"Madamo ang Magakalipay sa Iya Pagkatawo"

Liturhiya sang Pulong

(Miyerkoles, Disyembre 19, 2018)

Misa de Aguinaldo

Ang Pagbasa gikan sa Libro sang:

Mga Hukom 13:2-7, 24-25

May isa ka tawo nga ginhingalanan kay Manoa, nga taga-Sora, kag isa sia ka katapo sang tribo ni Dan. Ang iya asawa wala gid makapamata. Nagpakita ang anghel sang Ginoo sa iya kag nagsiling, "Wala gid ikaw makapamata, pero sa indi madugay magabusong ikaw kag magaanak sing isa ka bata nga lalaki. Tandaan mo nga indi ka gid mag-inom sing bino ukon makahulobog nga ilimnon, ukon magkaon sang ginadilian nga mga pagkaon, kay karon magabusong ka kag magaangkon sang isa ka anak nga Ialaki. Indi mo sia pagguntingan sang iya buhok, kay sa adlaw sang iya pagkatawo, pagaihalad sia sa Dios subong isa ka Nazareo. Sia ang magasugod sa pagluwas sa Israel gikan sa mga Filistinhon." Nian nagkadto ang babayi sa iya bana kag ginsugiran sia, "Nagkadto sa akon ang isa ka tawo sang Dios, nga ang iya dagway makakulogmat pareho sang anghel sang Dios. Wala ako magpamangkot sa iya kon diin sia maghalin, kag wala man sia magsugid sa akon sang iya ngalan. Pero nagsiling sia nga magabusong ako kag makaangkon sing anak nga lalaki. Ginsingganan niya ako nga indi mag-inom sing bino ukon makahulobog nga ilimnon, ukon magkaon sang ginadilian nga mga pagkaon, kay ang bata pagaihalad sa Dios subong isa ka Nazareo halin sa iya pagkatawo tubtob mapatay sia." Ang babayi nag-anak sang isa ka bata nga lalaki, kag ginhingalanan niya sia kay Samson. Nagdaku ang bata kag ginbendisyunan sia sang Ginoo. Kag ang espiritu sang Ginoo nagsugod sa pagpanghikot sa iya, samtang didto sia sa kampamento sang Dan, sa gin-utlan sang Sora kag Estaol.

Salmo sa Pagsabat:

Mga Salmo 71:3-4, 5-6, 16-17

(S) Pun-a ang akon bibig sang imo pagdayaw agod mag-amba sang imo himaya.

Ikaw mangindalangpan ko nga mapag-on, kag malig-on nga pamakod sa pag-apin sa akon, ikaw akon dalangpan kag mangangapin, O Dios ko, luwasa ako sa malaut nga mga tawo, gikan sa gahom sang mapintas kag malain nga mga tawo. (S)
Ang akon paglaum, O Ginoo, yara sa imo, nagasalig ako sa imo halin sang pamatan-on pa ako. Nagsalig ako sa imo sa bug-os ko nga kabuhi, gin-apinan mo ako halin pa sang akon pagkatawo. Magadayaw ako sa imo sa gihapon! (S)
Dayawon ko ang imo gahom, O Ginoong Dios, ibantala ko ang imo lamang pagkamatarong. Gintudloan mo ako halin sang pamatan-on pa ako, kag tubtob karon ginasugid ko ang imo makatilingala nga mga binuhatan. (S)

Aleluya:
O gamot ni Jese nga mangin tanda sa tunga sang mga katawohan, kari ka sing may pagdali sa pagluwas sa amon.

Ang Pagbasa sang Santos nga Ebanghelyo suno kay:

San Lucas 1:5-25

Sang si Herodes amo ang hari sa Judea, may isa ka pari nga ginhingalanan kay Zacarias sa linya sang pagkapari ni Abias. Ang iya asawa si Elisabet nga kaliwat man sang panimalay sang mga pari. Nagkabuhi sila sing matarong sa atubangan sang Dios, kag nagtuman sang tanan nga mga kasugoan kag mga pagsulondan sang Ginoo. Wala sila sing bata kay si Elisabet baw-as kag tigulang na sila. Isa ka adlaw, turno na ni Zacarias ang pag-alagad subong pari sa atubangan sang Dios sa bahin sang iya grupo. Suno sa kinabatasan sang mga pari, nahanabo nga natuon sa iya ang pagsunog sang insyenso sa altar. Gani nagsulod sia sa templo sang Ginoo, samtang ang madamo nga mga tawo nagapangamuyo sa gwa sa tion nga ginasunog ang insyenso. Dayon may nagpakita sa iya nga isa ka anghel sang Ginoo nga nagatindog sa tuo nayon sang altar sa diin ginasunog ang insyenso. Sang pagkakita ni Zacarias sa anghel natublag sia kag hinadlukan gid. Pero ang anghel nagsiling sa iya, “Zacarias, indi ka magkahadlok! Ginpamatian sang Dios ang imo pangamuyo kag si Elisabet nga imo asawa magaanak sing isa ka bata nga lalaki. Pagahingalanan mo sia kay Juan. Magamalipayon kag masinadyahon ka tungod sa iya, kag madamo ang magakalipay sa iya pagkatawo! Kay mangindaku sia sa atubangan sang Ginoo. Indi sia mag-inom sing bino ukon ilimnon nga makahulobog. Mapun-an sia sang Espiritu Santo halin sa iya pagkatawo. Pabalikon niya ang madamo nga mga tawo sang Israel sa Ginoo nga ila Dios. Magauna sia sa iya nga may kusog kag gahom kaangay kay Elias nga propeta. Pabalikon niya ang maayo nga kaangtanan sang mga ginikanan kag mga kaanakan. Palisuon niya ang mga di-masinulondon sa panghunahona sang mga matarong. Amanon niya ang mga tawo para sa Ginoo.” Si Zacarias nagsiling sa anghel, “Ano ang pagkahibalo ko kon matuod ini? Tigulang na ako kag subong man ang akon asawa.” Ang anghel nagsabat sa iya, “Ako si Gabriel nga nagatindog sa atubangan sang Dios. Ginpadala niya ako sa paghambal kag sa pagsugid sa imo sining maayong balita. Pero tungod kay wala ka magpati sang akon ginsugid sa imo nga matuman sa nagakaigo nga tion, magaapa ka tubtob sa adlaw nga matuman ining ginsiling ko.” Sa pihak nga bahin, ang mga tawo naghinulat kay Zacarias. Natingala sila nga nadugayan sia sa sulod sang templo. Sang paggwa niya indi na sia makahambal. Gani nahangpan nila nga nakakita sia sing palanan-awon sa templo. Nagsinyas na lang sia sa ila kay indi na sia makahambal. Sang matapos niya ang iya turno sa pag-alagad sa templo nagpauli sia. Sang ulihi ang iya asawa nga si Elisabet nagbusong kag wala sia magguwagowa sa ila balay sa sulod sang lima ka bulan. Nagsiling sia, “Sa sining paagi ginbuligan gid man ako sang Ginoo kag ginkuha niya ang akon kahuloy-an sa atubangan sang mga tawo.”

Disyembre 18 | Disyembre 20