Si Eliseo Nagbulig sa Isa ka Imol nga Balo
1 Ang isa ka balo nga babayi nga katapo sang grupo sang mga propeta nagkadto kay Eliseo kag nagsiling, “Sir, ang akon bana napatay! Ikaw nakahibalo nga sia isa ka tawo nga nagatahod sa GINOO, pero karon nag-abot ang tawo nga iya nautangan kag ginkuha niya ang akon duha ka anak nga lalaki agod mangin-ulipon sa pagbayad sang utang sang akon bana.”
2 Nagpamangkot sia, "Ano bala ang akon mabulig sa imo? Sugiri ako, ano bala ang yara sa sa imo balay?" Ang balo nagsabat,"Wala gid bisan ano, luaslamang sa isa ka tibod nga lana sang olivo.”
3 Si Eliseo nagsiling sa iya, "Kadto ka sa imo mga kaingod kag magpanghulam sang madamo nga mga sulodlan nga sarang mo mahulam.
4 Dayon ikaw kag ang imo mga anak nga lalaki magsulod sa balay, siraduhi ang puwertahan kag sudli sing lana ang mga sulodlan. Ang mapuno nga sulodlan imo painon."
5 Gani ang balo sa iya balay upon sa iya mga anak nga lalaki, ginsiraduhan ang puwertahan, kag nagsugod sa pagsulod sang lana sa mga sulodlan samtang ginadala ini sang iya mga anak sa iya.
6 Sang mapuno nila ang tanan nga mga sulodlan, nagpamangkot sia kon may yara pa nga nabilin. Ang isa sang iya anak nagsabat, “Amo na lang ina ang katapusan.” Kag nag-untat ang pag-ilig sang lana.
7 Nagkadto sia liwat kay Eliseo nga propeta kag si Eliseo nagsiling sa iya, "Ibaligya ang lana kag bayari ang tanan mo nga utang, kag may mabilin pa ikaw nga kuwarta nga imo mapangabuhian upod sa imo mga anak nga lalaki."
Si Eliseo kag ang Manggaranon nga Babayi nga Taga-Sunem
8 Isa ka adlaw, si Eliseo nagkadto sa Sunem, sa diin nagapuyo ang manggaranon nga babayi. Gin-agda niya si Eliseo sa pagkaon upod sa iya,
9 kag halin sadto sa tagsa ka tion nga magkadto didto si Eliseo nagakaon sia sa balay sadto nga babayi. Nagsiling sia sa iya bana, "Nahibal-an ko nga ining tawo nga nagahapit diri pirme sa aton isa ka balaan nga tawo sang Dios.
10 Himuan naton sia sing isa ka kuwarto sa may atop, butangan naton sia sing higdaan, lamisa, pulongkoan kag suga, kag didto naton sia pahigdaon kon mag-abot sia diri."
11 Sang ulihi, nag-abot si Eliseo sa Sunem kag nagsaka sia sa iya kuwarto sa pagpahuway.
12 Ginsingganan niya si Giezi nga iya alagad sa pagtawag sang babayi. Sang pag-abot sang babayi kay Eliseo,
13 ginsingganan ni Eliseo si Giezi, “Pamangkuta sia kon ano ang luyag niya himuon ko sa iya tungod sang iya maayo nga pagtatap sa aton. Ayhan luyag niya nga makadto ako sa hari ukon sa pangulo sang mga hangaway sa pagsiling nga maayo sia nga babayi.” Nagsabat ang babayi, "Kuntento na ako sang akon kahimtangan upod sa akon mga tawo.”
14 Nagpamangkot si Eliseo kay Giezi, "Ano karon ang akon himuon sa iya." Nagsabat si Giezi, "Wala sia sing anak nga lalaki kag ang iya bana tigulang na."
15 Nagsugo si Eliseo, "Singgana sia nga magpalapit diri." Nag-abot ang babayi kag nagtindog sa puwertahan,
16 kag si Eliseo nagsiling sa iya, "Sa sini nga panahon sa madason nga tuig magakugos na ikaw sang isa ka bata nga lalaki.” Sa kakunyag nagsiling sia, “Sir, indi ka magbutig sa akon. Ikaw isa ka alagad sang Dios!"
17 Pero, suno sa ginsiling ni Eliseo, sa amo nga tion sa madason nga tuig nagbata sia sing lalaki.
18 Isa ka adlaw, sang daku na ang bata, nagkadto sia sa iya amay nga yadto sa uma sa tion sang tig-alani upod sa mga mangangani.
19 Sa hinali nagsinggit ang bata sa iya amay, "Ang ulo ko masakit! Ang ulo ko tama ka sakit!" Ang amay nagsiling sa iya suloguon, "Dalha ang bata sa iya iloy.”
20 Ginhakwat sang suloguon kag gindala ang bata pabalik sa iya iloy. Ginsabak sia sang iya iloy tubtob mag-udto, kag napatay sia.
21 Gindala niya ang bata sa kuwarto ni Eliseo, ginpahamyang niya sa higdaan ginsirahan niya ang puwertahan kag naggwa;
22 dayon gintawag niya ang iya bana kag ginsingganan, "Padalhi ako sang isa ka suloguon kag isa ka asno. Kinahanglan makadto ako kay Eliseo nga propeta. Mabalik man ako gilayon."
23 Nagpamangkot ang iya bana, “Ngaa makadto gid Ikaw karon nga adlaw, indi man ini Adlaw nga Inugpahuway ukon Piesta sang Lati?"e Nagsabat sia, "Sigi lang."
24 Dayon ginbutangan niya sing hampilo ang asno kag nagsugo sa suloguon, "Padasiga ang asno, kag indi pagpahinaya kon indi ako magsiling sa imo."
25 Gani naglakat sia, kag nagkadto sa bukid sang Carmelo sa diin si Eliseo. Nakita sia ni Eliseo nga nagapakari samtang malayo pa sia, kag ginsingganan niya ang iya suloguon nga si Giezi, "Tan-awa, nagapakari ang babayi nga taga-Sunem!
26 Dalagan kag sugataa sia kag pamangkuta kon kumusta sia, ang iya bana, kag ang iya anak nga lalaki.” Ginsugiran sang babayi si Giezi nga ang tanan maayo man,
27 pero sang pag-abot niya kay Eliseo nagluhod sia sa iya atubangan kag nagkapyot sa tiil ni Eliseo. Itiklod sia kuntani ni Giezi, pero nagsiling si Eliseo, "Pabay-i lang sia. Wala mo bala makita nga daku gid ang iya kalisod? Kag ang Ginoo wala magsiling sa akon nahanungod sini nga butang.”
28 Ang babayi nagsiling kay Eliseo. “Sir, nagpangayo bala ako sa imo sing isa ka anak nga lalaki? Wala bala ako nagsiling sa imo nga indi mo ako paglimbongan?"
29 Si Eliseo nagliso kay Giezi kag nagsiling, "Dalidali ka! Dalha ang akon baston kag maglakat. Indi ka na magbugno sa imo masugata, kag kon may magbugno sa imo indi ka magsabat. Sulod ka dayon sa balay kag uyati ang sungkod ko sa ibabaw sang bata."
30 Ang babayi nagsiling kay Eliseo, "Nagasumpa ako sa akon pag-unong sa buhi nga Dios kag sa imo nga indi ako magbiya sa imo!" Gani nagbalik sila nga duha.
31 Si Giezi nag-una kag nag-uyat sang sungkod sa ibabaw sang bata, pero wala gid nagatingog ukon nagaginhawa ang bata. Gani nagbalik si Giezi sa pagsugata kay Eliseo kag nagsiling, "Ang bata wala gid magmata."
32 Sang pag-abot ni Eliseo, nagsulod sia nga isa lang sa kuwarto kag nakita niya ang bata nga patay nga nagahamyang sa higdaan.
33 Ginsirahan niya angpuwertahan, kag nagpangamuyo sa GINOO.
34 Dayon ginhap-an niya ang bata, ginbutang ang iya baba sa baba sang bata, ang iya mga mata sa mga mata sang bata, kag ang iya mga kamot sa mga kamot sang bata. Samtang nagahapa sia sa bata, ang lawas sang bata nag-amat init.
35 Nagbangon si Eliseo, naglakat pakadto pakari sa kuwarto, kag dayon nagbalik sia kag naghapa liwat sa bata. Ang bata nagpangatsi sing makapito, kag dayon nagmuklat ang iya mga mata.
36 Gintawag ni Eliseo si Giezi kag ginsingganan nga tawgon ang iloy sang bata. Sang pag-abot sang iloy, si Eliseo nagsiling sa iya, "Yari ang imo anak.”
37 Nagsaludo sia sa atubangan ni Eliseo nga ang iya guya nagaduot sa duta; dayon ginkuha niya ang iya bata kag naglakat.
Ang Duha pa gid ka Milagro
38 Sang tiggulotom sa bug-os nga duta,si Eliseo nagbalik sa Gilgal. Samtang nagatudlo sia sa grupo sang mga propeta, ginsingganan niya ang iya suloguon sa pagsun-ad sing daku nga kolon kag magluto sang linaga para sa ila.
39 Ang isa sa ila nagkadto sa uma sa pagpangutan. Nakakita sia sing atimon nga talunon, kag nagpang-ipo sia sang mga bunga nga masarangan niya sa pagdala. Gindala niya ini pauli, ginkihad, kag ginbutang sa linaga nga wala niya mahibal-i kon ano ini.
40 Ang linaga ginhuwad kag ginpakaon sa mga tawo, pero sang matilawan nila ini nagsiling sila kay Eliseo, “Makahililo ini!"—kag indi sila magkaon.
41 Si Eliseo nagpangayo sing harina, ginbutang ini sa kolon kag nagsiling, “Magkuha kamo sing linaga para sa mga tawo." Kag karon indi na ini makahililo.
42 Isa sadto ka tion, may isa ka tawo halin sa Baal Salisa, nga may dala kay Eliseo nga 20 ka bilog nga tinapay nga nahimo sa nahauna nga patubas sang sebada sina nga tuig, kag bag-o lang maani nga trigo. Ginsingganan ni Eliseo ang iya suloguon nga pakan-on sini ang grupo sang mga propeta,
43 pero ang suloguon nagsabat, “Nagahunahona ka bala nga makaigo ini sa 100 ka mga tawo?” Nagsabat si Eliseo, “Ihatag sa ila agod kaunon, kag ang Ginoo nagsiling nga magakaon sila kag may mabilin pa gid.”
44 Gani ginbutang sang suloguon ang kalan-on sa ila, kagsuno sa ginsiling sang Ginoo nagkaon sila tanan kagmay nabilin pa.
eADLAW NGA INUGPAHUWAY UKON PIESTA SANG LATI: Ining balaan nga mga adlaw ginahunahona nga labing maayo nga tion sa pagpamangkot sa propeta.
No comments:
Post a Comment