Si Elias Gindala pa Langit
1 Ang tion nag-abot nga ang Ginoo magadala kay Elias palangit paagi sa buhawi. Si Elias kag si Eliseo naglakat halin sa Gilgal,
2 kag sa dalan si Elias nagsiling kay Eliseo, "Pabilin ka diri kay ang Ginoo nagmando sa akon sa pagkadto sa Betel.” Pero nagsabat si Eliseo, "Nagasumpa ako tungod sa akon pag-unong sa buhi nga Ginoo kag sa imo nga indi ko ikaw pagbayaan." Gani nagkadto sila sa Betel.
3 Ang isa ka grupo sang mga propeta nga nagapuyo didto nagkadto kay Eliseo kag nagsiling sa iya, "Nakahibalo ka bala nga ang Ginoo magakuha sang imo agalon karon nga adlaw?" Nagsabat si Eliseo, "Huo nahibal-an ko, pero indi naton paghambalan ina."
4 Dayon si Elias nagsiling kay Eliseo, "Karon pabilin ka diri kay ang Ginoonagsugo sa akon sa pagkadto sa Jerico." Pero si Eliseo nagsabat, "Nagasumpa ako tungod sa akon pag-unong sa buhi nga Ginoo kag sa imo nga indi ko ikaw pagbayaan." Gani nagkadto sila sa Jerico.
5 Ang isa ka grupo sang mga propeta nga nagapuyo didto nagkadto kay Eliseo kag nagsiling sa iya, "Nakahibalo ka bala nga ang Ginoo magakuha sang imo agalon karon nga adlaw?" Si Eliseo nagsabat, "Huo nahibal-an ko, pero indi naton paghambalan ina."
6 Dayon si Elias nagsiling kay Eliseo, “Karon pabilin ka diri kay ang Ginoo nagsugo sa akon sa pagkadto sa suba sang Jordan.” Pero si Eliseo nagsabat, “Nagasumpa ako tungod sa akon pag-unong sa buhi nga Ginookag sa imo nga indi ko ikaw pagbayaan.” Gani naglakat sila,
7 kag ang 50 ka mga propeta nagsunod sa ila sa Jordan. Nagdulog si Elias kag si Eliseo sa pangpang sang suba, kag ang 50 ka mga propeta nagtindog sa unhan nila.
8 Dayon gin-uba ni Elias ang iya bayu, ginlukot ini kag ginhampak sa tubig. Ang tubig napihak, kag sia kag si Eliseo nag-agi sa mamala nga duta sa pagtabok sa pihak.
9 Didto si Elias nagsiling kay Eliseo, “Sugiri ako kon ano ang luyag mo himuon ko sa imo sa wala pa ako makuha sa imo.” Si Eliseo nagsabat, “Hatagi ako sang bahin sang imo gahom nga magahimo sa akon nga tal-os mo.”c
10 Si Elias nagsabat, “Mabudlay ihatag ang imo ginapangayo, pero mabaton mo ini kon makita mo ako nga ginakuha na palayo sa imo; kon indi mo ako makita, indi mo ini mabaton.”
11 Nagsugilanon sila samtang nagalakat sila, sang hinali lang ang isa ka karuwahi nga kalayo nga ginaguyod sang mga kabayo nga kalayo nag-abot sa tunga nila,kag si Elias gindala palangit paagi sa isa ka buhawi.
12 Nakita ini ni Eliseo kag nagsinggit sia kay Elias, “Amay ko, amay ko! Gamhanan nga mangangapin sang Israel! Wala na ikaw!” Kag wala na niya makita si Elias liwat. Sa kasubo, gingisi ni Eliseo ang iya bayu sa duha ka bahin.
 |
| "Amay ko, amay ko... Wala na ikaw!” (2:12) |
13 Dayon ginpulot niya ang bayu ni Elias nga nahulog, kag nagbalik sia kag nagtindog sa pangpang sang Jordan.
14 Ginhampak niya ang tubig sang bayu ni Elias, pero ang tubig wala mapihak. Nagsiling sia, “Diin ang Ginoo, ang Dios ni Elias?” Ginhampak niya liwat ang tubig, napihak ini, kag naglakat sia pakadto sa pihak.
15 Ang 50 ka mga propeta halin sa Jerico nakakita sa iya kag nagsiling, “Ang gahom ni Elias yara na kay Eliseo!” Naglakat sila sa pagsugata sa iya, nagluhod sa iya atubangan,
16 kag nagsiling, “Kami nga 50 yari diri, tanan mabakod nga mga lalaki. Dali pangitaon ta ang imo agalon. Basi gindala sia sang espiritu sang Ginoo kag ginbilin sia sa bukid ukon sapatag man.” Si Eliseo nagsabat, “Indi, indi kamo maglakat.”
17 Pero nagpamilit gid sila tubtob sang ulihi nagpasugot si Eliseo kag ginpalakat sila. Sila nga 50 naglakat sa pagpangita kay Elias sa sulod sang tatlo ka adlaw, pero wala nila sia makita.
18 Dayon nagbalik sila kay Eliseo, nga nagahulat sa Jerico, kag nagsiling sia sa ila, "Indi bala nagsiling ako sa inyo nga indi kamo maglakat?"
Ang mga Milagro ni Eliseo
19 May mga tawo nga nagkadto kay Eliseo halin sa Jerico nga nagasiling, "Sir, suno sa imo nahibaluan, ini maayo nga siyudad, pero ang tubig indi maayo, kag ang mga nagabusong ginahulogan.”
20 Nagsugo si Eliseo, "Butangi sing asin ang bag-onga yahong kag dalha sa akon.” Gindala nila ini sa iya,
21 kag nagkadto sia sa tuboran sang siyudad, ginhaboy ang asin sa tubig, kag nagsiling, "Amo ini ang ginasiling sang Ginoo: 'Ginapatinlo ko ini nga tubig, kag indi na ini manginkabangdanan sang madamo nga kamatayon ukon pagkahulog sang mga ginabusong.’”
22 Kag halin sadto ang tubig nagtinlo, suno sa ginsiling ni Eliseo nga mahanabo.
23 Naghalin si Eliseo sa Jerico kag nagkadto sa Betel. Sa dalan may mga kabataan nga lalaki nga naghalin sa banwa kag naglangolango sa iya. Nagsinggit sila, “Halin ka diri, kalbo! Halin ka diri, kalbo!"
24 Nagbalikid si Eliseo, nagtulok sa ila, kag ginpakamalaut sila sa ngalan sang Ginoo. Dayon ang duha ka uso nga babayi naggwa sa kakahuyan kag ginpangus-ab ang 42 sa ila.
25 Nagpadayon si Eliseo sa bukid sang Carmelo, kag sang ulihi nagbalik sia sa Samaria.
cSANG BAHIN. . . TAL-OS MO: Si Eliseo nagapangayo sa iya amay sang panublion sang kamagulangan nga anak nga lalaki paagi sa kasugoan (tan-awa ang Deut. 21:17).
No comments:
Post a Comment