Ano ang Daku nga Pagsulondan sang Kabuhi?

Liturhiya sang Pulong

(Biyernes, Agosto 21, 2020)

San Pio X, Santo Papa

Ang Pagbasa gikan sa Libro ni:

Ezequiel nga Propeta 37:1-14

   Nabatyagan ko ang gamhanan nga presensya sang GINOO, kag ang iya espiritu nagdala sa akon kag ginbutang niya ako sa kapatagan nga puno sing mga tul-an. Gindala niya ako sa palibot sang kapatagan, kag nakita ko nga may madamo nga mga tul-an kag mamala gid ini. Nagsiling sia sa akon, “Tawo nga mamalatyon, mabuhi pa bala ini nga mga tul-an?” 

   Nagsabat ako, “O GINOO nga Gamhanan, ikaw lamang ang makasabat sina.”

   Nagsiling sia, “Magtagna ka sa sini nga mga tul-an. Singgana ini nga mga tul-an nga magpamati sila sa pulong sang Ginoo. Singgana sila, nga ako, ang GINOO nga Gamhanan, nagasiling sa ila, ‘Hatagan ko kamo sing ginhawa kag buhion ko kamo liwat. Butangan ko kamo sing mga ugat kag mga unod, kag putson ko kamo sing mga panit. Hatagan ko kamo sing ginhawa kag buhion ko kamo liwat. Dayon makilala ninyo nga ako amo ang GINOO.’ ” 

   Gani, nagtagna ako suno sa ginsugo sa akon. Samtang nagahambal ako, nabatian ko ang linagatok, kag ang mga tul-an nag-alalangot sa isa kag isa. Samtang nagatan-aw ako, ang mga tul-an ginputos sing mga ugat kag mga unod kag dayon sang panit. Pero wala pa sing ginhawa ini nga mga lawas.

   Ang Dios nagsiling sa akon, "Tawo nga mamalatyon, magtagna ka sa hangin. Singgana ang hangin nga ang GINOO nga Gamhanan nagamando sa iya nga magkari halin sa apat ka pamusod sang kaIibutan, sa paghatag sing ginhawa sa sining patay nga mga lawas kag buhion sila liwat."

   Gani, nagtagna ako suno sa ginsugo sa akon, kag ang mga lawas nakabaton sang ginhawa. Nabuhi sila kag nagtindog. Ang ila kadamuon sarang mahimo nga isa ka daku nga hangaway.

   Ang Dios nagsiling sa akon, “Tawo nga mamalatyon, ang mga tawo sang Israel kaangay sini nga mga tul-an. Nagasiling sila nga mamala sila, wala sing paglaom, kag wala sing palaabuton. Gani, magtagna ka sa akon mga tawo nga Israelinhon kag singgana sila nga ako, ang GINOO nga Gamhanan, magaabri sang ila mga lulobngan. Pagwaon ko sila, kag dalhon pabalik sa duta sang Israel. Kon abrihan ko ang mga lulobngan sa diin nalubong ang akon mga tawo kag pagwaon sila, makilala nila nga ako amo ang GINOO. Hatagan ko sila sang akon ginhawa, buhion ko sila liwat, kag papuy-on ko sila sa ila kaugalingon nga duta. Dayon makilala nila nga ako amo ang GINOO. Nagsaad ako nga akon ini himuon kag tumanon ko ini. Ako, ang GINOO, amo ang naghambal sini."

Salmo sa Pagsabat:

Mga Salmo 107:2-3, 4-5, 6-7, 8-9

(S) Magpasalamat sa Ginoo, kay maayo sia, ang iya gugma wala sing katapusan!

Buylog kamo sa pagdayaw sa Ginoo, tanan kamo nga iya ginluwas. Ginluwas niya kamo sa inyo mga kaaway, kag gindala kamo pabalik halin sa iban nga mga pungsod, halin sa sidlangan kag nakatundan, halin sa aminhan kag bagatnan. (S)

Ang iban nagdalangdalang sa desierto nga wala sing dalan, kag indi sila makatultol sang alagyan pakadto sa isa ka siyudad nga ila pagapuy-an; gingutom kag gin-uhaw sila, kag nadulaan sang tanan ngapaglaom. (S)

Sa ila kapipit-an nagpanawag sila sa Ginoo, kag ginluwas niya sila sa ila mga kalisdanan. Gintuytoyan niya sila sa matadlong nga dalanon, padulong sa isa ka siyudad nga ila mapuy-an. (S)

Dapat sila magpasalamat sa Ginoo tungod sang iya mapinadayunon nga gugma, tungod sang makatilingala nga mga butang nga iya ginhimo sa ila! Ginatablaw niya ang mga ginauhaw, kag ang ginagutom iya ginabusog sang maayo nga mga butang. (S)

Aleluya:

Mga Salmo 25:4, 5

    Tudloi ako sang imo dalan, O Ginoo, tudloi ako sa pagkabuhi suno sa imo kamatuoran.

Ang Pagbasa sang Santos nga Ebanghelyo suno kay:

San Mateo 22:34-40

   Sang pagkabati sang mga Fariseo nga ang mga Saduceo wala makasabat kay Jesus, nagtipon sila, kag ang isa sa ila nga manunodlo sang Kasugoan, nagdakupdakop sa iya paagi sa isa ka pamangkot, “Manunodlo, ano bala ang labing daku nga sugo sa Kasugoan?”

   Si Jesus nagsabat, “ ‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga hunahona.’ Amo ini ang labing daku kag ang labing importante nga sugo. Ang ikaduha kaangay man sini, ‘Higugmaa ang imo isigkatawo subong sang imo kaugalingon.’ Sa sining duha ka mga sugo napasad ang bug-os nga Kasugoan nga ginsulat ni Moises kag ang mga pagtulon-an sang mga propeta.” 

Agosto 20 | Agosto 22