□□□□□
Si Salomon Nagpatindog sang Templo
1 Sa tapos ang 480 ka tuig nga ang mga Israelinhon nakahalin sa Egipto, sa ikap-at nga tuig sang paggahom ni Salomon sa Israel, sa ikaduha nga bulan nga amo ang bulan sang Zif, si Salomon nagsugod sa pagpatindog sang Templo.2 Ang sulod sini, 90 ka tapak ang kalabaon, 30 ka tapak ang kasangkaron, kag 45 ka tapak ang kataason.
3 Ang alagyan nga kuwarto 15 ka tapak ang kalabaon kag 30 ka tapak ang kasangkaron, pareho kasangkad sang santuaryo.
4 Ang mga pader sang Templo may mga bintana nga magamay sa gwa sang sa sulod.
5 Sa mga kilid kag sa likod sang Templo may gindugang nga mga balay nga nagatapik sa pader nga tatlo ka andana ang kataason, kag ang tagsa ka andana 7 ½ ka tapak ang kataason.
6 Ang tagsa ka kuwarto sa pinakamanubo nga panalgan 7 ½ ka tapak ang kasangkaron, sa natunga nga panalgan 9 ka tapak ang kasangkaron, kag ang naibabaw nga panalgan 10 ½ ka tapak ang kasangkaron. Ang dingding sang Templo nagaamat-amat nipis sa tagsa ka panalgan, agod ang mga kuwarto makatungtong sa dingding kag indi na kinahanglan nga butangan pa ini sing mga sintas.
7 Ang mga bato nga gingamit sa Templo ginahanda na nga daan sa ginkuhaan sini, gani wala na sing ginahod sang mga martilyo, mga wasay, ukon bisan ano nga gamit nga salsalon sang pagpatindog sang Templo.
8 Ang alagyan pasulod sa naidalomh nga panalgan sa gindugang nga balay, yara sa bagatnan nga kilid sang Templo, nga may mga hagdan pakadto sa ikaduha kag ikatlo nga mga panalgan.
9 Natapos ni Salomon ang pagpatindog sang Templo. Ginbutangan niya ini sing kisame nga tapi nga sedro.
10 Ang tatlo ka andana nga gindugang nga balay, nga ang tagsa ka andana 7 ½ ka tapak ang kataason, natapik sa nagwa nga dingding sang Templo, kag ginaangot ini sa dingding sang mga balayan nga sedro.
11 Ang Ginoo nagsiling kay Salomon,
12 "Kon tumanon mo ang tanan ko nga mga kasugoan kag mga sugo, himuon ko sa imo ang ginsaad ko sa imo amay nga si David.
13 Magapuyo ako upod sa akon mga tawo nga Israelinhon sa sini nga Templo nga imo ginapatindog, kag indi ko gid sila pagpatumbayaan."
14 Gani natapos ni Salomon ang pagpatindog sang Templo.
Ang mga Gamit sa Sulod sang Templo
15 Ang nasulod nga dingding natabunan sing mga sedro nga tapi halin sa salog tubtob sa kisame, kag ang salog nahimo sa pino.16 Ang nasulod nga santuaryo nga ginatawag ang Labing Balaan nga Duog ginhimo sa likod nayon sang Templo. Ang kalabaon sini 30 ka tapak, kag ginhulot ini sang mga tapi nga sedro halin sa salog tubtob sa kisame.i
17 Ang daku nga santuaryo 60 ka tapak ang kalabaon.
18 Ang sedro nga mga tapi napunihan sang mga gintigib nga mga balagon kag mga bulak; ang bug-os nga sulod ginbutangan sang sedro, agod ang mga bato sang mga dingding indi makita.
19 Sa likod nayon sang Templo may ginhimo nga nasulod nga santuaryo, nga butangan sang Kaban sang Kasugtanan sang Ginoo.
20 Ining nasulod nga santuaryo 30 ka tapak ang kalabaon, 30 ka tapak ang kasangkaron, kag 30 ka tapak ang kataason, kag nahaklapan ini tanan sang puraw nga bulawan. Ang altar nahaklapan sang tapi nga sedro.
21 Ang Templo nahaklapan sang bulawan sa sulod, kag ang bulawan nga kadena nahigot pabalabag sa alagyan pakadto sa nasulod nga santuaryo, nga nahaklapan man sing bulawan.
22 Ang bug-os nga nasulod sang Templo nahaklapan sang bulawan, kag subong man ang altar sa nasulod nga santuaryo.
23 May duha ka sapat nga may mga pakpak nga ginhimo sa kahoy nga olivo kag ginbutang sa nasulod nga santuaryo, ang tagsa ka sapat may kataason nga 15 ka tapak.
24-26 Sila nga duha pareho ka daku kag pareho man ang korte. Ang tagsa sa ila may duha ka pakpak kag ang tagsa ka pakpak may kalabaon nga 7 ½ ka tapak, gani ang kalabaon halin sa punta sang isa ka pakpak tubtob sa isa ka punta 15 ka tapak.
27 Ginbutang ini sa duha ka kilid sang nasulod nga santuaryo, gani ang ila nahumlad nga mga pakpak nagaduotay sa tunga sang kuwarto, kag ang duha pa gid ka pakpak nagaduot sa mga dingding.
28 Ang duha ka sapat nga may pakpak nahaklapan sang bulawan.
29 Ang mga dingding sang daku nga santuaryo kag sang nasulod nga santuaryo napunihan tanan sang gintigib nga mga larawan sang mga sapat nga may mga pakpak, sang mga palma, kag mga bulak.
30 Bisan ang salog nahaklapan sang bulawan.
31 Ang sira pasulod sa nasulod nga santuaryo may duha ka dahon nga nahimo sa kahoy nga olivo. Ang ibabaw sang puwertahan mataliwis nga arko.
32 Ang mga puwertahan napunihan sang larawan sang natigib nga mga sapat nga may mga pakpak, mga palma, kag mga bulak. Ang mga puwertahan, ang mga sapat nga may mga pakpak, kag ang mga palma nahaklapan sang bulawan.
33 Ang isa ka eskwalado nga hamba nga ginhimo sa kahoy nga olivo ginbutang sa puwertahan pakadto sa daku nga santuaryo.
34 May duha ka panid ang sira nga nahimo sa pino,
35 kag napunihan sang larawan sang natigib nga mga sapat nga may mga pakpak, mga palma, mga bulak, nga nahaklapan sing maayo sang bulawan.
36 Ang isa ka nasulod nga pasiyuhan ginhimo sa atubangan sang Templo. Nalibutan ini sang mga pader nga may isa ka sampaw nga tablon nga sedro sa tagsa ka tatlo ka sampaw nga bato.
37 Ang sadsaran sang Templo ginpasad sang ikaduha nga bulan, ang bulan sang Zif, sa ikap-at nga tuig sang paghari ni Salomon.
38 Sa ikawalo nga bulan, ang bulan sang Bul, sa ika-11 nga tuig sang paggahom ni Salomon, ang Templo natapos sing bug-os, suno gid sa plano. Pito ka tuig ang kalawigon sang pagpatindog sini ni Salomon.
hAng iban nga dumaan nga pagbadbad naidalom; sa Hebreo sa tunga.
iAng isa ka dumaan nga pagbadbad kisame; sa Hebreo mga dingding.
No comments:
Post a Comment