1 Si Eliseo nagsabat, “Pamatii ang ginasiling sang Ginoo. Buas sa amo
man sini nga tion ang isa ka gantang sang pinakamaayo nga trigo ukon duha ka
gantang sang sebada sarang mabakal sing isa ka bilog nga pilak sa balaligyaan
sang Samaria."
2 Ang opisyal nga nagaupod sa hari nagsiling kay Eliseo, "Indi
ina matabo—bisan ang Ginoo gid magpaulan sa gilayon!" Nagsabat si Eliseo,
"Makita mo ini nga matabo, pero indi ka sini nga pagkaon."
Ang mga Hangaway sang Siria Nagpalagyo
3 Sa gwa sang puwerta sang siyudad may apat ka tawo nga aruon, nga
nagahambalanay, "Ngaa bala magtener kita diri tubtob magkalamatay kita?
4 Wala sing pulos nga magkadto kita sa siyudad, kay mapatay kita
didto sa gutom; pero kon magpabilin kita diri mapatay man kita gihapon. Gani
makadto kita sa kampamento sang mga Sirianhon. Ang labing malain nga ila himuon
amo ang pagpatay sa aton, pero basi pa man indi nila kita pagpatyon."
5 Gani, sang sirom na, nagkadto sila sa kampamento sang mga
Sirianhon, pero sang pag-abot nila wala sing tawo didto.
6 Ginhimo sang Ginoo nga ang mga Sirianhon makabati sang ginahud
sang madamo nga mga hangaway, nga may mga kabayo kag mga karuwahi, kag ang mga
Sirianhon naghunahona nga ang hari sang Israel nagsuhol sa mga hari sang
Hethanon kag Egiptohanon kag sang ila mga hangaway sa pagsalakay sa ila.
7 Gani ang mga Sirianhon nagpalagyo sadto nga gab-i sa pagluwas
sang ila kabuhi, ginbayaan nila ang ila mga tolda, mga kabayo, kag mga asno,
kag ginbayaan nila ang kampamento nga wala gid sing dala.
8 Sang pag-abot sang apat ka mga tawo sa kampamento, nagsulod sila
sa isa ka tolda, nagkaon kag nag-inom, ginpanguha ang pilak, bulawan kag mga
bayu nga ila makita, kag naglakat sila kag gintago ini. Dayon nagbalik sila,
nagsulod sa isa ka tolda kag amo man ang ila ginhimo.
9 Pero nagsinilingay sila, “Indi maayo ang aton ginhimo! May maayo
kita nga balita kag indi naton ini pagtaguon sa aton kaugalingon. Kon maghulat
kita tubtob mag-aga sa pagsugid sini, pat-od gid nga pagasilutan kita. Malakat
kita subong, kag sugiran ta ang mga opisyales sang hari!”
10 Gani naghalin sila sa kampamento sang mga Sirianhon, nagkadto
sa siyudad kag nagpanawag sa mga gwardya sa puwerta: "Nagkadto kami sa
kampamento sang mga Sirianhon kag wala didto sing tawo; ang mga kabayo kag ang
mga asno nagaid pa, kag ang mga tolda ginbayaan nila nga wala gid sila sing dala."
11 Ang mga gwardya nagsugid sini nga balita, kag ginsugid ini sa
palasyo.
12 Gab-i pa sadto, pero ang hari nagbangon kag nagsiling sa iya
mga opisyales, “Sugiran ko kamo sang plano sang mga Sirianhon! Nahibal-an nila
nga may gutom diri, gani ginbayaan nila ang ila kampamento kag naglakat sa
pagpanago sa latagon. Nagahunahona sila nga bayaan naton ang siyudad kag
magpangita sing kalan-on, kag dayon dakpon nila kita nga buhi kag agawon ang siyudad.”
13 Ang isa sang iya opisyales nagsiling, “Ang mga tawo sa siyudad
magakalamatay gid man, kaangay sadtong nagkalamatay na. Gani ipadala naton ang
pila ka mga tawo agod mahibal-an naton kon ano ang natabo. Sarang nila magamit
ang lima ka kabayo nga nabilin diri."
14 Nagpili sila sing pila nga mga tawo, kag ang hari nagpadala sa
ila sa duha ka karuwahi kag ginmanduan sa pag-usisa kon ano ang natabo sa mga
hangaway nga Sirianhon.
15 Ang mga tawo nakalambot tubtob sa Jordan, kag sa dalanon nakita
nila ang mga bayu kag mga gamit nga
ginpangwigit sang mga Sirianhon samtang nagapalagyo sila. Dayon nagbalik sila kag nagsugid sa hari.
16 Ang mga tawo sang Samaria naggwa kag gin-ati ang kampamento
sang mga Sirianhon. Kag suno sa ginsiling sang Ginoo, ang isa ka gantang nga
pinakamaayo nga trigo ukon duha ka gantang nga sebada nagabili lang sang isa ka
bilog nga pilak.
17 Natabuan nga ang hari sang Israel nagpili sang opisyal nga
mag-upod sa iya sa pagdumala sa pagbantay sang puwerta sa siyudad. Dayon ang
opisyal gintapak sang mga tawo kag napatay sia, suno sa gintagna ni Eliseo sang
ang hari nagkadto sa pagpakigkita sa iya.
18 Si Eliseo nagsiling sa hari nga sa amo man nga tion sa sa madason
nga adlaw ang isa ka gantang sang pinakamaayo nga trigo ukon duha ka gantang
nga sebada magabili sing isa ka bilog nga pilak sa balaligyaan sang Samaria,
19 kag ang opisyales nagsabat, “Indi ina matabo—bisan ang Ginoo
gid magpaulan sa gilayon!" Kag si Eliseo nagsabat, "Makita mo ini nga
matabo, pero indi ka makatilaw sini nga pagkaon."
20 Kag amo gid ini ang natabo sa iya—napatay sia, gintapak sang
mga tawo tubtob napatay sia sa puwerta sang siyudad.
No comments:
Post a Comment