoo, nagasiling nga indi ini matabo. Tungod kay ang Siria indi magbakod sang sa Damasco, kag ang Damasco indi magbakod sang sa kay Haring Rezin. Nahanungod sa Israel, sa sulod sang 65 ka tuig malaglag ini kag indi na makatindog subong isa ka pungsod. Ang Israel indi magbakod sang sa siyudad sang Samaria, kag ang Samaria indi magbakod sang sa kay Haring Peca.

   “Kon ang inyo pagtuo indi mabakod, indi kamo makapadayon.’”

Salmo sa Pagsabat:

Mga Salmo 48:2-3, 3-4, 5-6, 7-8

(S) Ang Dios magabantay sang siyudad nga indi maano sa wala sing katapusan.

Gamhanan ang Ginoo, kag dapat gid dayawon sa siyudad sang aton Dios, sa iya balaan nga bukid mataas kag matahom; nagadala sing kalipay sa bug-os nga kalibutan! (S)

Ang Sion, ang bukid sang Dios, ang siyudad sang gamhanan nga hari. Ang Dios nagapakita nga upod sa iya wala sing katalagman sa sulod sang mga pamakod sang siyudad. (S)

Nagtipon ang mga hari kag nagkari sa pagsalakay sang bukid sang Sion. Sang pagkakita nila sini, natingala sila; hinadlukan sila kag nagpalagyo. (S)

Didto gindakop sila sang kahadlok kag kasakit, subong sang isa ka babayi nga manugbata. Ginapangguba sang Dios ang dalagku nga mga sakayan sa hangin nga timog. (S)

Aleluya:

Mga Salmo 95:8

   Karon nga adlaw indi ninyo pagpatig-aha ang inyo mga kasingkasing; kundi pamatii ninyo ang ginasiling sang Ginoo.

Ang Pagbasa sang Santos nga Ebanghelyo suno kay:

San Mateo 11:20-24

   Dayon ginpangbasol ni Jesus ang mga banwa sa diin naghimo sia sang kalabanan sang iya mga milagro kay ang mga tawo didto wala maghinulsol sang ila mga sala. “Kailo ka man Corazin! Kailo ka man Betsaida! Kay kon ang mga milagro nga ginhimo sa inyo ginhimo sa Tiro kag Sidon, dugay na kuntani ang mga tawo didto nagbayu sang sako kag nagbutang sing abo sa ila ulo sa pagpakita nga nagbiya sila sa ila mga sala! Gani dumdoma ninyo nga sa Adlaw sang Paghukom, sobra pa ang silot nga inyo pagabatunon sang sa Tiro kag Sidon. Kag ikaw man Capernaum luyag ka bala nga bayawon pa langit? Itagbong ka sa impiyerno! Kay kon ang mga milagro nga nahimo sa imo ginhimo sa Sodoma, kuntani ang Sodoma ara pa tubtob karon! Gani, dumdoma ninyo nga sa Adlaw sang Paghukom sobra pa ang silot nga batunon mo sang sa Sodoma!”

Hulyo 13 | Hulyo 15