Magkahadlok Kamo sa Dios nga Makalaglag sang Lawas kag Kalag didto sa Impiyerno

Liturhiya sang Pulong

(Sabado, Hulyo 11, 2020)

San Benito, Abad

Ang Pagbasa gikan sa Libro ni:

Isaias nga Propeta 6:1-8

    Sang tuig nga napatay si Haring Uzias nakita ko ang Ginoo. Nagapungko sia sa iya trono, mataas kag mahimayaon, kag ang iya kapa naghil-ob sang bug-os nga Templo. Nagatindog sa palibot niya ang nagadabdab nga tinuga nga ang tagsatagsa sa ila may anom ka mga pakpak. Ang tagsa ka tinuga nagatabon sang iya guya sang iya duha ka pakpak, sang iya lawas sang iya duha ka pakpak, kag ang duha pa gid ka pakpak ginagamit sa paglupad. Nagasiling sila sa isa kag isa:
     “Balaan, balaan, balaan!
     Ang Ginoo nga Makagagahom balaan!
     Ang iya himaya nagapuno sang duta.”
   Ang gahod sang ila mga tingog nag-uyog sang sadsaran sang Templo, kag ang Templo napuno sang aso.
   Nagsiling ako, “Wala na ako sing paglaom! Tapos na ako! Ang tagsa ka pulong nga ginamitlang sang akon mga bibig malaut, kag nagapuyo ako sa tunga sang mga tawo nga ang tagsa ka pulong nga ila ginahambal malaut kag mahigko. Kag karon, nakita gid sang akon mga mata ang Hari, ang Ginoo nga Makagagahom!”
   Dayon ang isa sang mga tinuga naglupad pakadto sa akon, nga nagadala sing baga nga iya ginkuha sang kimpit halin sa altar. Gintandog niya ang akon mga bibig sing baga kag nagsiling, “Ining baga nagtandog sang imo mga bibig, kag karon ang imo kalautan nakuha na kag ang imo mga sala ginpatawad.”
   Dayon nabatian ko ang Ginoo nga nagasiling, “Sin-o bala ang akon ipadala? Sin-o bala ang amon manginmanugbalita?” Nagsabat ako, “Handa ako sa paglakat! Ipadala ako!”

Salmo sa Pagsabat:

Mga Salmo 93:1, 1-2, 5

(S) Ang Ginoo hari! Napanaptan sia sang pagkahalangdon.

Ang Ginoo hari! Napanaptan sia sang pagkahalangdon, kag nalikupan sang kusog. (S)
Matuod gid ang kalibutan napahamtang sing malig-on sa iya duog kag indi mauyog. Ang imo trono, O Ginoo, malig-on halin sa ginsugoran, kag yara na ikaw sa wala pa magsugod ang panahon. (S)
Ang imo mga kasugoan wala sing katapusan, O Ginoo, kag ang imo Templo matuod gid nga balaan, tubtob sa walay katapusan. (S)

Aleluya:

1 Pedro 4:14

   Bulahan kamo kon ginapakahuy-an kamo tungod kay mga sumolunod kamo ni Cristo, ang Espiritu sang Dios, yara sa inyo.

Ang Pagbasa sang Santos nga Ebanghelyo suno kay:

San Mateo 10:24-33

      “Wala sing eskuwela nga maglabaw sa iya maestro, ukon ulipon nga maglabaw sa iya agalon. Gani tuman na sa eskuwela nga manginpareho sa iya maestro, kag sa ulipon nga manginpareho sa iya agalon. Kon ang pangulo sang panimalay ginatawag Beelzebul, ano pa gid ayhan kalain ang pagtawag nila sang mga katapo sina nga panimalay!”
   “Gani, indi kamo magkahadlok sa mga tawo. Wala sing ginatabunan nga indi mabuksan, kag wala sing sekrito nga indi mabuyagyag. Ang ginasiling ko sa inyo sa madulom ihambal ninyo sa masanag, kag ang inyo mabatian sa hutik isinggit ninyo gikan sa atop sang mga balay. Indi kamo magkahadlok sa mga makapatay sang lawas pero indi makapatay sang kalag; sa baylo magkahadlok kamo sa Dios nga makalaglag sang lawas kag kalag didto sa impiyerno. Indi bala nga tagduha singko lang ang magamay nga pispis? Pero wala sing isa sa ila nga mahulog sa duta nga wala sing pahanugot sang inyo Amay. Kag kon nahanungod sa inyo, bisan pa ang mga buhok sa inyo ulo naisip tanan. Gani indi kamo magkahadlok, kay mahal pa kamo kaayo sa mga magamay nga pispis!”
   “Ang bisan sin-o nga magkilala sa akon sa atubangan sang mga tawo, kilalahon ko man sia sa atubangan sang akon Amay sa langit. Pero ang bisan sin-o nga indi magkilala sa akon sa atubangan sang mga tawo, indi ko man sia pagkilalahon sa atubangan sang akon Amay nga yara sa langit.” 

Hulyo 10 | Hulyo 12