□□□□□
Ang Dios Nagpakita liwat kay Salomon
(2 Cron. 7:11-22)
1 Sa tapos mapatindog ni Haring Salomon ang Templo kag ang palasyo, kag ang tanan nga luyag niya patindugan,2 ang GINOO nagpakita liwat sa iya, subong sang iya pagpakita sa Gabaon.
3 Ang Ginoo nagsiling sa iya, "Nabatian ko ang imo pangamuyo. Ginapakabalaan ko ini nga templo nga imo ginpatindog subong nga duog sa diin ako pagasimbahon sa walay katubtoban. Pagabantayan kag apinan ko ini sa walay katubtoban.
4 Kag karon, kon ikaw mag-alagad sa akon sing matarong kag maminatud-on subong sang pag-alagad sang imo amay nga si David, nga nagahimo sang tanan nga ginsugo ko sa imo, kag nagatuman sang akon mga kasugoan,
5 tumanon ko ang akon ginsaad sa imo amay nga si David sang ginsingganan ko sia nga ang isa sang iya mga kaliwat magagahom sa bug-os nga Israel.
6 Pero kon ikaw ukon ang imo mga kaliwat mag-untat sa pagsunod sa akon, kag maglapas sang mga kasugoan kag mga sugo nga ginhatag ko sa inyo, kag mag-alagad kag magsimba sa iban nga mga dios,
7 dayon tabugon ko ang akon mga tawo nga Israel gikan sa duta nga akon ginhatag sa ila. Patumbayaan ko man ini nga Templo nga akon ginpakabalaan tungod kay diri ako simbahon, kag ang mga tawo bisan diin magayaguta kag magapasipala sa Israel.
8 Ini nga Templo mangintinumpokan sang mga ginub-an,s kag ang tagsatagsa nga maglabay makibot kag matingala kag magapamangkot sila, 'Ngaa ang Ginoo naghimo sini sa sini nga duta kag sa sini nga Templo?'
9 Kag ang iban magasabat, 'Kay ang mga tawo nagbiya sa GINOO nga ila Dios, nga nagdala sang ila mga katigulangan pa gwa sa duta sang Egipto. Nagdangop sila sa iban nga mga dios, kag ginsimba nila kag gin-alagad ini nga mga dios. Gani ang GINOO nagdala sini nga kalalat-an sa ila.'"
Ang Kasugtanan ni Salomon kag ni Hiram
(2 Cron. 8:1-2)
10 Si Salomon nagpatindog sang Templo kag sang iya palasyo sa sulod sang 20 ka tuig.11 Si Haring Hiram sang Tiro naghatag sa iya sang tanan nga kahoy nga sedro kag pino, kag sang tanan nga bulawan nga iya kinahanglanon para sa sini nga hilikuton. Sang matapos ini, si Haring Salomon naghatag kay Hiram sing 20 ka mga banwa sa sakop sang Galilea.
12 Ginkadtuan kag gintan-aw ini ni Hiram, pero wala sia maluyag sini.
13 Gani nagsiling sia kay Salomon, "Utod ko, ano bala ining mga banwa nga ginhatag mo sa akon?" Tungod sini, ini nga duog ginatawag pa Cabul.t
14 Ang nahatag ni Hiram nga bulawan kay Salomon malapit sa isa ka tonelada.
Ang Iban pa nga Hinimuan ni Salomon
(2 Cron. 8:3-18)
15 Si Haring Salomon naggamit sang pilitaryo nga pag-obra sa pagpatindog sang Templo kag palasyo, sa pagtampok sang duta sa aminhan nga bahin sang siyudad, kag sa pagpatindog sang mga pader sang siyudad. Gingamit man niya ang pilitaryo nga pag-obra sa pagpatindog liwat sang mga banwa sang Hazor, Meguido, kag Gezer.16 (Ang hari sang Egipto nagsalakay sang Gezer kag gin-agaw ini. Ginpamatay niya ang mga pumoluyo sini, kag ginsunog ang siyudad. Dayon ginhatag niya ini subong nga regalo sa kasal sang iya bata nga babayi, sang pagpamana niya kay Salomon,
17 kag ginpatindog ini liwat ni Salomon.) Paagi man sa pilitaryo nga pag-obra, ginpatindog ni Salomon ang naubos nga Bethoron,
18 ang Baalat, ang Tamar sa desierto sang Juda,
19 ang mga banwa sa diin ginabutang ang iya mga bodega, ang mga banwa para sa iya mga kabayo kag mga karuwahi, kag ang tanan nga luyag niya patindugon sa Jerusalem, sa Libano, kag bisan diin sa iya ginharian.
20-21 Sa sining pilitaryo nga obra si Salomon naggamit sang mga kaliwat sang pumoluyo sang Canaan nga wala ginpamatay sang mga Israelinhon sang pag-agaw nila sang ila duta. Ini nagalakip sang mga Amornon, mga Hethanon, mga Pereznon, mga Hevhanon, kag mga Jebusnon, nga ang ila mga kaliwat nagapadayon nga mga ulipon tubtob karon nga panag-on.
22 Si Salomon wala mag-ulipon sa mga Israelinhon, kundi ginhimo niya sila nga iya mga soldado, mga opisyales, pangulo nga mga soldado, mga kapitan sa karuwahi, kag mga manugsakay sa kabayo.
23 May 550 ka mga manugdumala nga gintugyanan sang pilitaryo nga obra sa nagkalainlain nga mga bulohaton ni Salomon.
24 Si Salomon nagpatampok sang duta sa nasidlangan nga bahin sang siyudad, sa tapos ang iya asawa nga anak sang hari sa Egipto nagsaylo halin sa siyudad ni David pakadto sa palasyo nga ginpatindog ni Salomon para sa iya.
25 Tatlo ka beses kada tuig si Salomon nagadulot sing mga halad nga sinunog kag mga halad sa paghiambit sa altar nga iya ginpatindog sa Ginoo. Nagsunog man sia sing insyenso sa Ginoo. Gani natapos niya ang pagpatindog sang Templo.
26 Si Haring Salomon naghimo man sing madamo nga mga sakayan sa Eziongeber nga yara sa luyo sang Elat sa baybayon sang Dagat nga Mapula sa duta sang Edom.
27 Si Haring Hiram nagpadala sing batid nga mga sakayanon gikan sa iya mga sakayan sa pag-alagad upod sa mga tinawo ni Salomon.
28 Nagbiyahe sila sa duta sang Ofir kag pagbalik nila nagdala sila kay Salomon sing malapit sa 16 ka tonelada nga bulawan.
sAng iban nga dumaan nga pagbadbad tinumpokan sang mga ginub-on; sa Hebreo mataas.
tCABUL: Ini nga ngalan kon ihambal daw pareho sang Hebreo nga "ke-bal," kon sayuron "wala sing pulos."
No comments:
Post a Comment