"Ang Pulong sang Dios Nag-abot kay Juan"

Liturhiya sang Pulong

(Domingo, Disyembre 9, 2018) 

Ikaduha nga Domingo sang Adbyento

1. Ang Pagbasa gikan sa Libro ni:

Baruc 5:1-9

O Jerusalem, ubaha ang panapton sang paglalaw kag pagkasubo kag isuklob ang walay katapusan nga pagkahalangdon sang diosnon nga himaya. Magkunop ka sang pagkamatarong sang Dios. Isuklob sa imo ulo ang korona sang himaya sang walay katapusan nga Dios. Igapakita sang Dios ang imo pagkahalangdon sa tanan nga pungsod sang duta. Magasiling sia sa imo sa walay katapusan: "Ang imo kalig-on nagikan sa imo pagkamatarong, kag ang imo pagkahalangdon nagikan sa imo paghangad sa akon.” Magbangon ka, O Jerusalem, magtindog ka sa putokputokan sang bukid, tan-awa kon sa diin ginadala sang Dios nga Balaan ang imo mga anak gikan sa sidlangan kag nakatundan. Nagakalipay sila nga ang Dios nagdumdom sa ila. O Jerusalem, ang imo mga anak gindala palayo sang ila mga kaaway; paghalin nila nagalakat lang sila, pero ang Dios nagpabalik sa ila sa harianon nga pagkahalangdon. Ang Dios nagmando nga pagatapanon ang tagsa ka mataas nga bukid kag ang nagakatay nga mga bakulod; nagmando sia nga tampokan ang mga kabaloran kag tapanon ang mga duta agod nga magpauli nga dili masablagan ang mga tawo sang Israel sa himaya sang Dios. Sa mando sang Dios, magatuhaw ang mga kagulangan sang mahumot nga mga kahoy nga magahatag sing handong sa mga tawo sang Israel. Ang Dios magatuytoy pauli sa mga taga-Israel. Magapauli sila nga naupdan sang daku nga kalipay; natuytoyan sang imo kaluoy kag pagkamatarung, nalibutan sang kapawa sang iya mahimayaon nga pagkayara.

Salmo sa Pagsabat:

Mga Salmo 126:1-2, 2-3, 4-5, 6

(S) Ang Ginoo naghimo sing dalagku nga mga butang sa aton. Daw ano kita sadto ka malipayon.

Sang ginpabalik kita sang Ginoo sa Jerusalem, daw isa lang yadto ka dalamguhanon! Daw ano ang aton pagkinadlaw kag pagkinanta sa kalipay. (S)
Dayon ang iban nga mga pungsod nagsiling nahanungod sa aton, "Ang Ginoo naghimo sing dalagku nga mga butang sa ila! Matuod gid naghimo sia sing dalagku nga mga butang sa aton, daw ano kita sadto ka malipayon! (S)
O Ginoo, pauswaga kami liwat subong nga ang ulan nagadala sang tubig pabalik sa mamala nga mga duta. Himua man yadtong nagtamon nga nagahilibion, magaani nga may kasadya. (S)
Yadtong mga nagahibi samtang naggwa sila nga nagadala sing binhi magabalik nga nagakanta sa kalipay, nga nagadala sang ila patubas. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 1:4-6, 8-11

Sa tagsa ka tion nga nagapangamuyo ako para sa inyo, nagapangamuyo ako nga may kalipay, tungod sang inyo pagbulig sa akon sa pagpalapnag sang Maayong Balita, halin sang nahauna gid nga adlaw tubtob karon. Pat-od gid ako nga ang Dios nga nagsugod sining maayong buhat sa inyo, magapadayon tubtob mahimpit ini sa Adlaw ni Cristo Jesus. Ang Dios nakahibalo nga nagasugid ako sing matuod, sa akon pagsiling nga ang akon tudok nga balatyagon para sa inyo nagagikan gid sa tagipusoon ni Cristo Jesus. Amo ini ang akon pangamuyo para sa inyo nga ang inyo gugma magtubo nga magtubo nga naupdan sang matuod nga kaalam kag himpit nga paghangop, agod nga sarang kamo makapili sang labing maayo. Gani manginputli kamo nga wala sing kasawayan sa Adlaw ni Cristo. Ang inyo kabuhi magapatubas sing maayo nga mga buhat nga mahimo lamang ni Jesu-Cristo, para sa kahimayaan kag kadayawan sang Dios.

Aleluya:

Lucas 3:4, 6

Amana ninyo ang alagyan para sa Ginoo, maghimo kamo sang tadlong nga dalan nga iya pagaagyan! Kay ang tanan nga katawuhan makakita sang kaluwasan gikan sa Ginoo!

Ang Pagbasa sang Santos nga Ebanghelyo suno kay:

San Lucas 3:1-6

Karon ika 15 na nga tuig ang paggahom ni Emperador Tiberio; si Poncio Pilato amo ang gobernador sang Judea, si Herodes ang pangulo sang Galilea, kag si Felipe nga iya utod ang pangulo sang Iturea kag Traconite; si Lisanias ang pangulo sang Abilinia, kag si Anas kag si Caifas amo ang pinakamataas nga mga pari. Sa amo nga panahon ang pulong sang Dios nag-abot kay Juan nga anak ni Zacarias sang didto sia sa desierto. Gani nagpanglakaton sia sa bug-os nga kadutaan sang Jordan nga nagawali, “Magbiya kamo sang inyo mga sala kag magpabautiso, kag ang Dios magapatawad sang inyo mga sala.” Ini suno sa ginsulat ni Isaias nga propeta sa iya libro: “May nagasinggit sa desierto, ‘Amana ninyo ang alagyan para sa Ginoo, maghimo kamo sing tadlong nga dalan nga iya pagaagyan! Ang tagsa ka nalupyakan tampukan, ang mga bukid kag mga bakulod tapanon, ang tiko nga mga dalan tadlungon, ang mga malain nga dalan kaayuhon, ang tanan nga katawuhan makakita sang kaluwasan gikan sa Ginoo!’”

Disyembre 8 | Disyembre 10