Wala sing Propeta nga Ginakilala sa Iya Kaugalingon nga Banwa

Liturhiya sang Pulong

(Lunes, Agosto 31, 2020)

Lunes sang Ika-22 nga Semana sang Tuig

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 2:1-5

   Mga kautoran, sang pagkadto ko sa inyo sa pagwali sang tinago nga kamatuoran sang Dios, wala ako maggamit sang madalom nga mga pulong ukon sang mataas nga kinaalam. Kay sang dira pa ako sa inyo nagtapat ako nga kalimtan ko ang tanan, luas si Jesu-Cristo, kag labi na gid ang iya pagkamatay sa krus. Gani nga sang pagkadto ko sa inyo maluya ako kag nagakurog sa kahadlok, kag ang akon mensahi kag paghambal indi paagi sa mahayluhon nga mga pulong sang tawuhanon nga kaalam, kundi paagi sa gahom sang Espiritu sang Dios. Gani, ang inyo pagtuo wala mapasad sa kaalam sang tawo, kundi sa gahom sang Dios.

Salmo sa Pagsabat:

Mga Salmo 119:97, 98, 99, 100, 101, 102

(S) Daw ano ang paghigugma ko sang Imo kasugoan, O Ginoo!

Daw ano ang paghigugma ko sang imo kasugoan! Ginapamalandungan ko ini sa bug-os nga adlaw. (S)

Ang imo sugo yari sa akon sa tanan nga tion, kag nagahimo ini sa akon nga maalam pa sang sa tanan ko nga mga kaaway. (S)

Makahangop ako sing labaw pa sang sa tanan ko nga mga manunodlo, kay ginapamalandungan ko ang imo mga pagtudlo. (S)

Labi pa ang akon kaalam sang sa tigulang nga mga tawo, kay ginatuman ko ang imo mga sugo. (S)

Ginlikawan ko ang tanan nga malain nga pagginawi, kay luyag ako magtuman sang imo pulong. (S)

Wala ko ginpatumbayai ang imo mga pagtudlo, kay ikaw gid ang nagtudlo sa akon. (S)

Aleluya:

San Lucas 4:18

   Ang Espiritu sang Ginoo yari sa akon kag ginpili niya ako sa pagwali sang Maayong Balita sa mga imol.

Ang Pagbasa sang Santos nga Ebanghelyo suno kay:

San Lucas 4:16-30

   Dayon si Jesus nagkadto sa Nazaret, sa diin sia nagdaku, kag sang Adlaw nga Inugpahuway nagkadto sia sa sinagoga suno sa iya kinabatasan. Nagtindog sia sa pagbasa sang mga Kasulatan, kag ginhatag sa iya ang libro ni Isaias nga propeta. Ginbukad niya ini kag nakita niya ang bahin diin nasulat ang masunod:

   “Ang Espiritu sang Ginoo yari sa akon.

   Kag ginpili niya ako sa pagwali

   Sang Maayong Balita sa mga imol,

   Ginpadala niya ako sa pagbantala

   Sang kahilwayan sa mga bihag,

   Sa pag-ayo sang mga bulag,

   Sa paghilway sang mga ginapigos,

   Sa pagbantala sang tuig nga ang Ginoo

   Magaluwas sang iya mga tawo.”

   Gintakop ni Jesus ang libro, gin-uli sa manugbulig, kag naglingkod. Ang tanan sa sinagoga nagtulok sa iya. Nagsugod sia sa paghambal sa ila, “Ini nga dinalan sang kasulatan natuman karon nga adlaw samtang ginapamatian ninyo ang pagbasa sini.”

   Gindayaw sia sang tanan, kag natingala sila sang matahom nga mga pulong nga iya ginhambal. Nagsiling sila, “Indi bala ini anak ni Jose?”

   Nagsiling si Jesus sa ila, “Sa walay duhadoha magasiling kamo sa akon sining hulobaton, ‘Manugbolong, ayuha anay ang imo kaugalingon.’ Kag magasiling man kamo sa akon, ‘Abi, himoa man diri sa imo kaugalingon nga banwa ang tanan nga nabatian namon nga ginhimo nimo sa Capernaum.’” Kag nagsiling pa gid si Jesus, “Nagasiling ako sa inyo: wala sing propeta nga ginakilala sa iya kaugalingon nga banwa! Pamatii ninyo ako: matuod gid nga madamo ang mga babayi nga balo sa Israel sang panahon ni Elias, sang wala gid mag-ulan sa sulod sang tatlo ka tuig kag anom ka bulan kag may daku nga tiggulotom sa bug-os nga duta, pero si Elias wala ginpadala sa bisan sin-o sa ila, kundi sa babayi nga balo sa Sarepta didto sa Sidon. Kag may madamo nga mga aruon sa Israel sang panahon ni Eliseo nga propeta, pero wala gid sing isa sa ila nga gin-ayo, kundi si Naaman lang nga taga-Siria.”

   Ang tanan nga mga tawo sa sinagoga naakig gid sang pagkabati nila sini. Tumindog sila kag ila ginganoy si Jesus pa gwa sa banwa, kag gindala nila sia sa ibabaw sang bakulod sa diin ang ila banwa napasad, agod ila sia itiklod sa pil-as. Pero si Jesus nag-agi sa tunga nila, kag naglakat.

Agosto 30 | Setyembre 1