Liturhiya sang Pulong
(Domingo, Agosto 2, 2020)
Ika-18 nga Domingo sang Ordinaryo nga Panahon
1. Ang Pagbasa gikan sa Libro ni:
Isaias nga Propeta 55:1-3
Ang Ginoo nagasiling, “Kari ang tagsa tagsa nga ginauhaw—yari ang tubig! Kari kamo nga wala sing kuwarta—magbakal sing kalan-on kag magkaon! Kari kamo, magbakal sing bino kag gatas—wala ini ginpabayari! Ngaa magasto kamo sing kuwarta sa indi kalan-on? Ngaa gastuhon ninyo ang inyo mga suweldo, sa mga butang nga indi makabusog? Pamati kamo sa akon kag tumana ang akon ginasiling, kag mabusog kamo sang labing maayo nga pagkaon sa tanan. Karon pamati kamo, mga tawo ko, kag kari kamo sa akon; kari kamo sa akon, kag makaangkon kamo sing kabuhi! Magahimo ako sing walay katapusan nga kasugtanan sa inyo, kag ihatag ko sa inyo ang mga kaayuhan nga ginsaad ko kay David.
Salmo sa Pagsabat:
Mga Salmo 145:8-9, 15-16, 17-18
(S) Kon ginabuksan mo ang imo mga kamot, ginapaayawan mo kami sing tuman.
Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo. (S)
Ang tanantanan nga nagakabuhi nagalaom sa iya, kag ginahatagan niya sila sing pagkaon sa tion nga ila kinahanglanon ini. Ginahatagan mo sila sing tuman kag ginahimun-an mo ang tanan sa ila mga kinahanglanon. (S)
Ang Ginoo matarong sa tanan nga iya ginahimo, maluloy-on sa tanan niya nga mga buhat. Malapit sia sa tanan nga nagapanawag sa iya, nga nagapanawag sa iya sing maminatud-on. (S)
2. Ang Pagbasa gikan sa Sulat ni San Pablo nga Apostol, sa mga:
Taga-Roma 8:35, 37-39
Karon, sin-o bala ang makapahamulag sa aton sa gugma ni Cristo? Ang pag-antos bala, ang kapipit-an, ang paghingabot, ang gutom, ang kaimulon, ang katalagman, ukon ang kamatayon? Wala sing may makapahamulag sa aton! Kay sa sini nga mga butang may bug-os kita nga pagdaog paagi sa iya nga naghigugma sa aton! Kay napat-od ko gid nga wala sing may makapahamulag sa aton sa iya gugma, bisan pa ang kamatayon ukon kabuhi, bisan pa ang mga anghel ukon ang langitnon nga mga punoan ukon mga gahom. Bisan pa ang mga butang sa karon ukon sa palaabuton, ang kalibutan sa ibabaw ukon sa idalom, wala gid sing butang sa tanan nga mga tinuga nga sarang makapahamulag sa aton sa gugma sang Dios nga nangin-aton paagi kay Cristo Jesus nga aton Ginoo.
Aleluya:
San Mateo 4:4
Indi lamang sa tinapay mabuhi ang tawo, kundi sa tagsa ka pulong nga ginahambal sang Dios.
Ang Pagbasa sang Santos nga Ebanghelyo suno kay:
San Mateo 14:13-21
Sang pagkabati sini ni Jesus, naghalin sia sadto nga duog nga nagsakay sa sakayan kag nagkadto sa isa ka baw-ing nga duog nga isahanon lang. Sang nahibal-an ini sang mga tawo sa nagkalainlain nga banwa, nag-apas sila kay Jesus nga nagalakat lang. Sang pagtakas ni Jesus, nakita niya ang madamo nga mga tawo. Naluoy gid sia sa ila kag gin-ayo niya ang ila mga masakiton.
Sang sirom na, ang iya mga gintuton-an nagpalapit sa iya kag nagsiling, “Madulom na kag baw-ing ini nga duog. Palakta ang mga tawo agod makabakal sila sang ila kaunon sa mga baryo palibot.”
Nagsabat si Jesus, “Indi na kinahanglan nga maglakat pa sila. Kamo mismo ang maghatag sa ila sing pagkaon.”
Nagsabat sila, “Wala gid kami diri sing pagkaon, kundi lima gid lang ka bilog nga tinapay kag duha ka isda.”
Nagsiling si Jesus, “Dalha ninyo ina diri sa akon.” Ginsugo niya ang mga tawo nga maglingkod sa hilamon. Dayon iya ginkuha ang lima ka bilog nga tinapay kag duha ka isda, nagtangla sa langit kag nagpasalamat sa Dios. Ginpamihakpihak niya ang tinapay kag ginhatag niya sa iya mga gintuton-an, kag ginhatag ini sang mga gintuton-an sa mga tawo. Ang tagsatagsa nagkaon kag nabusog. Dayon gintipon sang mga gintuton-an ang nabilin kag dose pa ka alat ang napuno. Ang mga nagkalaon mga 5,000 ka mga lalaki, wala labot ang mga babayi kag mga kabataan.
No comments:
Post a Comment