"Magtindog kamo, ang inyo Kaluwasan Malapit na"

Liturhiya sang Pulong

(Domingo, Disyembre 2, 2018)

Una nga Domingo sang Adbyento

1. Ang Pagbasa gikan sa Libro ni:

Jeremias nga Propeta 33:14-16 

Ang Ginoo nagsiling, "Magaabot ang tion nga tumanon ko ang saad nga akon ginhimo sa mga tawo sang Israel kag Juda. Sa sadto nga tion, pilion ko subong hari ang isa ka kaliwat ni David nga manginkaangay niya. Ini nga hari magahimo sing matarong kag nagakaigo sa bug-os nga duta. Ang mga tawo sang Juda kag sang Jerusalem pagaluwason kag magakabuhi nga wala sing katalagman. Ang siyudad pagatawgon: 'Ang GINOO matarong.' 

Salmo sa Pagsabat:

Mga Salmo 25:4-5, 8-9, 10, 14

(S) Sa imo, O Ginoo nagapangamuyo ako.

Tudloi ako sang imo mga dalanon, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa tanan nga tion nagasalig ako sa imo. (S)
Tungod kay ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matarong nga dalan, kay iya sila ginatudloan sang iya kabubot-on. (S)
Sa gugma kag katutom iya ginatuytoyan ang tanan nga nagatuman sang iya kasugtanan kag sang iya mga sugo. (S)
Ang Ginoo abyan sang tanan nga nagatuman sa iya, kag ginapalig-on niya sa ila ang iya kasugtanan. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 3:12—4:2

Kabay nga ang Ginoo magpatubo sang inyo gugma sa isa kag isa kag sa tanan nga mga tawo, kag mangindaku ini subong sang amon paghigugma sa inyo. Sa sini nga paagi mapalig-on niya ang inyo mga tagipusoon, kag manginhimpit kamo kag manginbalaan sa atubangan sang aton Dios nga Amay, kon mag-abot ang aton Ginoong Jesus kaupod sang iya kaugalingon nga mga tawo. Sa katapusan, mga kautoran, nakatuon kamo sa amon kon ano ang nagakabagay nga pagkabuhi agod mapahamuot ninyo ang Dios. Kon sa bagay amo man ini ang inyo pagkabuhi halin sang una. Kag karon nagapangabay kami kag nagalaygay sa inyo sa ngalan ni Ginoong Jesus, nga mag-uswag kamo sing labi pa. Kay nahibal-an ninyo ang mga sugo nga ginhatag namon sa inyo, paagi sa gahom sang aton Ginoong Jesus. 

Aleluya:

Mga Salmo 85:8

Ipakita sa amon ang imo kaluoy, O Ginoo, ihatag sa amon ang imo kaluwasan.

Ang Pagbasa sang Santos nga Ebanghelyo suno kay:

San Lucas 21:25-28, 34-36

“Sa sadto nga tion may mga tanda nga makita sa adlaw, sa bulan kag sa mga bituon. Ang tanan nga mga pungsod sa duta magakurog sa kahadlok sang dinaguhob sang mga balod sa dagat. Ang mga tawo magakalipong sa kahadlok samtang nagahulat sila sang magaabot sa bug-os nga duta. Kay ang mga gahom sa kahawaan pagapatalangon sa ila kinaandan nga alagyan. Dayon ang Anak sang Tawo magapakita, nga nagakari sa mga panganod, nga may daku nga gahom kag himaya. Kon ini nga mga butang mahanabo, magtindog kamo kag magbayaw sang inyo mga ulo, kay ang inyo kaluwasan malapit na.” “Magbantay kamo! Indi kamo magpatuyang, magpahuboghubog kag magpalibog sa sining kabuhi, basi yadtong Adlaw mag-abot sa inyo sing hinali. Kay yadto nga Adlaw magaabot subong sang isa ka siod sa tanan nga mga tawo sa bug-os nga duta. Magbantay kag magpangamuyo kamo pirme agod nga may kusog kamo kag indi maano kon ini nga mga butang mahanabo, kag makatindog kamo sa atubangan sang Anak sang Tawo.” 

Disyembre 1 | Disyembre 3