□□□□□
Si Salomon Nagpangayo sing Kaalam
(2 Cron. 1:3-12)
1 Si Salomon nanginkadampig sang hari sang Egipto sa iya pagpangasawa sang iya bata nga babayi. Gindala niya sia sa pagpuyo sa Siyudad ni David tubtob natapos niya ang pagpatindog sang iya palasyo, sang Templo, kag sang pader sa palibot sang siyudad.2 Ang templo para sa Ginoo wala pa mapatindog, gani ang mga tawo nagadulot pa sadto sing mga halad sa nagakalainlain nga mga altar.
3 Si Salomon naghigugma sa Ginoo, kag ginsunod niya ang mga ginbilin sang iya amay nga si David, pero nag-ihaw man sia sing mga sapat kag gindulot ini subong nga halad sa nagakalainlain nga mga altar.
4 Isa ka tion, nagkadto sia sa Gabaon sa pagdulot sing mga halad, kay didto ang bantog nga altar. Nakadulot sia didto sing ginatos ka mga halad nga sinunog sang nagligad nga panahon.
5 Sadto nga gab-i ang GINOO nagpakita sa iya sa isa ka damgo kag ginpamangkot sia, “Ano ang luyag mo nga ihatag ko sa imo?”
6 Si Salomon nagsabat, “Nagpakita ikaw sing daku nga paghigugma sa akon amay nga si David nga imo alagad. Maayo sia, mainunongon, kag maminatud-on sa iya kaangtanan sa imo. Kag nagpadayon ka sa pagpakita sang imo daku kag mapinadayunon nga gugma sa imo paghatag sa iya sing isa ka anak nga nagbulos sa iya sa paggahom.
7 O GINOONG Dios, ginpabulos mo ako sa akon amay subong nga hari, bisan pamatan-on pa ako kag indi pa makahibalo maggahom.
8 Yari ako upod sa mga tawo nga ginpili mo nga mangin-imo, mga tawo nga madamo gid nga indi sarang maisip.
9 Gani, hatagi ako sing kaalam sa paggahom sing matarong kag sa paghibalo sang maayo kag sang malain. Kay kon indi mo ako paghatagan, ano bala ang paggahom ko sining imo mga tawo nga tama kadamo?”
 |
| Hatagi ako sing kaalam sa paggahom sing matarong kag sa paghibalo sang maayo kag sang malain. (3:9) |
11 gani nagsiling sia sa iya, “Tungod kay nagpangayo ka sing kaalam sa paggahom sing matarong, sa baylo sang malawig nga kabuhi para sa imo kaugalingon, ukon kamanggaran, ukon kamatayon sang imo mga kaaway,
12 ihatag ko ang ginapangayo mo. Hatagan ko ikaw sing kaalam kag paghangop labaw sa bisan kay sin-o sang una ukon sa ulihi man.
13 Hatagan ko ikaw sang wala mo ginapangayo: magaangkon ka sing manggad kag kadungganan sa bug-os mo nga kabuhi, labaw sa bisan kay sin-o nga hari.
14 Kag kon magtuman ka sa akon kag magbantay sa akon mga kasugoan kag mga sugo, subong sang ginhimo sang imo amay nga si David, hatagan ko ikaw sing malawig nga kabuhi.”
15 Si Salomon nagmata kag natalupangdan niya nga ang Dios nagpakighambal sa iya paagi sa isa ka damgo. Dayon nagkadto sia sa Jerusalem kag nagtindog sa atubangan sang Kaban sang Kasugtanan sang GINOO kag nagdulot sa Ginoo sing halad nga sinunog kag halad sa paghiambit. Dayon nagpapunsyon sia para sa tanan niya nga mga opisyales.
Si Salomon Naghukom sang Isa ka Mabudlay nga Kaso
16 Isa ka tion may duha ka babayi nga nagabaligya sang ila dungog nga nagkadto kay Haring Salomon.17 Ang isa sa ila nagsiling, "Mahal nga Hari, ini nga babayi kag ako nagapuyo sa isa lang ka balay, kag ako nagbata sing lalaki sa balay samtang yadto man sia didto.
18 Sang makaligad ang tatlo ka adlaw nga nagbata ako, nagbata man sia sing lalaki. Duha lamang kami didto kag wala na sing iban.
19 Dayon isa ka gab-i naligiran niya ang iya bata kag napatay ini.
20 Sang gab-i nagbangon sia, ginkuha ang akon bata sa luyo ko samtang nagakatulog ako, kag gindala ini sa iya higdaan. Dayon ginbutang niya ang patay nga bata sa akon higdaan.
21 Sang madason nga aga, sang pagmata ko sa pagpatiti sang akon bata, nasapwan ko nga patay na ini. Gintan-aw ko sia sing maayo kag nasapwan ko nga indi sia akon bata.”
22 Pero ang isa ka babayi nagsabat, "Indi! Ang buhi nga bata akon, kag ang patay nga bata imo!" Ang nahauna nga babayi nagsabat, "Indi mahimo! Ang patay nga bata imo, kag ang buhi nga bata akon!" Kag nagsabtanay sila sa atubangan sang hari.
23 Dayon si Haring Salomon nagsiling, "Ang tagsa sa inyo nagaangkon sang buhi nga bata kag indi mag-angkon sang patay nga bata.”
24 Nagmando sia nga magkuha sang espada kag sang madala ini sa sulod
25 nagsiling sia, “Pihaka ang buhi nga bata kag hatagan ang tagsa ka babayi sang tagpihak.”
26 Ang matuodtuod nga iloy nga napun-an sing paghigugma sa iya anak nagsiling sa hari, "Mahal nga Hari, kon mahimo indi pagpatya ang bata! Ihatag sa iya!” Pero ang isa ka babayi nagsiling, "Indi pag-ihatag ini sa bisan kay sin-o sa amon. Sigi, pihaka ang bata."
27 Dayon si Salomon nagsiling, "Indi pagpatya ang bata! Ihatag ini sa nahauna nga babayi. Sia amo ang matuod nga iloy sini.”
28 Sang pagkabati sang mga tawo sang Israel sang paghukom ni Salomon, nagtahod gid sila tanan sa iya, kay nakahibalo sila nga ang Dios naghatag sa iya sing kaalam sa paghusay sang mga kaawayon sing matarong.
No comments:
Post a Comment