□□□□□
Ang mga Opisyales ni Salomon
1 Si Haring Salomon amo ang hari sang bug-os nga Israel,2 kag amo ini ang iya mataas nga mga opisyales:
Ang pari: si Azarias nga anak ni Sadoc
3 Ang mga sekretaryo sa korte: si Elioref kag si Ahias nga mga anak ni Sisa
Ang nagsulat sing maragtas: si Josafat nga anak ni Ahilud
4 Ang pangulo sang hangaway: si Benaya nga anak ni Joiada
Ang mga pari: si Sadoc kag si Abiatar
5 Ang pangulo sang mga manugdumala sang mga distrito: si Asarias nga anak ni Natan
Ang palamangkutan sang hari: ang pari nga si Zabud nga anak ni Natan
6 Ang manugdumala sang mga suloguon sa palasyo: si Ahisar
Ang manugdumala sang pilitaryo nga pag-obra: si Adoniram nga anak ni Abda
7 Si Salomon nagpili sing dose ka mga tawo subong mga gobernador sang mga distrito sa Israel. Sila ang magahatag sing kalan-on sa hari kag sa iya panimalay gikan sa ila distrito, kag ang tagsa ka gobernador amo ang magahatag sing kalan-on sa bilog nga bulan sa kada tuig.
8 Ang masunod amo ang mga ngalan sini nga mga opisyales kag ang mga distrito nga ila ginadumalahan:
Si Benhur: sa kabakuloran sang Efraim
9 Si Bendequer: sa mga siyudad sang Macaz, Saalbim, Betsemes, Elon, kag Bethanan
10 Si Benhesed: sa mga siyudad sang Arubot kag Soco, kag ang bug-os nga kadutaan sang Hafer
11 Si Benabinadab nga nakapangasawa sa kay Tapat nga bata ni Salomon: sa bug-os nga duta sang Dor
12 Si Baana nga anak ni Ahilud: sa mga siyudad sang Taanac, sang Meguido, kag sa tanan nga kadutaan malapit sa Betsean, malapit sa banwa sang Zaretan, sa bagatnan sang banwa sang Jezreel tubtob sa siyudad sang Abilmehola kag sa siyudad sang Jocneam
13 Si Bengeber: sa siyudad sang Ramot sa Galaad, kag sa mga siyudad nga may mga tolda sa Galaad, nga iya sang baranggay ni Jair nga anak ni Manases, kag sa duta sang Argob, sa Basan nga 60 ka dalagku nga mga banwa tanan nga napamakuran sing mga pader kag saway nga mga pintal sa mga puwerta
14 Si Ahinadab nga anak ni Iddo: sa siyudad sang Mahanaim
15 Si Ahimaaz nga nagpangasawa kay Basemat nga bata ni Salomon: sa kadutaan ni Neftali
16 Si Baana nga anak ni Husai: sa duta sang Aser kag ang banwa sang Bealot
17 Si Josafat nga anak ni Parua: sa kadutaan ni Isacar
18 Si Simei nga anak ni Ela: sa kadutaan ni Benjamin
19 Si Geber nga anak ni Uri: sa duta sang Galaad nga gingamhan Sihon nga hari sang mga Amornon kag ni Og nga hari sang Basan
Wala labot sining dose, may isa ka gobernador sa duta sang Juda.
Ang Mainuswagon nga Paggahom ni Salomon
20 Ang mga tawo sang Juda kag sang Israel pareho kadamo sang balas sa baybayon: nagkaon sila kag nag-inom kag malipayon.21 Ang ginharian ni Salomon nagsakop sang tanan nga mga pungsod halin sa suba sang Eufrates sa sidlangan, tubtob sa Filistia sa nakatundan kag tubtob sa dulonan sang Egipto sa bagatnan. Nagbayad sila sa iya sing buhis kag gingamhan niya sila sa bug-os sang iya pagkabuhi.
22 Ang kalan-on nga kinahanglanon ni Salomon kada adlaw 69 ka pasong nga mapino nga arina kag 138 ka pasong nga ginaling nga trigo;
23 napulo ka binukot nga baka, 20 ka luyaw nga mga baka, 100 ka mga karnero, wala labot sang usa, gazela, mga usa nga lalaki kag mga manok.
24 Si Salomon naggahom sa bug-os nga duta sa nakatundan sang suba sang Eufrates, halin sa Tifsa, sa Eufrates, tubtob sa nakatundan sa siyudad sang Gaza. Ang tanan nga mga hari sa katundan sang Eufrates nasakop sa iya, kag may kalinong sia sa tanan niya nga kaingod nga mga pungsod.
25 Samtang nagakabuhi pa si Salomon, ang mga tawo sa bug-os nga Juda kag Israel nagpuyo sa kalinong, kag ang tagsa ka panimalay may ila nga kaugalingon nga talamnan sing ubas kag mga katamnan sang mga olivo.
26 Si Salomon may 40,000 ka mga kabayo sa iya kuwadra para sa karuwahi, kag 12,000 ka mga soldado nga nagasakay sa kabayo.
27 Ang tagsa ka gobernador sa mga puod may katungdanan sa paghatag sing isa ka bulan nga kunsomo para kay Haring Salomon kag sa tanan nga nagakaon sa iya palasyo. Wala gid sila magpalta sa ila paghatag.
28 Ang tagsa ka gobernador nagtuman sang iya katungdanan sa paghatag sing sebada kag kumpay sa diin ginakinahanglan ini para sa mga kabayo nga nagaguyod sang karuwahi kag sa mga hayop nga ginaobra.
29 Ang Dios naghatag kay Salomon sing labaw nga kaalam kag paghangop, kag ihibalo nga indi matungkad.
30 Si Salomon maalam pa sa mga mangin-alamon sang Sidlangan, ukon sa mga mangin-alamon sang Egipto.
31 Sia ang labing maalam sang tanan nga mga tawo: maalam pa sia kay Etan nga Ezranhon, kay Heman, kay Calcol, kag kay Dorda—ang mga anak nga Ialaki ni Mahol. Ginbantog sia sa tanan nga mga pungsod sa palibot.
32 Naghimo sia sing 3,000 ka mga hulobaton kag nagkumposo sing sobra sa 1,000 ka mga kalantahon.
33 Naghambal sia nahanungod sang mga kahoy kag mga tanom, halin sa sedro sang Libano tubtob sa isopo nga nagatubo sa mga dingding. Naghambal man sia nahanungod sang mga sapat, mga pispis, mga sapat nga nagasaug, kag mga isda.
34 Ang mga hari sa bug-os nga kalibutan nakabati sang iya kaalam, kag nagpadala sila sing mga tawo sa pagpamati sa iya.
No comments:
Post a Comment