"Bulahan ang Bata nga imo Ginadala"

Liturhiya sang Pulong

(Domingo, Disyembre 23, 2018)

Ika-apat nga Domingo sang Adbyento
Misa de Aguinaldo

Ang Pagbasa gikan sa Libro ni:

Miqueas nga Propeta 5:1-4

Mga pumoluyo sang Jerusalem, magdalidali kamo sa pag-aman! Ginakibon kita! Ginasalakay nila ang pangulo sang Israel! Ang GINOO nagasiling, "Betlehem Efrata, ikaw ang isa sang pinakadiotay nga mga banwa sang Juda. Pero gikan sa imo magabangon ako sing isa ka pangulo para sa Israel nga ang iya mga katigulangan kutob pa sang una nga mga panahon.” Gani ang Ginoo magatugyan sang iya mga tawo sa ila mga kaaway tubtob ang babayi nga amo ang magaanak makabata na. Dayon ang iya mga kasimanwa nga yadto sa kabihagan magabalik kag magatingob sa ila kaugalingon nga mga kasimanwa. Kon mag-abot sia, pagagamhan niya ang iya mga tawo sang gahom nga nagagikan sa Ginoo, kag sang pagkahalangdon sang GINOONG Dios mismo. Ang iya mga tawo magapuyo nga wala sing katalagman, kay ang mga tawo sa bug-os nga duta magakilala sang iya pagkagamhanan, kag sia magapaluntad sang paghidait.

Salmo sa Pagsabat:

Mga Salmo 80:2 kag 3, 15-16, 18-19

(S) Pabalika kami, O Dios! Ipakita sa amon ang imo gugma, kag maluwas kami!

Pamatii kami, O Manugbantay sang Israel, sa nagalingkod ikaw sa imo trono sa ibabaw sang mga Kerubin, ipakita sa amon ang imo kusog; kari kag luwasa kami! (S)
Talupangda kami, O Dios nga Makagagahom! Gikan sa langit tamda kami; kari kag luwasa ang imo balagon sang ubas! Kari kag luwasa ining balagon nga ikaw gid ang nagtanom, ining linghod nga balagon nga ginpatubo mo sing mabakod. (S)
Apini kag tipigi ang imo pinili nga mga tawo, ang mga pungsod nga imo ginpabakod. Indi na gid kami magbiya sa imo; buhia kami, kag magadayaw kami sa imo. (S)

2. Ang Pagbasa gikan sa Sulat sa mga:

Hebreo 10:5-10

Tungod sini, sang manugkari si Cristo sa kalibutan, nagsiling sia sa Dios: “Indi ka luyag Sang mga halad kag mga dulot Kundi nag-aman ka Sing isa ka lawas para sa akon. Wala ka malipay Sa mga dulot nga mga sapat Nga ginasunog sing bug-os sa altar, Ukon sang mga halad Sa pagkuha sang mga sala. Gani nagsiling ako, ‘Yari ako, O Dios, Sa pagtuman sang imo kabubot-on, Suno sa nasulat nahanungod sa akon Sa libro sang kasugoan.’ ” Sa nahauna, nagsiling si Cristo, “Wala ka luyag ukon nalipay sang mga halad kag sang mga dulot, ukon sang halad nga mga sapat nga ginasunog sa altar, kag sang mga halad sa pagkuha sang mga sala.” Ginsiling niya ini bisan pa ini tanan nga mga halad ginadulot suno sa Kasugoan. Dayon nagsiling sia, “Yari ako, O Dios, sa pagtuman sang imo kabubot-on.” Gani gindula sang Dios ang tanan nga una nga mga halad, kag gin-ilisan ini sang paghalad ni Cristo sang iya kaugalingon. Tungod kay si Jesu-Cristo nagtuman sang bug-os nga kabubot-on sang Dios, kita tanan natinluan sa sala paagi sa paghalad niya sang iya kaugalingon nga lawas sing makaisa gid lang.

Aleluya:

Lucas 1:38

Alagad ako sang Ginoo. Kabay nga matuman ini sa akon suno sa imo ginsiling.


Ang Pagbasa sang Santos nga Ebanghelyo suno kay:

San Lucas 1:39-45

Sa tapos sadto si Maria nanghimos kag nagdalidali sa pagkadto sa isa ka banwa sa kabakuloran sang Judea. Nagkadto sia sa balay ni Zacarias kag iya gin-abiabi si Elisabet. Sang pagkabati ni Elisabet sang pag-abiabi ni Maria, nagkibo ang bata sa iya tiyan. Napun-an si Elisabet sang Espiritu Santo, kag sa mabaskog nga tingog naghambal, “Bulahan ikaw sa tanan nga mga babayi! Bulahan ang bata nga imo ginadala! Ngaa matabo ining daku nga butang sa akon, nga ang iloy sang akon Ginoo magduaw sa akon? Kay sang pagkabati ko gid sang imo pag-abiabi, ang bata sa akon tiyan nagkibo sa kalipay. Bulahan ikaw nga nagtuo nga matuman sa imo ang ginsiling sang Ginoo.”

Disyembre 22 | Disyembre 24 (Misa de Aguinaldo)