Disyembre 5, 2020, Sabado sang Nahauna nga Semana sang Adbiento

Liturhiya sang Pulong

Nahauna nga Balasahon - Isaias 30:19-21, 23-26

Salmo sa Pagsabat - Mga Salmo 147:1-2, 3-4, 5-6

Aleluya - Isaias 33:22

Ebanghelyo - Mateo 9:35—10:1, 5, 6-8

"Ang Ginharian sang Langit Malapit na"

Ang Pagbasa gikan sa Libro ni:

Isaias nga Propeta 30:19-21, 23-26

   Kamo nga mga tawo nga nagapuyo sa Jerusalem indi na maghibi liwat. Ang GINOO maluloy-on, kag kon magpanawag kamo sa iya sa pagpangayo sing bulig, magasabat sia sa inyo. Paagihon kamo sang Ginoo sa mga kabudlayan, pero sia gid manginkaupod ninyo sa pagtudlo sa inyo kag indi na kamo kinahanglan magpangita sa iya. Kon magtalang kamo sa dalan sa inyo tuo ukon wala, mabatian ninyo ang iya tingog gikan sa inyo likod nga nagasiling, "Yari ang dalan, diri kamo agi."

   Kon magtanom kamo sang inyo mga binhi, ang Ginoo magapadala sa inyo sing ulan sa pagpatubo sini, kag magapatubas kamo sing madamo, kag ang inyo mga kahayupan may madamo nga halalbon. Ang mga baka kag ang mga asno nga ginaarado sa inyo mga uma magahalab sang labing maayo nga kumpay. Sa adlaw nga ang mga pamakod sang inyo mga kaaway maagaw kag ang ila mga tinawo magakalamatay, ang mga tuboran sang tubig magailig halin sa tagsa ka bukid kag tagsa ka bakulod. Ang bulan manginmasanag subong sang adlaw, kag ang adlaw magasanag sang pito ka pilo sang sa kinaandan, kaangay sang kasanag sang pito ka adlaw nga gintingob sa isa! Ini tanan mahanabo kon ang GINOO magbugkos kag mag-ayo sang mga pilas nga iya ginhatag sa iya mga tawo.

Salmo sa Pagsabat:

Mga Salmo 147:1-2, 3-4, 5-6

(S) Bulahan ang tanan nga nagakalangkag sang pag-abot sang Ginoo.

Dayawa ang Ginoo! Maayo ang magkanta sing mga pagdayaw sa aton Dios; manami kag nagakabagay ang pagdayaw sa iya. Ang Ginoo nagapatindog liwat sang Jerusalem; ginapabalik niya ang mga bihag. (S)

Ginapabakod niya ang nadulaan sing paglaom, kag ginabugkosan niya ang ila mga pilas. Ginpat-od niya ang kadamuon sang mga bituon kag ginatawag niya sila sa ila mga ngalan. (S)

Daku kag makagagahom ang aton Ginoo; indi matungkad ang iya ihibalo. Ginabayaw niya ang mga mapinauboson, pero ginadugmok niya ang mga malaut sa duta. (S)

Aleluya:

Isaias nga Propeta 33:22

   Ang Ginoo nga aton hukom, manugmando kag hari; amo ang magaapin sa aton. 

Ang Pagbasa sang Santos nga Ebanghelyo suno kay:

San Mateo 9:35—10:1, 5, 6-8

   Dayon si Jesus naglibot sa tanan nga kabanwahanan kag mga kabaryuhanan. Nagpanudlo sia sa mga sinagoga, nagbantala sang Maayong Balita sang Ginharian, kag nagpang-ayo sang mga tawo sa ila nagkalainlain nga mga masakit kag balatian. Sang makita niya ang madamo nga mga tawo, naluoy gid sia sa ila kay madamo gid ang ila palaligban kag kaangay sila sang mga karnero nga nagaalaplaag nga wala sing manugbantay. Gani nagsiling sia sa iya mga gintuton-an, “Malapad ang alanyon, ugaling diutay lang ang mangangani. Magpangamuyo kamo sa tag-iya sang alanyon, agod magpadala sia sang dugang nga mga mangangani sa pagtipon sang iya patubas.”

   Gintawag ni Jesus sing tingob ang dose ka mga gintuton-an kag ginhatagan sila sing gahom sa pagtabog sang malaut nga mga espiritu, kag sa pag-ayo sang tanan nga masakit kag balatian. Ginpadala ni Jesus ang dose ka mga apostoles kag ginsingganan sila: “Indi kamo magkadto sa duta sang mga Gentil ukon sa mga banwa sang Samaria, kundi kadtoi ninyo ang mga tawo sang Israel nga subong sang mga karnero nga nagtalalang. Lakat kamo kag ibantala nga ang Ginharian sang langit malapit na! Ayuha ninyo ang mga masakiton, banhawa ang mga patay, ayuha ang mga aruon, kag tabuga ninyo ang mga yawa. Nakabaton kamo nga wala sing bayad, gani maghatag man kamo nga indi magpabayad.

Disyembre 4 | Disyembre 6