Si Haring Joas sang Juda
(2 Cron. 24:1-16)
1 Sa ikapito nga tuig sang paggahom ni Haring Jehu sang Israel, si Joas nanginhari sang Juda, naggahom sia sa Jerusalem sing 40 ka tuig. Ang iya iloy amo si Sibia nga nagikan sa siyudad sang Beerseba.
2 Sa bug-os niya nga kabuhi naghimo sia sing matarong sa atubangan sang Ginoo, kay si Joiada ang pari nagtudlo sa iya.
3 Wala sapayan sini, ang mga altar sa diin ginasimba ang mga diosdios wala malaglag, kag ang mga tawo nagapadayon sa pagdulot sing mga halad kag pagsunog sing insyenso sa sini nga mga altar.
4 Si Joas nagpatawag sang mga pari kag ginsugo sila sa pagtipon sang kuwarta nga ginbayad sa kaangtanan sang mga halad sa Templo: ang kuwarta nga ginabayad sang mga tawo subong buhis, kag ang kuwarta nga ginahatag subong kinabubot-on nga mga dulot.
5 Ang tagsa ka pari magakuha sang kuwarta nga ginadala sa ila sang mga tawo nga ila ginaalagaran, kag ang kuwarta gamiton sa pagkaayo sang Templo, suno sa kinahanglanon.
6 Pero nakalambot na sa ika-23 ka tuig ang paghari ni Joas kag ang mga pari wala pa makapakaayo sang Templo.
7 Gani ginpatawag niya si Joiada kag ang iban nga mga pari kag ginpamangkot sila, “Ngaa bala nga wala ninyo ginapakaayo ang Templo? Sugod karon indi na ninyo pagtagoon ang kuwarta nga inyo nabaton; kinahanglan ihatag na ninyo ini agod masugoran ang pagpakaayo.”
8 Ang mga pari nagsugot sini, kag nagsugot man sa pagkaayo sang Templo.
9 Dayon si Joiada nagkuha sing isa ka kaban kag ginbuboan ini sa takop, kag ginbutang ini sa altar sa tuo nga kilid kon magsulod ka sa Templo. Ang mga pari nga nagaalagad sa puwerta nagbutang sa kaban sang tanan nga kuwarta nga ginhatag sang mga sumilimba.
10 Kon madamo na gani ang kuwarta sa kaban, ang sekretaryo sang hari kag ang Pinakamataas nga Pari nagaabot kag ginaisip ang kuwarta kag ginasulod sa sako kag ginahigtan.
11 Sa tapos maisip ang kuwarta, ginahatag nila ini sa mga tawo nga ginatugyanan sang obra sa Templo, kag ginabayaran nila ang mga panday, ang mga nagapatindog sang Templo,
12 ang mga kantero, ang mga nagatihab kag nagabasbas sang bato, kag nagapamakal sang mga tablon kag sang mga bato nga ginagamit sa pagkaayo, kag sa pagbayad sang tanan nga mga kagastuhanan nga may kaangtanan sini.
13 Pero wala sing kuwarta nga ginagamit sa pagbayad para sa paghimo sing mga kupa nga pilak, mga batiya, mga trumpeta, ukon mga gamit para sa mga suga, ukon sang bisan ano nga sulodlan nga pilak ukon bulawan.
14 Ginagamit ini tanan sa pagsuweldo sa mga nag-ulobra kag sa pagbakal sang mga galamiton nga ginagamit sa pagkaayo.
15 Ang mga tawo nga gintugyanan sang obra masaligan, gani, wala na sing kinahanglan ang paghusay sang kuwarta.
16 Ang kuwarta nga ginahatag tungod sa mga halad nga bayad kag mga halad tungod sa sala, wala ginabutang sa kaban, kay iya ini sang mga pari.
17 Sa sadto nga tion si Haring Hazael sang Siria nagsalakay sang siyudad sang Gat kag nag-agaw sini; dayon nagpamat-od sia sa pagsalakay sang Jerusalem.
18 Si Haring Joas sang Juda nagkuha sang tanan nga mga dulot nga ginhalad sa GINOO sang mga hari nga una sa iya nga amo sanday Josafat, Jehoram kag Ocozias lakip ang iya kaugalingon nga dulot, kag sang tanan nga bulawan nga yara sa talaguan sang Templo kag sang palasyo, kag ginpadala ini tanan kay Haring Hazael subong regalo, dayon ginpahalin ni Haring Hazael ang iya hangaway sa Jerusalem.
19 Ang tanan nga mga ginhimo ni Haring Joas nasulat sa Maragtas sang mga Hari sang Juda.
20-21 Ang mga opisyales ni Haring Joas naghimbon batok sa iya, kag ang duha sa ila, si Josacar nga anak nga lalaki ni Semeat kag si Josabad nga anak nga lalaki ni Somer, nagpatay sa iya sa balay nga ginpatindog sa duta nga gintampok sa nasidlangan nga bahin sang Jerusalem, sa dalan padulhog sa Silla. Si Joas ginlubong sa mga Iulobngan sang hari sa Siyudad ni David, ang daan nga bahin sang Jerusalem, kag ang iya mga anak nga lalaki nga si Amasias nagbulos sa iya subong hari.
No comments:
Post a Comment