Liturhiya sang Pulong
(Huwebes, Agosto 13, 2020)
San Ponciano, Santo Papa
San Hipolito, Pari, mga Martires
Ang Pagbasa gikan sa Libro ni:
Ezequiel nga Propeta 12:1-12
Ang Ginoo naghambal sa akon, “Tawo nga mamalatyon, nagapuyo ikaw sa tunga sang mga tawo nga mabinatuon. May mga mata sila, pero indi sila makakita. May mga dulonggan sila, pero indi makabati, tungod kay mabinatuon sila.
"Gani, tawo nga mamalatyon, maghimos ka sang imo mga dalal-on sa pagpanglakaton pakadto sa kabihagan, kag maglakat ka samtang adlaw pa. Patan-awa ang tagsatagsa sang imo paghalin pakadto sa iban nga duog. Sa sini nga paagi ayhan matalupangdan nila nga mabinatuon sila. Samtang adlaw pa, himusa ang imo mga dalal-on pakadto sa kabihagan agod makita nila ikaw, kag patan-awa sila sang imo paghalin sa gab-i subong nga daw makadto ka sa kabihagan. Samtang nagatan-aw sila, magguhab ka sa pader sang imo balay, kag diri mo ipaagi ang imo dala. Patan-awa sila sang imo pagpas-an sang imo dala, kag maggwa ka sa kadudolman nga natabunan ang imo mga mata, agod indi ka makakita kon diin ka nagapakadto. Ang imo pagahimuon mangin-isa ka paandam sa mga Israelinhon.”
Gintuman ko ang sugo sang Ginoo. Sadto nga adlaw naghimos ako sang akon mga dalal-on pareho sang ginahimo sang isa ka bihag, kag sang pagdulom sadto nga gab-i nagguhab ako sa pader paagi sa akon mga kamot. Ginpas-an ko ang akon mga dala kag naglakat samtang nagatan-aw sila sa akon.
Pagkaaga ang Ginoo naghambal sa akon, "Tawo nga mamalatyon, karon nga ang mabinatuon nga mga Israelinhon nagapamangkot sa imo kon ano ang imo ginahimo, sugiri sila nga ako, ang GINOONG Dios, nagasiling sa ila, kag ini nga mensahi para sa mga pangulo nga nagagahom sa Jerusalem kag sa tanan nga mga tawo nga nagapuyo didto. Sugiri sila nga ang imo ginhimo isa ka tanda kon ano ang matabo sa ila—pagabihagon sila. Ang pangulo nga nagagahom sa ila magapas-an sang iya dala sa kadudolman kag malagyo paagi sa buho nga ginaguhab nila sa pader agod makaagi sia. Pagatabunan niya ang iya mga mata kag indi sia makakita kon diin sia nagapakadto.
Salmo sa Pagsabat:
Mga Salmo 78:56-57, 58-59, 61-62
(S) Indi ninyo malimtan ang mga nahimo sang Dios.
Nagbato sila sa Dios nga Makagagahom, kag gintilawan nila sia. Wala sila magtuman sa iya mga sugo, pero nagmabinatuon sila kag nagdi-matinumanon subong sang ila mga katigulangan, nga indi masaligan subong sang baslay nga ginpana gikan sa tiko nga pana. (S)
Ginpaakig nila sia tungod sa ila di-diosnon nga mga altar, kag ginpaimon nila sia tungod sang ila mga diosdios. Naakig ang Dios sang iya makita ini, gani ginsikway niya sing bug-os ang iya mga tawo. (S)
Gintugotan niya ang mga kaaway sa pag-agaw sang kaban sang kasugtanan, sa diin ang iya gahom kag himaya nakita. Naakig sia sa iya kaugalingon nga mga tawo, kag ginpabay-an niya sila nga mapatay sa ila mga kaaway. (S)
Aleluya:
Mga Salmo 119:135
Mag-upod Ka sa akon, kag tudloi ako sang Imo mga kasugoan.
Ang Pagbasa sang Santos nga Ebanghelyo suno kay:
San Mateo 18:21-19:1
Nagpalapit si Pedro kay Jesus kag nagpamangkot, “Ginoo, makapila bala makasala ang akon utod sa akon kag ako magapatawad sa iya? Tubtob bala sa makapito?”
Si Jesus nagsabat, “Wala ako magsiling sa imo nga tubtob sa makapito, kundi 70 ka pito.” Kay ang Ginharian sang langit kaangay sang isa ka hari nga luyag maghusay sang mga utang sang iya mga suloguon sa iya. Sang nagahusay sia sang ila mga utang, may gindala sa iya nga nakautang sing minilyon ka pisos. Tungod nga indi makabayad ang suloguon sang iya utang, nagsugo ang iya agalon nga ibaligya sia, ang iya asawa, ang iya mga kabataan kag ang tanan niya nga pagkabutang agod mabayaran niya ang iya mga utang. Nagluhod ang suloguon sa atubangan sang iya agalon kag nagpakiluoy, ‘Amoy, hulatholata lang ako anay, kay bayaran ko ikaw sang tanan!’ Ang agalon naluoy sa iya, gani ginpalakat niya sia kag wala na pagpabayara sang iya utang.
“Karon naggwa sia kag nasugata niya ang isa man ka suloguon nga nakautang sa iya sing pila lamang ka pisos. Ginliab niya sia kag ginkuga nga nagasiling, ‘Bayari ang utang mo sa akon!’ Ang iya pareho nga suloguon nagluhod nga nagapakiluoy sa iya, ‘Hulatholata lang ako anay, kay bayaran ko ikaw!’ Pero indi gid sia makahulat. Sa baylo ginpabilanggo niya sia tubtob mabayaran niya ang iya utang. Sang pagkakita sini sang iban nga mga suloguon, naglain gid ang buot nila kag ginkadtuan nila ang ila agalon kag ginsugiran sang nahanabo. Gani ginpatawag sang agalon yadtong suloguon kag ginhambalan, ‘Walay pulos ka nga suloguon! Ginpatawad ko ang imo mga utang kay nagpakiluoy ka sa akon. Kuntani magkaluoy ka man sa pareho mo nga suloguon subong sang pagkaluoy ko sa imo.’ Naakig gid ang iya agalon kag ginpabilanggo sia agod masilutan tubtob nga bayaran niya ang tanan niya nga utang.”
Sa katapusan si Jesus nagsiling, “Amo man ini ang himuon sa inyo sang akon Amay sa langit kon ang tagsa sa inyo indi magpatawad sang inyo utod sa inyo tagipusoon.”
Sang makasiling sini si Jesus, naghalin sia sa Galilea kag nagkadto sa duog nga sakop sang Judea sa tabok sang suba sang Jordan.
No comments:
Post a Comment