Setyembre 6, 2020, Ika-23 nga Domingo sang Tuig

Liturhiya sang Pulong

Nahauna nga Balasahon - Ezequiel 33:7-9

Salmo sa Pagsabat - Mga Salmo 95:1-2, 6-7, 8-9

Ikaduha nga Balasahon - Roma 13:8-10

Aleluya - 2 Corinto 5:19

Ebanghelyo - Mateo 18:15-20

Kon ang Imo Utod Makasala Batok sa Imo

1. Ang Pagbasa gikan sa Libro ni:

Ezequiel nga Propeta 33:7-9

   “Gani, tawo nga mamalatyon, ginahimo ko ikaw nga manugbantay para sa tanan nga mga tawo sang Israel. lsugid mo sa ila ang mga paandam nga ginahatag ko sa imo. Kon magsiling ako nga ang isa ka malaut nga tawo mapatay, pero wala mo sia pagpaandami sa pagbaylo sang iya pagginawi agod magkabuhi sia, ini nga tawo mapatay nga makasasala kag ikaw ang manabat sang iya kamatayon. Kon paandaman mo ang malaut nga tawo, kag indi sia mag-untat sa pagpakasala, mapatay sia nga makasasala, pero maluwas ang imo kaugalingon nga kabuhi.”

Salmo sa Pagsabat:

Mga Salmo 95:1-2, 6-7, 8-9

(S) Pamatii ninyo ang ginasiling sang Ginoo: "Indi ninyo pagpatig-aha ang inyo mga kasingkasing."

Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)

Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. Karon pamatii ninyo ang iya ginasiling. (S)

Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa. Didto gintilawan kag ginsulay  nila ako, bisan nakita na nila ang akon ginhimo para sa ila. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 13:8-10

   Indi kamo dapat mautangan sa kay bisan sin-o, kundi ang dapat mangin-utang ninyo amo ang paghigugmaanay. Ang nagahigugma sang iya isigkatawo nakatuman sang Kasugoan. Ang mga sugo nga nagasiling, “Indi ka magpanginbabayi ukon magpanginlalaki, indi ka magpatay, indi ka magpangawat, indi ka magkaibog,” ini tanan kag iban pa nga mga sugo sarang matingob sa isa lamang ka sugo nga nagasiling, “Higugmaa ang imo isigkatawo subong sang imo kaugalingon.” Ang nagahigugma sang iya isigkatawo indi gid maghimo sa iya sing malaut. Gani, ang paghigugma amo ang pagtuman sang bug-os nga Kasugoan. 

Aleluya:

2 Taga-Corinto 5:19

   Ang Dios nagahimo sang tanan nga mga tawo nga iya mga abyan paagi kay Cristo, kag naghatag sia sa amon sang mensahi kon paano niya sila mahimo nga mga abyan.

Ang Pagbasa sang Santos nga Ebanghelyo suno kay:

San Mateo 18:15-20

   “Kon ang imo utod makasala batok sa imo, kadtoi sia kag sugiri sang iya sayop nga kamuhanon lang. Kon magpamati sia sa imo, ti magabalik ang inyo pag-ayuhay. Pero kon indi sia magpamati sa imo, dala ka sing isa ukon duha pa ka tawo agod nga suno sa ginasiling sang kasulatan, ‘Ang tagsa ka panumbongon masaksihan sang duha ukon tatlo ka tawo.’ Ugaling kon indi sia magpamati sa ila, isugid ini sa iglesia. Kag kon indi pa gid sia magpamati sa iglesia kabiga sia nga dumoluong ukon manugsokot sang buhis.” 

   “Gani nagasiling ako sa inyo nga kon ano ang ginadumilian ninyo sa duta, ini pagadumilian man sa langit. Kon ano ang inyo ginapahanugotan sa duta, ini pagapahanugotan man sa langit. “Nagasiling pa gid ako sa inyo, nga kon ang duha sa inyo maghisugot diri sa duta nahanungod sang butang nga inyo pangayuon sa pangamuyo, ina pagahimuon para sa inyo sang akon Amay sa langit. Kay kon diin ang duha ukon tatlo nga nagatipon sa akon ngalan, yara ako sa tunga nila.” 

Setyembre 5 | Setyembre 7

Kon ang Imo Utod Makasala batok sa Imo

Liturhiya sang Pulong

(Miyerkules, Agosto 12, 2020)

Santa Juana Francisca de Chantal, Relihiyosa

Ang Pagbasa gikan sa Libro ni:

Ezequiel nga Propeta 9:1-7, 10:18-22

   Dayon nabatian ko ang Dios nga nagasinggit, “Kari kamo, mga tawo nga magasilot sang siyudad. Dalha ninyo ang inyo mga armas.” Sa gilayon nag-abot ang anom ka mga lalaki halin sa naaminhan sang nagwa nga puwerta sang Templo nga ang kadaisa may armas nga dala. May upod sila nga isa ka lalaki nga nagabayu sing lino, nga nagadala sing inugsulat. Nagtindog sila sa luyo sang altar nga saway. 

   Dayon ang masilaw nga kapawa nga nagapahayag sang presensya sang Dios sang Israel nagpaibabaw halin sa mga sapat nga may mga pakpak pakadto sa puwertahan sang Templo. Gintawag sang GINOO ang tawo nga nagabayu sing lino, “Libuta ang bug-os nga siyudad sang Jerusalem kag markahi ang tagsa ka agtang sang tagsatagsa nga nagaantos kag ginabudlayan tungod sang mga kangil-aran nga ginahimo sa siyudad.”

   Kag nabatian ko ang Dios nga nagasiling sa iban nga mga tawo, “Sunda ninyo sia sa siyudad kag pamatya ninyo ang mga tawo nga wala luoyluoy kag wala sing ibilin. Pamatya ninyo ang tanan: mga babayi kag mga lalaki, tigulang ukon pamatan-on, mga ginikanan kag mga kabataan. Pero indi ninyo pag-anha ang may marka sa agtang. Magsugod kamo diri sa akon Templo.” Gani nagsugod sila sa mga pangulo nga nagatindog sa Templo. 

   Ang Dios nagsiling sa ila, “Dagtai ninyo ang Templo. Pun-a ninyo ang iya mga pasiyuhan sing mga bangkay. Dalia ninyo!” Gani ginsugoran nila ang pagpamatay sang mga tawo sa siyudad. 

   Dayon ang masilaw nga kapawa nga nagapahayag sang presensya sang GINOO nagsaylo halin sa puwertahan sang Templo pakadto sa ibabaw sang mga sapat. Ginhumlad nila ang ila mga pakpak kag naglupad paibabaw halin sa duta samtang nagatan-aw ako, kag ang mga rueda nag-upod sa ila. Nagdulog sila sa nasidlangan nga puwerta sang Templo, kag ang masilaw nga kapawa yara sa ibabaw nila. Nakilala ko nga amo man gihapon ini nga mga sapat ang nakita ko sa idalom sang Dios sang Israel sa suba sang Kebar. 

   Ang kadaisa sa ila may apat ka mga guya, may apat ka mga pakpak, kag may kamot nga daw iya sang tawo sa idalom sang tagsa ka pakpak. Ang ila mga guya pareho gid sang mga guya nga akon nakita sa suba sang Kebar. Ang tagsa ka sapat nagalakat sing tadlong sa ila ginapadulongan. 

   

Salmo sa Pagsabat:

Mga Salmo 113:1-2, 3-4, 5-6

(S) Ang himaya sang Ginoo yara sa ibabaw sang kalangitan.

Kamo nga mga alagad sang Ginoo, dayawa ninyo ang iya ngalan! Ang iya ngalan pagadayawon, karon kag sa walay katapusan! (S)

Halin sa sidlangan pakadto sa nakatundan, ang ngalan sang Ginoo pagadayawon! Ang Ginoo nagagahom sa tanan nga mga kapungsoran, ang iya himaya yara sa ibabaw sang kalangitan. (S)

Wala gid sing isa nga kaangay sa Ginoo nga aton Dios, nagapuyo sia sa kahitaasan, pero nagaduko sia sa pagtan-aw sang kalangitan kag sang duta. (S)

Aleluya:

2 Corinto 5:19

   Ang Dios naghimo sang tanan nga mga tawo nga Iya mga abyan paagi kay Cristo, kag naghatag Sia sa amon sang mensahi kon paano Niya sila mahimo nga mga abyan.

Ang Pagbasa sang Santos nga Ebanghelyo suno kay:

San Mateo 18:15-20

   “Kon ang imo utod makasala batok sa imo, kadtoi sia kag sugiri sang iya sayop nga kamuhanon lang. Kon magpamati sia sa imo, ti magabalik ang inyo pag-ayuhay. Pero kon indi sia magpamati sa imo, dala ka sing isa ukon duha pa ka tawo agod nga suno sa ginasiling sang kasulatan, ‘Ang tagsa ka panumbongon masaksihan sang duha ukon tatlo ka tawo.’ Ugaling kon indi sia magpamati sa ila, isugid ini sa iglesia. Kag kon indi pa gid sia magpamati sa iglesia kabiga sia nga dumoluong ukon manugsokot sang buhis.” 

   “Gani nagasiling ako sa inyo nga kon ano ang ginadumilian ninyo sa duta, ini pagadumilian man sa langit. Kon ano ang inyo ginapahanugotan sa duta, ini pagapahanugotan man sa langit. 

   “Nagasiling pa gid ako sa inyo, nga kon ang duha sa inyo maghisugot diri sa duta nahanungod sang butang nga inyo pangayuon sa pangamuyo, ina pagahimuon para sa inyo sang akon Amay sa langit. Kay kon diin ang duha ukon tatlo nga nagatipon sa akon ngalan, yara ako sa tunga nila.” 

Agosto 11 | Agosto 13

Tubtob nga Magapangibabaw ang Katarungan

Liturhiya sang Pulong

(Sabado, Hulyo 18, 2020)

Sabado sang Ika-kinse nga Semana sang Ordinaryo nga Panahon

Ang Pagbasa gikan sa Libro ni:

Miqueas nga Propeta 2:1-5

   Kailo ang mga nagahigda nga wala nagakatulog kag nagaplano sing kalautan! Pagkaaga, kon may kahigayunan lang sila, ginahimo nila ang kalautan nga ila ginplano. Kon luyag sila sing mga duta, ginaagaw nila ini. Kon luyag sila sing mga balay, ginaagaw man nila ini. Ginaagaw nila ang mga balay kag ang mga pagkabutang sang mga tawo.

   Gani ang Ginoo nagasiling, “Nagaplano ako sa pagpadala sing kalalat-an sa inyo, kag indi kamo makapalagyo. Indi na kamo makalakat nga may bugal, kay manginmalain ini nga panahon para sa inyo. Kon mag-abot ina nga panahon, ang mga tawo magagamit sang inyo inagihan subong mga halimbawa sang kalalat-an, kag magakanta sila sining masubo nga kalantahon:

     Nalaglag kami sing bug-os!

     Ang Ginoo nagkuha sang amon duta.

     Ginhatag niya ini sa mga nagbihag sa amon.’”

   Gani wala sing isa sa inyo nga pagahatagan sing duta sa adlaw nga partihon ini liwat sa mga tawo sang Dios.

Salmo sa Pagsabat:

Mga Salmo 10:1-2, 3-4, 7-8, 14

(S) Indi pagkalimti ang ginapigos, O Ginoo.

Ngaa bala kalayo sa imo, O GINOO? Ngaa bala nagapanago ka sa tion sang kinagamo? Ang mga malaut bugalon kag nagahingabot sang mga imol; kabay nga masiod gid sila sang mga siod nga ila ginhimo. (S)

Ginapabugal sang malaut nga tawo ang iya malaut nga mga handom, ang dalok nagapasipala kag nagasikway sa GINOO. Ang malaut nga tawo wala nagasapak sa GINOO; sa iya pagpabugal nagahunahona sia nga ang Dios bali wala. (S)

Ang iya hambal puno sing mga pasipala, kabutigan kag pamahog, madali sia maghambal sang malaut kag malain nga mga pulong. Didto sia sa mga puongpuong nagapanago; nagahulat sia didto kag nagapamatay sang mga tawo nga wala sing sala. Ginabantayan gid niya ang iya palatyon nga wala sing makatabang. (S)

Pero nagatan-aw ka; makita mo ang pag-antos kag kalisod, kag handa ka gihapon sa pagbulig. Sa imo ginatugyan sang maluya ang iya kaugalingon, tungod kay nagabulig ka sa gihapon sa mga nawad-an. (S)

Aleluya:

2 Corinto 5:19

   Ang Dios nagahimo sang tanan nga mga tawo nga iya mga abyan paagi kay Cristo, kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Mateo 12:14-21

   Ang mga Fariseo naglakat kag naghimbon sila sa pagpatay kay Jesus. 

   Sang mahibaluan ini ni Jesus, naghalin sia sa sadto nga duog kag ginsunod sia sang madamo nga mga tawo. Gin-ayo niya ang tanan nga masakiton, kag ginpaandaman nga indi sila magpanugid bisan kay sin-o nahanungod sa iya, agod matuman ang ginsiling ni Isaias nga propeta: 

     “Yari ang akon alagad

     Nga akon ginpili,

     Siling sang Dios,

     Ang akon hinigugma

     Nga sa iya nahamuot ako.

     Ang akon espiritu ibutang ko sa iya,

     Kag sia magapahibalo

     Sang akon paghukom

     Sa mga kapungsoran. 

     Pero indi sia magbais

     Ukon magsinggit,

     Ukon mabatian ang iya hambal

     Sa mga dalan. 

     Indi sia magbali

     Bisan sang luma na nga tigbaw,

     Ukon magpatay sang nagapiraw nga suga,

     Tubtob nga magapangibabaw

     Ang katarungan, 

     Kag ang tanan nga mga tawo

     Magasalig sa iya.”

Hulyo 17 | Hulyo 19

Magpakabakod Ka - Ang Imo mga Sala Ginapatawad

Liturhiya sang Pulong

(Huwebes, Hulyo 2, 2020)

Huwebes sang Ika-Trese nga Semana sang Ordinaryo nga Panahon

Ang Pagbasa gikan sa Libro ni:

Amos nga Propeta 7:10-17

   Si Amasias nga pari sang Betel nagpanugid kay Haring Jeroboam sang Israel sini, “Si Amos naghimbon batok sa imo sa tunga sang mga Israelinhon. Ang iya mga pamulongpulong magaguba sang pungsod. Amo ini ang iya ginasiling, ‘Si Jeroboam mapatay sa inaway, kag ang mga Israelinhon pagakuhaon sa ila duta kag pagabihagon.’”

   Kag si Amasias nagsiling kay Amos, “Ikaw nga indi matuod nga propeta! Magbalik ka sa duta sang Juda kag didto ka magpangita sang imo pangabuhian kag didto ka magpanagna. Indi ka na magpanagna diri sa Betel. Ini nga duog simbahan sang hari. Amo ini ang templo sang bug-os nga pungsod.”

   Si Amos nagsabat, “Indi ako propeta. Indi amo ini ang akon palangitan-an. Manugbantay ako sang mga hayop, kag manug-atipan man sang higera. Pero ang Ginoo nagkuha sa akon sa pagkamanugbantay sang hayop kag nagmando sa akon sa paglakat kag sa paghambal sa iya mga tawo nga Israelinhon para sa iya. Gani karon, magpamati ka sa ginasiling sang Ginoo. Ginasingganan mo ako sa pag-untat sa pagpanagna batok sa mga pumoluyo sang Israel, kag indi na magwalay batok sa mga kaliwat ni Isaac. Amasias, tungod kay nagasiling ikaw sina, ang Ginoo nagasiling sa imo, ‘Ang imo asawa mangin-isa ka makihilawason nga babayi sa siyudad, kag ang imo mga kabataan magakalamatay sa gira. Ang imo duta pagapahatpahaton kag pagaihatag sa iban, kag ikaw mismo mapatay sa duta sang indi tumoluo. Ang mga pumoluyo sang Israel pagakuhaon sa ila duta kag pagabihagon.’”

Salmo sa Pagsabat:

Mga Salmo 19:8, 9, 10, 11

(S) Matarong ang mga paghukom sang Ginoo; wala ini sing may ginapasulabi.

Ang kasugoan sang Ginoo himpit; nagahatag ini sing bag-o nga kabuhi, ang mga sugo sang Ginoo masaligan, kag nagahatag ini sing kaalam sa mga nakulangan. (S)

Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop sa hunahona. (S)

Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)

Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)

Aleluya:

2 Corinto 5:19

   Amo ini ang amon mensahi nga ang Dios nagahimo sang tanan nga mga tawo nga iya mga abyan paagi kay Cristo kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Mateo 9:1-8

   Nagsakay si Jesus sa sakayan pabalik sa tabok sang linaw, kag nag-abot sia sa iya kaugalingon nga banwa. May mga tawo nga nagdala sa iya sing isa ka paralitiko nga nagahamyang sa higdaan. Nakita ni Jesus kon daw ano ang ila pagtuo kag nagsiling sia sa paralitiko, “Anak, magpakabakod ka! Ang imo mga sala ginapatawad.” 

   Dayon may mga manunodlo sang Kasugoan didto nga nagsiling sa ila kaugalingon, “Ini nga tawo nagahambal batok sa Dios!”

   Si Jesus nga nakahibalo sang ila ginapanghunahona nagsiling, “Ngaa bala nagapanghunahona kamo sing malain? Diin bala sini ang mahapos, ang pagsiling sa paralitiko, ‘Ang imo mga sala ginapatawad,’ ukon ang pagsiling, ‘Bangon ka kag maglakat’? Karon pamatud-an ko sa inyo nga ang Anak sang Tawo may gahom sa duta sa pagpatawad sang mga sala.” Gani nagsiling sia sa paralitiko, “Bangon ka, dalha ang imo higdaan kag magpauli ka!” 

   Ang paralitiko nagbangon kag nagpauli. Sang pagkakita sini sang mga tawo, hinadlukan sila kag gindayaw nila ang Dios tungod sang gahom nga iya ginhatag sa mga tawo. 

Hulyo 1 | Hulyo 3