Si Haring Uzias sang Juda
(2 Cron. 26:1-32)
1 Sa ika-27 nga tuig sang paggahom ni Haring Jeroboam II sang Israel, si Uzias nga anak nga lalaki ni Amasias nanginhari sang Juda.
2 Nagaedad sia sing 16 ka tuig, kag naggahom sia sa Jerusalem sa sulod sang 52 ka tuig. Ang iya iloy amo si Jecolia nga taga-Jerusalem.
3 Ginhimo niya ang matarong sa atubangan sang Ginoo kag nagsunod sang ginhimo sang iya amay.
4 Pero ang mga duog sa diin ginasimba ang mga diosdios wala makuha, kag ang mga tawo nagpadayon sa pagdulot sing mga halad kag pagsunog sing insyenso sa sini nga mga duog.
5 Ang Ginoo naghatag kay Uzias sang balatian sa panit nga makalalaton nga wala mag-ayo tubtob sa iya kamatayon. Nagpuyo sia sa iya kaugalingon nga balay nga hilway sa iya tanan nga mga katungdanan, samtang ang iya anak nga lalaki nga si Joatam amo ang naggahom sa pungsod.
6 Ang tanan nga mga ginhimo ni Uzias nasulat sa Maragtas sang mga Hari sang Juda.
7 Napatay si Uzias kag ginlubong sa lulobngan sang mga hari sa Siyudad ni David, ang daan nga bahin sang Jerusalem, kag ang iya anak nga lalaki nga si Joatam nagbulos sa iya subong hari.
Si Haring Zacarias sang Israel
8 Sa ika-38 nga tuig sang paggahom ni Haring Uzias sang Juda, si Zacarias nga anak ni Jeroboam II nanginhari sa Israel, kag naggahom sia sa Samaria sa sulod sang anom ka bulan.
9 Kaangay sang mga hari nga una sa iya, nagpakasala sia batok sa Ginoo. Ginsunod niya ang malaut nga ginhimo ni Haring Jeroboam nga anak ni Nebat, nga nagdala sa Israel sa pagpakasala.
10 Si Sallum nga anak nga lalaki ni Jabes naghimbon batok kay Haring Zacarias, ginpatay niya sia sa Ibleam,r kag nagbulos sa iya subong hari.
11 Ang tanan nga mga ginhimo ni Zacarias nasulat sa Maragtas sang mga Hari sang Israel.
12 Gani natuman ang saad nga ginhimo sang Ginoo sa kay Haring Jehu nga nagasiling, "Ang imo mga kaliwat tubtob sa ikap-at nga kaliwatan,s magahari sa Israel."
Si Haring Sallum sang Israel
13 Sa ika-39 nga tuig sang paggahom ni Haring Uzias sang Juda, si Sallum nga anak nga lalaki ni Jabes nanginhari sang Israel, kag naggahom sia sa Samaria sa sulod sang isa ka bulan.
14 Si Menahem nga anak nga lalaki ni Gadi naghalin sa Tirsa pakadto sa Samaria, ginpatay niya si Sallum kag ginbuslan subong hari.
15 Ang tanan nga mga ginhimo ni Sallum, lakip ang iya paghimbon, nasulat sa Maragtas sang mga Hari sang Israel.
16 Samtang nagalakat si Menahem halin sa Tirsa, ginlaglag niya sing bug-os ang siyudad sang Tappua,t ang iya mga pumoluyo, kag ang mga kadutaan palibot, tungod kay ang siyudad indi magyaub sa iya. Iya gani ginririan ang tiyan sang tanan nga mga babayi nga nagabusong.
Si Haring Menahem sang Israel
17 Sa ika-39 nga tuig sang paggahom ni Haring Uzias sang Juda, si Menahem nga anak nga lalaki ni Gadi nanginhari sang Israel, kag naggahom sia sa Samaria sa sulod sang napulo ka tuig.
18 Nagpakasala sia batok sa Ginoo, nagsunod sia sa mga malaut nga ginhimo ni Haring Jeroboam nga anak nga lalaki ni Nebat, nga nagdala sa Israel sa pagpakasala tubtob nga napatay sia.
19 Si Tiglat Piliser, nga emperador sang Asiria naggubat sang Israel kag si Menahem naghatag sa iya sing 38 ka tonelada nga pilak agod si Tiglat Piliser magbulig palig-on sang iya gahom sa bug-os nga pungsod.
20 Si Menahem nagkuha sini nga mga pilak sa manggaranon nga mga tawo sang Israel paagi sa pagpilit sa tagsatagsa sa ila sa pag-amot sing 50 ka bilog nga pilak. Gani si Tiglat Piliser nagbalik sa iya kaugalingon nga pungsod.
21 Ang tanan nga mga ginhimo ni Menahem nasulat sa Maragtas sang mga Hari sang Israel.
22 Napatay sia kag ginlubong, kag ang iya anak nga lalaki nga si Pecaya nagbulos sa iya subong hari.
Si Haring Pecaya sang Israel
23 Sa ika-50 nga tuig sang paggahom ni Haring Uzias sang Juda, si Pecaya nga anak nga lalaki ni Menahem nanginhari sang Israel kag naggahom sia sa Samaria sa sulod sang duha ka tuig.
24 Nagpakasala sia batok sa Ginoo, nagsunod sa malaut nga ginhimo ni Haring Jeroboam nga anak ni Nebat, nga nagdala sa Israel sa pagpakasala.
25 Ang isa ka opisyal sang hangaway ni Pecaya, si Peca nga anak nga lalaki ni Remalias, naghimbon upod sang 50 ka mga lalaki halin sa Galaad, ginpatay nila si Pecaya sa nasulod nga pamakod sang palasyo sa Samaria, kag nagbulos sa iya subong hari.
26 Ang tanan nga mga ginhimo ni Pecaya nasulat sa Maragtas sang mga Hari sang Israel.
Si Haring Peca sang Israel
27 Sa ika-52 nga tuig sang paggahom ni Haring Uzias sang Juda, si Peca nga anak nga lalaki ni Remalias nanginhari sang Israel, kag naggahom sia sa Samaria sa sulod sang 20 ka tuig.
28 Nagpakasala sia batok sa Ginoo, nagsunod sa malaut nga ginhimo ni Haring Jeroboam nga anak nga lalaki ni Nebat, nga nagdala sa Israel sa pagpakasala.
29 Sa panahon nga si Peca amo ang hari, si Tiglat Piliser, ang emperador sang Asiria nag-agaw sang mga siyudad sang Ijon, Abel Bet Maaca, Janoa, Cades, kag Hazor, kag ang mga kadutaan sang Galaad, Galilea, kag Neftali, kag gindala ang mga tawo sa Asiria subong mga bihag.
30 Sa ika-20 nga tuig sang paggahom ni Joatam nga anak nga lalaki ni Uzias subong hari sang Juda, si Oseas nga anak nga lalaki ni Ela naghimbon batok kay Haring Peca, ginpatay kag ginbuslan sia subong hari. Ang tanan nga mga ginhimo ni Peca nasulat sa Maragtas sang mga Hari sang Israel.
Si Haring Joatam sang Juda
(2 Cron. 27:1-9)
32 Sa ikaduha nga tuig sang paggahom ni Peca nga anak nga lalaki ni Remalias subong hari sang Israel, si Joatam nga anak ni Uzias nanginhari sang Juda.
33 Nagaedad sia sing 25 ka tuig kag naggahom sia sa Jerusalem sa sulod sang 16 ka tuig. Ang iya iloy amo si Jerusa, nga anak ni Zadok.
34 Si Joatam naghimo sing matarong sa atubangan sang Ginoo, nagsunod sia sa ginhimo sang iya amay nga si Uzias.
35 Pero ang mga duog sa diin ginasimba ang mga diosdios wala niya paglaglaga, kag ang mga tawo nagpadayon sa pagdulot sing mga halad kag nagsunog sing insyenso sa sini nga mga duog. Si Joatam amo ang nagpatindog sang Naaminhan nga Puwerta sang Templo.
36 Ang tanan nga mga ginhimo ni Joatam nasulat sa Maragtas sang mga Hari sang Juda.
37 Sa panahon sang iya paghari ang Ginoo nagpadala sing una kay Haring Resin sang Siria kag Haring Peca sang Israel sa pagsalakay sang Juda.
38 Si Joatam napatay kag ginlubong sa mga lulobngan sang hari sa Siyudad ni David, ang daan nga bahin sang Jerusalem, kag ang iya anak nga lalaki nga si Acaz nagbulos sa iya subong hari.
rAng isa ka dumaan nga pagbadbad sa Ibleam; sa Hebreo sa atubangan sang mga tawo.
sIKAP-AT NGA KALIWATAN: Si Zacarias apo sa tuhod ni Jehu.
tAng isa ka dumaan nga pagbadbad Tappua: sa Hebreo Tipsa.
No comments:
Post a Comment